გულანი
საცდელი · 1.37.0
ხმა 5 · ორშაბათი 1 / 84ვაჲ ჩემდა განმარისხებელსა შენ მოწყალისა ღმრთისა და…

ხმა 5 · ორშაბათი

რვა ხმა

პარაკლიტონი · დაახლ. 25 წთ

ვაჲ ჩემდა განმარისხებელსა შენ მოწყალისა ღმრთისა და…

მწუხრად, დასდებელნი მსგავსნი სამეუფონი, ჴმა ე. გიხაროდენი.

ვაჲ ჩემდა განმარისხებელსა შენ მოწყალისა ღმრთისა და უფლისა, რაოდენ გზის აღგითქუ შენანებად ქრისტე, და მტყუარ ვიპოვე უგუნური, შევბღალე უკუე პირუელი სამოსელი ნათლის-ღებისა, და აღთქმული ჩემი შენდამი დაუტევე, და მეორე ესე კუალად აღთქმული, რომელი აღგიარე შენ წინაშე ანგელოსთა და კაცთა ხატითა მგლოვარითა შემოსილმან, რომლისა დამტევებელა მაცხოვარ, ნუ მიტევებ მე წარწყმედად ვიდრე აღსასრულადმდე:

ვითარსამე უუე მისაგებელსა ჰპოებ უბადრუკო სულო დღესა შინა სასჯელისასა, და ანუ ვინმე გიჴსნას შენ დასჯისაგან და ცეცხლისა საუკუნოჲსა, და სხუათა სატანჯუელთა, არავინ, უკეთუ შენ არა მოწყალე-ჰყო სახიერ, დატევებითა ბოროტთა საქმეთა შენთათა, და მოგებითა კეთილ-სათნოჲსა ცხოვრებისათა და ტირილითა მარად-დღე უზომოთათჳს ცოდუათა შენთა, რომელთაცა იგი ყოველსა ჟამსა ჰსცოდავ საქმით და სიტყჳთ და გონებით, მვედრებელი ქრისტესი მოცემად შენდა სრულიადისა მოტევებისა მათისა:

ნუმცა შემიპყრობს მე მაცხოვარ მიმზიდუელი იგი ჩუეულებაჲ ცოდჳსა, ნუმცა უფლებს ჩემ ზედა ეშმაკი მბრძოლი მარადის, მიმყუანებელი ნებისა მიმართ თჳსისა, არამედ გამომიტაცე მე ჴელმწიფებისაგან მისისა, ძლიერითა ჴელითა შენითა ყოვლად ძლიერო, და ჰსუფევდ ჩემ შორის კაცთ-მოყუარე, და ყოვლითურთ ყოფად შენდა და ცხოვრებად ნებისაებრ შენისა ღირს-მყავ მე სიტყუაო, და ქონებად შენ შორის განსუენებისა და პოვნად ჩემდა განწმედისა და დიდისა წყალობისა:

ვნებანი ბიწიანნი მტანჯუენ მე, და დააბნელებენ გუგათა…

სხუანი დასდებელნი, უჴორცოთანი. ჴმა იგივე. მსგავსნი.

ვნებანი ბიწიანნი მტანჯუენ მე, და დააბნელებენ გუგათა გულისა ჩემისათა, და გზათა საცხოვრებელთა ვერ შემძლებელ-ვარ ხედუად, რამეთუ მარადის შევჰსცთები და თავ-დამოქცევით შთავვარდები სიღრმეთა შინა ჯოჯოხეთისათა, გარნა ვიგონებ რა საკჳრუელებათა თქუენთა მთავარ-ანგელოსნო, განჳკურნები სალმობათაგან ჩემთა ყოველთა, ისწრაფეთ დაშრეტად ალისა ვნებათა ჩემთასა, რათა ვიხილო მე მსწრაფლი შეწევნაჲ თქუენი, და ნათლისა მიმართ საცხოვრებელისა მიძღოდეთ:

აღსავალი უკუე შესწორებული დიდებისა აქუნდა თქუენ თანა ბოროტსა ეშმაკსა, და ნათელშემოსილ გამოსჩნდებოდა იგი თქუენთანავე მთავარ-ანგელოსო, გარნა სიბოროტისა მიერ ვითარცა წინა-აღმდგომი გარდამოვარდა ქუეყანასა ზედა, და დაბნელდა სიბნელესა შინა, და აწ ისწრაფის თავისა მიმართ თჳსისა მიტაცებად ჩემდა, გამომიჩნდით მე უბადრუკსა შუამდგომელად შემწედ და შესავედრებელად ბრძენნო, და იოტეთ ჩემდა ცხოვრებაჲ და დიდი-წყალობაჲ:

შექმნულისა ხატად ღმრთისა, და აღრაცხილისა თქუენ თანა არა ჯერ-იყო ჩემდა მსახურებად საძაგელისა მტერისა, არამედ ნებსით დავემონე მას, და განვჰყარენ მცნებანი, და მოვაკლდი პატივსა შემოქმედისა ჩემისასა, მხედუელთა ვნებათა მისთა მონა-ქმნისა ჩემისათა, მომეცით მე ჴელი შეწევნისა წმიდანო მთავარ-ანგელოსნო, და სიღრმისაგან წარწყმედისა აღმომიყუანეთ, და ნათლისა მიმართ მიძღოდეთ, და იოტეთ რათა მივემთხჳო პირუელსავე სიკეთესა დიდებისასა:

გამომიბრწყინუე მე ნათელი, ბნელსა შინა ვნებათასა მდებარესა…

დიდება, აწდა. ღმრთის-მშობელოსა. მსგავსი.

გამომიბრწყინუე მე ნათელი, ბნელსა შინა ვნებათასა მდებარესა, რომელმან ჰშევ, ღმერთი ნათელი უვნებელობისა, ჴორცითა ქალწულო, და სიღრმისაგან ბრალთა, ჩემთასა და სასოწარკუეთილებისაგან, კლდესა ზედა ცხოვრებისასა აღმამაღლე, და დაამტკიცენ, სულისა ჩემისა, სლუანი, საჯენ მავნებელნი ჩემნი, და ბრძოდე მბრძოლთა ჩემთა, და დააცხრუენ ტკივილი, უძლურისა გულისა ჩემისა, ღირსო ყოველთა კიდეთა, სოფლისათა სასოო, და მომანიჭე, დიდი-წყალობაჲ:

უფალო ცოდუასა არა დავჰსცხრები, და კაცთ-მოყუარებისა შენისა…

სტიქარონსა ზედა, დასდებელნი სინანულისანი, ჴმა ე.

უფალო ცოდუასა არა დავჰსცხრები, და კაცთ-მოყუარებისა შენისა ღირს ყოფასა ვერ გულის-ჴმა-ვჰყოფ მძლე-ექმენ სიღრმესა ჩემსა, მხოლოო სახიერო და შემიწყალე მე:

უფალო შიშისა შენისაგან მეშინის, და ბოროტთა საქმედ არა დავსცხები, ვისმე სამსჯავროსა შინა მსაჯულისაგან არა ეშინის, ანუ ვისმე ჰნებავს განკურნება, და მკურნალსა განარისხებნ, ვითარმე სულ-გრძელო უფალო, უძლურებასა ჩემსა ზედა ლმობიერ-იქმენ და შემიწყალე მე:

რომელთა ქუეყანისა ყოველივე შეურაცხ-ჰყავ, და სატანჯუელთა ახოვნად…

მოწამეთა.

რომელთა ქუეყანისა ყოველივე შეურაცხ-ჰყავ, და სატანჯუელთა ახოვნად შებმა უყავთ, ნეტარისა მის სასოებისაგან არა განსცხუვენით, არამედ ზეცათა სასუფეველისა მკჳდრად გამოსჩნდით, ყოვლად ქებულნო მარტჳლნო და კადნიერებაჲ გაქუსთ, ღმრთისა მიმართ კაცთ-მოყუარისა, ითხოვეთ სოფლისათჳს მშჳდობაჲ, და სულთა ჩუენთათჳს დიდი-წყალობაჲ:

საშინელი დიდებული და დიდი საიდუმლო, დაუტევნელი საშოსა…

დიდება, აწდა. ღმრთის-მშობლისა.

საშინელი დიდებული და დიდი საიდუმლო, დაუტევნელი საშოსა დაიტია, და დედა შემდგომად შობისა კუალად ქალწულადუე დაადგრა, რამეთუ ღმერთი იშუა მისგან განკაცებული, მისსა მიმართ ჴმა-ვჰყოთ, მისსა ქება შევჰსწიროთ, და ანგელოსთა თანა უგალობდეთ წმიდა ხარ ქრისტე ღმერთო ჩუენო, რომელი ჩუენთჳს განჴორციელდი დიდება შენდა:

გალობასა ჟამსა, და ლოცჳსა ჟამსა, ვედრებით უღაღადოთ…

ორშაბათსა ცისკრად, რაჟამს იგალობებოდეს, ალლილუია. გალობა სამებისა, ჴმა ე.

გალობასა ჟამსა, და ლოცჳსა ჟამსა, ვედრებით უღაღადოთ მხოლოსა ღმერთსა ჩუენსა, წმიდა-ხარ, წმიდა-ხარ, წიდა-ხარ, შენ ღმერთო ჩუენო, ღმრთის-მშობელისა მიერ შეგჳწყალენ ჩუენ:

გამოხატჳთ ვიკადრებთ საცნაურთა შენთა მსახურთასა, სამებაო დაუსაბამოო, ბაგითა უღირსითა გიღაღადებთ და ვიტყჳთ, წმიდა-ხარ, წმიდა-ხარ, წმიდა-ხარ, შენ ღმერთო ჩუენო, ღმრთის-მშობელისა მიერ შეგჳწყალენ ჩუენ:

რომელი საშოსა ქალწულისასა დაიტიე, და წიაღთა მამისათა არა განეშორე, ანგელოსთა თანა ჩუენიცა შეიწირე ქრისტე ღმერთო გალობაჲ, წმიდა-ხარ, წმიდა-ხარ, წმიდა-ხარ, შენ ღმერთო ჩუენო, ღმრთის-მშობელისა მიერ შეგჳწყალენ ჩუენ:

რაჟამს მსაჯული იგი სიმართლისა დაჯდეს, და ბევრეულნი…

ორშაბათსა ცისკრად, შემდგომად ა. სტოხოლოგიისა, წარდგომანი სინანულისანი, ჴმა ე.

რაჟამს მსაჯული იგი სიმართლისა დაჯდეს, და ბევრეულნი ანგელოსნი წინაშე დგენ, საყჳრი იგი დიდი ჰჴმობდეს, და სახმილი იგი ცეცხლისა ეგზებოდეს, რაჲმე ჰყო შენ სულო ჩემო, მიგიყუანებდენ რა განკითხუად, რამეთუ მაშინ ბოროტნი შენნი, წარმოგიდგებიან და დაფარულნი ცოდუანი გემხილებიან, აწ უკუე პირუელ აღსასრულისა ლმობიერად ღაღადებდი, ვჰსცოდე ღმერთო ჩემო და შემიწყალე მე:

სულო ჩემო საწყალობელო, საწუთო ესე წარმავალ-არს, და…

უფალო ნუ გულის-წყრომითა შენითა მამხილებ მე და ნუცა რისხჳთა შენითა მჰსწავლი მე:

სულო ჩემო საწყალობელო, საწუთო ესე წარმავალ-არს, და საუკუნო იგი წარუვალ ვხედავ სამსჯავროსა და საყდართა ზედა მსაჯულსა, და ვჰსრძწი განჩინებისაგან, აწ უკუე ისწრაფე მოქცევა სინანულად სულო ჩემო, რამეთუ სასჯელი იგი თანა წარუვალ-არს:

მჴურუალედ შუამდგომელო, და უძლეველო სასოებაო საცნაურო და…

დიდება, აწდა. ღმრთის-მშობლისა. თანა დაუსაბამოსა.

მჴურუალედ შუამდგომელო, და უძლეველო სასოებაო საცნაურო და ურცხუენელო, ზღუდეო და საფარუელო და ლიმენაო შენდამი მოლტოლჳლთაო, მარადის ქალწულო წმიდაო, ძესა შენსა და ღმერთსა ევედრე ანგელოსთა თანა, სოფლისა მოცემად მშჳდობაჲ და ცხოვრებაჲ და დიდი წყალობაჲ:

ყოველნი ვიღჳძებდეთ და ქრისტესა მივეგებოდეთ, მორწმუნენო სიმრავლითა…

შემდგომად ბ. სტიხოლოღიისა, წარდგომანი, სინანულისანი, ჴმა ე.

ყოველნი ვიღჳძებდეთ და ქრისტესა მივეგებოდეთ, მორწმუნენო სიმრავლითა ზეთისათა, და ლამპრითა ბრწყინუალითა, რათა სასძლოსა მას შინაგან ღირს-ვიქმნნეთ, რამეთუ რომელი კარსა გარეგან დაშთეს, ურგებად ჰჴმობდეს ღმრთისა მიმართ, შემიწყალე მე უფალო:

ცხედარსა ზედა მდებარე-ვარ მრავალთა ცოდუათასა, და სასოებაჲ…

მიწყალე მე უფალო, რამეთუ უძლურ ვარ, განმკურნე მე:

ცხედარსა ზედა მდებარე-ვარ მრავალთა ცოდუათასა, და სასოებაჲ მიმიღებიეს კეთილისა ცხოვრებისა, რამეთუ ძილი მცონერებისა ჩემისა მოატყუებს სულსა ჩემსა სატანჯუელთა, არამედ შენ ქრისტე ღმერთო რომელი იშევ ქალწულისაგან, აღმადგინე გალობად შენდა რათა გადიდებდე:

უწმიდესად ხერუვიმთა, და უმაღლესად ცათა ყოვლად საგალობელო…

დიდება, აწდა. ღმრთის-მშობლისა.

უწმიდესად ხერუვიმთა, და უმაღლესად ცათა ყოვლად საგალობელო ღმრთის-მშობელო, ჭეშმარიტად აღგიარებთ შენ, რამეთუ გპოვეთ ჟამსა ჭირისასა მეოხად, და გუაქუ ცოდჳლთა შესავედრებელად, ამისთჳს ნუ დაიდუმებ ჩუენთჳს მეოხებასა, სიმტკიცეო და შესავედრებელო სულთა ჩუენთაო:

მეშინის სასჯელისა და განუკრთები განგდებისა მსაჯულისა მიერ…

შემდგომად გ. სტიხოლოგიისა წარდგომანი სინანულისანი. ჴმა ე. თანა დაუსაბამოსა.

მეშინის სასჯელისა და განუკრთები განგდებისა მსაჯულისა მიერ, რამეთუ სჳნიდისი ჩემი მარადის მამხილებს მე, ვინადგან მედგრობასა შინა წარულე ყოველი ცხოვრებაჲ ჩემი, გარნა თქუენ წმიდანო მთავარ-ანგელოსნო მორწმუნეთა შემწენო, მიჴსენით ცეცხლისაგან, მჴურუალითა მეოხებითა თქუენითა:

ბრწყინავს დღეს საჴსენებელი ღუაწლით-შემოსილთა მოწამეთა, რამეთუ ბრწყინუალებაჲ…

მოწამეთა. დიდება შენდა, ღმერთო ჩუენო, დიდება შენდა:

ბრწყინავს დღეს საჴსენებელი ღუაწლით-შემოსილთა მოწამეთა, რამეთუ ბრწყინუალებაჲ საღმრთო ჰმოსიესთ ზეგარდამო, და გუნდნი ანგელოსთანი დღესასწაულობენ, და ძენი კაცთანი უგალობენ, ამისთჳსცა ევედრებიან იგინი მჴურუალედ შეწყალებად სულთა ჩუენთათჳს:

ზეცით მოგართუა შენ გაბრიილ, ქუეყანასა ზედა, სიხარული…

დიდება, აწდა. ღმრთის-მშობლისა. მსგავსი, თანა დაუსაბამოსა.

ზეცით მოგართუა შენ გაბრიილ, ქუეყანასა ზედა, სიხარული უკუე საკჳრუელი, რამეთუ შემოქმედისა ანგელოზთასა მუცელსა შინა შენსა განჴორციელებისა მხედუელი, სახარულევანსა გალობასა გიღაღადებდა შენ უბიწოო, მასწავლელი ყოველთა, რამეთუ შენ მხოლო გამოსჩნდი ყოველთა კაცთა მიმართ მიზეზ სიხარულისა:

მჴსნელსა ჩუენსა ღმერთსა, რომელმან განიყუანა, დაულტოლუელად ერი…

ორშაბათსა. კანონი სინანულისა. უფლისა. იოსებისა. გალობა ა. სძლისპირი.

მჴსნელსა ჩუენსა ღმერთსა, რომელმან განიყუანა, დაულტოლუელად ერი თჳსი ზღუასა და ფარაო მჴედრებითურთ დაანთქა სიღრმესა, მას მხოლოსა უგალობთ, რომელიცა დიდებულ-არს:

მრავლითა საცთურითა, მტერისათა ძლეული, და შთავრდომილი მახეთა…

ტროპარნი.

მრავლითა საცთურითა, მტერისათა ძლეული, და შთავრდომილი მახეთა მათ მისთა, მომაქციე და შემიწყალე ქრისტე ღმერთო ჩემო, ვითარცა ხარ მხოლო ძლიერი და მრავალ-მოწყალე:

ქრისტე ღმერთო ჩემო, რომელმან ყრუსა ყურნი, განუხუენ პირუელ მეცა გევედრები, სულისა ჩემისა ყურნი ყრუნი და უსმნი აწ მსმენელ-ჰყუენ, რათა ყურად-იხუენ სიბრძნით, სიტყუანი შენნი:

მზისა სიმართლისა, მთიებნო ბრწყინუალენო, ყოვლად ქებულნო მჴნენო…

მოწამეთა.

მზისა სიმართლისა, მთიებნო ბრწყინუალენო, ყოვლად ქებულნო მჴნენო მოწამენო, დაჰჴსენით ბნელი წყუდიადი და გონებანი და გულნი ჩუენნი, ბრწყინუალედ განანათლენით ღირსნო:

სულისა წმიდისა, საღმრთოთა ნაკუერცხალთა, მჴურუალედ აღტყინებულთა ისართა მტერისათა, ქრისტეს მოწამეთა ვეშაპისათა, მის გულარძნილისა, ყოველნი ისარნი შეჰმუსრნეს:

ბჭეო საღმრთოსა მის, დიდებისაო ბჭენი, სინანულისა საწადელისანი…

ღმრთის-მშობლისა.

ბჭეო საღმრთოსა მის, დიდებისაო ბჭენი, სინანულისა საწადელისანი განმიხუენ და ბჭეთა მათგან ჯოჯოხეთისათა, განარინე აღუსებული ცოდჳთა სული ჩემი:

გალობა ანგელოსთა მიმართ მეხუთე

სხუა, კანონი უჴორცოთა. რომლისა კიდურ-წერილობაჲ.

გალობა ანგელოსთა მიმართ მეხუთე.

ქადაგნო ღმერთ-მთავრობისანო, ანგელოსთა ძალნო, და ნათლითა მისითა…

გალობა ა. ჴმა ე. სძლისპირი. ეტლთა სიმრავლე.

ქადაგნო ღმერთ-მთავრობისანო, ანგელოსთა ძალნო, და ნათლითა მისითა ბრწყინუალედ განათლებულნო, ევედრებით მას რათა განანათლოს, სული ჩემი დაბნელებული და განაბრწყინუოს:

ვითარცა წინაშე მდგომელთა, საყდართა მაღალთა, გაქუსთ თქუენ კადნიერებაჲ, მთავარნო ანგელოსთანო, სარწმუნოებით მგალობელნი თქუენნი, ჭირთაგან გამპოგჳჴსნენით, ღმრთიუ-ბრწყინუალენო:

დაჰჴსნდეს წყევანი ევასნი, და მწუხარებანი, რამეთუ კურთხეული…

ღმრთის-მშობლისა.

დაჰჴსნდეს წყევანი ევასნი, და მწუხარებანი, რამეთუ კურთხეული, და სანატრელი ქალწული, გამოჩნდა ძირისაგან დავითისა, მორწმუნეთა სიხარულად რომელსა უგალობთ:

ძალითა ჯუარისათა ქრისტე, განმაძლიერე დიდებად შენდა, რათა…

გალობა გ. სძლისპირი.

ძალითა ჯუარისათა ქრისტე, განმაძლიერე დიდებად შენდა, რათა უგალობდე მარადის ღუთაებასა შენსა მოწყალე:

რომელსა არავისი გნებავს, წარწყმედაჲ სახიერო უფალო, მე…

ტროპარნი.

რომელსა არავისი გნებავს, წარწყმედაჲ სახიერო უფალო, მე წარწყმედული მომიძიე, და მაცხოვნე მრავალ-მოწყალე:

ქა҃ უწყი სახიერო, ცნობით და უცნობელად შეგცოდე, ამისთჳს შიშით შეგივრდები, შემიტკბე მსგავსად უძღებისა:

რათა მოაკუდინოთ თქუენ ცოდუაჲ, და მოჰკლათ მტერი…

მოწამეთა.

რათა მოაკუდინოთ თქუენ ცოდუაჲ, და მოჰკლათ მტერი ქრისტეს მარტჳლნო, არა ზრუნევდით ჴორცთა თქუენთა, სიკუდილისათჳს დიდებულნო:

შემკულნი ვნებათა ზეთითა და სისხლთა თქუენთა ძოწეულითა, ქრისტეს მეუფისა წინაშე გჳრგჳნოსანნი სდგათ მარტჳლნო:

ქალწულო ღმრთისა დამტევნელო, ჴმა მუედრებელთა შენთა ისმინე…

ღმრთის-მშობლისა.

ქალწულო ღმრთისა დამტევნელო, ჴმა მუედრებელთა შენთა ისმინე და მრავალ-სახეთა ჭირთაგან, გჳჴსნენ მხოლოო კურთხეულო:

რომელმან, დააფუძნე ქუეყანაჲ წყალთა ზედა, და მიეც…

სხუა. სძლისპირი.

რომელმან, დააფუძნე ქუეყანაჲ წყალთა ზედა, და მიეც, ნაყოფიერება ყოვლადუე, კლდესა ზედა ქრისტე, მცნებათა შენთასა შეუძრავსა, დაამტკიცე ეკკლესიაჲ შენი, მხოლოო სახიერ და კაცთ-მოყუარე:

რომელმან, მგალობელნი ზეცისა მჴედრობათანი, დაჰბადენ, სიტყჳთა სიბრძნისა…

ტროპარნი.

რომელმან, მგალობელნი ზეცისა მჴედრობათანი, დაჰბადენ, სიტყჳთა სიბრძნისა შენისათა, რათა საცნაურ-ჰყო სიტკბოებაჲ შენი მიუწთომელი, მათ მიერ შეზღუდე ეკკლესიაჲ შენი, მხოლოო სახიერ და კაცთ-მოყუარე:

დედა ღმრთისა იქმენ შენ უმამაკაცოდ, რომელი უჴორცოთა…

ღმრთის-მშობლისა.

დედა ღმრთისა იქმენ შენ უმამაკაცოდ, რომელი უჴორცოთა გუნდთა სამთა შინა მღუდელ-მთავრობათა და უფლებათა განაბრწყინუებს, გალობად ერთისა ღმერთ-მთავრობისა ყოვლად წმიდაო ქალწულო ყოვლად საგალობელო:

სმენა მესმა ძლიერისა ჯუარისა შენისა ქრისტე, რომლისა…

გალობა დ. სძლისპირი.

სმენა მესმა ძლიერისა ჯუარისა შენისა ქრისტე, რომლისა მიერ სამოთხე განეღო, და გიღაღადებ, დიდება ძალსა შენსა უფალო:

საქმენი რომელნი მიქმნიან ბოროტ-არიან, ამისთჳს გევედრები მიჴსენ…

ტროპარნი.

საქმენი რომელნი მიქმნიან ბოროტ-არიან, ამისთჳს გევედრები მიჴსენ ქრისტე, და სინანული, წმიდა და ლმობიერი მომმადლე:

ყოველნი მცნებანი შენნი შეურაცხ-ვყუენ, და შიში შენი განუაგდე, ქრისტე და მეშინის საყდრისა შენისაგან, თუალუხუავისა, სადა იგი ნუ დამსჯი მოწყალე:

განრთხმული სასტიკად, და გუემათა მიერ განლეულნი უწყალოდ…

მოწამეთა.

განრთხმული სასტიკად, და გუემათა მიერ განლეულნი უწყალოდ, და ფრჩხილებითა მძჳნუარედ დაბძარულნი, მჴნენი მარტჳლნი, იხარებდეს და გალობდეს ქრისტე:

საღმრთოსა სიმტკიცისაგან შეძრუად თქუენდა ვერ შეუძლო, ყოვლად ბოროტმან მჴნენო მოწამენო, რომლისათასცა, სიმტკიცედ შერყეულთა გამოჰსჩნდით:

განკაცნა შენგან ღმერთი ღმრთის-მშობელო, და მოსცა სინანული…

ღმრთის-მშობლისა.

განკაცნა შენგან ღმერთი ღმრთის-მშობელო, და მოსცა სინანული, მგალობელთა შენთა მეოხებითა, შენითა ღირსო, ვითარცა ტკბილ-არს და კაცთ-მოყუარე:

ანგელოსთა თუალნი დაჰბადენ, და საღმრთოსა ბრწყინუალებითა, სახიერებით…

სხუა. სძლისპირი. ესმა მოსლუა.

ანგელოსთა თუალნი დაჰბადენ, და საღმრთოსა ბრწყინუალებითა, სახიერებით განაბრწყინუენ, ვითარცა ძლიერმან ძალითა, სიტყუათა შენთა აღსრულებად ქრისტე:

ნივთიერი განზრახუა ჴორცთაგან, განუაგდოთ ჵ მორწმუნენო, და მივემსგავსნეთ ცხოვრებასა, უსხეულოთა მათ წესთასა, და გონებაჲ ფრთოვანვჰყოთ სულითა:

მექმენ მე შუამდგომელ ყოვლად უბიწოო, შესავედრებელ და…

ღმრთის-მშობლისა.

მექმენ მე შუამდგომელ ყოვლად უბიწოო, შესავედრებელ და ბავთ-საყუდელ, და ვნებათა ღელჳსა განმდევნელ, რომელმან სძლე გუნდთა ანგელოსთასა სიკეთითა შეუსწორებელითა:

აღმსთობილნი შენ გიგალობთ უფალო გუაცხოვნენ ჩუენ ვითარცა…

გალობა ე. სძლისპირი.

აღმსთობილნი შენ გიგალობთ უფალო გუაცხოვნენ ჩუენ ვითარცა სახიერ-ხარ, რამეთუ სხუა ღმერთი არა ვიცით:

ჵ სულო განიფრთხუე, და განაგდე ძილი ცოდჳსა…

ტროპარნი.

ჵ სულო განიფრთხუე, და განაგდე ძილი ცოდჳსა, ხოლო სინანულისა, ნათლითა განათლდი ბრწყინუალედ:

ანეულ ვჰყუნეთ სულნი, მოღუაწებითა და დავათურნეთ ცრემლითა, რათა საღმრთო, სინანულისა ნაყოფი მოვისთულოთ:

იწუდენით ცეცხლითა, სიყუარულისათა მარტჳლნო, და ზეგარდამო-ჭედილ-მახჳლ, იქმნენით…

მოწამეთა.

იწუდენით ცეცხლითა, სიყუარულისათა მარტჳლნო, და ზეგარდამო-ჭედილ-მახჳლ, იქმნენით მომსრუელ მტერთა ბანაკსა:

არა ჰმონეთ მტერსა ვინაცა, დაიმონეთ იგი მოწამენო და საკუთარ, მონა ქრისტეს მეუფისა გამოსჩნდით:

სძალო კურთხეულო, წყალობაჲ შენი მოგუმადლე ჩუენ, რამეთუ…

ღმრთის-მშობლისა.

სძალო კურთხეულო, წყალობაჲ შენი მოგუმადლე ჩუენ, რამეთუ მოწყალითა ღმრთისა დედად გამოსჩნდი უბიწოო:

მიიწევით კიდეთა ქუეყანისათა, ყოვლად ქებულნო მთავარ-ანგელოსნო, და…

სხუა. სძლისპირი. რომელმან შეიმოსე.

მიიწევით კიდეთა ქუეყანისათა, ყოვლად ქებულნო მთავარ-ანგელოსნო, და წყალობათა ღმრთისათა, მორწმუნეთა ერსა მიჰმადლებთ, და გარე შეზღუდავთ მათ:

სიტყჳსა შენისა დამორჩილებულნი, სიტუაო ღმრთისა მამისაო, წესთ მთავარნი ზეცათანი, ნათლითა შენ მიერითა, ელუარედ ბრწყინუენ მარადის:

ყოველი წადილი ჩემი შენდა მომართ აღსძარ, ბუნებათა…

ღმრთის-მშობლისა.

ყოველი წადილი ჩემი შენდა მომართ აღსძარ, ბუნებათა უაღრესისა მის, სიტბოებისა მშობელო, და მორწმუნეთა დამატკბობელო, ღმრთის-მშობელო ქალწულო:

გარე-მომიცუეს ღელუათა, და მექმა საფლავ მუცელი ვეშაპისა…

გალობა ვ. სძლისპირი.

გარე-მომიცუეს ღელუათა, და მექმა საფლავ მუცელი ვეშაპისა და გიღაღადებ, მიჴსენ მე კაცთ-მოყუარე და მაცხოვნე, მრავალ-მოწყალეო უფალო:

არა არს სოფელსა შინა, ცოდუა რომელი მე…

ტროპარნი.

არა არს სოფელსა შინა, ცოდუა რომელი მე უბადრუკსა არა აღმისრულებიეს, უფროს ყოველთა კაცთა კაცთ-მოყუარეო, და უცოდუელო შემიწყალე მე:

ფრთოვან-ვიქმნნეთ გონებითა, აფრითა მით გულს-მოდგინებისათა რათა, ნავთ-საყდელსა მას, რომელ არს სინანული შევიდეთ ძმანო,და ვპოოთ ცხოვრებაჲ საღმრთოჲ:

მოციქულთა და ქადაგთა, და მოწამეთა ღუაწლითა განშუენდების…

მოწამეთა.

მოციქულთა და ქადაგთა, და მოწამეთა ღუაწლითა განშუენდების, ყოველი სფელი, რომელთა ვედრებითა განგუანათლენ ჩუენ, მავალ-მოწყალეო უფალო:

ჭურთა მათ სიწმიდისათა, და დამტევნელთა საღმრთოსა ბრწყინუალებისათა, მარტჳლთა ყოველნი, შევასხმიდეთ რათა გჳთხოონ, ქრისტესგან დიდი წყალობაჲ:

მორწმუნეთა ცხორებაო, ღმრთისა დედაო ყოვლად წმიდაო გჳთხოვე…

ღმრთის-მშობლისა.

მორწმუნეთა ცხორებაო, ღმრთისა დედაო ყოვლად წმიდაო გჳთხოვე, მონათა შენთა, ჴსნაჲ ბრალთაგან, ქრისტეს ღმრთისაგან, მხოლოსა სახიერისა:

ზღუა აღძრული ღელჳთა, წარმწყმედელი დააცხურე ქრისტე, შერისხჳთ…

სხუა. სძლისპირი.

ზღუა აღძრული ღელჳთა, წარმწყმედელი დააცხურე ქრისტე, შერისხჳთ დააყუდე, მეცა დანთქმული ცოდუათაგან, აღმომიყუანე მოწყალე:

ბრწყინუალედ შემკობილნი, ანგელოსთა ერნი რჩეულნი, პირუელითა ნათლით…

ტროპარნი.

ბრწყინუალედ შემკობილნი, ანგელოსთა ერნი რჩეულნი, პირუელითა ნათლით, შეიმკუებიან და საღმრთონი საიდუმლონი ეუწყებიან:

მუცლად-იღე უხრწნელო, ყოველთა შემოქმედი ღმერთი, რომელსა მოწყალებით…

ღმრთის-მშობლისა.

მუცლად-იღე უხრწნელო, ყოველთა შემოქმედი ღმერთი, რომელსა მოწყალებით, და სიხარულით განიცდიან, და ჰმონებენ ზეცისა წესნი:

რომელმან იჴსნენ ყრმანი, საჴუმილისაგან მგალობელნი, კურთხეულ-ხარ უფალო…

გალობა ზ. სძლისპირი.

რომელმან იჴსნენ ყრმანი, საჴუმილისაგან მგალობელნი, კურთხეულ-ხარ უფალო, ღმერთო მამათა ჩუენთაო:

კურთხეულ-ხარ შენ ღმერთო, რომელი მრავალ-მოწყალებით, შეიტკბობ მონანულთა…

ტროპარნი.

კურთხეულ-ხარ შენ ღმერთო, რომელი მრავალ-მოწყალებით, შეიტკბობ მონანულთა, და შეუნდობ შეცოდებათა:

განჰკურნენ ქრისტე ღმერთო, ვნებათა ჩემთა სიმრავლენი, რამეთუ შენ მხოლომან, უწყი შეცოდებაჲ ჩემი:

ძალითა საუფლოჲთა, განძლიერდა მწყობრი მარტჳლთა, და უღმრთოთა…

მოწამეთა.

ძალითა საუფლოჲთა, განძლიერდა მწყობრი მარტჳლთა, და უღმრთოთა ბანაკი, იოტნეს და განიბნინეს:

რომელმან მოწამენი, განაძლიერენ მოთმინებად, მრავალ-ფერთა ტანჯუათა, მათ მიერ გუაცხოვნენ ქრისტე:

კურთხეულ-ხარ შენ ღმერთო, რომელმან ჴორცნი შეიმოსენ, ქალწულისაგან…

ღმრთის-მშობლისა

კურთხეულ-ხარ შენ ღმერთო, რომელმან ჴორცნი შეიმოსენ, ქალწულისაგან სძლისა, და აცხოვნენ მორწმუნენი:

უსაზღუროსა მის ძალისა, თჳსისა გამოჩინებად, დაგბადნა თქუენ…

სხუა სძისპირი, უფროს ამაღლებულმან.

უსაზღუროსა მის ძალისა, თჳსისა გამოჩინებად, დაგბადნა თქუენ ჵ მთავარ-ანგელოსნო, და გასწავათ გალობა, ღმერთო შენ კურთხეულ-ხარ:

რომელი ეგე შეამკობ ზეცისა ძალთა სიმრავლესა, ურიცხუსა მოწყალებით მორწმუნეთა კრებულნი, ღირს-ჰყუენ გალობად შენდა, ღმერთო შენ კურთხეულ-ხარ:

ვითარცა მავასხებელსა, ქრისტესა ჴორცთასა თანამდები გაქუს დედოფალო…

ღმრთის-მშობლისა.

ვითარცა მავასხებელსა, ქრისტესა ჴორცთასა თანამდები გაქუს დედოფალო რომელიცა, იჴსენ, მეოხებითა შენითა განსაცდელთაგან:

მამისაგან შობილსა ძესა, უწინარეს საუკუნეთა, და აღსასრულსა…

გალობა ჱ. სძლისპირი.

მამისაგან შობილსა ძესა, უწინარეს საუკუნეთა, და აღსასრულსა ჟამთასა, ქალწულისაგან ჴორციელ-ქმნილსა, მღუდელნი აკურთხევდით, ერნი უფროსად ამაღლებდით მას უკუნისამდე:

რომელი ესე გარდასლჳთა, მცნებათა მოვჰკუედ ბოროტად, განმაცხოველე…

ტროპარნი.

რომელი ესე გარდასლჳთა, მცნებათა მოვჰკუედ ბოროტად, განმაცხოველე უფალო, სინანულისა მიერ რათა ჴმა-ვჰყო, მღუდელნი აკურთხევდით, ერნი უფროსად ამაღლებდით მას უკუნისამდე:

განმაბრწყინუე სინანულითა, და წყუდიადისაგან ცოდჳსა, მიჴსენ მე უფალო რათა განათლებული გიღაღადებდე, მღუდელნი აკურთხევდით, ერნი უფროსად ამაღლებდით მას უკუნისამდე:

ღუაწლით-შემოსილთა მარტჳლთა, ალი საცთურისა დაშრიტეს, და ცუარითა…

მოწამეთა.

ღუაწლით-შემოსილთა მარტჳლთა, ალი საცთურისა დაშრიტეს, და ცუარითა ზეცისათა, ღმრთიუ-ბრწყინუალედ შეცურეულნი ჰჴმობდეს, მღუდელნი აკურთხევდით, ერნი უფროსად ამაღლებდით მას უკუნისამდე:

ვითარცა მიწამან პოხილმან, თავ-წარსხმულნი ასეულისა, ღუაწლის დამდებელსა ღმერთსა, ნაყოფად მიუპყართ და იტყოდეთ მღუდელნი აკურთხევდით, ერნი უფროსად ამაღლებდით მას უკუნისამდე:

შენგან წმიდაო ღმრთის-მშობელო, აღმობრწყინდა ღმერთი ჴორცითა, და…

ღმრთის-მშობლისა.

შენგან წმიდაო ღმრთის-მშობელო, აღმობრწყინდა ღმერთი ჴორცითა, და ღმრთის-მეცნიერებითა, განანათლნა დაბადებულნი და იტყჳან, მღუდელნი აკურთხევდით, ერნი უფროსად ამაღლებდით ას უკუნისამდე:

შენ მხოლოსა, დამბაებელსა ყოველთასა, გალობა სულიერი გიღაღადეს…

სხუა. სძლისპირი.

შენ მხოლოსა, დამბაებელსა ყოველთასა, გალობა სულიერი გიღაღადეს ყრმათა, ყოველნი საქმენი უფალსა უგალობდით, და ამაღლებდით მას უკუნისამდე:

აღმძრავს წადილი, გონებისა ანგელოსთა, გუნდსა გალობად შესხმითა…

ტროპარნი.

აღმძრავს წადილი, გონებისა ანგელოსთა, გუნდსა გალობად შესხმითა სულიერითა, და ქებით გადიდებთ შენ დამბადებელსა, და უფროსად აღგამაღლებთ უკუნისამდე:

მარტივისა მის სამ-ბრწყინუალისა ნათლისა, ქადაგნო და მსახურნო და ღმრთის-მეტყუელნო, მისსა მიმათ მეოხ-გუეყუენით მოსავთა თქუენთა, რათა მიხსნნეს საცთურთაგან, შემსხმელნი თქუენნი:

ნათლისა ბჭეო, ქალულო ღმრთისა დედაო, განანათლენ რომელნი…

ღმრთის-მშობლისა.

ნათლისა ბჭეო, ქალულო ღმრთისა დედაო, განანათლენ რომელნი შენდა მოივლტიან, რამეთუ შენ-ხარ სასო და შესავედრებელი, ღელუა-გუემულთა, ჵ მხოლოო კურთხეულო:

ჰშევ ქალწულო, მიუწდომელი ბუნებათა, უჟამოდ გამოუთქმელი, ამისთჳს…

გალობა თ. სძლისპირი.

ჰშევ ქალწულო, მიუწდომელი ბუნებათა, უჟამოდ გამოუთქმელი, ამისთჳს უბიწოო, ყოველნი მორწმუნენი გადიდებენ შენ:

მოწყალე-მექმენ მეუფეო ყოვლად-ძლიერო, უიცხუად შეცოდებულსა, და უბადრუკსა…

ტროპარი.

მოწყალე-მექმენ მეუფეო ყოვლად-ძლიერო, უიცხუად შეცოდებულსა, და უბადრუკსა ამას და ღირს-მყავ, სასუფეველსა შენსა მოწყალე:

ვითარცა პირუელ ნინეველნი აცხოვნენ მჴსნელი რაჟამს იგი შეინანეს, ჩუენცა დაბადებულნი, შენნი გუაცხოვნენ წყალობითა შენითა:

ჴორცნი თქუენნი მისცენით ყოველთა წყლულებათა, საღმრთოსა მის…

მოწამეთა.

ჴორცნი თქუენნი მისცენით ყოველთა წყლულებათა, საღმრთოსა მის დიდებისა ზიარნო მოწამენო, და უკუდავსა დიდებასა ღირს-იქმნენით:

ვითარცა დღენი მნათობნი განანათლებთ სოფელსა, და სულსა მორწმუნეთასა განაბრწყინუებთ, მარტჳლნო საღმრთოთა მით, ბრწყინუალებითა თუენითა:

ვითარცა საყდარსა ცეცხლისასა საღმრთოსა გიტჳრთავს, წიაღითა უფალი…

ღმრთის-მშობლისა.

ვითარცა საყდარსა ცეცხლისასა საღმრთოსა გიტჳრთავს, წიაღითა უფალი, და აწოებ ქალწულო, მზდელსა ყოველთა დაბადებულთასა:

ისაია მხიარულ-იყავ ქალწულმან მუცლად-იღო, შუა ძე დაუსაბამოჲ…

სხუა. სძლისპირი.

ისაია მხიარულ-იყავ ქალწულმან მუცლად-იღო, შუა ძე დაუსაბამოჲ, ემმანუ ღმერთი და კაცი, აღმოსავალ სახელი მისი. მას ვადიდედთ, და რომელმან შუა იგი ვნატრიდეთ:

ანგელოსთა კრებულსა ზედა, მთავრად დადგინებულ-ხარ, ბრწყინუალეო მიქაელ…

ტროპარნი.

ანგელოსთა კრებულსა ზედა, მთავრად დადგინებულ-ხარ, ბრწყინუალეო მიქაელ, და საღმრთოჲსა განკაცებისა, მსახურო მაღალო გაბრიილ, მადიდებელნი თქუენნი გჳჴსნენით განსაცდელთაგან:

საუნჯეთა შენთა სიმდიდრე, ნიჭმრავალ-არს უფალო, რომელმან ანგელოსთა, წესნი შეჰქმნენ, რომელთა თანა, მომავალ ხარგანჰსჯად სოფლისა, შემიწყალე მე, მოწყალებათა შენთა მოსავი:

მთავარ-ანგელოსნი და ძალნი, სერაფიმ ქერუვიმნი, საყდარნი და…

ღმრთის-მშობლისა.

მთავარ-ანგელოსნი და ძალნი, სერაფიმ ქერუვიმნი, საყდარნი და უფლებანი, მთავრობანი ჴელმწიფებანი, და სიწმიდენი ყოვლად წმიდანი, შენგან შობილსა ძრწოლით მონებენ ღმრთისა დედაო:

ჵ მე რასა ვემსგავსე უნაყოფოსა მას ლეღუსა…

აღჳვსენითსა ზედა, დასდებელნი. სინანულისანი. ჴმა ე.

ჵ მე რასა ვემსგავსე უნაყოფოსა მას ლეღუსა, და მეშინის მე წყევისა მისგან და მოკუეთისა, არამედ შენ ზეცათა მუშაკო ქრისტე ღმერთო, უნაყოფოჲ სული ჩემი, ნაყოფიერად გამოაჩინე, და ვითარცა უძღები იგი შჳლი, მეცა შემიწყალე და შემიწყნარე:

სიმრავლე ცოდუათა ჩემთა უგულებელს-ჰყავ უფალო, რომელი იშევ ქალწულისაგან, და ყოველნი ბრალნი ჩემნი აღჴოცენ, გალის-სიტყუა მოქცევისა მომმადლე, ვითარცა მხოლო კაცთ-მოყუარე-ხარ, გევედრები შემიწყალე მე:

კურთხეულ-არს მჴედრობა მეუფისა ცათასა, რამეთუ დაღაცათუ ქუეყანისა…

მოწამეთა.

კურთხეულ-არს მჴედრობა მეუფისა ცათასა, რამეთუ დაღაცათუ ქუეყანისა ნაშობნი იყუნეს ღუაწლით-შემოსილნი, არამედ ანგელოსთა დიდებასა მიწევნად მოსწრაფე-იქმნეს, ჴორცნი უგულებელს-ჰყუნეს, და ვნებათა მიერ უჴორცოთა პატივსა ღირს-იქმნეს, ლოცჳთა მათითა გარდამოგჳვლინე, ჩუენ უფალო დიდი-წყალობაჲ:

დააცხრუე ტკივილი მრავალსაგლოველისა ამის სულისა ჩემისა, რომელმან…

დიდება, აწდა. ღმრთის-მშობლისა.

დააცხრუე ტკივილი მრავალსაგლოველისა ამის სულისა ჩემისა, რომელმან განაქარუე ყოველი ცრემლი პირისაგან ქუეყანისა, რამეთუ შენ სალმობასა კაცთასა იოტებ, და მჭმუნუარესა ცოდჳლთასა ნუგეშინის-ცემ, შენ-ხარ ყოველთა ქრისტიანეთა სასო და სიმტკიცე, ყოვლად წმიდაო ქალწულო, დედაო ქრისტესო:

ავაზაკმან ჯუარსა ზედა ღუთად გქადაგა, და ჰრწმენა…

ორშაბათსა, მომიჴსენენი. ჴმა ე.

ავაზაკმან ჯუარსა ზედა ღუთად გქადაგა, და ჰრწმენა შენდა მომართ, ქრისტე და აღგიარა შენ, მჴურუალითა გულითა, და ჰჴმობდა წადიერებით, მომიჴსენე მეუფეო სასუფეველსა შენსა:

სულითა განმხრწნელთა ავაზაკნი დამესხნენს გზასა საწუთოჲსასა, და მომწყლეს მე სასიკუდინედ უწყალოდ, ხოლო აწ წყალობათა, შენთა მოვივლტი მე ქრისტე, განმკურნე და შემიწყალე მე და მაცხოვნე გევედრები:

ზეცისა გუნდნი დიდების-გმეტყუელებენ, ყოველთა შემოქმედო, და შუა-მდგომელობითა მათითა, სიმრავლენი ბოროტთა ჩემთანი უგულებელს-ყუენ, და მაცხოვნე გევედრები მხოლო კაცთ-მოყუარეო:

ანგელოსთა გუნდსა მიმსგავსებულნო, და მათ თანა აღრაცხილნო…

მოწამეთა.

ანგელოსთა გუნდსა მიმსგავსებულნო, და მათ თანა აღრაცხილნო, მარტჳლნო ნათლითა აღუსებულნო, ვნებანი უსულონი გონებისა ჩემისანი, განსდევნენით მეოხებითა, თქუენითა ჵ დიდებულნო:

სამებაო ყოვლად წმიდაო, დიდებით გალობებულო ჴმითა ანგელოსებრივითა…

დიდება.

სამებაო ყოვლად წმიდაო, დიდებით გალობებულო ჴმითა ანგელოსებრივითა, ვნებული ეშმაკთა მიერ სული ჩემი მრავლითა მოწყალებითა შენითა, მრთელგამოაჩინე გევედრები:

ანგელოზისა მიერ სიხარული, შეიწყნარე საშოსა შენსა, უსძლოო…

ღმრთის-მშობლისა.

ანგელოზისა მიერ სიხარული, შეიწყნარე საშოსა შენსა, უსძლოო ღმრთის-მშობელო, ბოროტთა საქმეთა მიერ, შეწუხებული სული ჩემი, სიხარულითა აღავსე, და ნათლად საღმრთოდ წარუძეღუ:

ნათელი რომელი მკჳდრ-იქმნა, შენ თანა ქალწულო, და…

სერობისად გალობანი წმიდისა ღმრთის-მშობლისანი. გალობა ა. ჴმა ე. სძლისპირი. ეტლთა სიმრავლე.

ნათელი რომელი მკჳდრ-იქმნა, შენ თანა ქალწულო, და ნათლითა საღმრთოთა, განანათლნა ცისკიდენი, მას ევედრე დედაო და ქალწულო, განათლებად მგალობელთა შენთა წმიდაო:

განსუენებულმან სიკეთითა, სათნოებათათა, ჵ ღმრთიუ-მიმადლებულო, მადლი სულისა წმიდისა, ყოვლისა მდიდრად განმაშუენებელი, შეიწყნარე და სავანედ მისსა განბრწყინდი:

წინათუე გამოგსახა მაყუალმან სინას აღგზებულმან, და ცეცხლშეუხებელმან ქალწულო ღმრთისა დედაო, რამეთუ ქალწულმან ჰშევ და ქალწულადუე ეგე ზესთა ბუნებისა სძალო ღმრთისაო:

გამოჩნდი კიბედ რომლითა გარდამოჴდა ჩუენდა მაღალი, და…

გალობა გ. სძლისპირი. რომელმან დააფუძნა ქუეყანით.

გამოჩნდი კიბედ რომლითა გარდამოჴდა ჩუენდა მაღალი, და აღმართა განხრწნილი ბუნება, და ტაძრად და საყდრად, სამეუფოდ იქმენ ღმრთის-მშობელო, და შენ მიერ შეერთო დაბადებულთა, სიტყუა თანა სწორი ღმრთისა მამისა:

პირუელივე განსაზღურებული საღმრთო საიდუმლო, და წინა საუკუნეთა განჩინებული, ჟამთა აღსასრულსა, შენ მიერ სრულ იქმნა ღმრთის-მშობელო, და განკაცებული რა იშუა შენგან, ძე ღმრთისა მხოლო და გუაცხოვნნა ჩუენ:

წყევისა მის, პირუელისა პატიჟნი დაიჴსნეს ქალწულო, შუა-მდგომელობითა შენითა, რამეთუ შენ მიერ, უფალი დიდებისა გამოჩნდა, და კურთხევა საუკუნო მოგუმადლა, შუენიერებაო მორწმუნეთაო:

გულითა და სულითა და პირითა, ღმრთის-მშობლად აღგიარებთ…

გალობა დ. სძლისპირი. ესმა მოსულა შენი.

გულითა და სულითა და პირითა, ღმრთის-მშობლად აღგიარებთ, წადიერად სარწმუნოებით, და ცხოვრებასა მივემთხუევით, ვედრებითა შენითა ქალწულო:

რომელმან შეგქმნა არა რასაგან, შენგან ჴორცნი შეისხნა, სახიერებით და წყალობით, ცხოვრებისა მათისათჳს რომელნი დედად ღმრთისად გქადაგებენ:

განწყობილნი ზეცისა ძალნი, უგალობენ ძესა შენსა, მოხარულნი ცხოვრებისათჳს, კაცთასა რომელნი მადლობით, დედად მჴსნელისად აღგიარებენ:

წმიდათა წინასწარ-მეტყუელთა წინათუე გქადაგეს ვითარმედ, დედად ღმრთისად…

გალობა ე. სძლისპირი. რომელმან შეიმოსა ნათელი.

წმიდათა წინასწარ-მეტყუელთა წინათუე გქადაგეს ვითარმედ, დედად ღმრთისად ყოფად ხარ ღმრთის-მშობელო დიდებულო, რამეთუ შენ მხოლო იპოვე, ყოვლითურთ წმიდა და უბიწო:

ღრუბლად ნათლისად წყლისა ცხოველისა მტჳრთუელად, გიცნობთ ყოველნი ღმრთისა დედაო, რომელმანცა დამათურნა ჩუენ, წჳმითა უკუდავებისათა, სასო წარკუეთილნი ესე:

ვითარცა ყოვლითურთ შუენიერი და უბიწო, და დაბეჭდული ქალწულებითა, შეგიყუარა ღმერთმან მხოლომან, და სიწმიდით დაემკჳდრა იგი, შენ შორის დიდებულო:

მიზეზმან ყოვლისამან, და არსებისა მომცემელმან, ჴორც შესხმისა…

გალობა ვ. სძლისპირი. ზღუა აღძრული ღელუათა.

მიზეზმან ყოვლისამან, და არსებისა მომცემელმან, ჴორც შესხმისა თჳსისა, მიზეზად გპოვა ღმრთის-მშობელო, და შენგან კაცება მიიღო:

კურნებათა წყაროსა, სულთა მზრდელსა აღმოუცენებ, რომელნი სურჳელად, მოივლტიან საფარუელსა შენსა, უხრწნელო ყოვლად წმიდაო:

ცხოვრებისა მიზეზო, გჳშევ ცხოვრების მომცემელი, რომელმან საუკუნო, გამოჴსნა მოგუანიჭა ჩუენ, აღმსარებელთა შენთა სძალო:

უქცეველად ეგო უსაზღურო, გუამოვნებითა რა ჴორცთათა, შეგუერთო…

გალობა ზ. სძლისპირი. უფროსად ამაღლებული.

უქცეველად ეგო უსაზღურო, გუამოვნებითა რა ჴორცთათა, შეგუერთო მოწყალებით, შენ შორის უბიწოო, და მხოლოო კურთხეულო, ღმერთი მამათა ჩუენთა:

სძლად უბიწოდ და უხრწნელად, აღგიარებთ ღმრთის-მშობელო, და საყდრად მეუფისად, რომელსა უღაღადებთ, სულიერითა შესხმითა, ღმერთო შენ კურთხეულ ხარ:

დედად დამბადებელისად, განწმედილ სულითა წმიდითა, გამოსჩნდი ღმრთის-მშობელო, რომელმანცა შეგქმნა შენ, რომელსა უღაღადებთ, ღმერთო შენ კურთხეულ ხარ.

მწუხარებანი, ადამისნი დასცხრეს აწ, სიხარული რა გჳშუა…

გალობა ჱ. სძლისპირი. შენ მხოლოსა დამბადებელი.

მწუხარებანი, ადამისნი დასცხრეს აწ, სიხარული რა გჳშუა ღმრთისა დედამან, ყოველნი საქმენი უფალსა უგალობდით, და ამაღლებდით მას უკუნისამდე:

გალობს ჩუენთანა, უჴორცოთა განწყობილი და აქებენ შენგან მიუწთომელად შობილსა, ყოველნი საქმენი უფალსა უგალობდით, და ამაღლებდით მას უკუნისამდე:

წყარო ნათლისა, და უკუდავებისა სძალო შენგან გამოვიდა რომელსა უღაღადებთ, ყოველნი საქმენი უფალსა უგალობდით და ამაღლებდით მას უკუნისამდე:

უბიწოთა სისხლთა შენთაგან, სძისა სახედ შეიყუნეს, ჴორცნი…

გალობა თ. სძლის-პირი. ისაია მხიარულ იყავ.

უბიწოთა სისხლთა შენთაგან, სძისა სახედ შეიყუნეს, ჴორცნი მეუფისანი, უზესთაეს ბუნებათასა, უთესლოდ და უმამაკაცოდ, და გონიერნი, და სულიერნი ღმრთისა დედაო:

დაჰჴსენ აღძრუა განძჳნებული, სიკუდილისა მომსრუელი, ჰშევ რა საღმრთო ცხოვრება, საუკუნო რომელსა იგი ჯოჯოხეთმან აზმნო რა შთანთქმა, განსქდა მუცელი მისი უძღები, ღმრთისა დედაო:

საყდართა რა მაღალთა დაჯდა, ძე შენი ფესუედითა, ოქროვანითა შემკული, და ბრწყინუალე სათნოებათა მიერ, ურიცხუთა დაგადგინა, მარჯუენით მისსა, და პატივ გცა შენ დედასა თჳსსა: