გულანი
საცდელი · 1.37.0
ხმა 4 · სამშაბათი 1 / 81ქანანელისა მიმსგავსებითა სულო ჩემო, შეეხე უკანით ქრისტესა…

ხმა 4 · სამშაბათი

რვა ხმა

პარაკლიტონი · დაახლ. 29 წთ

ქანანელისა მიმსგავსებითა სულო ჩემო, შეეხე უკანით ქრისტესა…

მწუხრად, დასდებელნი სინანულისანი, მსგავსნი, სამეუფონი, ჴმა დ. რომელი იწოდე.

ქანანელისა მიმსგავსებითა სულო ჩემო, შეეხე უკანით ქრისტესა, და ჴმობდი, შემიწყალე ჵ მეუფეო რამეთუ ასული მივის ჴორცი ჩემი უწესოდ ეშმაკეული, რომლისაგან განსდევნე აღტყინებულებაჲ მისი გევედრები, და დააყუდენ აღძრუანი უწესონი, და მოაკუდინენ შიშითა შენითა, მეოხებითა რომელმან მუცლადგიღო ყოვლად უბიწოჲსა მშობელისა შენისათა ქრისტე, და ყოველთა წმიდათა, მომცემელო კეთილისაო მრავალ-მოწყალე:

ნინეველთა ოდესმე შეცოდებულთა მიუვლინე იონაჲ ქრისტე ქადაგად მათდა, რომელთაცა შეინანეს და შესცუალეს გულისწყრომაჲ შენი მოწყალებად, და იჴსნნეს რისხჳსაგან წარმწყმედელისა, მომივლინე უკუე მეცა კაცთ-მოყუარე უღირსსა, მტკიცჱ შეწევნაჲ შენი, რათა მოვიქცე ურიცხუთაგან ცოდუათა ჩემთა, და ადგილისა მიმართ სინანულისა ძღუანჳლ-ვიქმნე, და ვსტიროდე და სულთ-ვითქმიდე მწარედ, ჰჴსნად მრავალთა შეცოდებათა ჩემთა წყალობითა შენითა:

მოსრულმან სოფლად ცხოვრებად, კაცთა შეცოდებულთა, და სინანულად მოწოდებად მათდა, ვითარცა სახიერმან, მე უკუე მოწყალეო, რომელმან უფროს ყოველთა კაცთა განგარისხე, შემიწყალე და მაცხოვნე სახიერებითა შენითა, და გზად სინანულისად წარმიძეღუ მე, და გულის-სიტყუაჲ შემუსრჳლებისა მომეც მე, და დაამტკიცე გული ჩემი რათა იქმნნეს მდაბალ, და წრფელ, და მშჳდ, და უზაკუელ მაცხოვარო ჩემო, წყალობითა შენითა ვითარცა მოწყალემან:

დაბნელებული სული ჩემი სიბოროტითა გუელისათა, განანათლე ლოცჳთა…

სხუანი, დასდებელნი წინა-მორბედისანი, ჴმა დ. მსგავსნი, მოგიცემიეს ღმერთო.

დაბნელებული სული ჩემი სიბოროტითა გუელისათა, განანათლე ლოცჳთა შენითა იოანე ნეტარო, და გზათა წრფელთა მიძღოდე მე, ნეტარისა მიმართ ცხოვრებისა გევედრები, რათა გმადლობდე სულითა მარადის, და დიდების გმეტყუელებდე შენ ყოვლად საკჳრუელო უჴმარი მონაჲ შენი, მიმღებელსა თხოვათა ჩემთასა:

მე-ვარ ხე იგი უნაყოფო, რომლისა სული მოკლებული ყოველთაგან საქმეთა კეთილთა, ლოცჳთა შენითა გამომღებელ-ჰყავ ნაყოფთა სინანულისათა, ყოვლად სანატრელო და პატიოსანო წინა-მორბედო სულთქმით გევედრები შენ, რათა ვედიდებდე ძალსა და მსწრაფლსა შეწევნასა, შენსა, ცხოვნებული უჴმარი მონა შენი:

მსაჯულო მართალო, განმხილუელო ყოველთაო კაცთ-მოყუარე, ძჳრ-უჴსენებელო უფალო, ჟამსა სასჯელისასა ნუ წარმწყმედ მე დასჯილსა, არამედ პატიოსნითა ლოცჳთა ნათლის-მცემელისა შენისათა, მოწყალე-მექმენ მე და მაცხოვნე გევედრები, იესო ყოვლად სახიერო, მაცხოვარო სულთა ჩუენთაო:

მე-ვარ ესავ ახალ ყოვლითა, უკუე სახითა ყოვლად-წმიდაო…

დიდება, აწდა. ღმრთის-მშობლისა. მსგავსივე.

მე-ვარ ესავ ახალ ყოვლითა, უკუე სახითა ყოვლად-წმიდაო, რამეთუ მხოლო გამოვჰსჩნდი საწყალობელი დაკლებულ კეთილთაგან საქმეთა, და განშიშულებულ ყოვლითურთ. ვინმე არა ტიროდეს ჩემთჳს, ვინ არა ჰგონებდეს წარწყმედასა ჩემსა, ვინაცა პირუელ აღსასრულისა გიღაღადებ შენ, ვჰსცოდე დედოფალო მაცხოვნე მე ვითარ იგი ოდესმე აცხოვნა უძღები იგი ძემან შენმან:

მინდა ცრემლთა მიერ აღჴოცაჲ, შეცოდებათა ჩემთა ჴელით-წერილისა…

სტიქარონსა ზედა, დასდებელნი სინანულისანი, ჴმა დ.

მინდა ცრემლთა მიერ აღჴოცაჲ, შეცოდებათა ჩემთა ჴელით-წერილისა უფალო, და ნეშტსა ცხოვრებისა ჩემისასა, სინანულით სათნო-ყოფად შენდა, არამედ მტერი მაცთუნებს და ჰბრძავს სულსა ჩემსა, უფალო პირუელ სრულიად წარწყმედად ჩედამდე მაცხოვნე მე:

ვინ ღელვა-გუემული მოივლტინ, ამას ნავთ-საყუდელსა, და არა განერის, ანუ რომელი უძლური მოუჴდინ ამას სამკურნალოსა, და არა განიკურნის, დამბადებელო ყოველთაო, და მკურნალო განწირულთაო, უფალო პირუელ სრულიად წარწყმედად ჩემდამდე მაცხოვნე მე:

რომელმან წმიდათა მოწამეთა მოთმინებაჲ შეიწირე, ჩუენიცა გალობაჲ…

მოწამეთა:

რომელმან წმიდათა მოწამეთა მოთმინებაჲ შეიწირე, ჩუენიცა გალობაჲ შეიწირე კაცთ-მოყუარე, და მათითა მეოხებითა მოგუანიჭე ჩუენი დიდი-წყალობაჲ:

შენ ყოვლად უბიწოსა, პალატსა მეუფისასა, გევედრები დიდებულო…

დიდება, აწდა, ღმრთის-მშობლისა. მოგიცემიეს.

შენ ყოვლად უბიწოსა, პალატსა მეუფისასა, გევედრები დიდებულო, გონებაჲ ჩემი ყოვლითა ცოდჳთა შეგინებული განწმიდე, და სავანედ სახარულევანად, სამებისა წმიდისა გამოაჩინე, რათა ძლიერებასა შენსა და აურაცხელსა წყალობასა, ვადიდებდე ცხოვნებული, მე უჴმარი მონაჲ შენი:

დაღონებულსა ამას და მოუძლურებულსა სულსა ჩემსა ზედა…

სამშაბათსა ცისკრად, შემდგომად ა. სტიქოლოგიისა, წარდგომანი სინანულისანი, ჴმა დ.

დაღონებულსა ამას და მოუძლურებულსა სულსა ჩემსა ზედა, მოიხილე ღმერთო და შემიწყალე მე, რომელმან ცოდუასა შინა წარუაგე ცხოვრებაჲ ჩემი, მსგავსად მეძჳსა მის შეგივრდები, შემიწყალე მაცხოვარ და მაცხოვნე მე:

წიაღუალ მე ზღუასა ამას ამის ცხოვრებისასა, და…

უფალო ნუ გულის-წყრომითა შენითა მამხილებ მე და ნუცა რისხჳთა შენითა მჰსწავლი მე:

წიაღუალ მე ზღუასა ამას ამის ცხოვრებისასა, და ვიგონებ უფსკრულსა ურიცხუთა ბოროტთა ჩემთასა, რამეთუ არა მაქუს მე მენავეთ-მოძღუარი გულის-სიტყუაჲ, ამისთჳსცა ჴმასა პეტრესსა გიღაღადებ, მაცხოვნე მე ქრისტე, და შემიწყალე ვითარცა კაცთ-მოყუარე ხარ:

სიტყუასა მამისასა ქრისტესა, ღმერთსა ჩუენსა, შენგან განჴორციელებულად…

დიდება, აწდა. ღმრთის-მშობლისა.

სიტყუასა მამისასა ქრისტესა, ღმერთსა ჩუენსა, შენგან განჴორციელებულად ვიცნობთ ღმრთის-მშობელო ქალწულო, ამისთჳს დაუცხრომელად შენნი მადიდებელნი გალობით გადიდებთ:

ვიგონებ მე მოქცევსა მრავალთა ცოდუათა ჩემთასა, და…

შემდგომად ბ. სტიქოლოგიისა, წარდგომანი სინანულისანი, ჴმა დ.

ვიგონებ მე მოქცევსა მრავალთა ცოდუათა ჩემთასა, და ვერ მკადრე-ვარ ზე აღხილუად და თხოვად მოტევებისა, არამედ მომეც მე პირუელ აღსასრულისა უფალო სინანული, და მაცხოვნე მე:

არმურსა ვნებათასა, და გემოთა სოფლისათა, შეეთხზა გონებაჲ…

მიწყალე მე უფალო, რამეთუ უძლურ ვარ, განმკურნე მე: დაუკჳრდა იოსებს.

არმურსა ვნებათასა, და გემოთა სოფლისათა, შეეთხზა გონებაჲ უბადრუკისა სულისა ჩემისა, და გულის-სიტყუაჲ სინანულისა არა არს ჩემ თანა, არამედ შეიწყალე სიგლახაკჱ ჩემი, და მომეც გულის-სიტყუაჲ სინანულისა, რათა მეცა პირუელ აღსასრულისა უღაღადო წყალობათა შენთა, ქრისტე ღმერთო მაცხოვარო ჩემო, განწირული ესე და უღირსი მაცხოვნე, ვითარცა კაცთ-მოყუარე-ხარ:

შენ გადიდებთ ღმრთის-მშობელო, და ვღაღადებთ, გიხაროდენ ნათლისა…

დიდება, აწდა. ღმრთის-მშობლისა.

შენ გადიდებთ ღმრთის-მშობელო, და ვღაღადებთ, გიხაროდენ ნათლისა წარუალისა ღრუბელო, რომელმან იტჳრთე წიაღითა უფალი დიდებისა:

გურიტი უდაბნოს მოყუარე, ნათლის-მცემელი სინანულისა მქადაგებელი, რომელი…

შემდგომად გ. სტიქოლოგიისა, წარდგომა, ჴმა დ. მსწრაფლ მეწიე.

გურიტი უდაბნოს მოყუარე, ნათლის-მცემელი სინანულისა მქადაგებელი, რომელი გამოგჳცხადებდა ქრისტესა კაც-ყოფად, ყოველთა შეცოდებულთათჳს შობილად შუამდგომელი ღელუა-გუემულთა შემწე განუშორებელი, ლმობიერად ევედრების ქრისტესა რათა იჴსნას სოფელი თჳსი:

ჯუარითა აღჭურჳლთა წმიდათა მოწამეთა მანქანებაჲ ბოროტთა დასაბამისა…

დიდება შენდა, ღმერთო ჩუენო, დიდება შენდა: მოწამეთა.

ჯუარითა აღჭურჳლთა წმიდათა მოწამეთა მანქანებაჲ ბოროტთა დასაბამისა, მტერისა, დაამჴუეს ქრისტე ღმერთო ჩუენო, და განბრწყინდეს ვითარცა მნათობნი, და წინა-უძღჳან მორწმუნეთა, და მისცემენ კურნებათა სარწმუნოებით მუედრებელთა, მათითა მეოხებითა აცხოვნენ სულნი ჩუენნი:

მხოლომან ჰშევ შემოქმედი ყოველთა, მხოლომან შეამკევ კაცებაჲ…

დიდება, აწდა. ღმრთის-მშობლისა.

მხოლომან ჰშევ შემოქმედი ყოველთა, მხოლომან შეამკევ კაცებაჲ, შობითა შენითა ყოვლად წმიდაო, და მიჴსენ მე საბრჴისაგან მაცთურისა ბელიარისა, და დამადგინე მე კლდესა ზედა ქრისტეს მცნებისასა, მას ევედრე ლმობიერად, რომელიცა განჴორციელდა შენგან:

საღმრთომან ნისლმან დაჰფარა ენა მძიმე, და აღიტყუა…

სამ-შაბათსა, კანონი სინანულისა. გალობა ა. ჴმა დ. სძლისპირი. იოსებ.

საღმრთომან ნისლმან დაჰფარა ენა მძიმე, და აღიტყუა იგი სჯულსა ღმრთიუ-წერილსა, რამეთუ განაგდო ნივთი უგულის-ჴმო, გონებისა თუალთა, და მოიღო მან სულიერი გალობაჲ, პატივად ღმრთისა მიერ:

ვიქმ მე საქმეთა ბნელისათა ფარულად, რომელთათჳს იგი…

ტროპარნი.

ვიქმ მე საქმეთა ბნელისათა ფარულად, რომელთათჳს იგი ნუ მამხილებ ცხადად სახიერ, და საშინელსა მას განჰსჯასა, ნუ განმაქიქებ მე, არამედ განმაბრწყინუე სინანულითა, მაცხოვარ და მაცხოვნე მე:

ცოდუასა დავსძინებ მე ცოდუასა ზედა, უძღები ესე ყოვლადუე მეუფეო და შიშსა, შენსა არა მოვიჴსენებ მე, და არცა გულის-ჴმა-ვჰყოფ, პირუელ აღსასრულისა მომაქციე მე, და შემიწყალე სახიერ:

ფარი სარწმუნოებისა, გაქუნდათ მარტჳლნო, ხოლო ჯუარი ნაცულად…

მოწამეთა.

ფარი სარწმუნოებისა, გაქუნდათ მარტჳლნო, ხოლო ჯუარი ნაცულად საჭურუელისა აღგეღოთ, და ესრეთ განუჴედით მტერთა, უხილავთა წყობად, და შემუსრეთ, ყოველი ძალი მათი, და ძლევაჲ შეიმოსეთ:

ფუფუნებისა მისგან სიავთასა, და ჴრმლითა გუემისაგან საზარელისა და ფუცხუათა, დამბძარუელთა მათ შუათაგან, და ლომთა ზახებისა, და სხუათა მათ, მძჳნუარეთა ტანჟუათაგან, არა განჰკრთეს მარტჳლნი:

კარავსა სულიერსა და კიდობანსა, ტაბლასა და მთასა…

ღმრთის-მშობლისა.

კარავსა სულიერსა და კიდობანსა, ტაბლასა და მთასა რომლისაგან თჳნიერ ჴელისა, კაცთასა გამოეკუეთა ლოდი იგი საკიდური, მარიამს გალობით, პატივს-ვჰსცემდეთ ერნო ქრისტეს ღმრთისა დედასა:

გალობასა სავედრებელსა შეგითხზათ შენ ნეტარო სიყუარულით

სხუა, კანონი წმიდისა წინა-მორბედისა. რომლისა კიდურ-წერილობაჲ.

გალობასა სავედრებელსა შეგითხზათ შენ ნეტარო სიყუარულით.

ვითარცა რა დიდი, მთიები ჰრბიოდე შენ, წინაშე…

იოსებ. გალობა ა. ჴმა დ. სძლისპირი. დაანთქენ.

ვითარცა რა დიდი, მთიები ჰრბიოდე შენ, წინაშე მზისა და განანათლე ქუეყანაჲ, ბრწყინუალებითა შენითა, ნათლის-მცემელო ქრისტესო. მეცა ურიცხუთა ცოდუათაგან, დაბნელებული განმანათლე ნეტარო:

ოდესმე ბერწობისა, დამხსნელიქმენ შობითა, ამისთჳს გევედრები ბერწ-ქმნილი სული ჩემი, კუეთებითა ვნებათათა, მეოხებითა შენითა, ნაყოფიერ-ჰყავ ნეტარო, და ჴჳლ-მრავალ სათნოებათა მიერ:

ძალითა და სულითა, ილიასითა იქმენ, განმმზადებელ გზათა ქრისტეს მეუფისათა, რომლისა მიმართ წარმართენ, სულისა ჩემისა კუალნი, დიდებულო იოანე, და მოსპე ჩემგან გულარძნილებაჲ ვნებათა:

ნათლისა ღრუბელო, ბნელნი იგი ღრუბელნი, სულისა ჩემისანი…

ღმრთის-მშობლისა.

ნათლისა ღრუბელო, ბნელნი იგი ღრუბელნი, სულისა ჩემისანი ბრწყინუალითა ოხითა, შენითა განსდევნენ ჩემგან, რათა ვიხილო ნათელი, შენგან შობილისა ვიხილო ნათელი, შენგან შობილისა ღმრთისა, და ნათლითა ნათელი საღმრთოჲ მოვიღო:

ლოცუამან ანნა წინასწარ-მეტყუელისამან, რაჟამს იგი დამდაბლდა წინაშე…

გალობა გ. სძლისპირი.

ლოცუამან ანნა წინასწარ-მეტყუელისამან, რაჟამს იგი დამდაბლდა წინაშე ღმრთისა, განჰჴსნა საკრუელი ბერწისა მის მუცლისა, და მოსპო ყუედრებაჲ სულისა თჳსისა, მუცლად-ღებითა კაცისა მის ღმრთისათა:

რომელმან ბრმათა თუალნი განანათლენ ქრისტე, თუალნი ჩემნი…

ტროპარნი.

რომელმან ბრმათა თუალნი განანათლენ ქრისტე, თუალნი ჩემნი დაბნელებულნი განანათლენ, გემოთა მიერ და სოფლისა ზრუნუათა, რომელი ყოვლადუე არა განჳცდი, მსჯავრთა მათ შენთა, თუალ-უხუავსა სასჯელსა:

ესე არს ჟამი, განიფრთხუე შენ, სულო ჩემო, ბოროტთა მათგან რომელნი იგი ჰქმნენ შენ, და უღაღადე მეუფესა და მჴსნელსა, განმიჴუენ მე ბჭენი სინანულისანი, რომელი ესე ძრწოლით გევედრები შენ:

იოტა მძლავრი ბელიარ და დაეცა, ღუაწლისა-მძლეთა საღმრთოთა ღუაწლთა მიერ, და განბძარულად იხილუების მათ მიერ, და მკუდრად უსულოდ და უძრავად მდებარეარს, რომელი პირუელ ზუაობით იქადოდა:

სრულ-ჰყუეს სრბაჲ თჳსი, ახოვნებით მოწამეთა, საღმრთომან გუნდმან და მწყობრმან უძლეველმან, და ბევრეულნი უხილავნი ლინდონი, ძალითა საღმრთოჲთა დასჭრნეს და მოსწყჳდნეს, და გჳრგჳნითა ძლევისათა შეიმკუნეს:

მწუხარებანი პირუელთა მამათანი დაჰჴსენ, ყოვლად უბიწოო ღმრთისა…

ღმრთის-მშობლისა.

მწუხარებანი პირუელთა მამათანი დაჰჴსენ, ყოვლად უბიწოო ღმრთისა დედაო, რამეთუ ჰშევ შენ, ცხოვრების-მომცემელი, რომელსა ევედრე აწ ცხოვრებისათჳს, სულთა ჩუენთასა, სასოო სოფლისაო:

მშჳლდი ძლიერთა მოუძლურდა, და უძლურნი შეიმოსნეს ძალითა…

სხუა, სძლისპირი.

მშჳლდი ძლიერთა მოუძლურდა, და უძლურნი შეიმოსნეს ძალითა მაღლისათა, ამისთჳსცა განძლიერდა დღეს, უფლისა მიერ გული ჩემი:

ყოველი სათნოებაჲ წარმართე და ყოველივე ცოდუაჲ გულითად…

ტროპარნი.

ყოველი სათნოებაჲ წარმართე და ყოველივე ცოდუაჲ გულითად მოიძულე შენ, ხოლო სინანულისა გზანი, ნეტარო ყოველთა უჩუენენ:

დიდად, წინა-მსრბოლად გამოსჩნდი, სიტყვისა ჴორცთ-შესხმულისა, ამისთჳს გევედრები, მიჴსენ ვნებათა ბოროტთაგან, და უვნებელობად მიმიძეღუ:

ვიდრეღა ჴორცთა შინა იყავ, უჴორცოთა ცხოვრებაჲ, აჩუენე წინა-მორბედო, რომლისა ბაძუად ღირს-მყუენ ღირსო, გევედრებით ლოცჳთა შენითა:

ცხონდა, სძალო შენგან სოფელი, გარდასლჳსათჳს წარწყმედილი და უჴმარ-ქმნილი, ამისთჳს შესხმითა საღმრთოჲთა, ჯეროვნად გნატრის და გადიდებს:

შენ მეუფეო მეუფეთაო ღმერთო, სიტყუაო რომელი მამისაგან…

გალობა დ. სძლისპირი.

შენ მეუფეო მეუფეთაო ღმერთო, სიტყუაო რომელი მამისაგან იშევ, მხოლო მხოლოსა მიერ, ვითარცა ღმერთ-ხარ სული შენი სახიერი თანა-სწორი, მომეც მონათა ძალსა შენსა დიდება:

განუშიშულდი სათნოებათაგან მე უბადრუი, და შევიმოსე ცოდჳსა…

ტროპარნი.

განუშიშულდი სათნოებათაგან მე უბადრუი, და შევიმოსე ცოდჳსა სიბოროტჱ, და აღსავსევიქმენ მე, ყოვლითა სირცხჳლითა იესო მჴსნელო კაცთ-მოყუარეო, სამკაულითა, საღმრთოჲთა განმაშუენე:

ვიდოდე რა სოფლისა ამის ზღუასა შინა, მედგრობითა ჩემითა დანთქმად მივეცი, ჴორცთა გემოსა მიერ, და გულის-თქმათა ამაოსა მწარისა, კუეთებისა ქრისტე, სინანულისა, ნავთ-სადგურად მიმიძეღუ:

სიმპალე და სიმყრალე უღმრთოებისა, განწმიდეს და განასუნნელეს…

მოწამეთა.

სიმპალე და სიმყრალე უღმრთოებისა, განწმიდეს და განასუნნელეს მარტჳლთა, მჴნეთა და უძლეველთა, მოთმინებითა და წყლულებათა მათთა მარილითა, და სუნნელებაჲ, მიჰფინეს ცისკიდეთა:

მსგავსად ქუათა პატიოსანთა გორჳდეს რა, მჴნენი მოწამენი ქუეყანასა ზედა, საცთურისა შენებაჲ, ძნელოვანი შემუსრეს, და დაიწულილეს უძლეველთა, მათ მიერ მჴსნელო, აცხოვნენ სულნი ჩუენნი:

მაცხოვრად ჩემდა გხადი ღმრთისა, დედაო, და ყოველსა…

ღმრთის-მშობლისა.

მაცხოვრად ჩემდა გხადი ღმრთისა, დედაო, და ყოველსა ჟამსა და ადგილსა, შემწედ ჩემდა მოგიგებ, ნუ დამაგდებ მე ჭირუეულსა ამას მონასა შენსა, არამედ მიჴსენ, ვნებათა ბოროტთაგან:

ვითარცა გურიტი უმანკოჲ, ჰქადაგებდ შენ არესა ცხოვრებისასა…

სხუა. სძლისპირი. სიყუარული წყალობისა.

ვითარცა გურიტი უმანკოჲ, ჰქადაგებდ შენ არესა ცხოვრებისასა ჭეშმარიტსა სიტყჳთა ჭეშმარიტებისათა, ქრისტეს წინა-მორბედო:

ვითარცა შუამდგომელმან, დიდმან ძუელისა, და ახლისა სჯულისამან, დაძუელებული ესე, ცოდჳთა განმაახლე, ქრისტეს წინა-მორბედო:

რომელმან უბრალოჲთა მით, ცხოვრებითა უდაბნოჲ განაშუენე, უქმი გონებაჲ ჩემი, აღავსე ნაყოფითა, ქრისტეს წინა-მორბედო:

მჴსნელ და მაცხოვარ-გუექმნა ჩუენ ძე შენი ქალწულო…

ღმრთის-მშობლისა.

მჴსნელ და მაცხოვარ-გუექმნა ჩუენ ძე შენი ქალწულო ყოვლად უბიწოო, მას ევედრე ჴსნად ჩუენდა, რომელნი წადიერად, და სურჳლით გნატრით შენ:

მოვედით დღეს შჳლნო ეკკლესიისანო, და განათლდით თქუენ…

გალობა ე. სძლისპირი.

მოვედით დღეს შჳლნო ეკკლესიისანო, და განათლდით თქუენ მადლითა, სულისათა, რომელ-არს მსგავს ცეცხლისა, შემწუელ ცოდჳსა, რომლისა მიერ სიონით ვიცანთ სჯული, ცეცხლისა ენათაგან დამტკიცებული:

დაჴსნილობით გარდავიჴდი ცხოვრებასა, ჩემსა ხრწნილებასა შინა, და…

ტროპარნი.

დაჴსნილობით გარდავიჴდი ცხოვრებასა, ჩემსა ხრწნილებასა შინა, და საცთურსა, და მაცთურისა მიერ დაბნელებულ-ვარ, წარმიძეღუ ნათლად სინანულისად მჴსნელო, და ცხოვრებაჲ უბრალოჲ მომანიჭე მე:

ამაღლდა გული ჩემი გუელისა მიერ, და დავეცი დაცემითა, სასტიკითა, აღდგომაო ყოველთა დაცემულთაო, ქრისტე ღმერთო აღმადგინე და მაცხოვნე მე, მოწყალებათა შენთა სიტკბოებაო:

ცუარითა სისხლთა თქუენთათა დაშრიტეთ თქუენ, ცეცხლი მრავალ-ღუთაებისა…

მოწამეთა.

ცუარითა სისხლთა თქუენთათა დაშრიტეთ თქუენ, ცეცხლი მრავალ-ღუთაებისა, ჵ ნეტარნო, მარტჳლნო და წჳმანი კურნებათანი, წარღუნელნი სენთანი აღმოაცენენით, და ვნებათა საჴუმილსა მდიდრად შეაცურევთ:

მდგომარენი წინაშე საყდართა მათ, მსაჯულთა უსჯულოთასა, ქუათა მიერ, უწყალოდ განტჳნულნი ფრიად გუემულნი, შემუსრჳლნი და ყოვლითურთ განლეულნი, არა შეირყიენით ქრისტეს მარტჳლნო:

აღმომიბრწყინუე წმიდაო დედოფალო, მადლი წყალობათა შენთა, შეპწყრობილსა…

ღმრთის-მშობლისა.

აღმომიბრწყინუე წმიდაო დედოფალო, მადლი წყალობათა შენთა, შეპწყრობილსა, ბნელითა ცოდუათათა და წარმიძეღუ მე, ნათელსა ბრწყინუალესა სინანულისასა, რათა გიგალობდე შენ სარწმუნოებით:

ვნებათა ოხრებისა, ნაკუერცხალთა მიერ, აღტყინებული ვედრებათა შენთა…

სხუა. სძლისპირი. ნათელი შენი.

ვნებათა ოხრებისა, ნაკუერცხალთა მიერ, აღტყინებული ვედრებათა შენთა, ცუარითა დიდო წინამორბედო, შეუწუელად მიჴსენ მისგან:

სიბრძნემან და ძალმან, და მარჯუენემან მამისამან, მარჯუენისაგან შენისა ნათელს-იღო, და მტერისა ჴელთაგან მიჴსნის ჩუენ, მეოხებითა შენითა:

სიმტკიცედ შესავედრებელად, და ჴელის-აღმპყრპობელად ყოველი სოფელი გიცნობს იოანე, მიჴსენ ჩუენცა ყოველთა ჭირთაგან, მეოხებითა შენითა:

შუენიერება ეგე იაკობისი ღმერთმან, შეგიყუარა ქალწულო ღმრთის-მშობელო…

ღმრთის-მშობლისა.

შუენიერება ეგე იაკობისი ღმერთმან, შეგიყუარა ქალწულო ღმრთის-მშობელო, სდა უშუერებაჲ ადამიანთა, შენ მიერ კუალად განაშუენა:

შენ ქრისტე ღმერთო ჩუენო, გამოგჳბრწყინდი სიტყუა ღმრთისა…

გალობა ვ. სძლისპირი.

შენ ქრისტე ღმერთო ჩუენო, გამოგჳბრწყინდი სიტყუა ღმრთისა ჴორცითა, ქალწულისაგან, რათა დანთქმული ადამ აღმოიყუანო, იონას-სახედ ნათესავითურთ მისით, მუცლისა მისგან, მჴეცისა მომსრუელისა:

მედგრობისა ძილითა დავჰჴსნდი, უდები, და ცოდჳსა ჰრუბლითა…

ტროპარნი.

მედგრობისა ძილითა დავჰჴსნდი, უდები, და ცოდჳსა ჰრუბლითა, დავსლბი მედგარი, სინანულისა ნათლითა განმანათლე, ქრისტე სახიერ და აღმადგინე მჴსნელო, მოღუაწებისა, ქუელის-საქმეთა მიერ:

ჵ ვითარ დავაკუეთე საწყალობელი, ჵ ვითარ განუეშორე, ტკბილსა უფალსა, ჵ ვითარ არა მოვიღებ გონებასა, სამსჯავროსა მას, რომლითაცა დასჯადვარ, დამბადებელო ჩემო შემიწყალე მე:

ქნარ ჴმა-ტკბილ-იქმნენით თქუენ, ღირსნო მარტჳლნო, და ორღანო…

მოწამეთა.

ქნარ ჴმა-ტკბილ-იქმნენით თქუენ, ღირსნო მარტჳლნო, და ორღანო შუენიერ, და დაატკბენით, გულნი მორწმუნეთანი, და სიმთრუალენი, საცთურისანი სრულიად განაჴმენით, ღმრთიუ-ბრწყინუალენო, ქრისტეს მორწმუნეთაგან:

კაცობრივთა საზღუართა ზესთა, იქმნენით, წმიდანო მოწამენო, წამის-ყოფითა…

ღმრთის-მშობლისა.

კაცობრივთა საზღუართა ზესთა, იქმნენით, წმიდანო მოწამენო, წამის-ყოფითა, დამბადებელისა მიმართ ჭეშმარითად, და უტკივრად ტკივილნი თავს-ისხენით, ვითარცა სხჳსა ჴორცითა დიდებულნო:

ქალწულო დედოფალო მონათა შენთა, უძლეველო შემწეო, შემწე მექმენ, და სამსჯავროსა მისგან საშინელისა, მიჴსენ მოსავი, და მაქებელი შენი, რათა გაქებდე მჴურუალედ დედოფალო:

შთავვარდი მე სიღრმესა ზღჳსასა, და ცოდჳსა უფსკრულთა…

სხუა, სძლისპირი.

შთავვარდი მე სიღრმესა ზღჳსასა, და ცოდჳსა უფსკრულთა, დამნთქეს მე, არამედ ვითარცა ღმერთ-ხარ, განხრწნისაგან, კუალად აღმოიყუანე, ცხოვრებაცა ჩემი მოწყალე:

დასდეგ და ნათელეც წყალთა შინა, მეუფესა რომელმან…

ტროპარნი.

დასდეგ და ნათელეც წყალთა შინა, მეუფესა რომელმან, აღიჴუნა ცოდუანი სოფლისანი, მას ევედრე, ჩუენთჳს წინა-მორბედო, რათა აცხოვნნეს სულნი ჩუენნი:

იქმენ შენ ქადაგ სინანულისა, რომლითა დაამტკიცე, შებღალული ცოდჳთა გული ჩემი, იოანე, და განაღჳძე იგი, და აღჭურე საქმედ კეთილისა:

ჴმა-ჰყავ შენ სულთა შორის უვალთა მოსლუა სიტყუა ღმრთისა, და დამჳდრება მათ შორის, იოანე, ამისთჳსცა, ჴმითა გალობისათა, მარადის გნატრის ეკკლესიაჲ:

სჯულისა სახეთა გამოსახეს, შობაჲ შენი ქალწულო, რომელთა…

ღმრთის-მშობლისა.

სჯულისა სახეთა გამოსახეს, შობაჲ შენი ქალწულო, რომელთა იგი აწ აღსრულებასა, განჳცდით ჩუენ, უხრწნელო დედოფალო, ჯეროვნად და ღირსად გადიდებთ:

მძლავრმან მიმძლავრებულმან, ჴმა-ჰყო ძლიერად, თაყუანის-ცემად ხატსა მას…

გალობა ზ. სძლისპირი.

მძლავრმან მიმძლავრებულმან, ჴმა-ჰყო ძლიერად, თაყუანის-ცემად ხატსა მას ოქროსასა, ხოლო მადლი სულისა, მიმიძღუების ჩუენ, მონებად ღმრთისა სამებით ცნობილისა, რათა უღაღადოთ მას, ღმერთო შენ კურთხეულ-ხარ:

რათა იჴსნე სოფელი ძუელისა მისგან, დასჯისა ქრისტე…

ტროპარნი.

რათა იჴსნე სოფელი ძუელისა მისგან, დასჯისა ქრისტე ახლად ყრმად გამოსჩნდი შენ, მოწყალებით სახიერ, ამისთჳს ვჰჴმობ მე, ცოდუათა მიერ დაძუელებული ესე, აწ განმაახლე, სინანულისა მიერ:

რომელმან სინანულითა იჴსენ მანასე, და მეძავი იგი ცრემლთა მიერ აცხოვნე, და კუალად ავაზაკი, მსწრაფლ შეიწყალე, მეცა ფრიად და მწარედ შეცოდებული, ესე მაცხოვნე, რათა გაკურთხევდე შენ:

რაჟამს ღელჳთა კერპთ-მსახურებისათა, სოფელი ესე ბოროტად დაინთქმოდა…

მოწამეთა.

რაჟამს ღელჳთა კერპთ-მსახურებისათა, სოფელი ესე ბოროტად დაინთქმოდა, მაშინ ღმრთის-მსახურებაჲ, ნავად იჴუმიეს, მარტჳლთა და საღმრთოჲთა მოღუაწებითა ნავთსაყუდელსა ზეცათასა შევიდეს:

ვითარცა ოქროჲ ბრძმედითა განწმედილი, ტანჯუათა მიერ განბრწყინდეს მოწამენი, და იქმნნეს ხატ-ბრწყინუალე, ქრისტეს ვნებათა, და საუნჯესა ცათასა დაიუნჯეს, უხრწნელებითა, საღმრთოჲთა შემკობილნი:

მჴსნელი და მაცხოვარი, და შემოქმედი, ჴორცითა გჳშევ…

ღმრთის-მშობლისა.

მჴსნელი და მაცხოვარი, და შემოქმედი, ჴორცითა გჳშევ წმიდაო დედოფალო, მას ევედრე უხრწნელო, რათა გჳჴსნნეს ჩუენ, ბოროტთაგან და ურიცხუთა შეცოდებათა, რომელნი ვაქებთ, მოწყალებათა მისთა:

ყოველივე ნაშობთა, უზესთაეს გამოჩნდი, წინასწარ-მეტყუელო დიდებულო, დიდად…

სხუა, სძლისპირი. აბრამიანთა.

ყოველივე ნაშობთა, უზესთაეს გამოჩნდი, წინასწარ-მეტყუელო დიდებულო, დიდად შეცოდებული, ვედრებითა შენითა, მიჴსენ ცეცხლით უშრეტით:

ლეღუსა უნაყოფოსა, ყოვლითურთ მივემსგავსე, და მეშინის მოკუეთისაგან, ვედრებითა შენითა, ნაყოფიერ-მყავ ბრძენო ქრისტეს წინა-მორბედო:

დააყუდენ აღძრუანი, და წყობანი მტერთანი, მოსავთა შენთა ზედა აღძრულნი, ვედრებითა შენითა, ქრისტეს წინა-მორბედო, ღმრთისა მეუფისაო:

იავარ-ყოფისაგან, და ზედა აღდგომისა, და მონებისა მტერთა…

ღმრთის-მშობლისა.

იავარ-ყოფისაგან, და ზედა აღდგომისა, და მონებისა მტერთა ბოროტთასა, იჴსნენ მონანი შენნი, ენითა და სულითა, მაქებელნი წმიდაო:

სამ-სახეობა სამებისა სამთა მათ, ალსა შეაცურევს და…

გალობა ჱ. სძლისპირი.

სამ-სახეობა სამებისა სამთა მათ, ალსა შეაცურევს და კრულებასა განჴსნის, ხოლო სამნი იგი მაღალსა აკურთხევენ, და ესრეთ ღაღადებენ დამბადებელო, და მჴსნელო ყოველთაო აღგამაღლებთ შენ:

არა დავადგერ, შიშსა შენსა მაცხოვარ, და არცაღა…

ტროპარნი.

არა დავადგერ, შიშსა შენსა მაცხოვარ, და არცაღა ვისმინე მცნებათა შენთა, არა ვჰქმენ ნება, შენი წმიდა ყოვლადუე, და ვიდრე ვიდე უბადრუკი ესე, შემიწყალე მოწყალე და ნუ განმაგდებ:

მუშაკო ტკბილო, მანგლითა მით შიშისა, შენისათა აღმოფხურენ ეკალნი იგი, გულის-თქმათანი, გულისაგან ჩემისა, და თავწარსხმულითა სინანულისათა, ნაყოფიერ-ჰყავ, სული ჩემი გლახაკი:

განვრცნეს ტანჯუათა, მიერ შეიწრებულნი, მჴნენი მარტჳლნი და…

მოწამეთა.

განვრცნეს ტანჯუათა, მიერ შეიწრებულნი, მჴნენი მარტჳლნი და შეაიწრეს მტერი, და ფერჴთა მათთა შეკრჳთა შეუბრკუმეს მას, ხოლო ჩუენ წარგჳძღუეს გზასა ზეცათასა, სარწმუნოებითა და სიყუარულითა:

დაინთქა მტერი, ღუაწლთა თქუენთა სიღრმესა, და უფსკრულსა მოთმინებათა თქუენთასა, და აწ ყოველთა, საცინელად ძეს ცოფი, ხოლო თქუენ ძლევით გჳრგჳნოსანნო მჴნენო, წინაშე სამებისა, წმიდისა სუფევთ:

მუცელი შენი ზჳნისა მის საღმრთოჲსა, კალოდ გამოსჩნდა…

ღმრთის-მშობელო.

მუცელი შენი ზჳნისა მის საღმრთოჲსა, კალოდ გამოსჩნდა ყოვლად უბიწოო, და მოგუართუა ჩუენ, ხუავად მზრდელი სოფლისა, ამისთჳს ვითარცა მიზეზსა კეთილთასა, სარწმუნოებით გაქებთ ღმრთისა დედაო:

მჴსნელო ყოველთაო, ძლიერო ღმერთო, ცეცხლსა შეთხეულნი, ყრმანი…

სხუა. სძლისპირი.

მჴსნელო ყოველთაო, ძლიერო ღმერთო, ცეცხლსა შეთხეულნი, ყრმანი იჴსნენი რაჟამს იგი შეაცურიე, საჴუმილით ღაღადებდეს აკურთხევდით, საქმენი უფლისანი უფალსა:

დანთქმული ძილითა და მედგრობითა, და დამონებული სიბოროტითა…

ტროპარნი.

დანთქმული ძილითა და მედგრობითა, და დამონებული სიბოროტითა, ლოცუათა შენთა ნათლითა, განმანათლე რათა სათნოებათა, დღესა შინა შუენიერად ვიდოდე:

განსაცდელთა ღელუაჲ, დამნთქამს უწყალოდ, და სიღრმჱ ვნებათა, შემაშთობს მწარედ, მიპყარ ჴელი წინა-მორბედო, და სინანულისა ნავთ-საყუდელსა, შეიყუანე ნავი სულისა ჩემისა:

რომელმან სოფლისა, ბრალთა აღმხმელსა, მდინარეთა წყალთა, შინა ნათელ-ეც, ბოროტთა ჩემთა უფსკრული, განაჴმე წყაროთა მადლთა შენთანა, იოანე ქრისტეს წინა-მორბედო:

იხილე თუალითა, სული ცხოველი, ისმინე ყურითა, ჴმაჲ მშობელისა, წამებდა რა საშინელად, შენ მიერ ნათელ-ღებულსა ქრისტესა, მას ევედრე ჩუენთჳს იოანე:

ვითარცა ხარ წყაროჲ განახლებისა, მტერისა ბრძოლითა განხრწნილი…

ღმრთის-მშობლისა.

ვითარცა ხარ წყაროჲ განახლებისა, მტერისა ბრძოლითა განხრწნილი ესე, განმაახლე მე ქალწულო, რათა სარწმუნოებით და სურჳლით, გადიდებდე ყოვლად საგალობელო:

გიხაროდენ შენ წმიდაო დედოფალო, დედათა დიდებაო, ქალწულთა…

გალობა თ. სძლისპირი.

გიხაროდენ შენ წმიდაო დედოფალო, დედათა დიდებაო, ქალწულთა თუალო, რამეთუ მეტყუელებად, ვერ შემძლებელ-ვართ, ღირსად ქებასა შობისა შენისასა, ამისთჳს სარწმუნოებით გადიდებთ შენ:

აჰა ესერა განღებულ-არს აწ სასძლოჲ და ბრძენნი…

ტროპარნი.

აჰა ესერა განღებულ-არს აწ სასძლოჲ და ბრძენნი შეამკობენ ლამპართა თჳსთა, ზეთითა სათნოებათათა და შევლენ, განაგდე ძილი, უმეცრებისა სულო, რათა ქრისტეს თანა, ლამპრითა ღირს-იქმნე შესლუად:

უ҃ხილავისა გონებისა ჴელითა, ვითარცა მეძავსა მას, მიპყრიან ფერჴნი, შენნი მჴსნელო და ცრემლითა დავალტობ მათ, და გევედრები, ცოდუათა და ბრალთა ჩემთა, მწჳრჱ განბანე, რათა გიგალობდე შენ:

იშუებენ გულნი და სულნი მართალთანი, ზეცას დამკჳდრებულნი…

მოწამეთა.

იშუებენ გულნი და სულნი მართალთანი, ზეცას დამკჳდრებულნი, და საწერტელთა, საღმრთოთა მიერ მარადის განშუენებულნი, ჩუენთჳს ითხოვენ ცოდუათა შენდობასა, და დიდსა წყალობასა სულთა ჩუენთათჳს:

წმიდა-იქმნების სოფელი, სავსებითურთ, ნაწილთა თქუენთა მიერ, ქრისტეს მჴედარნო, და უპყრიან იგინი სასოდ და ზღუდედ, და კუალად კაცნი ანგელოსთა თანა, მხიარულ-არიან სულთა თქუენთათჳს ღირსნი:

ჵ სახიერო ქალწულო კურთხეულო, რომელმან გჳშევ ღმერთი…

ღმრთის-მშობლისა.

ჵ სახიერო ქალწულო კურთხეულო, რომელმან გჳშევ ღმერთი, ყოვლად სახიერი სახიერ-ჰყავ უბადრუკი სული ჩემი, სავსე ცოდჳთა, და სიულთა ბოროტთა, და ვნებათა ბილწთა მძლედ გამოაჩინე იგი:

ევა ოდესმე ურჩებითა, წყევაჲ სოფლად შემოიღო, ხოლო…

სხუა. სძლისპირი.

ევა ოდესმე ურჩებითა, წყევაჲ სოფლად შემოიღო, ხოლო შენ ღირსო, წმიდაო ქალწულო ღმრთის-მშობელო, მორჩისა მუცლად-ღებითა უთესლოდ, აღმოუყუავილე სოფელსა კურთხევაჲ, ამისთჳსცა ყოველნი გადიდებთ:

ტროპარნი.

ძალ ჩემდა და გალობა ქრისტე, რომელსა ევედრე ნეტარო წინა-მორბედო, რათა მომცეს მე ძლევაჲ ვნებათა, და ყოვლისავე მტერთა კუეთებისა, და აღსრულებაჲ საღმრთოთა მცნებათა, რათა ჴსნილი, ქებით გიგალობდე:

შუენიერი გურიტი და მერცხალი, ტკბილად მჴმობელი გამოსჩნდი წინა-მორბედო, მაუწყებელად საღმრთოსა არესა, რომლისაგან გჳთხოვე რათა გჳჴსნნეს ჩუენ, ზამთრისაგან და ღელჳსა სულთა მკულელისა, რომელ-არს ცოდუაჲ და სიბოროტჱ:

აღიმღერენ საშოჲთ დედისათ, და ჰქადაგე ქალწულისა მიერ შობილი, რომელსა ევედრე ჴორცთა ჩემთა, აღძრჳსა მომკულელისა, მოკუდინებად, და აღუსებად სიხარულითა გული ჩემი, რათა გაქებდე წინა-მორბედო:

სასჯელი უწყალო-არს სულო, მათთჳს რომელთა იგი არა ჰყონ წყალობაჲ ეკრძალე და აღიღე შენ ზეთი, რათა არა დაშრტენ ლამპარნი შენნი, სიძე მოახლებულ-არს განიღჳძე, რათა არა ნებაჲ, დაშრეტილი გაქუნდეს:

კეთილის-მოყუარე ღმერთი ჰშევ, კეთილის-მოყუარეო ღმრთის-მშობელო ქალწულო, მას…

ღმრთის-მშობლისა.

კეთილის-მოყუარე ღმერთი ჰშევ, კეთილის-მოყუარეო ღმრთის-მშობელო ქალწულო, მას ევედრე რათა მიჴსნას მე, ყოვლისაგან სიბოროტისა სძალო, და დაჰნერგოს ჩემ შორის სიყუარული თჳსი, და აღმძრას მე ჴორცთა სიძულილად:

ცხოვარი სიტყჳერისა სამწყსოჲსა შენისა, შენდა მოვივლტი მწყემსისა…

აღჳვსენითსა ზედა, დასდებელნი სინანულისანი, ჴმა დ.

ცხოვარი სიტყჳერისა სამწყსოჲსა შენისა, შენდა მოვივლტი მწყემსისა კეთილისა, მომიძიე მე შეცთომილი ღმერთო, და შემიწყალე მე:

გრიგალთა ცოდჳსათა მომიცუეს მე მაცხოვარ, და ვერ შემძლებელ-ვარ თავს-დებად ღელუათა მისთა. შენდა მოვივლტი ქროლათა დამაყუდებელისა მათისა, ვითარცა პეტრეს მომეც მე ჴელი კაცთ-მოყუარებისა შენისა და მაცხოვნე მე:

ანგელოზთა თანა მოდასე-იქმნენით წმიდანო, და სტადიონსა შინა…

მოწამეთა.

ანგელოზთა თანა მოდასე-იქმნენით წმიდანო, და სტადიონსა შინა ახოვნად ჰქადაგეთ ქრისტეჲ, რამეთუ ყოველივე სიყუარული ამის სოფლისა, ვითარცა არა არსი დაუტევეთ, ხოლო სარწმუნოება ვითარცა ხარისხი მტკიცე შეიკრძალეთ, ვინაცა საცთური განჴადეთ, და მორწმუნეთა აღმოუცენებთ, მადლსა კურნებათასა დაუცხრომელად, მეოხ-გუეყუენით სულთა ჩუენთათჳს:

ღმრთის-მშობელო ყოველთა დედოფალო, მართლ-მადიდებელთა სიქადულო, მწუალებელთა სიცბილნი…

დიდება, აწდა. ღმრთის-მშობლისა.

ღმრთის-მშობელო ყოველთა დედოფალო, მართლ-მადიდებელთა სიქადულო, მწუალებელთა სიცბილნი და პირნი მათნი სირცხჳლეულ-ჰყუენ, რომელნი არა თაყუანის-სცემენ, და არცა პატივს-სცემენ, ყოვლად უბიწოსა ხატსა შენსა ყოვლად დიდებულსა:

ხისა მიერ ადამ, შეცთომილი განვარდა სამოთხით, ხისა…

სამ-შაბათსა, მომიჴსენენი, ჴმა დ.

ხისა მიერ ადამ, შეცთომილი განვარდა სამოთხით, ხისა მიერ ჯუარისა, ავაზაკი შევიდა სამოთხედ, რამეთუ მან შეურაცხ-ყო, ბრძანებაჲ დამბადებელისა თჳსისა, ხოლო ესე მის თანა ჯუარცმული ღაღადებდა აღსარებით, მომიჴსენე მჴსნელო, სასუფეველსა შენსა:

რომელმან პეტრეს ცრემლნი, და მეძჳსა ტირილი შეიწირე, და მეზუერისა სულთქმაჲ, წყალობით მიითუალე სახიერ, ჩუენიცა ესე თხოვაჲ, და შევრდომაჲ მიითუალე, და ცოდუათა შენდობაჲ, კაცთ-მოყუარე მომმადლე, და მაცხოვნე მე, და მიჴსენ საუკუნეთა სატანჯუელთაგან:

ვითარცა ბერწობისა, საკრუელნი განჰჴსნენ წინა-მორბედო, გულისაცა ჩემისა, უნაყოფოებაჲ დაჰჴსენ ნეტარო, და ღირს-მყავ გამოღებად, კეთილთა საქმეთა ოხითა შენითა, რათა დავიმკჳდრო მე, შუებაჲ სამარადისოჲ, და ვღაღადებდე, მომიჴსენე მჴსნელო სასუფეველსა შენსა:

შემუსრჳლთა ტანჯჳთა, და საჭმლად მჴეცთა უწყალოდ მიცემულთა…

მოწამეთა.

შემუსრჳლთა ტანჯჳთა, და საჭმლად მჴეცთა უწყალოდ მიცემულთა, და დაჭრილთა მძჳნუარედ, და ზღჳსა უფსკრულთა შთათხეულთა, და ცეცხლითა განლეულთა, და უმსჯავროჲთა განსჯითა, არა უარ-ჰყავთ ღმერთი და მუედრებელთა თქუენთა, და მგალობელთა, მშჳდობასა მისცემთ მარტჳლნო:

განჳწმიდნეთ ყოველთა გონებანი, და სამებასა წმიდასა უღაღადებდეთ…

დიდება.

განჳწმიდნეთ ყოველთა გონებანი, და სამებასა წმიდასა უღაღადებდეთ, მამაო, და ძეო მხოლოდ-შობილო, და სულო წმიდაო ერთ-პატივო, დაიცუენ მონანი შენნი, რომლითა უბიწოჲთა სიყუარულითა გმსახურებენ შენ, ერთსა ღუთაებასა, მეუფებასა, და უფლებასა, და გიგალობენ, მომიჴსენენ ჩუენ სასუფეველსა შენსა:

მამისა თანა არსი, ხოლო სულისა თანა მოსაყდრე…

ღმრთის-მშობლისა.

მამისა თანა არსი, ხოლო სულისა თანა მოსაყდრე, შეიწყნარე საშოსა, და ჰშევ ზესთა ცნობისა და სიტყჳსა, განკაცებული ჴორცითა, ცხოვრებად კაცთა ნათესავისა ღირსო, მარიამ ღმრთისა სძალო, ადგილო დიდებულო ქრისტეს ღმრთისაო, მისსა მიმართ მეოხ-გუეყავ რათა გვაცხოვნნეს:

ვინ შეუძლოს სძალო, მითხრობად საიდუმლო, შობისა შენისა…

სერობისად გალობანი წმიდისა. ღმრთის-მშობლისანი. გალობა ა. ჴმა დ. სძლისპირი. დაანთქენ ვნება.

ვინ შეუძლოს სძალო, მითხრობად საიდუმლო, შობისა შენისა გამოუკულეველისა, განჰკრთებიან გონებანი არამედ უძლური შესხმა, ჩუენი მიიღე ქალწულო, და გჳთხოვე ქრისტესგან დიდი-წყალობა:

სიმდაბლით მოვიდა სიტყუა დაუსაბამო ჴორც-შესხმად შენგან ღმრთის-მშობელო ქალწულო, და იშუა მიუწთომელად, ცხოვრებისათჳს კაცთასა, და დაგიცუა შენ ქალწულად, ყოვლად წმიდად ვითარცა პირუელ შობისა:

ნათლისა საღმრთოსა, საუნჯეო ქალწულო, ქალწულებით მშობელო ღმრთისა მაღლისაო, ცოდუათა ჩუენთა წყუდიადი, განაბნიე და მოგუმადლე, მონათა შენთა ნათელი, და მადლი სიწმიდისა რათა გადიდებდე:

მთასა მას ღმრთისასა რომელიცა იხილა, დანიილ რომლისაგან გამოეკუეთა ლოდი, საკიდური უხელოდ ქრისტე, რომელმან დასხნა ეშმაკნი ღმრთის-მშობელსა დედოფალსა, შესხმით უგალობდეთ რამეთუ დიდებულ-არს:

არა სიბრძნითა, არცა ძალითა, მით კაცობრივითა ვიქადით…

გალობა გ. სძლისპირი. არა სიბრძნითა.

არა სიბრძნითა, არცა ძალითა, მით კაცობრივითა ვიქადით ღმრთის-მშობელო, არამედ სასოებითა შენითა, და ჭეშმარიტად დედად ღმრთისად აღგიარებთ:

აღმატებულ-არს, ზესთა ქება შენი ენასა ჩუენსა, რამეთუ ვერ მისწუთების, საიდუმლოთა შენთა ღმრთის-მშობელო, არამედ მსგავსად ძალისა ქებით გადიდებთ:

ითხოვე ჩუენთჳს, კურნება სულთა და ჴორცთა ქალწულო, მჴსნელისაგან მაცხოვრისა, რომელი იშუა შენგან სანატრელო, რათა მოგუანიჭოს ჩუენ დიდი-წყალობა:

სასიკუდინოთა სენითა მდებარე ვარ მე უღუაწოდ, ცოდუათა სიმრავლითა, მომხედენ წყალობით ღმრთის-მშობელო და განჰკურნე, სული ჩემი ყოვლად წმიდაო:

ენითა ამით უძლურითა, ვითარ უძლო ქებად შენდა…

გალობა დ. სძლისპირი. იესო მჯდომარე დიდებით.

ენითა ამით უძლურითა, ვითარ უძლო ქებად შენდა, ჵ ყოვლად წმიდაო, რომელი მჴედრობათა ცისათა, აღემატე დიდებითა, რამეთუ შემოქმედი მათი ჰშევ ჴორციელად ვითარცა ჩჩჳლი:

ვითარცა უზესთაესსა, ყოველთა არსთასა სძალო მშობელო ღმრთისაო, ანგელოსთა მჴედრობა და ადამის, ნათესავნი გადიდებენ, სასოსა, სიმტკიცესა და სიქადულსა, მორწმუნეთასა:

ულხინე ტყუე-ქმნილსა სულსა ჩემსა, მრავალთა ცოდუათა მიერ, დედაო ღმრთისაო და მომაქციე ალაგთაგან, წარწყმედისათა და მომეც ლმობიერება, და ცრემლნი მჴურუალენი განმწმედელად, ცოდჳსა ბრალთა:

სიბრძნით განმგებელი ყოველთა, ძე ღმრთისა დაუსაბამო, საშოსა იტჳრთე, ყოვლად უბიწოო ღმრთის-მშობელო, და ჰბრწყინავ ელუარებითა ქალწულებისათა ამისთჳს, ქებით გადიდებთ:

ტაძრად დიდებისა და მთად ღმრთისა, სასანთლედ საყდრად…

გალობა ე. სძლისპირი. აწ აღვდგე თქუა.

ტაძრად დიდებისა და მთად ღმრთისა, სასანთლედ საყდრად, და სძლად მაღლისა გყო ძემან ღმრთისამან, ქალწულო რაჟამს შენთანა დაიმკჳდრა მან, და სამოთხედ საშუებელისად, შესავედრებელად მორწმუნეთა:

უფლისა დედად აღგიარებთ შენ, და გევედრებით, ღმრთის-მშობელო გჳთხოვე ძისა შენისაგან შენდობა ცოდუათა, დღესა მას დიდსა, მოსლჳსა მისისასა განსჯად ყოველთა საშინელებით:

მარიამ ყოველთა დედოფალო, ცოდჳლი მონა, შენი გამომიჴსენ ბოროტისაგან მტერისა და დამამონე, შენგან შობილსა, და შენდობა ცოდუათა, მითხოვე მისგან გევედრები:

გარე-შეუწერელი ღმერთი, და შეუხებელი, ბუნებითა მით ღუთაებისათა საშოსა შენსა იტჳრთე, ქალწულო ღირსო, და გჳშევ უქცეველად, ღუთაება და კაცება სრული:

ტაძრად სიწმიდისა გყო ქალწულო, სიტყუამან მამისამან, რაჟამს…

გალობა ვ. სძლისპირი. შთავარდი მე სიღრმე.

ტაძრად სიწმიდისა გყო ქალწულო, სიტყუამან მამისამან, რაჟამს არსებით დაემკჳდრა შენთანა, ამისთჳსცა, გევედრები ვნებანი ჩემნი განჰკურნენ დედოფალო:

ცისა მნათობთა უბრწყინუალესო, მარიამ უბიწოო, ბნელითა ცოდუათათა შეპყრობილი, სული ჩემი, განანათლე და მომეც, წყალობაჲ შენი დედოფალო:

ღი҃რსად და ჭეშმარიტად გნატრიან, ყოველნი ნათესავნი, უბიწოო ღმრთის-მშობელო მარიამ, და შესწირუენ ვედრებასა შენდამი, და ითხოვენ დიდსა წყალობასა:

აღმისუბუქენ ტჳრთი ცოდუათა, ღმრთის-მშობელო ქალწულო, და დააცხრუენ ღელუანი მჴჳნუარენი, სულიერნი ძისა შენისა მიმართ, მეოხებითა დედოფალო:

უზესთაეს ცნობათა არს ქალწულო შობისა, შენისა საიდუმლო…

გალობა ზ. სძლისპირი. ბაბილონს სამთა ყრმა.

უზესთაეს ცნობათა არს ქალწულო შობისა, შენისა საიდუმლო, რამეთუ ქრისტე ორითა მით, ბუნებითა ჰშევ და ეგე ქალწულად საუკუნოდ ღირსო:

ბუნებით, უცუალებელი ძე თანა სწორი, მამისა და სულისა, ჰშევ ქალწულო ჴორციელად, კურთხეულ-ხარ შენ დედაო უსძლოო, ღმრთისა დამტევნელო:

ღმერთი ჴორცითა იშუა შენგან მიუწთომელად, ქალწულო ღმრთის-მშობელო, და აცხოვნნა კაცნი და ჴმობენ, კურთხეულ-ხარ შენ უფალო, და ღმერთო მამათა ჩუენთაო:

უხრწნელად, და უთესლოდ ჰშევ ღმერთი ჭეშმარიტი, სანატრელო მარიამ და ყოვლად შობისა კუალად ქალწულად, ჰგიე უბიწოდ ამისთჳს, გაკურთხევთ მარადის:

მამისა მაღლისა, ძე თანა-სწორი, საშოსა იტჳრთე ქალწულო…

გალობა ჱ. სძლისპირი. მჴსნელო ყოველთაო.

მამისა მაღლისა, ძე თანა-სწორი, საშოსა იტჳრთე ქალწულო ღირსო, სულისა წმიდისა მადლითა, და ჰშევ ჴორცითა, რომელსა უღაღადებთ აკურთხევდით:

კურთხეულ-ხარ შორის, დედათა სძალო, რომელმან გჳშევ ჩუენ ღმერთი ჴორცითა, მფლობელი ყოველთა დაბადებულთა, მჴსნელად მორწმუნეთა და ჰჴმობენ აკურთხევდით:

ცოდჳსა ტჳრთითა დამძიმებული, განმათავისუფლე ღმრთისა დედაო, და განჰკურნენ სალმობანი, სულისა ჩემისანი და ჴმა-ვჰყო აკურთხევდით, საქმენი უფლისანი:

ნავთ-სადგურად გიცი, შენ ცხოვრებისა, და მოვივლტი შენდა, მე მონა შენი, ყოვლად წმიდაო ქალწულო მიჴსენ ბრალთა ჩემთა სიმრავლისაგან, რათა ვაქებდე შობასა შენსა:

თაყუანის-ვჰსცემ შობასა შენსა, ქალწულო რომლისა მიერ იქმნა…

გალობა თ. სძლისპირი. სენ სორის აღესრულა.

თაყუანის-ვჰსცემ შობასა შენსა, ქალწულო რომლისა მიერ იქმნა ჴსნა ჩუენი წყევისაგან, პირუელისა, და შობილსა შენგან ქრისტესა ღმერთსა, გალობითა დაუდუმებელითა ვადიდებთ:

მაღლისა დედად ღირსო, აღგიარებთ შენ, ჩუენ გამოჴსნილნი ესე შობითა შენითა გევედრებით, ღირს-მყუენ მარჯუენით ძისა შენისა სძალო, მეორედ მოსლუასა მისსა რომელნი გადიდებთ:

რომელი უხილავ-არს, ბუნებითა მით, ღუთაებისათა სიტყუა თანა-სწორი მამისა, უქცეველად, კაც-იქმნა ქალწულისა საშოსა, და ღმერთ-ჰყო ბუნება კაცობრივი სახიერებით:

უღირსთა ბაგეთაგან, უძლური შესხმა, და კნინი შეჰსწირე დედაო ღმრთისაო, და გჳთხოვე ძისა შენისაგან შენდობა ცოდუათა, რომელნი ვითარცა ღმრთის-მშობელ ხარ გადიდებთ: