გულანი
საცდელი · 1.37.0
ხმა 1 · ოთხშაბათი 1 / 71ნებნი შენნი ყოვლად წმიდანი ქრისტე ძელსა ზედა…

ხმა 1 · ოთხშაბათი

რვა ხმა

პარაკლიტონი · დაახლ. 29 წთ

ნებნი შენნი ყოვლად წმიდანი ქრისტე ძელსა ზედა…

მწუხრად, უფალო ღაღად-ვჰყავსა ზედა, დასდებელნი ჯუარსან. ჴმა ა. ყოვლად ქებულნო მოწამენო.

ნებნი შენნი ყოვლად წმიდანი ქრისტე ძელსა ზედა აღამაღლენ, და თითნი შენნი სისხლიან-ჰყუენ, მნებებელმან ჰჴსნად სამღთოთა ჴელთა შენთა ქმნულისა კაცთ-მოყუარე. ადამ გარდასლჳთა შეპყრობილისა სუფევასა შინა სასიკუდინეთა, რომელიცა აღადგინე ჴელმწიფებითა შენითა ყოვლად ძლიერო:

ჯუარსა ზედა დამსჭუალულმან ქრისტე ღმერთო ვითარცა კაცმან, ბუნებაჲ კაცობრივი განამღთუე, და დასაბამი იგი ბოროტთა გუელი მოაკუდინე, ხოლო ჩუენ ძელისა ძლითისა წყევისაგან განგუათავისუფლენ, რტამეთუ მოჴუედ წყევასა შინა ქმნილი ვითარცა სახიერი რათა ყოველთა მოსცე კურთხევაჲ და დიდი წყალობაჲ:

მეუფემან უზესთაესმან ყოვლისა პატივისამან, უპატიო-ყოფად ჯერიჩინე, საყუედრელისა სიკუდილისა დამთმენელმან მოწყალეო ძელსა ზედა, რომლისა მიერ მოისთლო უკუდავებაჲ ნათესავმან კაცთამან, და ცხოვრება მოიღო პირუელივე მოჰკუედ რა ჴორცითა ყოვლად ძლიერო:

შემძლებელ-ხარ ყოვლად წმიდაო ქალწულო, რათა მიჴსნა მე…

სხუანი, დასდებელნი ღმრთის-მშობლისანი მსგავსნივე.

შემძლებელ-ხარ ყოვლად წმიდაო ქალწულო, რათა მიჴსნა მე შემუსრჳსაგან ასოთასა, და ღრეკისაგან ჴელთასა, განრღუევისაგან მუჴლთასა, განსივებისაგან ფერჴთასა, სხუა და სხუათაგან ვნებათა, ესე-ვითართა უკუე ყოველთაგან ბოროტ-შემთხუევათა სიმრთელით დამიცევ მე, კეთილ-ნაწლეობისათჳს ღმრთისა და შემოქმედისა ჩემისა:

განუსდერკ ვნებათა მიერ სიბოროტეთათა, და უბადრუკ-ვიქმენ საძაგელებისაგან საქმეთა ყოვლად-მწიკულევანთასა, რომელთა გამოხატუანი და შეგინებულნი ხილუანი აწ კუალადცა შემაშფოთებენ მე, და გულსა ჩემსა გარდააქცევენ და მისდრეკენ, სურჳლისა მიმართ მათისა, გარნა მიჴსენ მე მათგან, ყოვლად-უბიწოო:

ცხოვრებაჲ ჩემი ყოვლად-წმიდაო მრავლითა სიბოროტითა, და მრავლითა განცდილებითა აღსავსე-არს, რომელთა არა ვეკრძალე მე, გარნა განმათავისუფლე შენ მათგან, და მომეც მე გულის-ჴმის-ყოფაჲ, და ცხოვრებაჲ შეუბრკოლებელი, და სიტყუაჲ მძლეთ-ცნობიერი, რათა სარწმუნოებით გნატრიდე შენ, და ვადიდებდე სამღთოსა სახელსა შენსა:

უმსჯავროდ დაკლუაჲ შენი ქრისტე, იხილა რა ქალწულმან…

დიდება, აწდა. ჯუარ-ღმრთის-მშობლისა. მსგავსივე.

უმსჯავროდ დაკლუაჲ შენი ქრისტე, იხილა რა ქალწულმან გოდებით გიღაღადებდა შენ შჳლო უტკბილესო ვითარიმე უკუე ივნებ უმსჯავროდ, ანუ ვითარ ძელსა ზედა დამოეკიდები, რომელმან ყოველი ქუეყანაჲ დაჰკიდე წყალთა ზედა, ნუ დამიტევებ მე მარტოსა ქუელის-მოქმედო და მრავალ-მოწყალეო, დედასა და მჴევალსა შენსა გევედრები:

ჯუარი აღემართა თხემისა ადგილსა, რომლისაგან აღმოგჳცენდა ჩუენ…

სტიქარონი, ჯურისა, ჴმა ა.

ჯუარი აღემართა თხემისა ადგილსა, რომლისაგან აღმოგჳცენდა ჩუენ უკუდავება, წყაროსაგან დაუწყვედელისა, გუერდისაგან მაცხოვრისა:

განუკუეთელ ზღუდე ჩუენდა არს, პატიოსანი ჯუარი მაცხოვრისა, და ყოველნი ვსცხონდებით რომელნი მას ვესავთ და თაყუანის-ვსცემთ:

ეჰა კეთილისა მის ვაჭრობისა თქუენისა წმიდანო, რამეთუ…

მოწამეთა.

ეჰა კეთილისა მის ვაჭრობისა თქუენისა წმიდანო, რამეთუ სისხლნი მისცენით და ცანი დაიმკჳდრენით, და საწუთოსა განცდილნი საუკუნოდ მხიარულ-ხართ, ჭეშმარიტად კეთილ-არს ვაჭრობაჲ თქუენი, რამეთუ განხრწნადნი დაუტევენით, და უჴრწნელნი მოიგენით, და ანგელოსთა თანა ჰგალობთ, და ადიდებთ დაუდუმებელად სამებასა ერთ-არსებასა:

მახჳლმან განულო გული ჩემი ჵ შჳლო, ქალწული…

დიდება, აწდა. ჯუარ-ღმრთის-მშობლისა, ყოვლად-ქებულნო მოწამენო.

მახჳლმან განულო გული ჩემი ჵ შჳლო, ქალწული იტყოდა, რამეთუ ძელსა ზედა დამოკიდებული გიხილე რა ქრისტე, განგმერილვიქმენ მეუფეო, ვითარ იგი წინათ თქუა სიმეონ, არამედ აღდეგ და მადიდე უკუდაო, მჴევალი და დედა შენი გევედრები:

აცხოვნე უფალო ერი შენი, და აკურთხე სამკჳდრებელი…

ოთხშაბათსა ცისკრად, შემდგომად ა, სტიხოლოგიისა, წარდგომანი ჯუარისანი, ჴმა ა.

აცხოვნე უფალო ერი შენი, და აკურთხე სამკჳდრებელი შენი, ძლევაჲ ჯუარითა ბარბაროსთა ზედა ღმრთივ-დაცულსა ერსა ჩუენსა მოანიჭე, და საფარუელსა ქუეშე მისსა დაიცევ რათა ვიტყოდეთ, უფალო დიდება შენდა:

ჯუარცმითა შენითა ქრისტე განიგმირა მძლავრი, და დაითრგუნა…

აღამაღლებდით უფალსა, ღმერთსა ჩუენსა, და თაყუანის-ჰსცემდით კუარცხლბეკსაფერჴთა მისთასა, რამეთუ წმიდა არს.

ჯუარცმითა შენითა ქრისტე განიგმირა მძლავრი, და დაითრგუნა ძალი მტერისა, რამეთუ არა ანგელოსმან არცა კაცმან, არამედ თავადმან უფალმან მაცხოვნენ ჩუენ:

შენ შუა-მდგომელად გუაქუ ყოვლად წმიდაო, და ვედრებითა…

დიდება, აწდა. ჯუარ-ღმრთის-მშობლისა.

შენ შუა-მდგომელად გუაქუ ყოვლად წმიდაო, და ვედრებითა შენითა ბოროტთაგან ვიჴსნებით, ჯუარითა ძისა შენისათა ყოვლადუე დაცულნი, ჯერისაებრ შენ ყოველნი კეთილ მსახურებით გადიდებთ:

ჯუარისა შენისა ძელსა თაყუანის-ვჰსცემთ კაცთ-მოყუარე, რამეთუ ყოველთა…

შემდგომად ბ. სტიხოლოგიისა, წარდგომანი ჯუარისანი, ჴმა ა. რაჟამს ლოდი იგი.

ჯუარისა შენისა ძელსა თაყუანის-ვჰსცემთ კაცთ-მოყუარე, რამეთუ ყოველთა ცხოვრებაჲ მას ზედა დაემსჭუალე მაცხოვარ, და მორწმუნესა ავაზაკსა სამოთხჱ განუღე, და საშუებელი მიანიჭე, რამეთუ აღგიარა შენ და ღაღადებდა, მომიჴსენე მე უფალო, ჩუენცა შეგჳწყალენ ვითარცა იგი, რომელნი ვღაღადებთ ვჰსცოდეთ ყოველთა, ნუ უგულებელს-გუჰყოფ ჩუენ წყალობითა შენითა:

საჭურუელი ჯუარისა, ოდესმე ბრძოლათა შინა გამოუჩნდა ღმრთის-მსახურსა…

ხოლო ღმერთმან, მეუფემან ჩუენმან, წინა საუკუნეთამან, შეჰქმნა ცხოვრება შორის ქუეყანისა. მსგავსივე, მჴედარნი რომელნი საფლავსა შენსა.

საჭურუელი ჯუარისა, ოდესმე ბრძოლათა შინა გამოუჩნდა ღმრთის-მსახურსა მეფესა კონსტანტინეს ძლიერებად უბრძოლუელად მტერთა მიმართ, ძალითა სარწმუნოებისათა, ამისგან ძრწიან ძალნი ჯოჯოხეთისანი ესე იქმნა ცხოვრებაჲ მორწმუნეთაჲ და სიქადულ პავლესა:

ჵ საკჳრუელი ახალი, ჵ საშინელი საიდუმლო ჰჴმობდა…

დიდება, აწდა. ჯუარ-ღმრთის-მშობლისა.

ჵ საკჳრუელი ახალი, ჵ საშინელი საიდუმლო ჰჴმობდა ტარიგი და ყოვლად უბიწო ქალწული, რაჟამს იხილა ძელსა ზედა განრთხმული უფალი, ნებთა მიერ მპყრობელი ყოველთა, ვითარ უბრალო იგი დაისაჯა მსაგულთაგან უსჯულოთა ჯუარსა ზედა:

განმმარტებელმან ჯუარსა ზედა ნებთა შენთამან მოწყალე, შეჰკრიბენ…

შემდგომად გ. სტიხოლოგიისა, წარდგომანი, ჴმა ა. მჴედარნი რომელნი.

განმმარტებელმან ჯუარსა ზედა ნებთა შენთამან მოწყალე, შეჰკრიბენ წარმართნი განშორებულნი შენგან, დიდებად მრავლისა სახიერებისა შენისა, არამედ აწცა მოიხილე სამკჳდრებელსა შენსა ზედა, და დაამჴუენ მბრძოლნი ჩუენნი ჯუარითა შენითა პატიოსნითა:

წყლულებათა იგი უფალო წმიდათა შენთანი რომელნი შენთჳს…

დიდება შენდა, ღმერთო ჩუენო, დიდება შენდა. მოწამეთა.

წყლულებათა იგი უფალო წმიდათა შენთანი რომელნი შენთჳს თავს-ისხნეს, მიიხუენ აწ მეოხებად ჩუენთჳს, და ყოველნივე სენნი ჩუენნი განკურნენ კაცთ-მოყუარე გევედრებით:

უბიწო ტარიგი, ტარიგსა და მწყემსსა ძელსა ზედა…

დიდება, აწდა. ჯუარ-ღმრთის-მშობლისა. მჴედარნი რომელნი.

უბიწო ტარიგი, ტარიგსა და მწყემსსა ძელსა ზედა მკუდრად მოკიდებულად გხედჳდა რა, ტირილით გეტყოდა და დედობრივ ღაღადებდა, ვითარ დავითმინო რა ესე შეგემთხჳა შენ ძეო ჩემო და ღმერთო, ნებსით ვნებულო ყოვლად სახიერო:

ოთხშაბათსა ცისკრად. კანონი ჯუარ-აღდგომისა. რომლისა კიდურ-წერილობაჲ.

ჯუარითა ცხოვნებულ-ვარ ვნებულისა მეუფისათა.

მონებისა მისგან მწარისა, ჴსნილმან ისრაილისამან განულო ქუეყანა…

იოსებ. გალობა ა. ჴმა ა. ქრისტეს შობასა. სძლისპირი.

მონებისა მისგან მწარისა, ჴსნილმან ისრაილისამან განულო ქუეყანა, დაულტოლუელად და იხილნა, მტერნი თჳსნი დანთქმულნი, და გალობით უგალობდა ღმერთსა საკჳრუელთ-მოქმედსა რამეთუ დიდებულ-არს:

ჯუარსა ზედა რა ამაღლდი ქრისტე, და აღამაღლე…

ტროპარნი.

ჯუარსა ზედა რა ამაღლდი ქრისტე, და აღამაღლე კაცი იგი დაცემული, და ყოველი ძალი მტერისა, დაამჴუ და დააკუეთე, ამისთჳსცა, ვნებასა მას შენსა და მჴსნელსა ვნებათასა, უგალობთ მოწყალე:

გჳრგჳნი ეკლისა დაიდგ, უფალმან დიდებისამან რომელმან, დიდებითა და პატივითა, გჳრგჳნოსან-ჰყავ კაცი, და ეკლისა, გამომღებელი ესე, ბუნებაჲ ჩუენი შეამკევ სათნოებითა:

წმიდათა გუნდმან უბიწომან, ნაკადულითა მით სისხლთა მათთათა…

მოწამეთა.

წმიდათა გუნდმან უბიწომან, ნაკადულითა მით სისხლთა მათთათა, და კეთილად მოღუაწებითა, წმიდა-ჰყუნა ცისკიდენი, და ეშმაკთა ბილწნი საზორუელნი, ძლიერებითა სამღთოთა უჩინო-ჰყუნა:

ახოვანნი წყობანი თქუენნი, ღრუბელმან ტანჯუათამან ვერ დაჰფარნა, ყოვლად ქებულნო მოწამენო, არამედ უფროს მზისა, განეფინა ბრწყინუალებაჲ თქუენი, და განანათლნა კიდენი ქუეყანისანი:

დაღაცათუ იწყალ მახჳლითა, ძისა შენისა ვნებისათა სძალო…

ღმრთის-მშობლისა

დაღაცათუ იწყალ მახჳლითა, ძისა შენისა ვნებისათა სძალო, იხილე რა ლახურისა წყლულებაჲ, ხოლო ვნებამან მისმან, სამოთხისა ბჭენი განგჳხუნა ჩუენ, და მახჳლი იგი იქცევისა დააყენა:

ალფა ვიტა

მეორე კანონი. უფროსად წმიდისა მიმართ ღმრთის-მშობლისა. რომლისა კიდურ წერილობაჲ.

ალფა ვიტა.

ტაძრად წმიდად გპოვა შენ სიტყუამან დაუსაბამომან ყოვლად…

გალობა ა, ჴმა ა. მარჯუენა შენი.

ტაძრად წმიდად გპოვა შენ სიტყუამან დაუსაბამომან ყოვლად უხრწნელო, და სიწმიდე და განათლებაჲ და გამოჰჴსნა შეცოდებათაგან, შენგან ჴორც-შესხმითა, მიმადლა პატივის-მცემელთა შენთა:

რომელმან ჰშევ ტევანი ცხოვრებისა აღმომაცენებელი სიტკბოებისა, ცოდუათა სიმრავლითა დაბნელებული ესე განმანათლე, და სინანულისა გზათა წრფელთა წარმიძეღუ სახიერო:

ნებსით თჳსით დაცემულსა გულის-თქმათა მიერ ბოროტთა დამონებულსა, და მედგრობითა ჩემითა მტერთა მიერ მოწყლულსა სასიკუდინედ, ნუ უგულებელს-მყოფ, არამედ მაცხოვნე დედოფალო:

რათა არა სიბრძნითა, და სიმდიდრითა თჳსითა იქადოდეს…

გალობა გ. წინა საუკუნეთა. სძლის-პირი.

რათა არა სიბრძნითა, და სიმდიდრითა თჳსითა იქადოდეს მოკუდავი, არამედ სარწმუნოებითა უფლისათა, მართლ-მადიდებლობით მჴმობელი ქრისტეს მიმართ და მარად მგალობელი, კლდესა ზედა მცნებათა შენთასა, დამამტკიცე მე მეუფეო:

ქრისტე ღმერთო რომელმან, ჴელითა გამოუთქმელითა დაჰბადე კაცი…

ტროპარნი:

ქრისტე ღმერთო რომელმან, ჴელითა გამოუთქმელითა დაჰბადე კაცი, უსჯულოთა კრებულმან ჴელნი და ფერჴნი შენნი განჴურიტნეს, ჯუარს-გაცუეს რა უკეთურებით, არამედ ვნებითა მით შენითა, ხრწნილებისაგან მიჴსენ:

ჴმა-ჰყო ოდესმე ისო, და დაადგინა სრბისაგან მზე და მთოვარჱ, და ცხადად მოასწავა მნათობთა დაბნელებაჲ, ჴორცითა ნებსით ჯუარცმასა მჴსნელისასა, რომლისა მიერ დაეცნეს მთავრობანი ბნელისანი, ბოროტნი:

ახოვნად მოითმენდეს, წყლულებათა დიდებულნი მოწამენი, და წყლულებითა…

მოწამეთა.

ახოვნად მოითმენდეს, წყლულებათა დიდებულნი მოწამენი, და წყლულებითა მათითა მოჰსწყლეს ბელიარი, რომელმან ძმაცჳთა გუელისათა მომაკუდინა ჩუენ, და სამღთოთა ძალითა ჰკურნებენ, სულთა და ჴორცთა ჩუენთა:

ძეგლნი საეშმაკონი და ტაძარნი კერპთანი დასცნეს მოწამეთა, და მოთმინებითა და სიმჴნითა ტაძრად ღმრთივ-ბრწყინუალედ აღაშენნეს თავნი თჳსნი, და იქმნნეს სამკჳდრებელ მამისა, ძით და სულით წმიდითურთ:

ჟამსა მას ვნებისასა, შუენიერსა სიკეთითა მიხედენ სძალო…

ღმრთის-მშობლისა.

ჟამსა მას ვნებისასა, შუენიერსა სიკეთითა მიხედენ სძალო, და იხილე რა მოკლებულად შუენიერებაჲ, მისი მწარითა გოდებითა ღაღად-ჰყავ, ჵ მე ვითარ გევნების ძეო ჩემო, ვნებულთა ცხოვრებაო:

სძალო ყოველთა დედოფალო, რომელმან ჰშევ მეუფჱ მიჴსენ…

სხუა. სძლისპირი. შენ მხოლოო რომელმან.

სძალო ყოველთა დედოფალო, რომელმან ჰშევ მეუფჱ მიჴსენ მე, მძლავრებისაგან ვნებათასა, რომელმან ესე მედგრობითა ჩემითა, და უგუნურებითა დავამონე მათ სული, და აღჳვსე ყოვლითა ბოროტითა:

ვითარცა მოწყალისა ღმრთისა დედასა სახიერსა და მოწყალესა, გაქუს დიდი წყალობაჲ მე ულმობელი და უწყალოჲ ესე, სიბრმითა გულისათა, მომაქციე უხრწნელო, და ლმობიერ-მყავ ოხითა შენითა:

გულის-სიტყუათა აღძრჳსაგან, და ჭირთა და ურუათა და განსაცდელთა მათ მძაფრთა, კუეთებისაგან, მიჴსენ და მყუდროებითა აღავსე გული ჩემი ღმრთისა დედაო, და სამღთოდ ნავთ-სადგურად მიმიძეღუ ყოვლად საგალობელო:

ესმა პირუელ ქრისტე ამბაკომს, საკჳრუელი სმენაჲ შენი…

გალობა დ. კუერთხი იესეს. სძლისპირი.

ესმა პირუელ ქრისტე ამბაკომს, საკჳრუელი სმენაჲ შენი და შიშით ჰჴმობდა, ღმერთი სამჴრით მოვიდეს, და წმიდა იგი მთით ჩრდილოთ, ცხოვრებად, და ჴსნად ცხებულთა მისთა, დიდება ძალსა შენსა უფალო:

განჰკურნებად წყლულებათა მათ, გულისა ჩემისათა წყლულებანი დაითმინენ…

ტროპარნი.

განჰკურნებად წყლულებათა მათ, გულისა ჩემისათა წყლულებანი დაითმინენ ქრისტე და გემოს-ხილჳსა მის, განკურნებად ჰსუ ძმარი, და ძელსა ზედა ამაღლებითა, წყევა იგი ძელისა მჭმუნუარჱ, კურთხევად გარდასცუალე:

ამაღლდი ქრისტე ჯუარსა ზედა, და შორად განშორებულნი წარმართნი წყალობით მოიზიდენ, და დამაგენ სუგრძელო, სახიერსა მამასა, შუამდგომელობითა შენითა, და შორის ქუეყანისა, ჯუარსა დამსჭუალჳთა საყუედრელითა:

ზღუასა შინა სისხლთა თქუენთასა, ყოვლით მჴედრებითურთ დაინთქა…

მოწამეთა:

ზღუასა შინა სისხლთა თქუენთასა, ყოვლით მჴედრებითურთ დაინთქა უხილავი ფარაო და წარწყმდა, ახივანნო მარტჳლნო, ხოლო თქუენ ქრისტეს მიერ, ქუეყანად აღთქმისა წიაღჰხედით, და ანგელოსთა თანა ზეცისა, მოქალაქედ გამოსჩნდით:

ძალითა სამღთოთა მძლექმნილთა, ვნებანი მრავალ-ფერნი მოითმინნეს ჴორცითა მათითა, ახოვანთა მარტჳლთა, ამისთჳსცა ვნებათა სულთა და ჴორცთასა განჰკურნებენ, მათსა რომელნი ქებით ადიდებენ, და ჰნატრიან ღირსთა:

გოდებით და ცრემლით გეტყოდა, ხედჳდა რა ქალწული…

ღმრთის-მშობლისა.

გოდებით და ცრემლით გეტყოდა, ხედჳდა რა ქალწული უმსჯავროსა სიკუდილსა შენსა ქრისტე, მართლ მსაჯულო უფალო, რასა დაისჯები, უბრალო ვითარცა ბრალეული, არამედ გნებავს კაცთა გარდასლჳთა, დასჯილთა უხრწნელ-ჰყოფად:

ღრუბელო, ნათლლისაო რომელმან უშევ კაცთა, მზე სიმართლისა…

სხუა. სძლისპირი. ღაღად-ჰყო ამბაკომ.

ღრუბელო, ნათლლისაო რომელმან უშევ კაცთა, მზე სიმართლისა და ნათლის-მომცემელი ღმერთი, ცოდჳთა დაბნელებული განმანათლე წყუდიადისაგან გემოთასა, იჴსენ სული ჩემი საწყალობელი:

მჴეცთაგან, უხილავთა განმხრწნელთა სულისათა, რომელნი ეძიებენ წარწყმედასა ჩემსა, მიჴსენ უხრწნელო ქრისტიანეთა სასოო, და ჭირუეულთა მხიარულებაო, ღმრთის-მშობელო ქალწულო უ҃ბიწოო:

ძალ ჩემდა, და გალობა უფალი არს რომელი, სისხლთა შენთაგან წმიდათა განხორციელდა სძალო, მას ევედრე რათა დავიცუა მე, მონაჲ შენი უბიწოდ ქალწულო, სულით და ჴორცით საცთურისაგან მტერისათა:

ნათელი, შენი დაუვალი აღმოაბრწყინუე ქრისტე, გულთა შინა…

გალობა ე. ღმერთი ხარ. სძლის-პირი.ი҃ი҃

ნათელი, შენი დაუვალი აღმოაბრწყინუე ქრისტე, გულთა შინა სარწმუნოებით, მგალობელთა შენთასა მშჳდობის-მომცემელმან ჩუენდა, უაღრეს გონებისა, ამისთჳს, ღამით უმეცრებისათ, დღისა მიმართ ნათლისა შენისა დიდების გმეტყუელებთ კაცთ-მოყუარე:

მზემან რა, გიხილა ჯუარსა ზედა დამსჭუალული, რომელმან…

ტროპარნი.

მზემან რა, გიხილა ჯუარსა ზედა დამსჭუალული, რომელმან დაჰკიდე ქუეყანა წყალთა ზედა, მყის განშიშულდა იგი ბრწყინუალებისაგან მჴსნელო, და კლდეთა კლდესა ზედა რა, ამაღლებული, გიხილეს განსქდეს შიშით, და ქუეყანაჲ ძრწოდა საფუძუელითურთ:

ამაღლდი, ძელსა ზედა და ჴელნი შენნი, სამსჭუალითა განიმსჭუალნეს და ლახჳრითა, განეღო გუერდი შენი რათა განჰკურნო ადამი, წყლულებათა მათგან რომელნი, შეემთხჳვნეს მას, ევას მორჩილებითა, და მცნებათა გარდასლჳთა:

სამოთხედ, გამოჰსჩნდა სიმრავლე წმიდათა, და შორის მათსა…

მოწამეთა.

სამოთხედ, გამოჰსჩნდა სიმრავლე წმიდათა, და შორის მათსა აქუნდა ქრისტეჲ ხედ ცხოვრებისად, რომლისათჳს თავს-იდუეს სიკუდილი საყუედრელი ახოვნითა გულის-სიტყჳთა, და ნათესავთა, მთავართა მკულელი გუელი, ძალითა სამღთოთა მოაკუდინეს:

სისხლისა, მდინარითა ქრისტეს მარტჳლნო განაჴმენ უფსკრული უღთოებისა, და საკჳრუელებათა აღმოცენებითა, სულისა და ჴორცთა ვნებათა, აღძრუასა დაჰხსნით, ამისთჳსცა ჯეროვნად, და ღირსად გნატრით ყოვლად ქებულნო:

ნებსით რა, ამაღლებულსა ჯუარსა ზედა, გხედჳდა ქრისტე…

ღმრთის-მშობლისა.

ნებსით რა, ამაღლებულსა ჯუარსა ზედა, გხედჳდა ქრისტე უბიწოჲ დედაჲ შენი, გოდებით გეტყოდა შენ ძეო ჩემო და ღმერთო, სალმობანი რომელთა იგი შობასა შენსა, თანა წარუჰხედ ესერა, მწარედ მეწივნეს ჯუარცმასა შენსა:

სული ჩემი, ნაყოფიერად გამოაჩინე სძალო, და აღმოფხურენ…

სხუა. სძლისპირი. შენ რომელმან განანათლე.

სული ჩემი, ნაყოფიერად გამოაჩინე სძალო, და აღმოფხურენ, შემაშფოთებელნი და უნაყოფონი, გულის თქმათა ეკალნი, გულისა ჩემისაგან უჴრწნელო, და ცოდჳსა მწიკულევანებანი:

სიტყუაჲ ღმრთისა, ზესთა სიტყჳსსა შეიწყნარე საშოსა, ღმრთის-მშობელო, მას ევედრე რათა გულის-თქმათაგან და საქმეთა ბოროტთა პირუტყუებრთა განგუათავისუფლნეს, მონანი და მგალობელნი შენნი:

შენ რომელმან, ნაყოფისა შენისა მიერ განაჴმენ, ძელისა მის, ცნობადისა პატიჟნი, და ნაყოფნი, ჴორცთა ჩემთა აღძრუანი, და ვნებათა ღელუანი დააყუდენ, რათა გაქებდე საგალობელო:

შეპყრობილ-ვარ მე, ყოვლითურთ უზომოთა, ვნებათაგან და ვეშაპისა…

გალობა, ვ. პირველ იონა. სძლისპირი.

შეპყრობილ-ვარ მე, ყოვლითურთ უზომოთა, ვნებათაგან და ვეშაპისა მიმართ ბოროტთასა, შთავვარდი, არამედ აღმომიყუანე მე ღმერთო განჴრწნისაგან, ვითარცა იონაჲ და მომანიჭე უვნებელობაჲ, რათა, ჴმითა ქებისათა და სულითა ცხოვრებისათ ვჰმსხუერპლჳდე შენდა:

ჴელნი რა ზეცად, განიპყრნა პირუელ მოსე, ვნებჲ…

ტროპარნი.

ჴელნი რა ზეცად, განიპყრნა პირუელ მოსე, ვნებჲ შენი გამოსახა რომელმან, განმარტენ ჴელნი, ძელისა ჯუარსა ზედა და ბოროტისა, მტერისა წარმწყმედელი ძალი შეჰმუსრე, მჴსნელო, ამისთჳსცა გიგალობთ, და ძრწოლით გადიდებთ კაცთ-მოყუარე:

ჯუარს-ევუ რა ქრისტე, სიკუდილი დაითმინე, და მკლუელი ჩუენი ეშმაკი მოაკუდინე, და ჴელთა შენთა, ქმნილი განაცხოველე ყოვლად ძლიერო და გუერდისა შენისაგან აღმოგჳცენენ, ორნი ცხოვრებისა წყარონი, ღუთად და კაცად შენთა აღმსარებელთა:

იქმნა სიკუდილი, თქუენი წინაშე ღმრთისა, პატიოსან წმიდანო…

მოწამეთა.

იქმნა სიკუდილი, თქუენი წინაშე ღმრთისა, პატიოსან წმიდანო მოწამენო, რომელმან იგი, შეგამკუნა თქუენ საუფლოთა მით ვნებითა, და არცხჳნა თქუენ მიერ ბილწსა ბელიარს, მტერსა, უკეთურსა რომელმან, ყოველთა ტანყუათა ღონითა გბრძო თქუენ:

მრავალ-სახეთა, ტანჯუათა შებმა-უყავთ, ყოვლითა სულითა ქრისტეს მჴედარნო, და ყოვლითურთ ჰპოეთ, ძალი სამღთოჲ თანა შემწედ თქუენდა მარტჳლო, რომელმან ყოვლითურთ კაცებაჲ შეიმოსა, ღირსნო, ვინაცა რაამს იგი, დაიჭრებოდით თქუენ არა გელმოდა:

ჯუარცმასა შენსა, ჰხედჳდა რა ქალწული, ცრემლით იტყოდა…

ღმრთის-მშობლისა.

ჯუარცმასა შენსა, ჰხედჳდა რა ქალწული, ცრემლით იტყოდა რაჲ არს ხილუა ესე, განსაკრთომელი უცხოჲ და საშინელი, ჵ ძეო ჩემო, ვითარ მკურნალსა ვნებულთასა გევნების, რასა, ნაცულად კეთილისა მოგაგეს ბოროტი მტერთა უღთოთა:

მოიკლა მტერი ცხოველს-მყოფელითა, შობითა შენითა სძალო, და…

სხუა, სძლისპირი. მომიცუნა ჩუენ.

მოიკლა მტერი ცხოველს-მყოფელითა, შობითა შენითა სძალო, და დაითრგუნა ჯოჯოხეთისა მძლავრებაჲ, და განთავუვისუფლდეს ნაშობნი მოკლულთანი, და ჩემთაცა ვნებათა სიმტკიცჱ დაჰჴსენ დედოფალო:

ცოდუათათჳს, უცხო-ქმნილი ღმრთისაგან, და შორად განშორებული, საკუთარ-მყავ მისა ჵ ყოვლად უბიწოო, დიდებულითა ვედრებითა შენითა, რათა ქებით უგალობდე ძლიერებათა შენთა:

უჟამოჲ ძე, შენგა ჟამიერად იშუა, ყოვლად წმიდაო ქალწულო, მას ევედრე რათა მრავალ-ჟამ დაძუელებულნი, ვნებანი სულისა ჩემისანი განჰკურნეს, და წარმიძღუეს, ცხოვრებისა მიმართ საუკუნოჲსა:

განულეს ვითარცა სასძლოჲ, ალი საჴუმილისა მიუახლებელი, კეთილ-მსახურებისა…

გალობა ზ. სძლისპირი. ყრმანი სარწმუნოებით.

განულეს ვითარცა სასძლოჲ, ალი საჴუმილისა მიუახლებელი, კეთილ-მსახურებისა ოდესმე, მჩუენებელთა ყრმათა წმიდათა, ერთ-ჴმობით გალობისა მგალობელთა მამათა ჩუეთა ღმერთო კურთხეულ-ხარ შენ:

ყურიმლის-ცემაჲ თავს-იდევ, მონისაგან ღმერთმან და მეუფემან, რათა განმათავისულოთ მე, დამონებული მტერსა ბოროტსა, ჯუარსა დამსჭუალჳთა მაცხოვნე და ვიტყჳ, მამათა ჩუენთა ღმერთო კურთხეულ-ხარ შენ:

მოწყალეო უფალო, ჯუარცმასა შენსა შეიძრა ქუეყანაჲ, და ლახურითა მოწყლუასა შენსა, მოიკლა მტერი გუნდითურთ მისით, ხოლო ადამ მომწყდარი განცხოველდა და ჴმა-ჰყო მამათა ჩუენთა ღმერთო კურთხეულ-ხარ შენ:

ჯუარითა შეჭურჳლმან, სამღთომან მწყობრმან ღუაწლითშემოსილთამან, ბანაკნი მტერთა ბოროტთანი, დაჰსცნეს და შემუსრნეს მადლითა, სამღთოთა და გჳრგჳნოსან-იქმნეს, და ჴმა-ჰყუეს მამათა ჩუენთა ღმერთო კურთხეულ-ხარ შენ:

ნივთთა შემოქმედსა, და ყოვლად ძლიერისა ღმრთისა მხოლოსა, სურჳლითა ეტყინებოდეთ, მჴნენო მოწამენო ამისთჳს, ცეცხლისა უძლიერეს გამოჰსჩნდით და დასწჳთ, უღთოებისა ნივთი ყოვლად ქებულნო:

ძემან შენმან ქალწულო, ყოველნი საუკუნენი დაბადნა, და…

ჯუარ-ღმრთის-მშობლისა.

ძემან შენმან ქალწულო, ყოველნი საუკუნენი დაბადნა, და ამაღლდა რა ჯუარსა ზედა, დაცემულნი მის თანა აღამაღლნა, და ზეცისა მოქალაქედ გამოაჩინნა, ამისთჳს გაკურთხევთ დედაო ღმრთისაო:

განმიხუენ მე სინანულისა ბჭენი, სძალო ბჭეო ნათლისაო…

სხუა. სძლისპირი. ვითარცა რა სი.

განმიხუენ მე სინანულისა ბჭენი, სძალო ბჭეო ნათლისაო, და კარნი გულის-თქმათანი, ჩემდა შემოსავალნი დაჰჴშენ ყოვლად წმიდაო, და განსდევნენ გულისთქმანი, მწიკულნი უკეთურნი, რათა ძალსა შენსა ძლიერსა ვაქებდე:

მწიკული ბრალთა, წარმდებად ცხოვრებითა, და უყე შეცოდებათა, შევიკრიბე უბადრუკმან, და შევაგინე სული ჩემი საწყალობელი, განმბანე ღმრთისა დედაო მადლთა შენთა მდინარითა, რათა ქებით გაკურთხევდე:

რომელმან ჰშევ, წყაროჲ უხრწნელებისა, სძალო ღმრთისაო უხრწნელო, ვნებათა მიერ განხრწნილი, და ეშმაკთა მოწყლული, ცხოველ-მყავ ვედრებითა, შენითა ქრისტეს მიმართ რათა ჴმა-ვჰყო, კურთხეულ-ხარ შენ უფალო ღმერთო მამათა ჩუენთაო:

აჩუენა ხატი ოდესმე, საჴუმილმან შეცურეულმან, საკჳრუელებისა ბუნებათა…

გალობა ჱ. სძლისპირი. საჴუმილი შეცურეული.

აჩუენა ხატი ოდესმე, საჴუმილმან შეცურეულმან, საკჳრუელებისა ბუნებათა უზესთაესისა, რამეთუ არა შეწუნა ყრმანი, ცხად-მყოფელმან ქრისტეს უთესლოსა, ქალწულისაგან შობისამან, ამისთჳსცა უგალობთ, აკურთხევდით საქმენი უფლისანი უფალსა, და ამაღლებდით მას უკუნისამდე:

განმარტნა მკლავნი ნებსით თჳსით ჯუარსა ზედა, რომელმან სიტყჳთ ცანი მოდრიკნა, და სამსჭუალ განწოლინ-იქმნა, რათა ბუნებაჲ იგი ვნებული, ადამისი განჰჴსნეს საკრუელთაგან განუჴსნელთა, დაცემისათა და ჩუენ ვღაღადებთ, აკურთხევდით საქმენი უფლისანი უფალსა და ამაღლებდით მას უკუნისამდე:

რაჟამს კლდე ეგე ცხოვრებისა დაგმსჭუალეს, ჰურიათა ერმან ჯუარსა ზედა, და ქუეყანაჲ შეიძრა, და მთანი შეიმუსრუოდეს მაშინ, მჴსნელო სულნი დასჯილნი ჯოჯოხეთს შინა, სამღთოდ ცხოვრებად შეიყუანენ და ჴმა-ჰყუეს, აკურთხევდით საქმენი უფლისანი უფალსა და ამაღლებდით მას უკუნისამდე:

უქსოეს სამოსელი უხრწნელებისა, განშიშულებითა ჴორცთა თჳსთათა, თავთა…

მოწამეთა.

უქსოეს სამოსელი უხრწნელებისა, განშიშულებითა ჴორცთა თჳსთათა, თავთა თჳსთა მარტჳლთა, ხოლო ტანჯუათა თავს-დებითა, და მრავალ-სახეთა წყლულებათა მოთმინებითა, წინაშე ღმრთისა იხარებენ და ჰჴმობენ აკურთხევდით, საქმენი უფლისანი უფალსა, და ამაღლევდით მას უკუნისამდე:

ფრჩხილებითა რა დაიბძარუოდეს მარტჳლნი, და ასოეულად დაიჭრებოდეს, და ცეცხლსა განმლეველსა, განუკითხუელად შეითხეოდეს, არა უგეს კერპთა ყრუთა და საძაგელთა, არამედ სიმჴნით წინა განეწყუნეს და ჴმა-ჰყუეს აკურთხევდით, საქმენი უფლისანი უფალსა, და ამაღლებდით მას უკუნისამდე:

რათამცა მოსპეს ქუეყანით სახელი შენი, განცოფებულთა მათ…

ჯუარ-ღმრთის-მშობლისა.

რათამცა მოსპეს ქუეყანით სახელი შენი, განცოფებულთა მათ ურიათა, ჯუარსა ზედა დაგმსჭუალეს, და უშჳლო-მყუეს, მე სახიერ, ამისთჳს შეიწყუებიან ნაწლევნი ჩემნი, დედობრივითა ლმობითა, ღაღადებდა დედაჲ შენი, გხედჳდა რა ქრისტე ჯუარსა ზედა, და მადლობით აღგამაღლებდა ყოვლად ძლიერო:

ვიმძლავრები ვნებათა მიერ, ეშმაკთა კუეთებითა, არამედ შეწევნითა…

სხვა. სძლისპირი. საჴუმილსა რა.

ვიმძლავრები ვნებათა მიერ, ეშმაკთა კუეთებითა, არამედ შეწევნითა შენითა ღმრთისა დედაო, ვიჴსნები და ვღაღადებ აკურთხევდით, ყოველნი საქმენი უფალსა უგალობდით, და ამაღლებდით მას უკუნისამდე:

ცათა უმაღლეს-ხარ ქალწულო, დედაო მჴსნელისაო უაღრესო ყოველთა დაბადებულთაო, ამისთჳს გევედრები სული ჩემი, ცხოვრებისა ამის ვნებათა უმაღლეს-ჰყავ, რათა გაკურთხევდე უკუნისამდე:

ნათლისა მომცემელი ღმერთი, ყოვლად განათლებულო ქალწულო, გჳშევ გამოუთქმელად ამისთჳს გევედრები, განაბრწყინუე გონებაჲ, ჩემი მწარედ ტყუე-ქმნილი, და დაბნელებული ვნებათაგან, რათა გაკურთხევდე უკუნისამდე:

საიდუმლო, ქალწულისა გამოუთქმელ-არს, რამეთუ ცად და საყდრად…

გალობა თ. სძლისპირი. საიდუმლო უცხო.

საიდუმლო, ქალწულისა გამოუთქმელ-არს, რამეთუ ცად და საყდრად ხერუვიმებრად და სასძლოდ ნათლითშემოსილად გამოჩნდა, ქრისტეს ღმრთისა ყოვლისამპყრობელისა, ამას უკუე კეთილ-მსახურებით, ვითარცა ღმრთის-მშობელსა ვადიდებდეთ:

გიხილა რა, ჯუარსა ზედა დამოკიდებული, ქრისტე ღმერთო…

ტროპარნი.

გიხილა რა, ჯუარსა ზედა დამოკიდებული, ქრისტე ღმერთო რომელმან, დაჰკიდე ქუეყანაჲ წყალთა ზედა, ავაზაკმან მან გონიერმან სარწმუნოებით ჴმა-ჰყო მომიჴსენე, მისთანა ჩუენცა გუაცხოვნენ მრავალ მოწყალე:

რაჟამს ჯუარს-ეცუ, მაცხოვარ შეარყიე ქუეყანაჲ, ხოლო რაჟამს მოიწყალ, ლახურითა აღმოგჳცენენ ქრისტე, წყარონი უკუდავებისანი, სისხლი იგი და წყალი რომლისა მიერ, განჰსწმიდე ვნებათაგან ბუნებაჲ ჩუენი:

იხარებდეს, ტანჯუათა შინა მოწამენი, და მსგავსად საშუებელთა…

მოწამეთა.

იხარებდეს, ტანჯუათა შინა მოწამენი, და მსგავსად საშუებელთა, მიიტაცებდეს მათ ახოვანნი, და ურთიერთას განამჴნობდეს, და იტყოდეს ესერა განღებულ-არს, ასპარეზი გჳრგჳნთა ვიღუაწოთ ძმანო:

განბრწყინდების ყოველი კრებული მორწმუნეთა, და ადიდებს სიმჴნეთა, ახოვანთა მჴნეთა მარტჳლთასა, რომელთა იგი ურიცხუნი, ტკივილნი ტანჯუათანი დაითმინნეს, და მკჳდრიქმნეს საშუებელთა საუკუნეთა:

კაცთ-მოყუარე, სიტყუაჲ გჳშევ ღმრთისა დედაო, ხოლო რაჟამს…

ღმრთის-მშობლისა.

კაცთ-მოყუარე, სიტყუაჲ გჳშევ ღმრთისა დედაო, ხოლო რაჟამს იხილე, ჯუარსა ზედა ვნებულად ეტყოდე, ვითარ ღმერთმან უვნებელმან, კაცთა ცხოვრებისათჳს ვნებაჲ თავს-იდევ, დიდება წყალობათა შენთა უფსკრულთა:

გიხაროდენ მხოლოო განმაქარუებელო მწუხარებისაო გიხაროდენ, მშობელო სიხარულისაო…

სხუა. სძლისპირი. სახედ მუცლად-ღებისა.

გიხაროდენ მხოლოო განმაქარუებელო მწუხარებისაო გიხაროდენ, მშობელო სიხარულისაო და განმდევნელო, ბნელსა სულთასა და განმანათლებელო, ტომთა და ენათაო, რომელნი სარწმუნოებით გნატრიან:

დააცხრუენ ღუარნი ვნებათანი, და განაჴმენ მორევნი ცოდუათა ჩემთანი, სძალო რომელმან ჰშევ უფსკრული მოწყალებისა, და მდინარე სამღთოსა მშჳდობისა, და წყარო ცხოვრებისა, და ზღუა განუცდელი კაცთ-მოყუარებისა:

გამოჰსჩნდი სამკურნალოდ უსასყიდლოდ, ყოველთა სასო წარკუეთილთა უხრწნელო, სასტიკად მოწყლულთა და დანთქმად მიახლებულთა, ზღუასა შინა ამის ცხოვრებისასა, ამისთჳსცა ყოველნი, მორწმუნენი გალობით გადიდებთ:

ჯუარო საჭურუელო ქრისტე ჩემისაო, დიდო ძლევაო მართლმადიდებელთა…

განმანათლებელსა, ვიტყჳთ დღისასა, უკეთუ არა აქუნდეს წმიდისა. რომელმან ცისა სამყარო.

ჯუარო საჭურუელო ქრისტე ჩემისაო, დიდო ძლევაო მართლმადიდებელთა მეფეთაო, და ეშმაკთა წარწყმედაო, სურჳლით თაყუანის-მცემელნი შენნი დაიცუენ, და მიეც მადლი შენი:

ჯუარისა და ვნებათა ძისა შენისათა ღმრთის-მშობელო, უეჭუელითა…

ჯუარ-ღმრთის-მშობლისა მსგავსივე.

ჯუარისა და ვნებათა ძისა შენისათა ღმრთის-მშობელო, უეჭუელითა გულითა სიმკაცრით თაყუანის-მცემელნი, მკჳდრად სამოთხისა, და ზიარად დიდებისა გამოაჩინენ:

შენ მაცხოვარ ძელსა ზედა დამსჭუალულსა, და ცხოვრებისა…

აღჳვსენითსა ზედა, დასდებელნი ჯუარისანი, ჴმა ა.

შენ მაცხოვარ ძელსა ზედა დამსჭუალულსა, და ცხოვრებისა ჩუენდა მომცემელსა, ვითარცა მეუფესა და მაცხოვარსა ჩუენსა, გიგალობთ დაუცხრომელად:

ჯუარითა შენითა ქრისტე ერთ-სამწყსო იქმნნეს ანგელოსნი და კაცნი, და ერთსა შინა შესაკრებელსა ცა და ქუეყანაჲ იხარებს მგალობელი, უფალო დიდება შენდა:

თქუენ ყოვლად ქებულნო მარტჳლნო, არცა ჭირმან, არცა…

მოწამეთა.

თქუენ ყოვლად ქებულნო მარტჳლნო, არცა ჭირმან, არცა იწროებამან, არცა სიყმილმან, არცა დევნულებათა, არცა გუემათა, არცა მძჳნუარებამან მჴეცთამან, არცა მახჳლმან, არცა ცეცხლისა ზარმან შეგიძლო თქუენ განშორებად ღმრთისაგან, უფროსღა სურჳლითა მისითა, ვითარცა უცხოჲთა ჴორცითა იღუაწეთ, ბუნებაჲ დაივიწყეთ, სიკუდილი შეურაცხ-ჰყავთ, ვინაცა ღირსად ტკივილთა თქუენთა სასყიდელი მოისთულეთ, და ზეცათა სასუფეველსა მკჳდრად გამოჰსჩნდით, მეოხ-გუეყუენით სულთა ჩუენთათჳს გევედრებით:

წინაშე ჯუარსა შენსა მდგომარე სიტყუაო ღმრთისაო, ტარიგი…

დიდება, აწდა. მსგავსი,. ზეცისა განწესებულთა.

წინაშე ჯუარსა შენსა მდგომარე სიტყუაო ღმრთისაო, ტარიგი და უბიწო დედაჲ შენი გოდებით ღაღადებდა, ვაჲ ჩემდა შჳლო, ვითარიმე მოჰკუდები ჯუარსა ზედა, ვაჲ ჩემდა ნათელო ჩემო ტკბილო, სადა უკუე დაჰჴდა ხატი სიკეთისა შენისა, უფროს ყოველთა კაცთა უშუენიერესო:

საჭმლისა მიერ გამოჴადა მტერმან ადამი სამოთხით, ხოლო…

ოთჴშაბათსა მომიჴსენენი, ჴმა ა.

საჭმლისა მიერ გამოჴადა მტერმან ადამი სამოთხით, ხოლო ჯუარისა მიერ ავაზაკი შეიყუანა ქრისტემან მას შინა, რომელი ჰჴმობდა მომიჴსენე მე უფალო, ოდეს მოხჳდე სუფევითა შენითა:

საყუედრელ-ვნებაჲ ჩუენთჳს, დაითმინე ქრისტე, და ყუედრებანი ჩუენნი ყოველნი მოსპენ ჩუენგან, და სუფევისა, მის ზეცათასა, ზიარად გამომაჩინენ, თაყუანის-ვჰსცემთ სიმდაბლესა შენსა ქრისტე, დიდება წყალობათა შენთა:

ადამის სიშიშულისა ქრისტე, შემოსაჲ გენება, ამისთჳსცა განშიშულდი, ჯუარსა ზედა ჴორცითა, და ჯუარცმა თავს-იდევ სიღრმეთაგან ბოროტთასა ამაღლებად ჩუენდა ამისთჳსცა ვადიდებთ სიტყუაო, სიმდაბლესა შენსა წმიდაო:

ჴორცთა თქუენთა წყლულებითა, ეშმაკნი მოსწყლენით, წმიდანო მოწამენო…

მოწამეთა.

ჴორცთა თქუენთა წყლულებითა, ეშმაკნი მოსწყლენით, წმიდანო მოწამენო, და კაცთა წყლულებასა, და სნეულებასა, დიდებულნო, მადლითა ჰკურნებთ დღითი დღე, და ევედრებით ქრისტესა ღმერთსა ჩუენსა, შეწყალებად სულთა ჩუენთათჳს:

მამასა თაყუანის-ვჰსცემდეთ, და ძესა დიდების-ვმეტყუელებდეთ, და ყოვლად…

დიდება.

მამასა თაყუანის-ვჰსცემდეთ, და ძესა დიდების-ვმეტყუელებდეთ, და ყოვლად წმიდასა სულსა მორწმუნენი ყოველნი უგალობდეთ, მოგჳხსენენ ჩუენ მღაღადებელნი, ერთ-არსო სამებაო მხოლოო ღმერთო:

წინაშე ჯუარსა სდეგ სძალო, და ხედევდ ქრისტესა…

აწდა. ჯუარ-ღმრთის-მშობლისა.

წინაშე ჯუარსა სდეგ სძალო, და ხედევდ ქრისტესა, დამსჭუალულსა ჴორცითა, და გოდებით იტყოდე, ეჰა მოწყალეო, ვითარ დაჰჴდა, სიკეთჱ შენი ბრწყინუალჱ, ანუ ვითარ აღივსე ვითარცა მზჱ, ჵ უფალო დიდებისაო:

ვნებათა ზღუასა შინა, და გემოთა უფსკრულსა,ვიღელუები მძჳნუარედ…

სერობისად. გალობანი წმიდისა ღმრთის-მშობლისანი. გალობა ა. ჴმა ა. სძლისპირი. უგალობდით უფალსა.

ვნებათა ზღუასა შინა, და გემოთა უფსკრულსა,ვიღელუები მძჳნუარედ და გევედრები, უხრწნელო დედოფალო, ღირს-მყავ მიწევნად, ნავთ-საყუდელსა, მოღუაწებასა სასოო მორწმუნეთაო:

ნათლითა სულისათა, განბრწყინდი დედოფალო, და ყოვლითურთ განწმედილმან სულით და ჴორცით, შეიწყნარე ბრწყინუალება ღმრთისა მამისა, რომლისათჳსცა, დაჰჴსენ წყუდიადი ბრალთა ჩემთა, ყოვლად უხრწნელო:

შენ ხარ ქრისტიანეთა, მყუდრო ნავთ-საყუდელი, და განსაცდელთაგან მჴსნელი, და ზღუდე და მფარუელი, ქალწულო დიდებულო, ღმრთისა დედაო, გჳჴსნენ ყოველნი, შემსხმელნი შენნი საბრჴეთაგან მტერისათა:

შენ ბჭე ეგე ზეცისა, და წმიდა კიდობანი, და ტაძარი სულიერი სალხინებელი, სათნო-გიყო დედად თჳსად ყოვლად წმიდაო, ქრისტემან ღმერთმან, და გყო შენ ჴელის-ამპყრობელად ქრისტიანეთა:

ნათლითა დედოფალო, ძისა შენისათა ცოდუათა ჩემთა წყუდიადი…

გალობა გ. სძლისპირი. დამამტკიცე მე ქრისტე.

ნათლითა დედოფალო, ძისა შენისათა ცოდუათა ჩემთა წყუდიადი, და ბრალთა ჩემთა, არმური ბნელი განაბნიე, შუამდგომელობითა შენითა:

ვითარცა გაქუს უსძლოო, საკჳრუელებათა უფსკრული მიუწთომელი, და წყაროჲ კურნებათა დაუწყვედელი ცოდუათა, მწიკულისაგან იჴსენ სული ჩემი:

სასოებათა ჩუენთა, სრულ-მყოფელად და სამღთოდ საფარუელად და წინამძღვრად, და ზღუდედ ცხოვრებისად მოგიგებთ შენ ღმრთისა დედაო, მოგუფინე ნათელი სინანულისა:

შენგან შობილსა ღმერთსა, თაყუანის-ვჰსცემთ ჵ კურთხეულო ღმრთისა დედაო, ყოველთა ჭირთაგან გჳჴსნენ მადიდებელნი შენნი, ოხითა შენითა უბიწოო:

სამკურნალოდ ურცხუენელად გუაქვს ჩუენ, ოხაჲ შენი უსძლოო…

გალობა დ. სძლისპირი. მესმა უფალო სმენა.

სამკურნალოდ ურცხუენელად გუაქვს ჩუენ, ოხაჲ შენი უსძლოო, და შესხმით და გალობით გადიდებთ შენ:

ზღუდედ უბრძოლუელად გუაქუს ჩუენ შენი, ფარუაჲ ღმრთისა დედაო, და ვიჴსნებით მტერთა უხილავთაგან:

ცოდჳთა დაცემულნი აღგუმართენ, მხოლოო კურთხეულო, რამეთუ შენ-ხარ სასო, მორწმუნევთა:

სიტყუაჲ ღმრთისა მუცლად-იღე სძალო, ბუნებათა უაღრეს, და ჰშევ ღმერთი მჴსნელი დაბადებულთა:

შემწე ხარ უძლეველი, განსაცდელთა შინა, და ჭირთა…

გალობა ე.სძლისპირი. ღამითგან აღჳმსთობთ.

შემწე ხარ უძლეველი, განსაცდელთა შინა, და ჭირთა ღმრთისა დედაო, შემწე გუექმენ ჟამსა ჭირისასა, და გჳჴსნენ მძლავრებისაგან, ცოდუათა ბოროტთასა:

კურნებათა მათ შენთა, და საკჳრუელებათა, წყაროთა და მდინარითა, ბილწებანი ჴორცთა ჩემთანი, განჰკურნენ და განწმი-ნ დე, სული ჩემი ქალწულო:

მლხინებელი ჩუენი და აღმჴოცელი ბრალთა, აღჳაროთ მჴურუალითა, სარწმუნოებითა და ვითხოოთ ჩუენ მის მიერ მოტევება ცოდუათა ჩუენთა:

გადიდებენ მარადის, ანგელოსთა წესნი, ვითარცა შემოქმედისა მათისა მშობელსა უბიწოო, ზესთა ბუნებისა, და ქალწულად დადგრომილსა:

შემუსრჳლებანი, წყლულებათა ჩემთანი, ვნებათა მიერ მოწევნულნი, წამლითა…

გალობა ვ. სძლისპირი. რომელმან თავს იდუა.

შემუსრჳლებანი, წყლულებათა ჩემთანი, ვნებათა მიერ მოწევნულნი, წამლითა ვედრებათა, შენთათა სძალო, ღირსო განჰკურნენ, და უვნებელობისა, სიცოცხლე მომანიჭე ოხითა შენითა:

სარწმუნოებითა, მტკიცითა გევედრებით, შენდობისათჳს ცოდუათასა, ქრისტეს ღმრთის-მშობელო, მონანი შენნი, და მაქებელნი შობისა შენისანი, ნუ უგულებელს ჰყოფ ვედრებასა ჩუენსა:

ყოვლითურთ განვჰკფდი მე, ბრალთა შინა ურიცხუთა, და წარჳტყუენე, გონებითა ცოდუათა ტყუეობითა, ფრიად მწარითა და ბოროტითა, და საფარუელსა შენსა, მოვივლტი ღმრთის-მშობელო, განმათავისუფლე მე:

ვითარცა რა ეტლმან, მზისა სიმართლისამან, განგუანათლენ დაბნელებულნი, ბნელითა ცოდჳსათა, ყოვლად წმიდაო ღმრთისა დედაო, და ცოდუათა ჰრულითა დანთქმულნი აღმადგინენ ვითარცა მკუდრეთით:

ვითარცა რა მშობელმან, ცხოვრები-მომცემელისა მეუფისამან, მომწყდარი ცოდჳთა…

გალობა ზ. სძლისპირი. აბრამიანთა ყრმათა.

ვითარცა რა მშობელმან, ცხოვრები-მომცემელისა მეუფისამან, მომწყდარი ცოდჳთა აღმადგინე ქალწულო, რათა ესრეთ ვიტყოდი კურთხეულ-ხარ შენ უფალო ღმერთო მამათა ჩუენთაო:

ჭირთა შინა მაცხოვრად, და განსაცდელთა შინა შემწედ გიცნობ შენ სძალო ღმრთისაო ქალწულო და სარწმუნოებით ვიტყჳ, კურთხეულ-არს ნაყოფი მუცლისა შენისა ქრისტე, მაცხოვარი სულთა ჩუენთა:

შენგან გამოსჩნდა ღმერთი, და იჴსნა წყევისაგან ბუნება კაცთა, დედაო ღმრთისაო, და განჰკურნა ყოველთა სალმობანი და ჴმობენ, კურთხეულხარ შენ:

გიხაროდენ ქალწულო, სიხარულო მორწმუნეთაო და დამჴსნელო, მწუხარებისაო, გიხაროდენ ყოველთა, ცოდჳლთა მაცხოვარო, და დიდო სალხინებელო, მადიდებელთა შენთაო:

დანთქმულთა ბრალთა შინა, გუაქუს მოწყალება შენი განწმედელად…

გალობა ჱ. სძლისპირი. გალობით ვაკურთხ.

დანთქმულთა ბრალთა შინა, გუაქუს მოწყალება შენი განწმედელად, ქრისტეს დედაო და მადლობით გიღაღადებთ, აკურთხევდით საქმენი უფლისანი უფალსა:

მოწყალე-ჰყავ ქალწულო, ძე და ღმერთი შენი სახიერი სარწმუნოებით მღაღადებელთათჳს, აკურთხევდით საქმენი უფლისანი უფალსა:

ღელუა გულის სიტყუათა, და არმური ქართა ცოდჳსათა, აღჰძრავს მძჳნუარედ გონებასა ჩემსა, ამისთჳს ნავთ საყუდელსა შენსა, შევევედრებით სძალო:

შენ ხარ ურუათა შინა, შემწე და მაცხოვარი და მხსნელი, სარწმუნოებით მგალობელთა ქალწულო, აკურთხევდით საქმენი უფლისანი უფალსა:

ვითარცა გაქუს დიდი და აურაცხელი წყალობა, დედოფალო…

გალობა თ. სძლისპირი. შენ რომელმან ღმერთი მიზეზი.

ვითარცა გაქუს დიდი და აურაცხელი წყალობა, დედოფალო ყოვლად წმიდაო, ჴორცთა და სულისა ვნებანი და წყლულებანი, განჰკურნენ მეოხებითა შენითა, მუედრებელთა შენთანი რათა გადიდებდეთ:

შენ ხარ მორწმუნეთა წინა მძღუარი უცთომელი, და ალაგთა ცხოვრებისათა, წრფელთა წარუმართებ და შეიყუანებ ცხოვრებად, და დაამკჳდრებ ზეცათა სასუფეველსა, უხრწნელო ღის-მშობელო, სულთა ჩუენთა სასოო:

შენ აღმოგჳცენე, ჩუენ პური იგი ზეცათა, და გუზრდი და მეოხ ხარ მარადის, და გჳჴსნი ურუათა და ჭირთაგან მრავალ ფერთა, და მოგუანიჭებ ცოდუათა შენდობასა, ღმრთის-მშობელო, მარიამ გალობით გადიდებთ:

შენ რომელმან სიტყუა ღმრთისა მუცლად-იღე საშოსა შენსა, და ზესთა ყოველთა გონებათა, და ბუნებათა გჳშევ ესე გამოუთქმელად, დიდების-გმეტყუელებთ და მადლობით, გიღაღადებთ გიხაროდენ ცოდჳლთა შემწეო და სასოო: