პირველ საუკუნეთა მამისაგან
დასდებელნი აღდგომისანი გ. ხმა ბ.
პირველ საუკუნეთა მამისაგან.
ქრისტემან მაცხოვარმან ჩუენმან.
მთავარ-ანგელოზთა თანა უგალობდეთ.
შენ ჯუარცმული და დაფლული
და აღმოსავლური ა. ხმა იგივე.
შენ ჯუარცმული და დაფლული.
რაჲსათჳს ნელსაცხებელსა ტირილით
დიდება
რაჲსათჳს ნელსაცხებელსა ტირილით.
ეჰა დიდებულისა ამის საიდუმლოსა საკჳრუელებათა მხედველი ვქადაგებ…
ესე ყოველი დასდებელნი იძიე დიდს მწუხრსა ზედა. აწ და, დოგმატიკა. ხმა ბ
ეჰა დიდებულისა ამის საიდუმლოსა საკჳრუელებათა მხედველი ვქადაგებ ღმრთაებასა რამეთუ ემმანუილ განახვნა უკუე ბჭენი ბუნებისანი ვითარცა კაცთ-მოყუარემან, ხოლო ქალწულებისა კლიტენი არა დახსნა ვითარცა ღმერთმან, არამედ ესრეთ გამოვიდა საშოჲთ, ვითარ იგი შევიდა სმენით, ესრეთ განხორციელდა, ვითარცა მუცლად-ღებულ იქმნა, უვნებელად შევიდა, და გამოუთქმელად გამოვიდა, წინასწარ-მეტყველისაებრ მეტყველისა, ბჭე ესე დახშულ იყოს, და არცა ერთი ვინ განვიდეს მიერ, გარნა მხოლო უფალი ღმერთი ისრაელისა, რომელსა აქუს დიდი წყალობაჲ.
ნათელი მხიარული
შესლვად.
ნათელი მხიარული.
რაჟამს ძელისაგან
სტიქარონსა ზედა დასდებელი, აღდგომისა. და ღმრთის-მშობლისა. ხმა ბ. მსგავსი.
რაჟამს ძელისაგან.
ყოველთა ჭირვეულთა სიხარული, და ყოველთა მიმძლავრებულთა ზედამდგომელი…
მოვიხსენო სახელი შენი ყოველსა შორის თესლსა და თესლსა.
ყოველთა ჭირვეულთა სიხარული, და ყოველთა მიმძლავრებულთა ზედამდგომელი, გლახაკთა ცხოვრება, უცხოთა შემწყნარებელი, და ღელუა-გვემულთა ნავთსაყუდელი, სნეულთა ლხინება, და დაწუნებულთა შემწე, და ნათელი ბრმათა შენ ხარ დედუფალო, დედაო ღმრთისა მაღლისაო, მეოხ გვეყავ და გვაცხოვნენ მონანი შენნი.
ყოველი უსჯულოება და ცოდუა, ურიდად და წარმდებებით…
ისმინე ასულო და იხილე, და მოჰყავ ყური შენი.
ყოველი უსჯულოება და ცოდუა, ურიდად და წარმდებებით აღუასრულე უძღებმან, და ყოველისა ტანჯვისა თანამდებ ვიქმენ უბადრუკი, სინანულად მომაქციე უსძლოო, რათა არა დავისაჯო საუკუნესა მას, რამეთუ შენ გესავ მეოხად, და შენ გხადი ხელის აღმპყრობელად, ნუ მარცხუენ მოსავსა შენსა სძალო ღმრთისაო.
არავინ გუაქუს სხუა შესავედრებელი უბიწოო, შემოქმედისა მიმართ…
პირსა შენსა ლიტანიობენ მდიდარნი ერისანი.
არავინ გუაქუს სხუა შესავედრებელი უბიწოო, შემოქმედისა მიმართ და მეუფისა თჳნიერ შენსა ღმრთისა სძალო, ნუ განგუაგდებ ჩუენ მხურუალისაგან შუამდგომელობისა შენისა, და ნუცა გვარცხუენ სურვილით მოლტოლვილთა, საფარველსა ქუეშე შენსა, დედაო ღმრთისა ჩუენისაო, არამედ ისწრაფე და მოგუეც შეწევნაჲ შენი, და აწინდელისაგან გვაცხოვნენ რისხვისა.
მენელსაცხებლეთა დედათა აღიმსთუეს და საფლავსა შენსა მოსწრაფედ…
დიდება, აწ და. ხმა ბ.
მენელსაცხებლეთა დედათა აღიმსთუეს და საფლავსა შენსა მოსწრაფედ მოიწივნეს, რათამცა შემურნეს უხრწნელნი ხორცნი შენნი ქრისტე მაცხოვარ, ხოლო ანგელოზისა მიერ უწყებულნი, სიხარულისა სასწაულთა მოციქულთა უთხრობდეს ვითარმედ აღდგა მკუდრეთით წინამძღუარი ცხოვრებისა ჩუენისა, და მოკლა სიკუდილი მძლავრი და უძღები ჯოჯოხეთი და თანა აღადგინა ადამი, და მოანიჭა სოფელსა ცხოვრება საუკუნო და დიდი წყალობაჲ.
შემდგომად წმიდაო ღმერთოსა, ტროპარი მშუენიერმან იოსებ
შემდგომად წმიდაო ღმერთოსა, ტროპარი მშუენიერმან იოსებ. და განტევება.
პირველ საუკუნეთა მამისაგან შობილსა, ღმრთისა სიტყუასა განხორციელებულსა…
ქრისტე აღდგა, ვითარცა არს ჩვეულება. ესრეთ ფსალმუნი პირველ დასაწყისი აკურთხევს სული ჩემი უფალსა. და კანონი ა. ფსალმუნთა. უფალო ღაღად-ვყავსა ზედა, უქცევთ მუხლთა ი. და ვგალობთ დასდებელთა აღდგომისათა გ. ხმა ბ. მუხლი. გამოიყუანე საპყრობილით სული ჩემი, რათა აუარო სახელსა შენსა.
პირველ საუკუნეთა მამისაგან შობილსა, ღმრთისა სიტყუასა განხორციელებულსა ქალწულისა მარიამისგან, მოვედით თაყუანის-ვსცეთ, რამეთუ ჯუარისა თავსმდებელი საფლავად მიეცა, ვითარცა თჳთ ინება და აღდგა რა მკუდრეთით, მაცხოვნა მე შეცთომილი კაცი.
ქრისტემან მაცხოვარმან ჩუენმან, ჩუენ ძლით ხელით წერილი…
მე მელიან მართალნი ვიდრემდის მომაგო მე.
ქრისტემან მაცხოვარმან ჩუენმან, ჩუენ ძლით ხელით წერილი შესმსჭუალვითა ჯუარსა აღხოცა, და სიმტკიცე სიკუდილისა განაქარუა. თაყუანის-ვსცემთ მისსა მესამისა დღისა აღდგომასა.
მთავარ-ანგელოზთა თანა უგალობდეთ ქრისტეს აღდგომასა, რამეთუ ესე…
ღრმით-ამო ღაღად-ვყავ შენდამი უფალო, უფალო შეისმინე ლოცვისა ჩემისა.
მთავარ-ანგელოზთა თანა უგალობდეთ ქრისტეს აღდგომასა, რამეთუ ესე არს მხსნელი და მაცხოვარი სულთა ჩუენთა, და დიდებითა საშინელითა ხელმწიფებითა და ძლიერებითა, კუალად მომავალ არს განკითხვად სოფლისა რომელი დაჰბადა.
შენ ჯუარცმული და დაფლული მეუფე, ანგელოზმან გქადაგა…
და ანატოლისანი დ. ხმა იგივე, იყვნენ ყურნი შენნი მორჩილ ხმასა ვედრებისა ჩემისასა.
შენ ჯუარცმული და დაფლული მეუფე, ანგელოზმან გქადაგა მაცხოვარ, და ეტყოდა დედათა მათ: მოვედით და იხილეთ სადა დაიდვა უფალი, რამეთუ აღდგა ვითარცა თქუა, ვითარცა ყოვლად-ძლიერი, ამისთჳს თაყუანის-გცემთ შენ, მხოლოსა უკუდავსა ცხოვრების-მომცემელო, ქრისტე, ღმერთო ჩუენო, დიდება შენდა.
ჯუარითა შენითა განაქარუე, წყევა იგი ძელისა მაცხოვარ…
უკუეთუ უსჯულოებათაებრ მიაგებდე უფალო, უფალო ვინმე დაუთმოს, რამეთუ შენ მიერ არს ლხინება.
ჯუარითა შენითა განაქარუე, წყევა იგი ძელისა მაცხოვარ და დაფლვითა შენითა მოაკუდინე სიკუდილისა ძალი, ხოლო აღდგომითა შენითა განანათლე კაცთა ნათესავი, ამისთჳსცა გიღაღადებთ შენ: ქუელის-მოქმედო ქრისტე, ღმერთო, დიდება შენდა.
განგეხუნეს შენ უფალო შიშით ბჭენი სიკუდილისანი, და…
სახელისა შენისათჳს დაგითმე შენ უფალო, დაუთმოს სულმან ჩემმან სიტყუასა შენსა, ესავს სული ჩემი უფალსა.
განგეხუნეს შენ უფალო შიშით ბჭენი სიკუდილისანი, და მეკარეთა ჯოჯოხეთისათა გიხილეს და შეძრწუნდეს, რამეთუ ბჭენი რუალისანი შემუსრენ და მოქლონნი რკინისანი შეფქუენ შენ და აღმომიყვანენ ჩუენ ბნელისაგან და აჩრდილთა სიკუდილისათა და კრულებანი ჩუენნი განხეთქენ.
ცხოვრებისა გალობასა ვგალობდეთ, და პირთაგან ჩუენთა შევწირვიდეთ…
სახმილავითგან განთიადისა მიმწუხრადმდე, სახმილავითგან განთიადისა ესევდინ ისრაელი უფალსა.
ცხოვრებისა გალობასა ვგალობდეთ, და პირთაგან ჩუენთა შევწირვიდეთ, მოვედით ყოველნი სახლსა უფლისასა შეუვრდეთ და ვიტყოდეთ: რომელი ჯუარს-ეცუ ძელსა ზედა, და აღდეგ მკუდრეთით და განისვენებ წიაღთა მამისათა, ლხინება ჰყავ შეცოდებათა ჩუენთათჳს.
მენელსაცხებლენი დედანი მოიწივნეს რა საფლავად, განთიად აქუნდათ…
ესრეთ სხუანი დასდებელნი მენელსაცხებლეთანი. თჳთ-ხმოვანი გ. ხმა ბ. ანატოლისა. რამეთუ უფლისა მიერ არს წყალობა, და მრავალ არს მის მიერ გამოხსნა, და თავადმან იხსნას ისრაელი ყოველთაგან უსჯულოებათა მისთა.
მენელსაცხებლენი დედანი მოიწივნეს რა საფლავად, განთიად აქუნდათ ნელსაცხებელი, რათა შემურონ გუამი იესოსი, და რაჟამს მიიწივნეს საფლავად უფლისა ურთიერთ-არს იტყოდეს: ვინ გარდაგვიგორვოს ჩუენ, ლოდი იგი, კარისა მისგან საფლავისანი, ანუ სადა არიან ბეჭედნი სავლავისანი და დასი პილატესი, გინა განკრძალვით დაცუაჲ მათი, ხოლო ანგელოზი აუწყებდა დედათა მათ და ეტყოდა, რასა ჰგოდებთ და ეძიებთ, რომელმან განაცხოველა კაცთა ნათესავი, არამედ აღდგა ქრისტე, ღმერთი ჩუენი, ვითარცა კაცთ-მოყუარე არს, და ჩუენ მოგუანიჭა უხრწნელება და ცხოვრება დიდითა წყალობითა თჳსითა.
რაჲსათჳს ნელსაცხებელსა ტირილითა განზავებთ ღირსნო დედანო მოწაფენო…
უგალობდით უფალსა ყოველი თესლები, და აქებდით მას ყოველი ერი.
რაჲსათჳს ნელსაცხებელსა ტირილითა განზავებთ ღირსნო დედანო მოწაფენო უფლისანო, ლოდი გარდაგორებულ არს, და საფლავი დაცალიერებულ, იხილეთ ხრწნილება ცხოვრებისა დახსნილი და ბრწყინუალედ მოწამედ ბეჭედნი აღუტეხელად, და მცუელნი მძჳნვარედ დაძინებულნი, და დადგინებულნი ურჩთა მათგან და სახედ მკუდართა დაცემულნი, მოკუდავნი უკუდავ ჰყუნა ღმერთმან და აცხოვნა სიკუდილითა თჳსითა ნათესავი კაცთა, და ჯოჯოხეთი ჰგოდებს მწარედ წარტყუენვისა მისისათჳს, მიჰგვარეთ მსწრაფლ და ახარეთ მოციქულთა, ვითარმედ მოკლა ქრისტემან სიკუდილი, და პირმშო ექმნა მკუდართა, წარუედით და იხილეთ, წინა გიძღვის თქუენ გალილეას.
მენელსაცხებლეთა დედათა აღიმსთუეს და საფლავსა შენსა მოსწრაფედ…
რამეთუ განძლიერდა ჩუენ ზედა წყალობა მისი, და ჭეშმარიტება უფლისა ჰგიეს უკუნისამდე.
მენელსაცხებლეთა დედათა აღიმსთუეს და საფლავსა შენსა მოსწრაფედ მოიწივნეს, რათამცა შემურნეს უხრწნელნი ხორცნი შენნი ქრისტე მაცხოვარ, ხოლო ანგელოზისა მიერ უწყებულნი სიხარულისა სასწაულთა მოციქულთა უთხრობდეს, ვითარმედ აღდგა მკუდრეთით წინამძღუარი ცხოვრებისა ჩუენისა და მოკლა სიკუდილი მძლავრი და უძღები ჯოჯოხეთი და თანა აღადგინა ადამი, და მოანიჭა სოფელსა ცხოვრება საუკუნო და დიდი წყალობაჲ.
მენელსაცხებლენი დედანი საფლავსა შენსა მოიწივნეს და იხილნეს…
დიდება. ხმა ვ. კოსმა მონაზონისა.
მენელსაცხებლენი დედანი საფლავსა შენსა მოიწივნეს და იხილნეს ბეჭედნი აღუტეხელად, და ვითარცა არა პოვნეს ხორცნი შენნი უხრწნელნი, მსწრაფლ მოიქცეს და ხმობდეს ესრეთ ცრემლით: ვინ წარიპარა სასოებაჲ ჩუენი, ვინმე აღიღო მკუდარი შიშუელი და შემურვილი მხოლო სიხარული დედისა, ეჰა ვითარ რომელმანცა იგი მკუდარნი ცხოველ-ყუნა მოკუდა, და რომელმან ჯოჯოხეთი შემჭამელი შემუსრა, ვითარ დაეფლა სამარესა, არამედ აღდეგ მაცხოვარ თჳთ ხელმწიფებით ვითარცა სთქუა და აცხოვნე სოფელი მიმძლავრებული მტერისაგან, და იხსენ მორწმუნენი ყოველისა შემძლებელო უფალო დიდება შენდა.
წარხდა სახე სჯულთა მათ პირველთა, და გამოჩნდა…
აწ და. ღმრთის-მშობლისა. ხმა ბ.
წარხდა სახე სჯულთა მათ პირველთა, და გამოჩნდა მადლი დღეს, და ვითარცა მაყუალი არა შეწუა ცეცხლმან აღგზებულმან, ეგრეთუე ქალწული ეგო ქალწულად, უვნებელად შემდგომად შობისა, სვეტისა მის წილ ცეცხლისა მზე სიმართლისა, მოსეს წილ ქრისტე გამოჩნდა, მაცხოვრად სულთა ჩუენთათჳს.
ნათელი მხიარული
შესლვად.
ნათელი მხიარული.
მენელსაცხებლენო დედანო, რად მოისწრაფით საფლავად უფლისა, ანუ…
ლიტანიასა ზედა, დასდებელნი თჳთ-ხმოვანი. ხმა ა.
მენელსაცხებლენო დედანო, რად მოისწრაფით საფლავად უფლისა, ანუ რად ეძიებთ ცხოველსა მას მკუდართა თანა, აღდგა უფალი ცხადად, ანგელოზი ეტყოდა მათ.
შიშით მოვიდეს საფლავსა შენსა ზედა, ხორცთა შენთა შემურუად სუნნელებითა ქრისტე დამბადებელო ღირსი დედანი, და ვითარ არა პოვნეს განკჳრვებული იყუნეს და გეძიებდეს შენ მხსნელო, რამეთუ აღდგომისა შენისა უმეცარ იყუნეს, არამედ ანგელოზმან ახარა აღდგომა, ვითარმედ აღდგა ქრისტე, და მოგუცა დიდი წყალობაჲ.
მოვიდენ საფლავად მაგდალინელი მარიამ, და სხუანი იგი დედანი ძიებად მაცხოვრისა, და პოვეს ანგელოზი ვითარცა ელვა ლოდსა ზედა მჯდომარე საფლავისასა, რომელმან რქუა მათ ღმრთივ-ბრწყინუალედ: რად ეძიებთ ცხოველსა მას მკუდართა თანა, რამეთუ აღდგა იგი ვითარცა სთქუა წინასწარ, წარუედით და ახარეთ მოციქულთა მისთა, რათა წარვიდენ გალილიას და იხილონ, და ჴმა-ჰყონ, რომელი აღდეგ მკუდრეთით უფალო დიდება შენდა.
მოითხოვა იოსებ ხორცი უფლისა, და თჳსსა მას…
დიდება. ხმა ვ.
მოითხოვა იოსებ ხორცი უფლისა, და თჳსსა მას ახალსა საფლავსა შინა დადვა შეძრწუნებულმან, და ზარ-განხდილმან, რამეთუ ჯერ იყო რათა ვითარცა სასძლოთ გამოვიდეს საფლავით, რომელმან შემუსრა, სიკუდილისა მწარე მძლავრებაჲ, და ბჭენი იგი სამოთხისანი განუხვნა კაცთა. ქრისტე ყოვლად-ძლიერო დიდება შენდა.
შემოქმედი და მხსნელი ჩემი ქრისტე, უფალი მე…
აწ და. ღმრთის-მშობლისა ხმა იგივე.
შემოქმედი და მხსნელი ჩემი ქრისტე, უფალი მე შემიმოსა, და საშოჲსა შენისაგან გამოვიდა ყოვლად-უბიწოო, და პირველისა მის წყევისაგან ადამი განათავისუფლა, ამისთჳს უხრწნელო ვითარცა დედასა ღმრთისასა და ქალწულსა ჭეშმარიტად დაუცხრომელად გიგალობთ გიხაროდენსა მსგავსად ანგელოზისა, გიხაროდენ დედუფალო სასოო და შესავედრებელო, და მაცხოვარო სულთა ჩუენთაო.
აღდგომამან შენმან ქრისტე მაცხოვარ, ყოველი სოფელი განანათლა…
სტიქარონსა ზედა, დასდებელი აღდგომისა, ხმა ბ.
აღდგომამან შენმან ქრისტე მაცხოვარ, ყოველი სოფელი განანათლა, და აღმოუწოდა თჳსსა დაბადებულსა ყოვლად-ძლიერო უფალო, დიდება შენდა.
პასექი ბრწყინუალედ შუენიერი აღმოგვიბრწყინდა ჩუენ დღეს, პასქა…
დასდებელნი პასექისანი აღდეგინ ღმერთი, და განიბნინედ ყოველნი მტერნი მისნი და ივლტოდენ მოძულენი მისნი პირისაგან მისისა.
პასექი ბრწყინუალედ შუენიერი აღმოგვიბრწყინდა ჩუენ დღეს, პასქა ახალი წმიდა, პასქა სამღუდელო, პასქა ყოვლად-ქებული, პასქა საიდუმლო, პასქა საუფლო, პასქა დიდი და პასქა უბიწო, პასქა რომელმან სამოთხისა ბჭენი დახშულნი განგვიხვნა ჩუენ, პასქა ყოველთა წმიდა მყოფელი.
ხილვით მოვედით დედანო მახარებელნო, და სიონს არქუთ…
ვითარცა მოაკლდენ, კუამლსა მოაკლდენ, და ვითარცა ცვილი რა დადნის წინაშე ცეცხლსა.
ხილვით მოვედით დედანო მახარებელნო, და სიონს არქუთ: მიიღე ხარება სიხარულისა ჩუენგან აღდგომისათჳს, იშუებდ და განსცხრებოდე იერუსალიმ, და იხილე ქრისტე მეუფე შენი, ვითარცა სიძე სასძლოთ, გამომავალი საფლავით, და ღმრთივ-ბრწყინუალედ მივეგებოდეთ.
მენელსაცხებლენი დედანი ცისკარს მოვიდეს საფლავსა ზედა ცხოვრების-მომცემელისათა…
ესრეთ წარწყმდენ ცოდვილნი პირისაგან ღმრთისა, და მართალნი იხარებდენ.
მენელსაცხებლენი დედანი ცისკარს მოვიდეს საფლავსა ზედა ცხოვრების-მომცემელისათა, და ჰპოვეს ანგელოზი ლოდსა ზედა მჯდომარე, და მან ესრეთ ჰრქუა მათ: რასა ეძიებთ ცხოველსა მას მკუდართა თანა, ანუ რასა სტირთ უხრწნელსა გუამსა მისსა, წარუედით არქუთ მოწაფეთა მისთა, აღდგომა მისი დიდებული.
პასექი საწადელი წმიდა და პასექი უფლისა ყოვლად-ქებული…
ესე არს დღე, რომელ ჰქმნა უფალმან, ვიხარებდეთ და ვიშუებდეთ ამას შინა.
პასექი საწადელი წმიდა და პასექი უფლისა ყოვლად-ქებული, ესერა აღმოგვიბრწყინდა საღმრთო პასექი, ამბორს უყოთ ძმანო ურთიერთ-არს სიწმიდით და სიხარულით, რამეთუ საფლავით დღეს გამოვიდა ქრისტე, ვითარცა სიძე სასძლოთ, და დედანი მხიარულ-ჰყუნა, და ჰრქუა მათ: ახარეთ ჩემთა მოციქულთა, ვითარმედ აღდგა უფალი.
შენ ქრისტე რომელმან შეიმოსე ნათელი ვითარცა სამოსელი…
დიდება. ხმა ე.
შენ ქრისტე რომელმან შეიმოსე ნათელი ვითარცა სამოსელი, გარდამოგხსნა დღეს იოსებ ძელისაგან ნიკოდიმოსის თანა, და გიხილა რა შენ მკუდრად შიშუელი უსულო, დაუფლუელად, გულითა ლმობიერითა მოწლედ გოდებდა, და ესრეთ იტყოდა: ჵ ჩემდა იესო ტკბილო ყოველთა მეუფეო, რომელი ეგე მზის თუალმან გიხილა რა ჯუარსა ზედა ვნებულად წყუდიადი შეიმოსა, ხოლო ქუეყანა შიშით ქოთებდა და განიპო კრეტსაბმელი ტაძრისა ორად, და აჰა ესერა აწ გხედავ შენ ჩემთჳს ნებსით მომკუდარსა და ვითარ დაგფლა შენ ღმერთი ჩემი, ანუ ვითარ შეგმურო შენ, და ანუ რომელითა ხელითა შევეხო ყოვლად-უხრწნელთა ხორცთა შენთა, ანუ ვითარ სიდონითა წარგრაგნო შენ, და ანუ ვითარ უგალობდე განსვლასა შენსა მოწყალე. ვადიდებ ვნებათა შენთა, დიდების ვმეტყველებ დაფლუასა შენსა, თაყუანის-ვსცემ აღდგომასა შენსა, უფალო დიდება შენდა.
აღდგომისა დღე არს, განვბრწყინდებოდეთ დღესასწაულსა ამას და…
აწ და. ხმა იგივე.
აღდგომისა დღე არს, განვბრწყინდებოდეთ დღესასწაულსა ამას და ურთიერთ-არს შევიტკბოთ, და ვრქუათ ძმათა ჩუენთა: მოძულეთაცა ჩუენთა შეუნდოთ ყოველი აღდგომასა, და ესრეთ ღმრთივ-ბრწყინუალედ ღაღად-ვჰყოთ.
ქრისტე აღდგა მკუდრეთით, და სიკუდილითა სიკუდილი დათრგუნა, და მყოფთა საფლავისათა ცხოვრება მიჰმადლა.
შენ ქრისტე რომელმან შეიმოსე ნათელი
-ა. გზის. აწ განუტევე. კურთხევასა ზედა პურისასა. ტროპარი ღმრთის-მშობელო ქალწულო. გ-გზის. და ჩვეულებისაებრ კითხვაჲ მათ დღეთასა. უკუეთუ არა იყოს ღამისთევაჲ იგალობების უფალო ღაღად-ვყავსა ზედა დასდებელი აღდგომისი დ. და მენელსაცხებლეთა ლიტანიის მუხლებით, მუხლი ვ. შესლვად წარდგომა. სტიქარონსა ზედა დასდებელნი პასექისანი. დიდება, აწ და. ხმა ე.
შენ ქრისტე რომელმან შეიმოსე ნათელი.
შუაღამისად იგალობების კანონი სამებისა ჩვეულებისაებრ
შუაღამისად იგალობების კანონი სამებისა ჩვეულებისაებრ. შუენის უწყება რამეთუ კჳრიაკითგან წმიდისა თომასა არა იქმნების პურთა განტეხა შემდგომად პურის კურთხევისა სიმოკლისათჳს ღამისა.
რაჟამს შთახედ საფლავად, ცხოვრება ეგე უკუდავი, მაშინ…
ღმერთი უფალსა ზედა, ტროპარი. ხმა ბ.
რაჟამს შთახედ საფლავად, ცხოვრება ეგე უკუდავი, მაშინ ჯოჯოხეთი შეაძრწუნე ელვითა მით ღმრთაებისა შენისათა. ხოლო რაჟამს მკუდარნი ქუესკნელით აღმოიყუანენ, მაშინ ყოველნი ძალნი ცათანი ღაღადებდნენ ცხოვრების-მომცემელო ქრისტე, ღმერთო ჩუენო, დიდება შენდა.
შუენიერმან იოსებ ძელისაგან გარდამოხსნა უხრწნელნი იგი ხორცნი…
ბ-გზის დიდება.
შუენიერმან იოსებ ძელისაგან გარდამოხსნა უხრწნელნი იგი ხორცნი შენნი, და არმენაკითა წმიდითა წარგრაგნა, სუნნელებითა შემურვილი ახალსა საფლავსა დაგდუა, გარნა მესამესა დღესა აღდეგ უფალო, მომცემელი სოფლისად დიდსა წყალობასა.
მენელსაცხებლეთა დედათა საფლავსა ზედა ანგელოზი უღაღადებდა, ნელსაცხებელი…
აწ და.
მენელსაცხებლეთა დედათა საფლავსა ზედა ანგელოზი უღაღადებდა, ნელსაცხებელი მოკუდავთათჳს სახმარ არს, ხოლო ქრისტე ხრწნილებისაგან უცხო იქმნა, არამედ ღაღადებდით აღდგა უფალი, და მოანიჭა სოფელსა დიდი წყალობაჲ.
ლოდი საფლავისა დაბეჭდუად არა დააყენე, და კლდე…
შემდგომად ა. ფსალმუნებისა წარდგომა, ხმა ბ.
ლოდი საფლავისა დაბეჭდუად არა დააყენე, და კლდე სარწმუნოებისა, აღდგომითა ყოველთა მოგუმადლე, უფალო დიდება შენდა.
წიაღნი მამულნი ცათა შინა არა დააცალიერენ და…
აღდეგ უფალო, ღმერთო ჩემო, ამაღლდინ ხელი შენი და ნუ დაივიწყებ გლახაკთა შენთა სდ̅.
წიაღნი მამულნი ცათა შინა არა დააცალიერენ და დაფლუა და აღდგომა ყოველთათჳს თავს-იდევ, უფალო დიდება შენდა.
ყოველივე საიდუმლო შენი ღმრთის-მშობელო, ზესთა გონებისა არს…
დიდება, აწ და. ღმრთის-მშობლისა.
ყოველივე საიდუმლო შენი ღმრთის-მშობელო, ზესთა გონებისა არს, და ზესთა დიდებისა, სიწმიდით დაბეჭდული, და ქალწულებით დაცული, დედად იცნობე უტყუელად, რამეთუ ღმერთი ჰშევ უცუალებელად, მას ევედრე ცხოვრებად სულთა ჩუენთათჳს.
მენელსაცხებლენი განთიად მოვიდეს, და იხილეს საფლავი ცალიერი…
შემდგომად ბ. ფსალმუნებისა. წარდგომა. ხმა ბ.
მენელსაცხებლენი განთიად მოვიდეს, და იხილეს საფლავი ცალიერი, და ეტყოდეს მოციქულთა: ხრწნილება დახსნა მპყრობელმან ყოველთამან, და მყოფნი ჯოჯოხეთისანი აღმოიყუანნა. ჰქადაგეთ კადნიერად, რამეთუ აღდგა ქრისტე, ღმერთი და მოანიჭა სოფელსა დიდი წყალობაჲ.
ნელსაცხებელი მორააქუნდათ დედათა, და ენებათ რათა დაგასხან…
აღგიარო შენ, უფალო, ყოველითა გულითა ჩემითა და მიუთხრა მე ყოველი საკჳრუელებაჲ შენი.
ნელსაცხებელი მორააქუნდათ დედათა, და ენებათ რათა დაგასხან შენ და შეგმურონ, ხოლო შიშისათჳს ჰურიათასა შეპყრობილნი ჰხედვიდენ მხედართა, რომელნი კრძალულად სცვიდეს საფლავსა შენსა, არამედ უძლური ბუნება დედათა სიმხნედ გამოაჩინეს, რამეთუ აქუნდათ განზრახუა კეთილი შენდა მომართ, და სიხარულით გიღაღადებდეს: აღდეგ ღმერთო, შეგვეწიენ ჩუენ, და გვიხსენ ჩუენ სახელისა შენისათჳს.
უფროსად კურთხეულ ხარ შენ ღმრთის-მშობელო ქალწულო, და…
დიდება, აწ და. ღმრთის-მშობლისა.
უფროსად კურთხეულ ხარ შენ ღმრთის-მშობელო ქალწულო, და გაქებთ შენ, რამეთუ ჯუარითა ძისა შენისათა დაიხსნა ჯოჯოხეთი, მოიკლა სიკუდილითა სიკუდილი, მკუდარნი აღდგეს და ცხოვრებასა ღირს იქმნეს, და სამოთხე მოიგეს პირველი იგი საშუებელი, ამისთჳსცა მადლობით უღაღადებთ, ვითარცა მპყრობელსა ქრისტესა ღმერთსა ჩუენსა, მხოლოსა მრავალ-მოწყალესა.
გუნდნი ანგელოზთანი
და კითხვა წესისაებრ მისისა სახარების თარგმანისა. შემდგომად ნეტარარიანისა, ტროპარნი.
გუნდნი ანგელოზთანი.
შემდგომად ვნებისა წარვიდეს დედანი საფლავად შემურუად ხორცთა…
კუერექსი და იპაკო, ხმა ბ.
შემდგომად ვნებისა წარვიდეს დედანი საფლავად შემურუად ხორცთა შენთა ქრისტე, ღმერთო, და საფლავსა შინა იხილნეს ანგელოზნი და განკრთეს, რამეთუ ხმა ესმოდა მათ მიერ, ვითარმედ აღდგა უფალი, და მოანიჭა სოფელსა დიდი წყალობაჲ.
ზეცად მიმართ თუალთა გულისა ჩემისათა აღვიხილავ მაცხოვარ…
და საკითხავი. და მეყუსეულად აღსავალი. ხმა ბ. ანტიფონი ა.
ზეცად მიმართ თუალთა გულისა ჩემისათა აღვიხილავ მაცხოვარ შენდა მომართ, მაცხოვნე მე შენითა მით გამობრწყინვებითა.
შეგვიწყალენ ჩუენ, რომელნი ესე შეგცოდებთ ფრიად ყოველსა ჟამსა, და მოგუეც პირველ სიკუდილისა, ჵ, ღმერთო ჩუენო, ჟამი სინანულისა.
სული-წმიდა მეუფე არს, და მფლობელ განცხოველებად არსთა…
დიდება.
სული-წმიდა მეუფე არს, და მფლობელ განცხოველებად არსთა, და წმიდა ყოფად, რამეთუ ღმერთი-არს, და თანა-არს მამისა და სიტყუისა.
არა თუმცა უფალი იყო ჩუენ თანა, ვინმცა…
აწ და, იგივე. ანტიფონი ბ.
არა თუმცა უფალი იყო ჩუენ თანა, ვინმცა უძლო განრომად საბრთხეთა და ღონეთაგან, მტერისა მის კაცის-მკვლელისათა.
შუათა მათთა ნუ მიმცემ ჩუენ მხსნელო მონათა შენთა, რამეთუ მსგავსად ლომთა იღრჭენენ კბილთა მათთა ჩუენ ზედა მტერნი ჩუენნი.
სულისა-წმიდისა დიდება და პატივი, რამეთუ დაბადებულთა ყოველთა…
დიდება.
სულისა-წმიდისა დიდება და პატივი, რამეთუ დაბადებულთა ყოველთა ძალითურთ ღმრთაებრ იპყრობს და მადლობს მათ, მამისა თანა ძითურთ.
მსგავს არიან მთისა მის წმიდისა, რომელნი ესვენ…
აწ და, იგივე. ანტიფონი გ.
მსგავს არიან მთისა მის წმიდისა, რომელნი ესვენ უფალსა, რომელნი არა შეირყევიან ბრძოლათაგან მძლავრთა ბელიარისთა.
უსჯულოებად ხელთა ნუ განიმარტებენ ღმრთის-მოყუარენი, რამეთუ არა დაუტეობს უფალი კუერთხსა ცოდვილთასა, ნაწილსა ზედა მართალთასა.
სულისაგან წმიდისა აღმოდის ყოველი სიბრძნე, ვინა იგი…
დიდება.
სულისაგან წმიდისა აღმოდის ყოველი სიბრძნე, ვინა იგი მიეცემის მადლი, მოციქულთა და მარტჳლთა ღუაწლითა შეამკობს, და წინასწარ-მეტყველთა ხილვითა.
განიღვიძე უფალო ღმერთო ჩემო, ბრძანებითა მით, რომელ…
აწ და, იგივე. წარდგომა ხმა ბ.
განიღვიძე უფალო ღმერთო ჩემო, ბრძანებითა მით, რომელ ამცენ და კრებული ერთა გარე-მოგადგეს შენ.
უფალო ღმერთო ჩემო შენ გესავ, მაცხოვნე მე
მუხლი
უფალო ღმერთო ჩემო შენ გესავ, მაცხოვნე მე.
აღდგომა ქრისტესი ვიხილეთ, თაყუანის-ვსცემთ წმიდასა ამას უფალსა…
სახარება გ. საცისკრო, აღდგომისა, მარკოზისა დასაწყისი ოა. ესრეთ.
აღდგომა ქრისტესი ვიხილეთ, თაყუანის-ვსცემთ წმიდასა ამას უფალსა დიდებისასა იესოს, მხოლოსა უცოდველსა, და ესრეთ ხმა-ვჰყოთ: ჯუარსა შენსა თაყუანის-ვსცემთ, ქრისტე მეუფეო, და წმიდასა აღდგომასა შენსა უგალობთ და ვადიდებთ, რამეთუ შენ ხარ ღმერთი ჩუენი და ჩუენ შენსა გარეშე სხუა ღმერთი არა ვიცით; მოვედით ყოველნი მორწმუნენი, თაყუანის-ვსცეთ ქრისტეს ღმრთისა ჩუენისა აღდგომასა, რამეთუ აჰა ესერა მოიწია ჯუარისა მიერ და აღდგომისა სიხარული ყოველისა სოფლისა. მარადის ვაკურთხევდეთ ქრისტესა და უგალობდეთ აღდგომასა მისსა, რამეთუ ჯუარცმა თავს-იდვა და სიკუდილითა სიკუდილი განაქარვა.
აღდგომისა დღე არს
გ-გზის. ფსალმუნი ნ. და შემდგომი. კანონი პასექისა ძლისპირითა, და თჳსის ღმრთის-მშობლის ტროპარებითა. მუხლი ვ. ესრეთ მდგომარისა კჳრიაკისა, კატავასია.
აღდგომისა დღე არს.
აღდგომისა დღე არს, განვბრწყინდებოდეთ აწ ერნო, პასქა…
კანონი პასექისა. გალობა ა. ხმა ა. ძლისპირი.
აღდგომისა დღე არს, განვბრწყინდებოდეთ აწ ერნო, პასქა უფლისა, პასქა რომელითა ქრისტემან, ღმერთმან, სიკუდილისაგან მიხსნა, და ქუეყანით ცად აღმიყვანა სუფევად, ძლევისა მგალობელნი დღეს.
განვიწმიდნეთ საცნობელნი და ესრეთ ვიხილოთ ნათელი უხილავი აღდგომისა ქრისტესისა, განმაბრწყინვებელი და გიხაროდენი სიტყუაჲ ცხადად ვისმინოთ, ძლევისა მგალობეთა დღეს.
ცანი ყოვლად-ღირსებით მხიარულ იქმნენინ დღეს, და ქუეყანა იშუებდინ, დღესასწაულობდ ყოველი სოფელი, ხილული და უხილავი, ცხადად ვისმინოთ ესრეთ, ძლევისა მგალობელთა დღეს.
სიკუდილისა განსაზღვრება უჩინო ჰყავ, ცხოვრებისა შობითა, საუკუნოსა…
კანონი ღმრთის-მშობლისა, რომელისა კიდურ წერილობა. პირველთა ტროპართა ზედა თეოფანე. ხმა იგივე.
სიკუდილისა განსაზღვრება უჩინო ჰყავ, ცხოვრებისა შობითა, საუკუნოსა ქრისტეს საფლავით აღმობრყინვებულისათა დღეს ქალწულო უბიწოო, რომელმან ნათელ-ჰყო სოფელი
აღდგომილისა მხილუელი ძისა და ღმრთისა შენისა იხარებდ მოციქულთა თანა ღმრთივ-მიმადლებულო და გიხაროდენი ვითარ სიხარულისა მიზეზმან შეიწყნარე, ღმრთისა დედაო უბიწოო.
გალობისა მოსეანისა შემწყნარებელმა
სხუა კანონი მენელსაცხებლეთა. რომელთა აღვიღებთ მუხლთა 8. ხმა ბ. ქმნილი უფლისა ანდრეა კრიტელისა. გალობა ა. ძლისპირი.
გალობისა მოსეანისა შემწყნარებელმა.
განაპო სიღრმე ზღვისა ბრძანებით, და ხმელად განიყვანა რჩეულნი, ხოლო მას შინა დაანთქნა მტერნი თჳსნი ძლიერმან ძალითა ბრძოლასა უფალმან, რამეთუ დიდებულ არს.
ჯუარს-ეცვი ხორცითა კაცობრივ მხსნელო და უვნებელად ეგე ღმრთაებითა, ხოლო სისხლი და წყალი მოგუმადლე გვერდით შენით, ძლიერმან ძალითა ბრძოლასა უფალმან, რამეთუ დიდებულ არს.
ჯუარცმასა შენსა პატივს-ვცემთ ქრისტე, და დაფლუასა შენსა თაყუანის-ვსცემთ, და შიშით ვადიდებთ აღდგომასა შენსა გამოუკულეველსა სახიერ, უფალო რამეთუ დიდებულ ხარ.
ნაღვლისა გემო იხილე ნებსით ეკლესიათა სიტკბოებამან, ხოლო გვასუ ჩუენ უხრწნელებაჲ გვერდით შენით, სისხლი და წყალი მხსნელო, რომელითა განმწმიდენ, რამეთუ დიდებულ ხარ.
შეირაცხე მკუდართა თანა მხსნელო, ხოლო მკუდარნი ღმრთაებრ აღადგინენ, რომელსა ხრწნილება სიკუდილისა არა გეუფლა, გემო სიკუდილისა იხილე უხრწნელებისა მომატყუებელი.
იხარებდ სიონ, და განსცხრებოდე იერუსალიმ, რამეთუ აღდგა ქრისტე საფლავით, და აღადგინნა მკუდარნი, რომელნი ბრწყინუალედ უგალობდეს: შენ ხარ ღმერთი ჩუენი დიდებული.
არდაგითა წარგრაგნა იოსებ და საფლავსა ახალსა დაგდუა ქრისტე, ხოლო შენ აღადგინენ საუკუნითგან პირველ-მომწყდარნი და იტყოდეს: შენ ხარ ღმერთი ჩუენი დიდებული.
მსთუად მიიწივნეს მენელსაცხებლენი და იხილეს მხსნელი, მოწაფეთა ახარებდეს, ვითარმედ აღდგა უფალი, მოვედით ჩუენ თანა სიხარულით, აღდგომასა მისსა ვადიდებთ.
სამებაო ყოვლად-წმიდაო, ერთ-ღმრთაებაო დაუსაბამოო მამაო, ძეო, და…
დიდება. სამების
სამებაო ყოვლად-წმიდაო, ერთ-ღმრთაებაო დაუსაბამოო მამაო, ძეო, და სულო-წმიდაო, აცხოვნე სოფელი, რამეთუ შენ ხარ ღმერთი ჩუენი დიდებული.
პირველი იგი წყევა განქარდა საშოსა შინა შენსა…
აწ და. ღმრთის-მშობლისა
პირველი იგი წყევა განქარდა საშოსა შინა შენსა ქალწულო, და აღმოგვიცენდა კურთხევა საუკუნო, რამეთუ ჩვილი ჰშევ უბიწოო, ქრისტე მხსნელი ღმერთი, და კაცი სრული.
აღდგომისა დღე არს, განვბრწყინდებოდეთ აწ ერნო, პასქა…
კატავასია
აღდგომისა დღე არს, განვბრწყინდებოდეთ აწ ერნო, პასქა უფლისა, პასქა რომელითა ქრისტემან, ღმერთმან, სიკუდილისაგან მიხსნა, და ქუეყანით ცად აღმიყვანა სუფევად, ძლევისა მგალობელნი დღეს.
მოვედით და ვსუათ სასმელი ახალი, არა კლდით…
გალობა გ. ძლისპირი.
მოვედით და ვსუათ სასმელი ახალი, არა კლდით მყარით ნიშოვან ქმნილი, არამედ უხრწნელებისა წყარო ქმნილი ქრისტეს საფლავით, რომელითა განვსძლიერდით.
აწ ყოველითურთ აღივსო ნათლითა ცა და ქუეყანა, ქუესკნელი, და ყოველივე ქმნილი დღესასწაულობს აღდგომასა ქრისტესსა, რომელითა განვსძლიერდით.
გუშინ შენთანა ჯუარს-ვეცმოდი ქრისტე, და თანა აღვდგები დღეს აღდგომასა შენსა, გუშინ შენთანა დავიფლვოდი, შენ მადიდე მაცხოვარ, სასუფეველსა შენსა.
ცხოვრებისა მიმართ დაუსრულებელისა კუალად ვეგები, სახიერებითა, შენგან…
კანონი ღმრთის-მშობლისა
ცხოვრებისა მიმართ დაუსრულებელისა კუალად ვეგები, სახიერებითა, შენგან შობილისათა სძალო, და ნათლითა კიდეთა ნათელ-მყოფელისათა.
ღმერთი რომელი ჰშევ ხორცითა, მკუდრეთით ვითარცა სთქუა აღდგომილისა მხილუელი უბიწოო იხარებდ, და ვითარცა ღმერთსა ამას, უხრწნელო ადიდებდი.
რომელმან მოსცა ძლევაჲ მეფესა ჩუენსა უფალმან და…
სხუა. ძლისპირი.
რომელმან მოსცა ძლევაჲ მეფესა ჩუენსა უფალმან და აღამაღლა რქა ცხებულისა, და ადიდა ეკლესია თჳსი, მართლ-მადიდებლობასა შინა, ამას უღაღადებდეთ დღეს: არავინ არს წმიდა ვითარ ღმერთი ჩუენი.
ხელნი რა ჯუარსა შემსჭუალენ იესო, და მოუწოდე წარმართთა ერსა, თაყუანის-ცემად შენდა ჭეშმარიტისა ღმრთისა, და საცთურისაგან კერპთასა იხსენ, და გადიდებდენ, არავინ არს წმიდა ვითარ ღმერთი ჩუენი.
კრებული ჰურიათა ღაღადებდა პილატეს მიმართ, მომეც ჩუენ ძუირის მოქმედი ბარაბა ავაზაკი, ხოლო ეგე, აღიღე და ჯუარს-აცუ ქრისტე, მხოლო უცოდველი, ეჰა სიცოფე უსჯულოთა მათ.
ჯუარცმასა შენსა მაცხოვარ, დაბნელდა ნათელი, და ქუეყანა შეიძრა საფუძვლითურთ, საფლავთაგან მკუდარნი აღდგეს, ძლიერებითა შენითა და გიგალობობდეს: არა ვინ არს წმიდა, ვითარ ღმერთი, ჩუენი.
წარდგომილ იყო ჯუარისა თანა უბიწო დედა შენი, იესო, და გოდებით ესრეთ ღაღადებდა: ვინა მიხვალ ძეო ჩემო, ანუ სადამე წარხვალ, კრავო რომელისათჳს დაიკალ.
თაყვანის-ვსცემ ჯუარსა, ვაქებ დაფლუასა, და უგალობ სამსჭუალთა შენთა და გჳრგჳნსა, და ლახვარსა, და ყოველთავე ვნებათა შენთა, და პატივს-ვცემთ აღდგომასა შენსა ცხოველსა, და ვიტყვი: არავინ არს წმიდა, ვითარ ღმერთი, ჩუენი.
მკუდრეთით რა აღდეგ იესო, წარმოსტყუენე მტერი, ხოლო ადამ და ევა განიხსნეს საკვრელთაგან, და ხრწნილებასა განერნეს შვილთა თჳსთა თანა, და ესრეთ სიხარულით ღაღადებდეს: არავინ არს წმიდა, ვითარ ღმერთი, ჩუენი.
ოდეს აღდეგ მკუდრეთით ქრისტე, მაშინ წარმოსტყუენე ბჭენი რუალისა და ჯოჯოხეთისანი, და სიკუდილისა ძლიერებაჲ დაამხუ ძლიერებითა შენითა, და გიღაღადებთ: არავინ არს წმიდა, ვითარ ღმერთი, ჩუენი.
ღმრთის-შემწყნარებელო იოსებ, მოვედ და დასდეგ ჩუენ თანა და ხმობდ: ვითარმედ აღდგა იესო მხსნელი და აღადგინა წყალობით ადამი შვილითურთ და ხმატკბილად ვგალობდეთ: არავინ არს წმიდა, ვითარ ღმერთი, ჩუენი.
იხარებდით ჩუენ თანა ათორმეტნო მოციქულნო, მენელსაცხებლეთა თანა და იოსებ, ნიკოდიმოსისა ღირსთა, და სხუათა მათ მოწაფეთა მწყობრსა, რამეთუ აღდგა უფალი და აღავსო ცაჲ და ქუეყანა სიხარულითა.
მამისა თანა ძესა, და სულსა-წმიდასა თაყუანის-ვსცემ და…
დიდება. სამების
მამისა თანა ძესა, და სულსა-წმიდასა თაყუანის-ვსცემ და ერთ-ბუნებად და ერთ-ღმრთაებად აღვიარებ და უგალობ პირებითა განვყოფ, ხოლო არსებითა შევაერთებ სამგუამოვანსა წმიდასა სამებასა.
ნეტარ ხარ შენ უბიწოო მარიამ შორის დედათა…
აწ და. ღმრთის-მშობლისა.
ნეტარ ხარ შენ უბიწოო მარიამ შორის დედათა, რომელი აღმოხედ მორჩად ძირთაგან დავითისთა და გამოიღე ყუავილად ქრისტე შემოქმედი, რომელსა უღაღადებთ: არავინ არს წმიდა, ვითარ ღმერთი, ჩუენი.
მოვედით და ვსუათ სასმელი ახალი, არა კლდით…
კატავასია
მოვედით და ვსუათ სასმელი ახალი, არა კლდით მყარით ნიშოვან ქმნილი, არამედ უხრწნელებისა წყარო ქმნილი ქრისტეს საფლავით, რომელითა განვსძლიერდით.
დაღაცათუ ნებსით თჳსით საფლავად შთახედ უკუდავი, არამედ…
კონდაკი.
დაღაცათუ ნებსით თჳსით საფლავად შთახედ უკუდავი, არამედ ჯოჯოხეთისა იგი ძალი დაარღვიე, და აღდეგ ვითარცა მძლე, ქრისტე, ღმერთო, ხოლო მენელსაცხებლეთა დედათა ხარებაჲ მიჰმადლე და მოციქულთა მშჳდობაჲ მიანიჭე, რომელმან დაცემულთა მიეც აღდგომაჲ.
უპირატესი მზისა, მზე შთახდა ოდესმე საფლავსა შინა…
იკოსი.
უპირატესი მზისა, მზე შთახდა ოდესმე საფლავსა შინა, რომელსა ცისკარს მსთუად ეძიებდეს, ვითარცა დღისი მენელსაცხებლენი დედანი და ურთიერთ-არს ეტყოდეს: მოვედით ჵ, მეგობარნო და ვსცხოთ ნელსაცხებელი ხორცთა დაფლულთა, მდებარესა საფლავსა შინა, გუამისა ადამ დაცემულისა აღმადგინებელთა, წარვიდეთ და მივისწრაფოთ ვითარცა მოგუნი და თაყუანის-ვსცეთ და მიუძღუანოთ სუნნელი, შესამურავი ვითარცა ძღუენი არა სახუევლითა, არამედ სუდარითა, წარგრაგნილსა და ტირილით ღაღად-ვჰყოთ: აღდეგ, ჵ მეუფეო, რომელმან დაცემულთა მიეც აღდგომაჲ.
ზენათა ძიებითა
და წარდგომა. ხმა ბ.
ზენათა ძიებითა.
მირონი სუნნელებისა მოიღეს საფლავად შენდა მენელსაცხებლეთა დედათა მაცხოვარ, არამედ ანგელოზმან ნათლისამან სულითა მხიარულ ყვნა, და შენ ყოველთა ღმერთსა გქადაგებდეს და მოციქულთა თანა ღაღადყუეს: ჭეშმარიტად აღდგა საფლავისაგან ყოველთა ცხოვრება.
მოწაფეთა შენთა გუნდი მენელსაცხებლეთა დედათა თანა ერთობით…
დიდება, აწ და. ხმა იგივე.
მოწაფეთა შენთა გუნდი მენელსაცხებლეთა დედათა თანა ერთობით იხარებენ, და ზოგად დღესასწაულობენ დღესასწაულსა შენსა, ადიდებენ და პატივს ცემენ აღდგომასა შენსა, და ჩუენცა მათ თანა გიღაღადებთ: კაცთ-მოყუარე უფალო ერსა შენსა მომადლე დიდი წყალობაჲ.
საღმრთოსა სახმილავსა ზედა საღმრთო მეტყველი ამბაკომ სდეგინ…
გალობა დ. ძლისპირი.
საღმრთოსა სახმილავსა ზედა საღმრთო მეტყველი ამბაკომ სდეგინ ჩუენთანა და გვიჩუენენ ჩუენ ანგელოზი ნათლისა, ბრწყინუალედ მეტყველი, ესრეთ ცხოვრება არს სოფლისა, რამეთუ აღდგა ქრისტე ვითარცა ყოველისა შემძლებელი.
ულმობელად განმღებელად ქალწულებრივისა საშოსა ითქუა ქრისტე, ხოლო ვითარცა კაცსა კრავად ეწოდა, ხოლო უბიწო, ვითარცა უცხოსა ბრალთაგან პასექსა ჩუენთჳს, და ვითარცა ჭეშმარიტსა ღმერთსა სრულ სახელედვა.
ვითარცა ტარიგი უბიწო, მაკურთხეველი ჩუენი, გჳრგჳნი ქრისტე, ნებსით ყოველთათჳს დაიკლა, პასექად წმიდა-მყოფელად, და კუალად შუენიერად საფლავით, სიმართლისა იგი მზე აღმოგვიბრწყინდა ჩუენ.
წე̅ აჩრდილებრივისა კიდობნისა როკვიდა დავით მამა ღმრთისა, ხოლო ჩუენ ერი ღმრთისა, იგავთა აღსრულებითა ხედვითა, საღმრთოდ ვიშუებთ, რამეთუ აღდგა ქრისტე ვითარცა ყოველისა შემძლებელი.
ადამ პირველისა მამისა შენისა შემოქმედი შენ შორის…
კანონი ღმრთის-მშობლისა
ადამ პირველისა მამისა შენისა შემოქმედი შენ შორის აღეგო უბიწოო, და მის ძლითი სიკუდილი, სიკუდილითა თჳსითა დღეს დახსნა და განაბრწყინა ყოველნი, საღმრთოთა მით ბრწყინუალებითა აღდგომისათა.
ქრისტესა, რომელი ჰშევ საფლავით შუენიერად აღმობრწყინვებულისა მხილუელი, ყოველთათჳს იხარებდ უბიწოო და უხრწნელო, უმეტეს უშუენიერესო, დედათა შორის, ადიდებდ მოციქულთა თანა დღეს.
სმენა მესმა უფალო შობა შენი ჩუენ კაცთათჳს…
სხუა. ძლისპირი.
სმენა მესმა უფალო შობა შენი ჩუენ კაცთათჳს და შიშმან შემიპყრა მე, რამეთუ ჯერ გიჩნდა დაუსაბამო ქრისტე, აღსასრულსა ჟამთასა მოსლუად კაცთა ცხოვრებისათჳს, ამისთჳსცა გიღაღადებთ: ძალსა შენსა დიდება მრავალ-მოწყალე.
ჯუარითა წარმოსტყუენე მუცელი ჯოჯოხეთისა მაცხოვარ და მთავრობაჲ მძჳნვარედ განხრწნილი სიკუდილისა დაარღვიე და აღადგინენ მკუდარნი, ამისთჳს თაყუანის-ვსცემთ დაფლუასა, და აღდგომასა შენსა, და ვხმობთ შენ ხარ ქრისტე სიბრძნე ღმრთისა და ძალი მისი.
რომელმან სათნო იყავ მოწყალებით და წყალობით დამსჭუალვა ჯუარსა ზედა და გვიხსენ, მამულთა პატიჟთაგან და დახსნენ ურიცხუთა ბრალთა ჩემთა საკჳრუელი, რამეთუ ყოველივე ძალგიძს რაოდენიცა ინებო, შენ ხარ ქრისტე სიბრძნე ღმრთისა და ძალი მისი.
ჯუარსა შემსჭუალენ პირველნი ჩემნი წყევანი, და აღმომიცენე მე მაცხოვარო კურთხევა შენი, რომელი გარდამოხდა პატიოსნისა გვერდისა შენისაგან, სისხლი და წყალი, და აწ დაარღვიენ კრულებანი ცოდუათა ჩემთანი, რამეთუ შემძლებელ ხარ რაოდენიცა გენებოს.
შეგემთხვია ჯოჯოხეთი ქუესკნელსა მხსნელო, და განმწარდა, რამეთუ გულის-ხმა-ჰყო ვითარმედ, რომელთა იგი მძლე ექმნა პირველ შერისხვით წარმოსთხევდა მათ, ვინაცა წარმოსტყუენე იგი, იხსენ დასჯილნი და თქუეს: შენ ხარ ქრისტე სიბრძნე ღმრთისა და ძალი მისი.
დაღაცათუ დაბეჭდეთ ლოდსა მას დასისა თანა ჵ უსჯულონო მტერნო ღმრთისანო, არამედ აღდგა უფალი ვითარცა გიბრძანა წინასწარ, და დახსნა შეცოდებანი ჩუენნი, რამეთუ ძალუძს მას რაოდენიცა ენებოს.
აღდეგ საფლავით მაცხოვარ და წარმოსტყუენე ჯოჯოხეთი და მკუდარნი აღადგინენ, და უხრწნელება მომანიჭენ შენითა მით აღდგომითა, და აწ დაარღვიე კრულებანი მრავალთა ცოდუათა ჩემთანი, რამეთუ შემძლებელ ხარ რაოდენიცა გენებოს.
გრცხუენოდენ ურწმუნონო, ჭეშმარიტად აღდგა ქრისტე და აღადგინნა მკუდარნი, და ჰრქუა მათ წყალობით: ნუ გეშინის რამეთუ ვძლე სიკუდილსა, და აწ უკუე გრწმენინ ჩემი, ისწავეთ ჩემგან და ხმობდით, შენ ხარ ქრისტე სიბრძნე ღმრთისა და ძალი მისი.
შენ რომელმან მიაგებე, აღდეგ რა საფლავით ქრისტე, მენელსაცხებლეთა წმიდათა მათ დედათა გიხაროდენი, და წარავლინენ ხარებად მოციქულთა, დახსნენ შეცოდებათა ჩემთა სიმრავლენი, რათა ხმა-ვჰყო: შენ ხარ ქრისტე, სიბრძნე ღმრთისა, და ძალი მისი.
იოსებ შუენიერსა ღმრთის-მსახურსა მოწაფესა მენელსაცხებლეთა მათ თანა და ქადაგთა ქრისტესთა მოციქულთა პატივს-ვსცემდეთ, და ვიხარებდეთ და აღდგომასა მხსნელისასა უგალობდეთ და ვიტყოდეთ: შენ ხარ ქრისტე სიბრძნე ღმრთისა და ძალი მისი.
არსთა შემოქმედისა ღმრთაებისა დიდებასა ვინ შეუძლოს გალობად…
დიდება. სამების
არსთა შემოქმედისა ღმრთაებისა დიდებასა ვინ შეუძლოს გალობად, რამეთუ არს იგი ერთ-ბუნებით, და სამებით ერთ ღმრთაებად იქების, დაუსაბამოდ თანასწორად, ამისთჳსცა უღაღადოთ: სამებაო წმიდაო, გვიხსენ მონანი შენნი.
რომელი იგი შევ თჳნიერ მამაკაცისა დამკჳდრებული საშოსა…
აწ და. ღმრთის-მშობლისა.
რომელი იგი შევ თჳნიერ მამაკაცისა დამკჳდრებული საშოსა შინა შენსა ქალწულო დედაო წმიდაო, მას ევედრე დაუცხრომელად, ვითარცა ღმრთის-მშობელი, რათა დახსნნეს საკრუელნი მრავალთა მათ შეცოდებათა ჩემთანი, რამეთუ ძალგიძს რაოდენიცა გენებოს.
საღმრთოსა სახმილავსა ზედა საღმრთო მეტყველი ამბაკომ სდეგინ…
კატავასია
საღმრთოსა სახმილავსა ზედა საღმრთო მეტყველი ამბაკომ სდეგინ ჩუენთანა და გვიჩუენენ ჩუენ ანგელოზი ნათლისა, ბრწყინუალედ მეტყველი, ესრეთ ცხოვრება არს სოფლისა, რამეთუ აღდგა ქრისტე ვითარცა ყოველისა შემძლებელი.
აღვიმსთოთ ჩუენ ცისკარსა მსთუად და მირონთა წილ…
გალობა ე. ძლისპირი.
აღვიმსთოთ ჩუენ ცისკარსა მსთუად და მირონთა წილ, გალობაჲ მიუძღუანოთ მეუფესა, ვიხილოთ სიმართლისა მზედ ცხოვრებისად ქრისტე, ყოვლად-აღმობრწყინვებული.
უზომო იგი მოწყალება რა შენი, ჯოჯოხეთისა კრულთა რაჟამს იხილეს, ნათლად ისწრაფეს ქრისტე, ფერხითა მოხარულითა, ტყუელვიდეს პასქად საუკუნოდ.
ლამპარ-შემოსილ მივეგებნეთ ქრისტესა, საფლავით-გამომავალსა სიძესა, და ვდღესასწაულობდეთ მედღესასწაულეთა წესთა თანა, ცხოვრებისა პასექსა.
განათლდების საღმრთოთა შარავანდედთა მიერ, ცხოვრება-შემოსილისა ძისა შენისა…
კანონი ღმრთის-მშობლისა
განათლდების საღმრთოთა შარავანდედთა მიერ, ცხოვრება-შემოსილისა ძისა შენისა აღდგომისათა სძალო, და მხიარულებითა მორწმუნენი აღივსებიან.
არა განახუენ ბჭენი ქალწულებისანი განხორციელებასა და ეგრეთუე საფლავისა ბეჭედნი არა დახსენ, ვინაცა აღდეგ რა მხილუელი იხარებდა.
იესო მთავარი მშჳდობისა მოვიდა დღეს დახსნად პატიჟთა…
სხუა. ძლისპირი.
იესო მთავარი მშჳდობისა მოვიდა დღეს დახსნად პატიჟთა ადამ პირველ ქმნილისა, და ხელნი რომელითა შექმნა, შესმსჭუალა ჯუარსა, და მით მოკლა მტერი ნათესავისა ჩუენისა, და თჳსთა მორწმუნეთა აჩუენა ძლევაჲ ჯუარითა, და მშჳდობაჲ მოგუმადლა.
პირველი იგი სამოსელი ურჩებისა, რომელი მიქსოვა მტერმან, განმძარცვე მხსნელო, განშიშვლდი რა ჩემთჳს ხორცითა და შემმოსე მე საღმრთო ნათელი უკუდავებისა, რაჟამს შემიმოსე მე განხრწნილი ესე ცოდვითა, და მშჳდობა მომმადლე.
ფურცელი ლეღვისა შემიკერნა ცოდუამან, რამეთუ უხრწნელი იგი ბრძანებაჲ შენი არა დავიმარხე მე უბადრუკმან მხსნელო, და განძარცვილ ვიქმენ, დიდებისაგან პირველისა, ხოლო შენ აღდგომითა უხრწნელება შემმოსე, და მშჳდობა მომმადლე.
წყლულ იქმნა სული ჩემი ბოროტთა ავაზაკთა და გულის-თქმათაგან, არამედ მიხსენ ცოდუათაგან, რომელი იშევ მარიამისგან, და ზეთი და ღვინოჲ დამასხ და განმკურნე ქრისტე, რომელსა გადიდებს ყოველი სული უკუნისამდე.
წე̅ ჯუარსა მდგომარე წმიდა ქალწული გოდებით იტყოდა შენდამი ქრისტე სახიერ: ნუ დამაგდებ მე მხოლოდ, ჵ, მხოლოდ-შობილო ძეო და სიტყუაო ღმრთისაო, არამედ ღმრთაებრ აღდგომითა მახარე, ვითარცა დედასა შენსა და მშჳდობა მომმადლე.
გუელი გულარძნილი დასაბამი ბოროტთა მხსნელო, ჯუარისა შენისა მიერ მოკალ საჭურველითა, და საწერტელი სიკუდილისა შემუსრე, ივნე რა ხორცითა და აღდეგ საფლავისაგან და ყოველთა გუახარე აღდგომაჲ, სასუფეველი და მშჳდობა მოგუმადლე.
შთასლჳთა შენითა ჯოჯოხეთს ყოვლად-ძლიერო განათლდა ბრწყინუალედ ადამ, და ღაღადებს: სადა არს ჯოჯოხეთო ძლევა შენი, ანუ სიკუდილო საწერტელი შენი, რამეთუ შემუსრა ქრისტემან მხსნელმან ჯუარითა, და დასჯილთა შენ მიერ გუახარა თავისუფლებაჲ.
სანატრელთა მათ დედათა სახსენებელსა გალობით და შესხმით აღუასრულებთ მორწმუნენი, და ყოველთა მოწაფეთა შენთასა მხსნელო და ბრწყინუალისა აღდგომისასა, და თაყუანის-ვსცემთ მადლობით შენსა მკუდრეთით აღდგომასა ნათელ გარდაფენილსა.
კეთილ მორწმუნეთა მათ მენელსაცხებლეთა სახსენებელსა აღუასრულებთ, და ყოველთა მოციქულთა შენთასა, და ესრეთ აღდგომითა შენითა განათლებულნი გალობით გიგალობთ შენ.
ღირსად და შუენიერად ყოველნივე პატივს-ვცემთ, რომელმან ხორცი უფლისა ძელისაგან გარდამოხსნა, და დაფლა საფლავსა შინა, ხოლო აღდგა იგი მკუდრეთით და განანათლა ქუეყანა, და ჩუენ შემსხმელთა მისთა მშჳდობაჲ მოგუმადლა.
ღმერთსა მამასა და ძესა და სულსა-წმიდასა, ყოველთა…
დიდება. სამების
ღმერთსა მამასა და ძესა და სულსა-წმიდასა, ყოველთა მფლობელსა, ყოველთა გამგებელსა, სამებით სამ გუამოვნებით დიდებულსა თაყუანის-ვსცემდეთ ჩუენ მორწმუნენო და ვიტყოდეთ: შენ ხარ დამბადებელი ჩუენი, და შენ შეგივრდებით, გვიხსენ და გვაცხოვნენ.
შენ უთესლოდ მშობელსა ზესთა ბუნებისა ქალწულსა წმიდასა…
აწ და.
შენ უთესლოდ მშობელსა ზესთა ბუნებისა ქალწულსა წმიდასა გიგალობთ მორწმუნენი, რამეთუ შენ მხოლომან განაახლე ბუნებაჲ კაცთა განხრწნილი, და პირველისა დედისა იგი პატიჟი დახსნენ, და ნათესავსა კაცთასა მშჳდობაჲ მიმადლე.
აღვიმსთოთ ჩუენ ცისკარსა მსთუად და მირონთა წილ…
კატავასია
აღვიმსთოთ ჩუენ ცისკარსა მსთუად და მირონთა წილ, გალობაჲ მიუძღუანოთ მეუფესა, ვიხილოთ სიმართლისა მზედ ცხოვრებისად ქრისტე, ყოვლად-აღმობრწყინვებული.
შთახედ შენ, ქუესკნელთა ქუეშე ქუეყანისათა, და შემუსრენ…
გალობა ვ. ძლისპირი.
შთახედ შენ, ქუესკნელთა ქუეშე ქუეყანისათა, და შემუსრენ მოქლონნი, საუკუნოდ პყრობილთა შებორკილებულთანი, და სამდღე მკუდარი, ვითარცა იონა ვეშაპით, ეგრეთ აღდეგ საფლავით.
დაიცუენ ბეჭედნი აღუტეხელად ქრისტე, აღდგომასა საფლავით, რომელმან კლიტენი ქალწულებისანი არა განხრწენ შობასა, და განმიხუენ ბჭენი სამოთხისანი.
მაცხოვარ, ცხოველი და დაუკულელი, მსხუერპლი, ვითარცა ღმერთმან თავი თჳსი ნებსით შესწირე მამისა, და აღადგინე ადამ, ყოველით ნათესავითურთ, რაჟამს აღდეგ საფლავით.
გზა გუექმნა პირველისა მიმართ ცხოვრებისა, და სამარადისოსა…
კანონი ღმრთის-მშობლისა
გზა გუექმნა პირველისა მიმართ ცხოვრებისა, და სამარადისოსა შუებისა, რომელი დაყენებულ იქმნა პირველ სიკუდილისაგან, კაც იქმნა რამეთუ შენ შორის, ქრისტე ყოვლად-უხრწნელო.
შთავიდა ქუესკნელთა ქუეშე ქუეყანისათა, რომელიცა შენ შორის შევიდა, და დაემკჳდრა ყოვლად-უხრწნელო კაც-ქმნილი ნებსით, და აღადგინა ადამ აღდგომილმან საფლავით.
იონა დანთქმულმან ზღუასა შინა, პირველ ვეშაპისა მის…
სხუა. ძლისპირი.
იონა დანთქმულმან ზღუასა შინა, პირველ ვეშაპისა მის წინასწარვე გამოსახა დაფლუა მხსნელისა სამისა დღისა, და აღდგომა უხრწნელად, და განუცხადა მან სახე დიდებულისა ვნებისა ცხოვრების მოცემული ყოველთა.
მკუდარ არს ჯოჯოხეთი, იხარებდით ქუეყანისა ნაშობნო, რამეთუ ძელსა დამსჭუალულმან განაწონა მას მახვილი, და ძეს მკუდრად დაბძარულად, რომელნი იგი ჰქონდეს წარმოსთხივნა ზარტეხილმან და იავარ-იქმნა და წარმოეტყუენა.
იგლოვდით მკჳდრნო ქუესკნელისანო რამეთუ წარმოვიტყუენე, საფლავნი აღახუენით და აღდეგით ხმობს ჯოჯოხეთი, მაცხოვარი მოვიდა მხსნელად ყოველთა ადამიანთა, ვნებითა და აღდგომითა ხრწნილებისაგან და სიკუდილისა.
მკუდარნი, რომელნი შთანთქუენ შენ მძლავრებით ოდესმე უძღებო ჯოჯოხეთო, მომცენ მოსწრაფედ, ეტყვის ხელმწიფედ ცხოვრების-მომცემელი ღმერთი, რომელი მოვიდა გამოხსნად სულთა, საუკუნითგან დასჯილთა ხრწნილებისაგან და სიკუდილისა.
ხმა-ჰყო ანგელოზმან ღმრთივ-ბრწყინუალედ დედათა მიმართ, რასა ცრემლოჲთ თქუენ სანატრელნო, რად ეძიებთ მკუდართა თანა ცხოველსა მას, აღდგა ვითარცა თქუა, შეცუალეთ გლოვაჲ სიხარულად, და მიუთხართ მოციქულთა აღდგომა მხსნელისა დიდებული.
შენ ქრისტე არმენაკითა წმიდითა წარგრაგნა იოსებ შუენიერმან, და დაგდუა საფლავსა და ნელსაცხებელი გცხო პატივად დაფლვისა შენისა, და მიაგორა ლოდი დიდი კარსა მას საფლავისასა.
აღდგა და წარმოტყუენა ჯოჯოხეთისა ბჭენი და აღმოიყუანნა მუნით პყრობილნი, და აღადგინნა ყოველნი, და ეგრეთუე პირველ შექმნილი ადამი განათავისუფლა ვითარცა სახიერმან და კაცთ-მოყუარემან ღმერთმან.
უგალობდეთ ერნო ძისა თანა მამასა, და სულსა-წმიდასა…
დიდება. სამების
უგალობდეთ ერნო ძისა თანა მამასა, და სულსა-წმიდასა ბრწყინუალედ ვადიდებდეთ, შეურევნელად, და განუყოფელად სამებასა წმიდასა დიდების ვმეტყველებდეთ, და ზეცისა ძალთა თანა სამ წმიდითა ხმითა ვაქებდეთ.
მუცლად-იღე სძალო უშრომელად უხრწნელებისა ტევანი, ვითარცა რა…
აწ და.
მუცლად-იღე სძალო უშრომელად უხრწნელებისა ტევანი, ვითარცა რა ვენახმან, რომელისა მიერ უკუდავებისა ტევანი მსგავსად ღვინისა მდიდრად აღმოგვიცენებენ საუკუნესა ცხოვრებასა და ვნებასა სიმთურალესა წარღუნიან.
შთახედ შენ, ქუესკნელთა ქუეშე ქუეყანისათა, და შემუსრენ…
კატავასია
შთახედ შენ, ქუესკნელთა ქუეშე ქუეყანისათა, და შემუსრენ მოქლონნი, საუკუნოდ პყრობილთა შებორკილებულთანი, და სამდღე მკუდარი, ვითარცა იონა ვეშაპით, ეგრეთ აღდეგ საფლავით.
ნელსაცხებლის მიმღებელთა, გიხაროდენი მიაგებე, და გოდება პირველისა…
კონდაკი. ხმა ბ.
ნელსაცხებლის მიმღებელთა, გიხაროდენი მიაგებე, და გოდება პირველისა დედისა ევასი სიხარულად გარდასცუალე, აღდგომითა შენითა ქრისტე, ღმერთო, ჩუენო, და მოციქულთა ხარებაჲ უბრძანე, ხოლო იგინი ხმობდეს: მხსნელი ჩუენი აღდგა საფლავისაგან.
საფლავსა შენსა მხსნელო დედანი მირავიდოდეს, და თავთა…
იკოსი.
საფლავსა შენსა მხსნელო დედანი მირავიდოდეს, და თავთა შორის თჳსთა გონებით ესრეთ განიზრახჳდეს: ვინ გარდაგვიგოროს ჩუენ ლოდი კარისაგან საფლავისა, და მიხედეს რა გარდაგორებულ იყო, ხოლო სახემან და სამოსელმან ანგელოზისამან განაკრთვინა, სივლტოლად ეგულვებოდა, არამედ მიუგო და ჰრქუა მათ უხორცომან ტკბილად, ვითარმედ აღდგა უფალი, მოვედით და იხილეთ სადა იგი მდებარე იყუნეს ხორცნი იესოსნი, და წარუედით და უთხართ მოწაფეთა მისთა, ვითარმედ მხსნელი ჩუენი აღდგა საფლავისაგან.
დღესა ამას კჳრიაკესა მესამესა შემდგომად პასექისასა, ვდღესასწაულობთ…
სვინაქსარი
დღესა ამას კჳრიაკესა მესამესა შემდგომად პასექისასა, ვდღესასწაულობთ დღესასწაულსა წმიდათა მენელსაცხებლეთა დედათასა და ხსენებასა ვჰყოფთ იოსებ არიამათიელისასა, რომელი იყო ფარულად მოწაფე ერთი სამეოცდაათთაგანი. და მოწაფეცა იგი ნიკოდიმოს, რომელი იყო მთავარი ჰურიათა, და ღამე მივიდნენ ქრისტესა რომელსა იგი სწამებენ მენელსაცხებლენი დედანი, შეუორგულებელად პირველსა მას აღდგომასა. ხოლო იქმნა რა დაფლუა ქრისტესი, იოსების მიერ და ნიკოდიმოსისა ჭეშმარიტად გამოცხადებითა, მეყსეულად განაძეს ნიკოდიმოს კრებულისაგან და არღარა ინებეს ჰურიათა ბრძნობა მისი. ხოლო იოსებ რა დაფლა გუამი ქრისტესი შემდგომად დაფლვისა იოსებ შთააგდეს ჰურიათა მღვიმესა შინა, და ძლიერებითა ღმრთისათა აღმოტაცებულ იქმნა და მიიწია მამულსა თჳსსა არიმათიად. და აღდგა რა ქრისტე ეჩუენა მას სახუეველითა შეკრული და უფროსად არწმუნა საიდუმლო აღდგომისა თჳსისა, და მრავალგზის ევნებოდა ჰურიათა მიერ ვინაჲთგან ვერ ითმენდა დუმილსა რაოდენიცა იქმნა კადნიერად სწავლიდა მათ. და იტყვიან ვითარმედ ნიკოდიმოს ვნება და აღდგომა უწინარეს პირველ ყოველთასა ამან აუწყა ჰურიათა ვინაჲთგან განზრახუანი და სიტყუანი ჰურიათა კრებულთანი გამოკვლევით უწყოდა მან. ამათ და სხუათა მოწაფეთა დედათა რაოდენი ჭეშმარიტად სწამეს და გამოაცხადეს დაფლვისათჳს და აღდგომისა. უწინარეს თომასა იყო რწმუნება მათი ვითარცა იტყვის შემდგომად რვისა დღისა შევიდა ხარებად მათ თანა. ხოლო პირველად დედათა მათ იხილეს აღდგომა და შემდგომად მოწაფეთა ახარეს. რამეთუ ჯეროვნად იყო ესე, რათა ცოდვითა დაცემულთა და წყევასა შინა მყოფთა პირველად აღდგომა უფლისა მათ ყურადეღოთ ამისთჳს ვინაჲთგან პირველად მათ სმენოდათ მწუხარებით შვნე შვილნი შენნი. და ამისთჳს უწოდთ მენელსაცხებლედ ვინაჲთგან პარასკევსა მას პასექისასა იყო დღე იგი დიდი შაბათისა და ფრიად იღუაწეს დაფლუასა ზედა გუამსა უფლისასა იოსებ და ნიკოდიმოს რომელთაცა სცხეს მას ჩვეულებისაებრ ჰურიათასა ნელსაცხებელი, არამედ უფროსად ღირს იქმნნეს მურთა და ალოჲთა რამეთუ მოირტყეს არდაგი და დაფლეს საფლავსა. ხოლო დედათა მათ აქუნდათ მხურუალე სიყუარული ქრისტესი ვითარცა მოწაფეთა მათ რამეთუ იყიდეს ნელსაცხებელი მრავალსასყიდლისა და ერთბამად მივიდნენ ღამე შიშისათჳს ჰურიათასა, რამეთუ ერთბამად იყო წესი განთიად მისვლისა მივიდნიან სცხებდიან და სტიროდიან და შემოკრებითა ჟამისათა მსწრაფლ აღასრულეს მაშინ. და რაჟამს მირავიდნენ იგინი მუნ მრავალნი პირად-პირადნი საკჳრუელებანი იხილნეს, რამეთუ შინაგან საფლავისა იხილნეს ორნი ანგელოზნი ბრწყინუალენი მსხდომარე ლოდსა ზედა, და შემდგომად მათსა იხილეს ქრისტე და თაყუანის-ცეს მათ, და მაგდალინელი გონებდა ერთსა მემტილეთაგანსა, და კითხვიდა მას მისთჳს. ხოლო მრავალნი იყვნენ მენელსაცხებლენი დედანი და მახარებელთა თავთა მათთჳს ჰყუეს მოხსენება და სხუანი დაუტევეს. ხოლო პირველ მათ ყოველთასა იყო მარიამ მაგდალინელი, რომელისა მიერ განსდევნა ქრისტემან შვიდნი ეშმაკნი, და შემდგომად ქრისტეს ამაღლებისა მივიდა ჰრომს, და აუწყა ქრისტეს მაცხოვრისათჳს ტიბერის კეისარსა რაოდენი რა შეამთხვიეს სიკუდილსა ზედა პილატე და მღუდელმთავართა, და ეფესოს შინა აღესრულა, და ღმრთის-მეტყველმან იოანე დამარხა, და კუალად ლეონ ბრძენმან მოიღო კონსტანტინეპოლედ. და მეორე იგი სალომე, რომელი იყო ასული იოსებისა, რომელისა მიერ მითხოვილ იყო მარიამ, ეგრეთუე ორთავე მათ ასული მისი უწოდა და იყო ქმარი მისი ზებედე, რომელისაგან იყუნეს მახარებელნი იოანე და იაკობ. ხოლო იოსებ შვნა ოთხნი ძენი, იაკობ რომელსა ეწოდა მცირე, და იოსია სვიმონ და იუდა, და სამნი ასულნი ესთერი, თამარი და სალომე ზებედესი, ვითარმედ რაჟამს გესმათ სახარებისა, მარიამ იაკობისი მცირისა და იოსეს დედა, ნუ გონებთ ღმრთის-მშობელსა, ვითარმედ დედა იოსების შვილთა ღმრთის-მშობელი იყოს, არამედ ამის მიერ იუწყე ვითარმედ დედის დაჲ იყო ქრისტეს მახარებელისა იოანესი ვითარცა ძმისა წული. ხოლო მესამე მენელსაცხებლე არს, იოანნა ცოლი ქოზაჲსა, ეზოს მოძღურისა და მაშენებელი სახლისა იროდი მეფისა. ხოლო მეოთხე და მეხუთე მარიამ და მართა დანი ლაზარესნი. მეექუსე მარაიმ კლეოპასი, მეშვიდე სოსანნა, და სხუანი მრავალნი იყუნეს, ვითარცა იტყვის საღმრთო ლუკა, რაოდენნი იყუნეს მსახურნი ქრისტესნი და მოწაფეთა მისთანი სახელდებულნი. ვითარმედ ქადაგეს მათ აღდგომა უფლისა და მრავალნი სასწაულნი და სახენი დაგვიტევეს უწყებად და რწმუნებად ქრისტეს აღდგომისათჳს და შემდგომად თომას დღესასწაულისა ამას დღესასწაულსა დღესასწაულობს ქრისტეს ეკლესია, ვინაჲთგან იხილეს პირველად ქრისტე აღდგომილი მკუდრეთით და ყოველთა ეუწყა მათ მიერ მაცხოვარებისა ქადაგება და შემდგომად ქრისტესა, სოფლისა ამის ცხოვრება უმეტესად იღუაწეს, ვითარცა შვენოდათ დედათა მათ ქრისტეს მიერ განსწავლულთა, ვედრებითა წმიდათა მათ მენელსაცხებლეთა, ქრისტე ღმერთო შეგვიწყალენ ჩუენ ამინ.
რომელმან ყრმანი იხსნა სახმილისაგან, რაჟამს განკაცნა ივნო…
გალობა ზ. ძლისპირი.
რომელმან ყრმანი იხსნა სახმილისაგან, რაჟამს განკაცნა ივნო, ვითარცა მოკუდავმან, და ვნებითა მოკუდავსა უხრწნელებისა შემოსა სამოსელი მხოლომან კურთხეულმან, ღმერთმან მამათამან და ზესთა ამაღლებულმან.
დედანი ღმრთივ-განბრძნობილნი შემდგომად შენსა, სრბით მირონითა მიგდევდეს ღმერთსა, და რომელსა მოკუდავად გეძიებდეს აღდგომილსა და ცხოველსა, თაყუანის-გცეს და პასქა ესე საიდუმლო მოწაფეთა ახარეს.
სიკუდილითა სიკუდილისა შემუსრვასა ჯოჯოხეთისასა დღეს ვდღესასწაულობთ, დასაბამსა და მიზეზსა ახლისა ცხოვრებისასა უგალობთ, მხოლოსა კურთხეულსა ღმერთსა მამათასა, და ზესთა აღმატებულსა.
ვითარცა ჭეშმარიტ წმიდა, და ყოვლად-კრება არს მაცხოვარებისა, ესე ღამე და ყოვლად-ნათლითშემოსილ, დღე აღდგომისა წინა მახარებელი, ვინა საფლავისაგან ზესთა ჟამთა ნათელი ხორცითა აღმოგვიბრწყინდა.
მოაკუდინა რა ძემან შენმან სიკუდილი დღეს ყოვლად-უბიწოო…
კანონი ღმრთის-მშობლისა
მოაკუდინა რა ძემან შენმან სიკუდილი დღეს ყოვლად-უბიწოო, და საუკუნო დადგრომადი ცხოვრება მიანიჭა ყოველთა მოკუდავთა ღირსო, მხოლომან კურთხეულმან ღმერთმან მამათამან და ზესთა აღმატებულმან.
ყოველთა დაბადებულთა შემოქმედმან, დაიმკჳდრა შენ შორის, კაც-ქმნილმან ნებსით, და ჯუარი დაითმინა, და სიკუდილი, და აღდგა ღმრთივ-შუენიერად და თანა აღმადგინნა ღმერთმან მამათამან და ზესთა აღმატებულმან.
ყრმანი წმიდანი სახმილსა ცეცხლისასა შეითხივნეს და შეცურეულნი…
სხუა. ძლისპირი.
ყრმანი წმიდანი სახმილსა ცეცხლისასა შეითხივნეს და შეცურეულნი სულითა უვნებელად დაიცუებოდეს მოსლჳთა ანგელოზისა ღმრთისათა, სიხარულით განბრწყინვებულნი ღაღადებდეს, და იტყოდეს, კურთხეულ ხარ შენ უფროსად ამაღლებულო ღმერთო მამათა ჩუენთაო.
კაცთ-მოყუარებით ინებე ხსნა დაბადებულთა შენთა, ამისთჳსცა თავსიდევ ჯუარსა ზედა დამსჭუალვაჲ მხსნელო, რათა ვნებათა შინა დაფლული ხატი თჳსი თავისა მიერ თჳსისა განაახლო წყალობით, და ჯოჯოხეთი დაარღვიო და მკუდარნი აღადგინე ყოვლად-ძლიერო.
ჯუარსა ზედა რა ამაღლდი, ყოველთა მოუწოდე თავისა მიერ თჳსისა, ვითარცა პირველ აღუთქუ სახიერ, რამეთუ ჭეშმარიტად ჯერ იჩინე ცხოვრებაჲ მათი, და ავაზაკსა სამოთხეჲ განუღე, და სთქუა: კურთხეულ ხარ შენ უფროსად ამაღლებულო, ღმერთო, მამათა ჩუენთაო.
ხორცთა ტაძარი დარღუეული აღადგინე სახიერ, მესამესა დღესა საფლავით აღდგომითა, ვითარცა თქუა რათა ჭეშმარიტებით გვიჩუენო ჩუენ დიდებაჲ შენი, რომელსა მოგუმადლებ სარწმუნოებისა მიერ, და ჯოჯოხეთით იხსენ ყოველნი დასჯილნი, შენთანა აღადგინენ.
ჵ ჰურიათა უგუნურება, ეჰა სიბორგილე, რაჲ უჯეროჲ იხილეთ, ქრისტეს თანა უსჯულონო, და არა გრწმენათ, ანუ არა სნეულნი თქუენნი სიტყჳთ განკურნა, და მკუდარნი თქუენნი ხელმწიფებით ვითარცა ძილისაგან, აღადგინა, ჰკითხეთ თქუენ მცუელთა და ირწმუნეთ, რამეთუ იგი არს მხსნელი ყოველისა სოფლისა.
მცუელთა მათ მკუდართა სწამეთ აწ, რომელი არა იხილეთ, ჵ ყოველითურთ ურწმუნონო, ვითარ წარპარულ იქმნა უფალი, რამეთუ რომელთა იგი აღდგომაჲ მისი ვერ აგრძნეს წარპარუამცა მისი ვითარ უძლეს ცნობად, გამხილებდინ თქუენ ბილწნო ლოდი, და ტილონი, და ბეჭედნი აღუტეხელნი.
რასა დაბეჭდეთ საფლავი უკუეთუ სახედ მკუდრისა სცავთ მხსნელსა, აჰა ესერა ბეჭედნი აღუტეხელად ჰგიან უღმრთონო, ვითარ უკუე წარიპარეს მკუდარი იგი, გრცხუენოდენ ბილწნო რამეთუ აღდგა უფალი, და გამხილებენ მკუდარნი, რომელნი აღდგეს და განეცხადნეს მრავალთა.
მამისა თანა ვადიდებთ ძესა, და სულსა-წმიდასა, და…
დიდება. სამების
მამისა თანა ვადიდებთ ძესა, და სულსა-წმიდასა, და ვედრებით ვხმობდეთ, და ვიტყოდეთ: ჵ სამებაო წმიდაო, ერთ არსებაო, სამ ხატოვანო, ერთ მთავრობაო, ერთ-ბუნებით აღსარებულო, შეგვიწყალენ ჩუენ უფროსად ამაღლებულო ღმერთო მამათა ჩუენთაო.
ვითარ საშოსა დაიტიე სძალო ჩჩვილებრ დაუტევნელი, რომელისაგან…
აწ და. ღმრთის-მშობლისა.
ვითარ საშოსა დაიტიე სძალო ჩჩვილებრ დაუტევნელი, რომელისაგან ძრწიან წესნი ანგელოზთანი ვითარცა ღმერთი-არს, არამედ ვითარცა სათნო იჩინა, რათა აცხოვნნეს ადამიანნი წყალობითა და იხსნეს ადამი პატიჟთაგან წყევისათა, ღმერთმან მამათა ჩუენთამან.
რომელმან ყრმანი იხსნა სახმილისაგან, რაჟამს განკაცნა ივნო…
კატავასია
რომელმან ყრმანი იხსნა სახმილისაგან, რაჟამს განკაცნა ივნო, ვითარცა მოკუდავმან, და ვნებითა მოკუდავსა უხრწნელებისა შემოსა სამოსელი მხოლომან კურთხეულმან, ღმერთმან მამათამან და ზესთა ამაღლებულმან.
ესე არს წმიდა და ჩინებულ დღე, საღმრთო…
გალობა 8. ძლისპირი.
ესე არს წმიდა და ჩინებულ დღე, საღმრთო დღე, ესე ერთშაბათი, და დედუფალ და უფალ, და დღესასწაული დღესასწაულთა, კრება კრებათა, რომელსა შინა ვაკურთხევთ უფალსა საუკუნოდ.
მოვედით ვეზიარნეთ ახლისა ამის ვენახისა ნაშობსა, საღმრთოსა მხიარულებასა, ბრწყინუალესა დღესა აღდგომისა და ქრისტეს სუფევისასა, ვაქებდეთ ვითარცა ღმერთსა უკუნისამდე.
აღიხილენ თუალნი გარემოს სიონ, და იხილენ, რამეთუ აჰა მოვიდეს შენდა, ვითარცა მნათობნი, დასავალით, ჩრდილოთ და აღმოსავალით, შვილნი შენნი კურთხევად ქრისტესა საუკუნოდ.
მამაო ყოველისა მპყრობელო და სიტყუაო, და სულო…
სამებისა
მამაო ყოველისა მპყრობელო და სიტყუაო, და სულო სახიერო, ბუნებით ერთო, გუამით განყოფილო, ზესთა არსთაო, და ზესთა ღმერთთაო, შენდამი ნათელღებულ ვართ, და შენ გაკურთხევთ მარადის.
შენ მიერ ღმერთი მოვიდა დღეს ქუეყანად ღმრთის-მშობელო…
კანონი ღმრთის-მშობლისა
შენ მიერ ღმერთი მოვიდა დღეს ქუეყანად ღმრთის-მშობელო ქალწულო, და განხეთქა მუცელი ჯოჯოხეთისა, და აღდგომა მოგუანიჭა მოკუდავთა, რომელისათჳსცა ვაკურთხევთ ქრისტესა საუკუნოდ.
ყოველითურთ დაამხუა სიმტკიცე სიკუდილისა, ძემან შენმან ქალწულო აღდგომითა თჳსითა, და ვითარცა ღმერთმან ძლიერმან თანა აღმადგინნა ჩუენ და განმამღურთნა, რომელისათჳსცა ვაკურთხევთ უფალსა საუკუნოდ.
საიდუმლო დიდებული ბაბილონს შინა სახმილმან აჩუენა ცუარისა…
სხუა. ძლისპირი.
საიდუმლო დიდებული ბაბილონს შინა სახმილმან აჩუენა ცუარისა ცურევითა, რამეთუ ყრმანი იხსნა ალისაგან შემწუელისა და მოწყვიდნა ქალდეველნი წამის-ყოფითა სულგრძელისათა, რომელსა ვაკურთხევთ ჩუენ, და აღუამაღლებთ მას უკუნისამდე.
ნათელი მზისა დაბნელდა შემოქმედისა ჯუარცმასა, და აღდგეს მკუდარნი საფლავთაგან, მთანი შეძრწუნდეს, და ყოველი ქუეყანა და ქუესკნელი, ჯოჯოხეთი მოსცემდა მხსნელსა დასჯილთა, რომელსა ვაკურთხევთ ჩუენ, და აღუამაღლებთ მას უკუნისამდე
სახმილსა მას შინა ოდესმე ნეტარნი სამნი ყრმანი, აღიმაღლებდენ ხელთა, და მოასწავებდენ ნეტარსა, და ყოვლად-პატიოსანსა ჯუარსა შენსა ქრისტე, რომელითა წარმოიტყუენა ეშმაკისა მძლავრებაჲ ამისთჳს გაკურთხევთ ჩუენ, და აღგამაღლებთ შენ უკუნისამდე.
ეჰა ბრმანო ჰურიანო, რომელნი ეგე შურითა მწარითა განცოფებულ იქმნენით, რასათჳს არა გრწამთ, აღდგომა ქრისტეს მეუფისა, რასა ხედავთ ურწმუნოსა, რამეთუ აღდგა მკუდრეთით უფალი, რომელმან იგი მკუდარნი, წინაშე თქუენსა განაცხოველნა.
ჵ ბოროტნო ჰურიანო, დაღაცათუ ჩუენნი არა გრწამთ, იუწყეთ მხედართა, თქუენთა მიერ, ვითარ განცვიფრებულ იქმნენ, ანუ ვინ გარდააგორა ხელითა, ლოდი იგი საფლავისა მის, რომელსა ვაკურთხევთ ჩუენ, და აღუამაღლებთ მას უკუნისამდე.
ვინ განახმო ლეღვი იგი, ანუ ვინ ხელი განხმელი განკურნა, ანუ ვინ განარინნა სიმრავლენი ურიცხუნი უდაბნოსა ზედა, ჭეშმარიტად ქრისტემან მკუდართა აღმადგინებელმან, რომელსა ვაკურთხევთ ჩუენ, და აღუამაღლებთ მას უკუნისამდე.
ვინ მისცა ნათელი ბრმათა, ვინ კეთროვანნი განწმიდნა, ვინ მკელობელნი ავლინნა, ანუ ვინ ვიდოდა ზღუასა ზედა ვითარცა ხმელსა, ჭეშმარიტად ქრისტე ღმერთი, ღმრთაებრ მკუდართა აღმადგინებელი, რომელსა ვაკურთხევთ ჩუენ, და აღუამაღლებთ მას უკუნისამდე.
ვინ აღადგინა მკუდარი, ოთხისა დღისა საფლავით, და ეგრეთუე ქურივისა ძეი, ანუ ვინმე უბრძანა განრღვეულსა აღდეგ ცხედრით, არამედ ქრისტემან ღმერთმან, რომელმან მკუდარნი ღმრთაებრ აღადგინნა, რომელსა ვაკურთხევთ ჩუენ, და აღუამაღლებთ მას უკუნისამდე.
ხმობს ლოდი ღმრთივ-შუენიერად, და ღაღადებენ ბეჭედნი იგი, რომელ თქუენ დასხენით, და წამებენ მცუელნი, რომელ დაადგინენით, ვითარმედ ჭეშმარიტად, აღდგა ქრისტე, ნუ სცდებით ჰურიანო, რომელსა ვაკურთხევთ ჩუენ, და აღუამაღლებთ მას უკუნისამდე.
ჭეშმარიტად აღდგა ქრისტე, და ჯოჯოხეთი დაირღუა, და გუელი მაცთური მოიკლა, განთავისუფლდა ადამი, აღდგეს ქუესკნელს დასჯილნი, რასა თჳსღა ურწმუნო ხართ, ურწმუნონო ქრისტეს აღდგომისათჳს, რომელსა ვაკურთხევთ ჩუენ, და აღუამაღლებთ მას უკუნისამდე.
ერთ-ღმრთაებად ვადიდებთ მამისა თანა ძესა, და სულსა-წმიდასა…
ვაკურთხევთ მამასა, და ძესა და წმიდასა სულსა, უფალსა.
ერთ-ღმრთაებად ვადიდებთ მამისა თანა ძესა, და სულსა-წმიდასა სახიერსა, და სამებად სამგუამოვნად, ერთ-ბუნებად ვაქებდეთ, და ვხმობდეთ, წმიდა ხარ, წმიდა ხარ, წმიდა ხარ, შენ სამებით დიდებულო, მხოლოო უკუნისამდე.
საშოსა შენსა ქალწულო, სამარადისოდ ცხოველი, უკუდავი პური…
აწ და, ღმრთის-მშობლისა.
საშოსა შენსა ქალწულო, სამარადისოდ ცხოველი, უკუდავი პური შეიყო, თბითა ჩუენითა შეურწყმელად, და შეურევნელად, და უქცეველად, კაც იქმნა ერთი ძე, ორითა ბუნებითა, რომელსა ვაკურთხევთ ჩუენ, და აღუამაღლებთ მას უკუნისამდე.
ესე არს წმიდა და ჩინებულ დღე, საღმრთო…
ვაქებთ, ვაკურთხევთ, თაყუანის-ვცემთ უფალსა, ვუგალობთ და აღუამაღლებთ მას უკუნისამდე. კატავასია
ესე არს წმიდა და ჩინებულ დღე, საღმრთო დღე, ესე ერთ შაბათი, და დედუფალ და უფალ, და დღესასწაული დღესასწაულთა, კრება კრებათა, რომელსა შინა ვაკურთხევთ ქრისტესა საუკუნოდ.
განათლდი, განათლდი, ახალო იერუსალიმ, დღეს დიდება უფლისა…
უპატიოსნესას არა ვგალობთ, ყოველსა კჳრიაკესა პასექისასა, და ვიდრე წარგზავნადმდე პასექისა. გალობა თ. ძლისპირი.
განათლდი, განათლდი, ახალო იერუსალიმ, დღეს დიდება უფლისა შენ ზედა გამობრწყინდა, განსცხრებოდე და იხარებდ სიონ, და აწ შენცა, იშუებდი ღმრთის-მშობელო, აღდგომასა ძისა შენისასა.
ჵ საღმრთო, ჵ ყოვლად-საყუარელი, ჵ ტკბილი ხმა, რომელითა აღმითქუა უტყუელად ჩუენთანა ყოფა ვიდრე აღსასრულადმდე სოფლისა, რომელი გუაქუს წინდად სასოებისა მორწმუნეთა და ვიშუებთ მარადის.
ჵ პასექო დიდო და დიდებულო ქრისტე, ჵ სიბრძნეო ღმრთისაო, და სიტყუაო და ძალო, მომეც ჩუენ უსრულესი მოღება, მადლთა შენთა დაუღამებელსა მას, დღესა სუფევისა შენისასა.
გნატრით შენ ქალწულო, ერთობით ჩუენ მორწმუნენი, გიხაროდენ…
კანონი ღმრთის-მშობლისა
გნატრით შენ ქალწულო, ერთობით ჩუენ მორწმუნენი, გიხაროდენ უფლისა ბჭეო, გიხაროდენ შენ, ქალაქო სულიერო, რომელისა მიერ ჩუენცა გამოგუიჩნდა ნათელი, შენგან შობილისა აღდგომითა.
იშუებდ და იხარებდ საღმრთოო ნათლისა ბჭეო, რამეთუ რომელი იგი დაჰხდა საფლავსა შინა აღმობრწყინდა მზისა უბრწყინუალესი, და ყოველნი მორწმუნენი ნათელ-ჰყუნა იესო, დედუფალო უსძლოო.
ვერ შემძლებელ ვართ დიდებად შენდა, ჯერისაებრ ქუეყანისანი…
სხუა. ძლისპირი.
ვერ შემძლებელ ვართ დიდებად შენდა, ჯერისაებრ ქუეყანისანი, და მოუძლურდებიან ზეცისანი ღმრთის-მშობელო, რამეთუ უზესთაეს იქმენ, შეიწირე სარწმუნოება ჩუენი, უწყით სიყუარული შენი, და ვითარცა ნათელსა ქრისტეანობისასა გადიდებთ.
ჯუარსა ზედა რა დამსჭუალულ იყავ, ავაზაკმან ღმერთად გიცნა მხსნელო და ხმა-ჰყო ძლიერად: მომიხსენე ოდეს მოხჳდე ყოვლად-ძლიერო მეუფეო, ამისთჳს გამოაჩინე იგი სასუფეველისა მკჳდრად, ჩუენცა მის თანა ღირს მყუენ სასუფეველსა შენსა მოწყალე.
რომელმან ჩუენთჳს, ყვრიმლის-ცემა, და ნერწყუა, თავს-იდევ იესო უსჯულოთა ჰურიათა მიერ, რომელმან ფიცარნი რჯულისანი მისცენ, სინასა მთასა ნების მყოფელსა, შენსა მოსეს, შეგვიწყალენ ჩუენ ქრისტე ღმერთო ჩუენო, რომელსა გადიდებთ.
ძმარი და ნაღუელი ჰსუ შენ ჩემთჳს ძელსა ზედა დამოკიდებულმან, რათა განკურნო პირველისა მის ხისა საცთური მაცხოვარ, და ჩუენ მოგუანიჭო ხორცი და სისხლი შენი პატიოსანი საჭმლად და სასმლად უკუდავად და მომატყუებელად ცხოვრებისა მის საუკუნოჲსა.
განიგმირე რა მხედართა მიერ ლახურითა გვერდით ცხოველს-მყოფელით, სისხლი და წყალი უხრწნელებისა აღმოგვიცენე ვითარცა ცხოველმან წყარომან მდინარემან უკუდავებისამან, რომელითა ცხოვნდა სოფელი, და გადიდებს შენ ორითა ბუნებითა სრულითა.
შეირაცხე შენ, ვითარცა მკუდარი, მკუდართა თანა თავისუფალი, ქრისტე მეუფეო, რომელმან განაცხოველენ მკუდარნი, და საფლავსა დაიდევ, რომელმან დააცალიერენ საფლავნი, წარმოსტყუენე ჯოჯოხეთი, და აღადგინე ადამი, დასჯილი შვილითურთ ყოვლად-ძლიერო.
აღდეგ რა ქრისტე, ღმერთო, საფლავით, მოიკლა მტერი სიკუდილი და წარმოიტყუენა სულთა დამსჯელი ჯოჯოხეთი, და მთავარნი ქუესკნელისანი დაეცნეს და აღდგენ მკუდარნი საფლავით და მადლობით გადიდებდეს, თაყუანის-გცემდეს თანა მამით და სულით-წმიდითურთ.
ვინ წარიპარა ქრისტე უღმრთონო ჰურიანო, რასა სცდებით თქუენ, ანუ ვინ წარიპარავს მკუდარსა შიშუელსა უსჯულონო, და განაშიშულებს სახუეველთაგან, და ცხებულსა მურითა და ალოითა. ქრისტე აღდგა ჭეშმარიტად, და შემუსრნა კლიტენი, და მოქლონნი ჯოჯოხეთისანი.
დიდება შენდა, ქრისტე მაცხოვარ, რომელმან მოგუმადლე ცხოვრება, და ბნელსა შინა უმეცრებისასა მსხდომარეთა ნათელი საღმრთო მოგუფინე, და განანათლე ყოველი სოფელი აღდგომითა შენითა დღეს, და მიხსენ მიმძლავრებულნი, ხელთაგან ეშმაკისათა.
შუენიერი მზრახუელი იოსებ გალობდინ მენელსაცხებლეთა თანა, და საღმრთოთა მოწაფეთა ქრისტესთა, რომელთა ჭეშმარიტად ქადაგეს ქრისტეს აღდგომა.
იოსებს საკჳრუელსა ვაქებდეთ მორწმუნენო, და მის თანა ნიკოდიმოსს, ეგრეთუე მენელსაცხებლეთა დედათა და მათდა მიმართ, ჩუენცა ღაღად-ვჰყოთ, ჭეშმარიტად აღდგა უფალი, და მოგუმადლა მოტევება ცოდუათა.
დაუსაბამო არს ღმერთი, მამა დაუბადებელ, ძე ღმერთი…
დიდება. სამების
დაუსაბამო არს ღმერთი, მამა დაუბადებელ, ძე ღმერთი და თანა მოსაყდრე დაუბადებელ ღმერთი სული-წმიდა, და სამნივე ერთ-ბუნებითა, ხოლო სამ ხატოვან გუამოვნებითა, სამებით იდიდებიან, და ერთ ღმრთაებით ძრწოლით, თაყუანის-იცემებიან მორწმუნეთაგან.
იხარებდინ იესე, და განსცხრებოდენ დავით, რამეთუ აჰა…
აწ და. ღმრთის-მშობლისა.
იხარებდინ იესე, და განსცხრებოდენ დავით, რამეთუ აჰა ქალწულმან მუცლად იღო, და აღმოაცენა კუერთხი იგი ღმრთივ-აღმოცენებული, ყუავილი მარადის ცხოვრებისა ქრისტე.
განათლდი, განათლდი, ახალო იერუსალიმ, დღეს დიდება უფლისა…
კატავასია
განათლდი, განათლდი, ახალო იერუსალიმ, დღეს დიდება უფლისა შენ ზედა გამობრწყინდა, განსცხრებოდე და იხარებდ სიონ, და აწ შენცა, იშუებდი ღმრთის-მშობელო, აღდგომასა ძისა შენისასა.
ხორცითა მიიძინე ვითარცა მოკუდავმან და მეუფემან და…
ესრეთ წმიდა არს უფალი, ღმერთი, ჩუენი. ხმასა ზედა ბ. განმანათლებელი პასექისა.
ხორცითა მიიძინე ვითარცა მოკუდავმან და მეუფემან და უფალმან და მესამესა დღესა აღდეგ და ადამი თანა აღადგინე ხრწნილებისაგან, და სიკუდილი დახსენ, პასექო უხრწნელებისაო, სოფლისა მაცხოვარო.
დედანო ყურად-იღეთ ხმაჲ სიხარულისა, რამეთუ მძლავრი ჯოჯოხეთი…
დიდება მენელსაცხებლეთა.
დედანო ყურად-იღეთ ხმაჲ სიხარულისა, რამეთუ მძლავრი ჯოჯოხეთი დავსთრგუნე, და ხრწნილებისაგან აღუადგინე სოფელი, მიისწრაფეთ და უთხართ მეგობართა ჩემთა, ხარებად, რამეთუ მნებავს დაბადებულთა სიხარულისა ჩუენებაჲ, ვინაჲთგან წარხდა მწუხარებაჲ.
ყოველი სული და ყოველი დაბადებული შენ გადიდებს…
აწ და. იგივე. ყოველი სული. აქებდითსა ზედა აღვიღებთ მუხლთა 8. დასდებენი აღდგომისა მუხლი დ. ხმა ბ. მუხლი. დიდება ესე არს ყოველთა წმიდათა მისთა.
ყოველი სული და ყოველი დაბადებული შენ გადიდებს უფალო, რამეთუ ჯუარისა მიერ სიკუდილი მოაკუდინე, რათა უჩუენო ერთა მკუდრეთით აღდგომაჲ შენი, ვითარცა მხოლო კაცთ-მოყუარე ხარ.
სთქუთღა უკუე ჵ ჰურიანო, ვითარ მხედართა წარწყმიდეს…
აქებდით ღმერთსა წმიდათა შორის მისთა, აქებდით მას სამყაროჲთა ძალისა მისისათა.
სთქუთღა უკუე ჵ ჰურიანო, ვითარ მხედართა წარწყმიდეს მეფე, რომელსა სცვიდეს, ანუ რასა ლოდმან არა დამარხა კლდე ცხოვრებისა, ანუ დაფლული მოგუეცით, ანუ აღდგომილსა თაყუანის-ეცით, და სთქუათ ჩუენთანა, დიდება სიმრავლესა წყალობათა შენთასა, მაცხოვარო ჩუენო დიდება შენდა.
გიხაროდენ ერნო და მხიარულ იყუენით, ანგელოზი ჯდა…
აქებდით მას ძლიერებითა მისითა, აქებდით მას მრავლითა სიმდიდრითა მისითა.
გიხაროდენ ერნო და მხიარულ იყუენით, ანგელოზი ჯდა ლოდსა ზედა საფლავისასა, და მან გუახარა ჩუენ და თქუა: ვითარმედ აღდგა ქრისტე მკუდრეთით, მაცხოვარი სოფლისა, და აღავსო ყოველივე სუნნელებითა, გიხაროდენ ერნო და მხიარულ-იყუენით.
ანგელოზმან პირველ მუცლად-ღებისა შენისა უფალო, გიხაროდენი სახარულევანსა…
აქებდით მას ხმითა ნესტჳსაჲთა, აქებდით მას ფსალმუნითა და ებნითა.
ანგელოზმან პირველ მუცლად-ღებისა შენისა უფალო, გიხაროდენი სახარულევანსა მოართუა ანგელოზმანვე ლოდი, დიდებულსა საფლავსა შენსა აღდგომასა გარდააგორა, მან მწუხარებისა წილ სიხარულისა სასწაული გუაუწყა, ხოლო ამან სიკუდილისა წილ ცხოვრების-მომცემელი ღმერთი გვიქადაგა ჩუენ, ამისთჳს გიღაღადებთ შენ, ქუელის-მოქმედო ყოველთაო უფალო დიდება შენდა.
ნელსაცხებელი შეზავეს ცრემლითა, საფლავსა შენსა ზედა დედათა…
აქებდით მას ბობღნითა, და მწყობრითა, აქებდით მას ძნობითა და ორღანოჲთა. და აღმოსავლური მუხლი დ.
ნელსაცხებელი შეზავეს ცრემლითა, საფლავსა შენსა ზედა დედათა, ხოლო აღივსნეს პირნი მათნი სიხარულითა, რაჟამს რქუეს მათ აღდგა უფალი მკუდრეთით.
აქებდით ერნი და ნათესავნი ქრისტესა ღმერთსა, ჩუენსა…
აქებდით მას წინწილითა კეთილ ხმითა, აქებდით მას წინწილითა ღაღადებისაჲთა. ყოველი სული აქებდით უფალსა.
აქებდით ერნი და ნათესავნი ქრისტესა ღმერთსა, ჩუენსა, რომელმან ნებსით ჯუარცმა დაითმინა, და სამდღე ქუესკნელად შთავიდა, და თაყუანის--სცემდით მისსა მკუდრეთით აღდგომასა, რომელისა მიერ განათლდეს ყოველნი კიდენი ქუეყანისანი.
ჯუარს-ეცუ და დაეფალ, ვითარცა ინებე ქრისტე ღმერთო…
აღდეგ უფალო, ღმერთო, ჩემო, ამაღლდინ ხელი შენი და ნუ დაივიწყებ გლახაკთა შენთა სდ̅.
ჯუარს-ეცუ და დაეფალ, ვითარცა ინებე ქრისტე ღმერთო, ხოლო წარმოსტყუენე სიკუდილი, და აღდეგ დიდებით ვითარცა ღმერთი და მეუფე, და მოანიჭე სოფელსა ცხოვრება საუკუნო და დიდი წყალობაჲ.
ჭეშმარიტად ჵ უსჯულონო, დარაბეჭდეთ ლოდსა მას, უაღრესთა…
აღგიარო შენ უფალო ყოველითა გულითა ჩემითა და მიუთხრა მე ყოველი საკჳრუელება შენი. ხოლო ესე ჩასართავნი ითქმიან ყოველსა კჳრიაკესა შინა.
ჭეშმარიტად ჵ უსჯულონო, დარაბეჭდეთ ლოდსა მას, უაღრესთა საკჳრუელებათა ღირს მყუენით ჩუენ, და იციან ესე მცუელთა მათ, რამეთუ დღეს გამოვიდა უფალი სამარით, და ეტყოდა მათ რათა თქუან, ვითარმედ ვ̅ეღა ჩუენ მეძინა, მოვიდეს მოწაფენი მისნი და წარიპარეს იგი, მკუდარი უფროსღა და შიშუელი, არამედ თავადი აღდგა, თჳთ ხელმწიფებით ვითარცა თქუა, და დაუტევა საფლავსა შინა და საფლავი თჳსი ვითარცა ღმერთი-არს. მოვედით და იხილეთ ჵ ჰურიანო, რამეთუ არა განხეთქა ბეჭედნი, რომელმან სიკუდილი დათრგუნა, და ნათესავსა კაცთასა, დაუსრულებელი ცხოვრება მოანიჭა, და დიდი წყალობაჲ.
მარიამის თანა ნელსაცხებელითა მოვიდეს დედანი, და განიზრახჳდეს…
დიდება. ხმა ბ. გერი სახარებისა.
მარიამის თანა ნელსაცხებელითა მოვიდეს დედანი, და განიზრახჳდეს რა იგინი, ვითარ ღირს იქმენ ხილუად საწადელისა, აღებულ იქმნა ლოდი, და საღმრთომან ჭაბუკმან დააცხრო გლოვაჲ მათი, და შფოთი სულისა მათისა, რამეთუ რქუა მათ აღდგა ქრისტე ღმერთი, და აწ უქადაგეთ ქადაგთა მისთა, რათა წარვიდენ გალილიას, და მუნ იხილონ იგი მკუდრეთით აღდგომილი, ვითარცა ღმერთი-არს.
უმეტესად კურთხეულ ხარ შენ
აწ და.
უმეტესად კურთხეულ ხარ შენ.
შუენიერმან იოსებ
დიდება მაღალი გრძლად. კუერექსი. და განტევება. და ჩვეულებისაებრ განსვლა სტოასა შინა ჟამი ა. და სრული განტევებაჲ. ჟამთა ზედა, ტროპარი აღდგომისა. დიდება.
შუენიერმან იოსებ.
აწ და. ღმრთის-მშობლისა, ჟამნობისა
აწ და. ღმრთის-მშობლისა, ჟამნობისა. შემდგომად წმიდაო ღმერთოსა, კონდაკი. ნელსაცხებლის მიმღებელთა. ესრეთვე ვიტყვით და სხუათაცა ჟამნობათა ზედა.
მომიხსენენ ჩუენცა სახიერ, ვითარცა მოიხსენე ავაზაკი იგი…
მომიხსენენი ხმისა მუხლი დ. ხმა ბ.
მომიხსენენ ჩუენცა სახიერ, ვითარცა მოიხსენე ავაზაკი იგი, შენსა ზეცისა სასუფეველსა.
ხისა მიერ განიდევნა ადამი სამოთხით, ხოლო ჯუარითა შევიდა ავაზაკი ზეცისა სასუფეველსა.
საფლავმან დაგფარა მაცხოვარ, რომელმან საფლავნი დააცალიერენ, და მკუდართა ცხოვრება მიანიჭე, ვითარცა ღმერთმან და მეუფემან.
მოციქულნო დიდებუნო ქრისტესნო, მას მხოლოსა ევედრენით ცოდუათა ჩუენთა შენდობისათჳს, რათა განსაცდელთაგან გვიხსნეს ჩუენ მეუფემან.
შენ ქრისტე არმენაკითა წმიდითა წარგრაგნა იოსებ შუენიერმან…
და კანონისაგან დღისა, გალობა ვ. მუხლი დ.
შენ ქრისტე არმენაკითა წმიდითა წარგრაგნა იოსებ შუენიერმან, და დაგდუა საფლავსა და ნელსაცხებელი გცხო პატივად დაფლვისა შენისა, და მიაგორა ლოდი დიდი კარსა მას საფლავისასა.
აღდგა და წარმოტყუენა ჯოჯოხეთისა ბჭენი და აღმოიყუანნა მუნით პყრობილნი, და აღადგინნა ყოველნი, და ეგრეთუე პირველ შექმნილი ადამი განათავისუფლა ვითარცა სახიერმან და კაცთ-მოყუარემან ღმერთმან.
უგალობდეთ ერნო ძისა თანა მამასა, და სულსა-წმიდასა…
დიდება. სამების
უგალობდეთ ერნო ძისა თანა მამასა, და სულსა-წმიდასა ბრწყინუალედ ვადიდებდეთ, შეურევნელად, და განუყოფელად სამებასა წმიდასა დიდების ვმეტყველებდეთ, და ზეცისა ძალთა თანა სამ წმიდითა ხმითა ვაქებდეთ.
მუცლად-იღე სძალო უშრომელად უხრწნელებისა ტევანი, ვითარცა რა…
აწ და.
მუცლად-იღე სძალო უშრომელად უხრწნელებისა ტევანი, ვითარცა რა ვენახმან, რომელისა მიერ უკუდავებისა ტევანი მსგავსად ღვინისა მდიდრად აღმოგვიცენებენ საუკუნესა ცხოვრებასა და ვნებასა სიმთურალესა წარღუნიან.
რაჟამს შთახედ საფლავად
შემდგომად შესლვისა, ტროპარი.
რაჟამს შთახედ საფლავად.
შუენიერმან იოსებ.
დაღაცათუ ნებსით თჳსით, საფლავად შთახედ უკუდავი, არამედ…
დიდება კონდაკი ზატიკისა და აწ და პასექისა.
დაღაცათუ ნებსით თჳსით, საფლავად შთახედ უკუდავი, არამედ ჯოჯოხეთისა იგი ძალი დაარღვიე, და აღდეგ ვითარცა მძლე ქრისტე, ღმერთო, ხოლო მენელსაცხებლეთა დედათა ხარებაჲ მიჰმადლე, და მოციქულთა მშჳდობაჲ მიანიჭე, რომელმან დაცემულთა მიეც აღდგომაჲ.
ხორცი ქრისტესი მოვიღოთ, და უკუდავებისა წყაროსა გემო…
სამოციქულო. საქმე მოციქულთა, დასაწყისი ივ. სახარება, მარკოზისი, დასაწყისი ჲთ. განიცადე.
ხორცი ქრისტესი მოვიღოთ, და უკუდავებისა წყაროსა გემო ვიხილოთ.
აქებდით უფალსა ცათაგან, აქებდით მას მაღალთა შინა.
გადიდებთ თქუენ წმიდანო მენელსაცხებლენო, და პატივს-ვცემთ წმიდასა…
უკუეთუ იყოს სადამე ტაძარი წმიდათა მენელსაცხებლეთა დედათა. მცირესა, და დიდსა მწუხრსა ზედა, და ცისკრად, და ლიტურგიასა ზედა, ვგალობთ ყოველსავე მსგავსად, ტიპიკონისაებრ წმიდისა დიდისა მოწამისა გიორგისა. გარნა მწუხრად წავიკითხავთ საკითხავსა, რომელი წერილ არს კჳრიაკესა ყოველთა წმიდათასა. ცისკრად შემდგომად სადიდებელისა, გადიდებსსა ვგალობთ ესრეთ.
გადიდებთ თქუენ წმიდანო მენელსაცხებლენო, და პატივს-ვცემთ წმიდასა ხსენებასა თქუენსა, რამეთუ თქუენ ხართ მეოხნი ჩუენნი, წინაშე ქრისტეს ღმრთისა ჩუენისა
ნეტარ არს კაცი, რომელსა ეშინის უფლისა
ფსალმუნი
ნეტარ არს კაცი, რომელსა ეშინის უფლისა.
და შემდგომი
და შემდგომი.