პროსკომიდია

გუაკურთხენ მეუფეო.

კურთხეულ არს ღმერთი ჩუენი ყოვლადვე, აწ და მარადის და უკუნითი უკუნისამდე. ამინ.

მეუფეო ზეცათაო: წმიდაო ღმერთო: ყოვლად წმიდაო სამებაო: შემდგომად: მამაო ჩუენოსა:

შენი არს სუფევა:

მიწყალენ ჩუენ, უფალო, შეგჳწყალენ ჩუენ, რამეთუ ყოვლისავე სიტყჳს მიცემისაგან უღონო ვართ, გარნა ამას ვედრებასა შენ მეუფისა სახიერისა ცოდვილნი ესე შევსწირავთ, მიწყალენ ჩუენ, უფალო, შეგჳწყალენ ჩუენ.

უფალო, შეგჳწყალენ ჩუენ, რამეთუ შენ გესავთ, ნუ განმირისხდები ჩუენ ფრიად, და ნუცა მოიჴსენებ უშჯულოებათა ჩუენთა, არამედ მოიხილე ჩუენ ზედა წყალობით ვითარცა სეხიერ ხარ, და გჳჴსნენ ჩუენ სამართლად რისხვისაგან შენისა, რამეთუ შენ ხარ ღმერთი ჩუენი, და ჩუენ ვართ ერნი შენი, და ყოველნივე ქმნულნი ჴელთა შენთანი ვართ და სახელი შენი წოდებულ არს ჩუენ ზედა და შეგჳწყალენ ჩუენ.

მოწყალებისა კარი განგჳღე კურთხეულო ღმრთის-მშობელო, რათა რომელნი ესე შენ გესავთ არა დავეცნეთ, არამედ განვერნეთ წინა აღმდგომთა მტერთაგან, რამეთუ შენ ხარ ცხოვრება ნათესავისა ქრისტიანეთასა

უხრწნელსა ხატსა შენსა თაყუანის-ვსცემთ, სახიერ, და ვითხოვოთ შენდობასა ცოდვათა ჩუენთასა, ქრისტე ღმერთო, განზრახვით სათნო იყავ აღსლვა ჯუარსა ზედა, რათა იჴსნნე, რომელნი შექმნენ მონებისაგან მტერისა, ვინაცა მადლობით გიღაღადებთ, სიხარულითა აღმავსენ ყოველნი, ვითარ მაცხოვარმან ჩუენმან, მოსრულმან ცხოვრებად ყოვლისა სოფლისა.

სახიერებისა წყარო ხარ შენ, წყალობასა შენსა ღირს მყვენ, ღმრთის-მშობელო, მოხედენ ერსა შეცოდებულსა, ყოვლად წმიდაო, და აჩვენე მარადის ძლიერებაჲ შენი, რამეთუ შენ გესავთ და გიხაროდენსა გიღაღადებთ, ვითარცა იგი ოდესმე უჴორცოთა მთავარმან გაბრიილ გიღაღადა.

უფალო, გარდამოავლინე ჴელი შენი მაღლით სამკჳდრებელით შენით, და განმაძლიერე მე მსახურებასა ამას შენსა ზედა, დაუსჯელად წარდგომად წინაშე საშინელსა საკურთხეველსა შენსა, და შეწირვად შენდა უსისხლო იგი მსხუერპლი, რამეთუ შენი არს ძალი, უკუნითი უკუნისამდე. ამინ.

შევიდე სახლსა შენსა, თაყუანის-ვსცე ტაძარსა წმიდასა შენსა შიშითა შენითა. უფალო, მიძეღუ მე სიმართლითა შენითა, და მტერთა ჩემთათჳს წარმართე შენ წინაშე გზაჲ ჩემი, რამეთუ არა არს ღირსი მათსა ჭეშმარიტება, გული მათი ამაო, სამარა ზეღებულ არს ჴორჴი მათი, ენითა მათითა ზაკჳდეს, საჯენ იგინი, ღმერთო, დაეცნედ იგინი ზრახვათა მათთაგან, სიმრავლისაებრ უღმრთოებათა მათთასა განიშორენ იგინი, რამეთუ განგამწარეს შენ, უფალო, და იშვებდენ ყოველნი, რომელნი გესვენ შენ უკუნისამდე, იხარებდენ და დაიმკჳდრონ მათ შორის, და იქადოდენ შენდამი, რომელთა უყვარს სახელი შენი, რამეთუ შენ აკურთხო მართალი, უფალო, ვითარცა ჭურითა სათნოებისათა გჳრგჳნოსან მყვენ ჩუენ.

ღმერთო, განმწმიდე მე ცოდვილი, და შემიწყალე მე.

აკურთხე მეუფეო გინგილაჲ და სტიქარი.

კურთხეულ არს ღმერთი ჩუენი ყოვლადვე, აწ და მარადის და უკუნითი უკუნისამდე. ამინ.

იხარებს სული ჩემი უფლისა მიმართ, რომელმან შთამაცვა მე სამოსელი ცხოვრებისა, და კვართი სიხარულისა შემმოსა მე, და ვითარცა სიძესა დამადგა გჳრგჳნი, და ვითარცა სძალი შემამკო მე სამკაულითა.

წმიდაო, წმიდაო, წმიდაო უფალო საბაოთ, სავსე არიან ცანი და ქუეყანა დიდებითა შენითა, ოსანა მაღალთა შინა ხოლო საბუხარსა შეიცვამს ჴელსა მარჯვენესა და იტყჳს:

მარჯვენე შენი, უფალო, დიდებულ არს ძალითა შენითა, მარჯვენამან ჴელმან შენმან მოსრნა მტერნი, და სიმრავლითა დიდებისა შენისათა შემუსრნა მჴდომნი იგი.

ჴელთა შენთა შემქმნეს მე, და დამბადეს მე, გულისჴმა-მიყავ, და ვისწავლნე სიმართლენი შენი.

კურთხეულ არს ღმერთი ჩუენი ყოვლადვე, აწ და მარადის და უკუნითი უკუნისამდე. ამინ.

იხარებს სული ჩემი: ვიდრე ბოლომდის, და მიიღებს ოლარსა და გამოჰსახავს ჯუარსა, და დაიდებს მას ქედსა ზედა და იტყჳს:

კურთხეულ არს ღმერთი, რომელმან მოსცა მადლი ესე მღდელთა მისთა, ვითარცა ნელსაცხებელი თავსა ზედა, გარდამომავალი წვერთა ზედა, წვერთა ზედა აარონისთა, რომელი გარდამოვიდოდა სამჴართა ზედა სამოსლისა მისისათა:

კურთხეულ არს ღმერთი, რომელმან გარე შემარტყა მე ძალი, და დასდვა უბიწოდ გზაჲ ჩემი, განამტკიცნა ფერჴნი ჩემნი ვითარცა ირემთანი, და მაღალთა ზედა დამადგინა მე.

შეიბ მახჳლი შენი წელთა შენთა, ძლიერო, შუენიერებითა შენითა, და სიკეთითა შენითა, და გარდააცუ, და წარემართე, და სუფევდი, ჭეშმარიტებისათჳს, და სიმშჳდისა, და სიმართლისა, და გიძღოდეს შენ საკჳრველად მარჯვენე შენი ყოვლადვე, აწ და მარადის და უკუნითი უკუნისამდე. ამინ.

მღდელთა შენთა, უფალო, შეიმოსონ სიმართლე, და წმიდანი შენნი სიხარულით იხარებდენ ყოვლადვე, აწ და მარადის და უკუნითი უკუნისამდე. ამინ.

დავიბანე უბრალოებით ჴელნი ჩემნი, და გარე მოვადექ საკურთხეველსა შენსა, უფალო, სმენად ჩემდა ჴმა ქებისა შენისა, და მითხრობად ყოველი საკჳრველება შენი. უფალო, შევიყვარე შუენიერებაჲ სახლისა შენისა, და ადგილი საყოფელი დიდებისა შენისა, ნუ წარსწყმედ უღმრთოთა თანა სულსა ჩემსა, და კაცთა მოსისხლეთა თანა ცხოვრებასა ჩემსა, რომელთა ჴელნი მათნი უშჯულოებასა შინა არიან, მარჯვენე მათი აღივსო ქრთამითა, ხოლო მე უმანკოებითა ჩემითა ვიდოდე, მიჴსენ მე, უფალო, და მიწყალე მე, ფერჴი ჩემი დასდგა სიწრფოებით ეკლესიასა შინა გაკურთხო შენ, უფალო.

ღმერთო განმწმიდე მე ცოდვილი, და შემიწყალე მე.

მომიყიდენ ჩუენ წყევისა მისგან შჯულისა, პატიოსნითა სისხლითა შენითა, ჯუარს ზედა რა დაემსჭვალე, და ლახვრითა განიგმირე, და უკუდავება აღმოუცენე კაცთა, მაცხოვარო ჩუენო, დიდება შენდა:

გუაკურთხენ მეუფეო.

კურთხეულ არს ღმერთი ჩუენი ყოვლადვე, აწ და მარადის და უკუნითი უკუნისამდე,

ამინ.

მოსახსენებელად უფლისა, ღმრთისა, და მაცხორისა ჩუენისა იესო ქრისტესა. გ-გზის.

ვითარცა ცხოვარი კლვად მიიგუარა.

და ვითარცა ტარიგი წინაშე მრისველისა თჳსისა უჴმობელად, ესრეთ არა აღაღებს პირსა თჳსსა.

სიმდალითა თჳსითა სასჯელი მისი მიეღო.

ხოლო თესლტომი მისი ვინმე მიუთხრას.

უფლისა მიმართ ვილოცოთ, ეპყრას გინგილა ჴელითა, და შემდგომად ამათსა სთქვას: აღიღე მეუფეო. ხოლო მღდელი შეკვეთს წმიდით ლახვრით გუერდსა მარჯვენით კერძოჲსა სეფისკუერისასა, აღმოიღებს წმიდასა პურსა და ესრეთ იტყჳს:

რამეთუ აღებულ არს ქუეყანით ცხოვრება მისი.

დაკალ მეუფეო.

დაიკლვის ტარიგი ღმრთისა, აღმღებელი ცოდვათა სოფლისათა, ცხოვრებისათჳს სოფლისა და ცხოვრებად.

განაღე მეუფეო.

ერთმან მჴედართაგანმან ლახვარითა განაღო გუერდი მისი, და მეყუსეულად გარდამოჴდა სისხლი და წყალი, და რომელმან იხილა სწამა და ჭეშმარიტ არს წამება მისი.

აკურთხე მეუფეო წმიდა შეერთება.

პატივად და მოსაჴსენებელად, უმეტესად კურთხეულისა, დიდებულისა დედუფლისა ჩუენისა ღმრთის-მშობელისა, და მარადის ქალწულისა მარიამისა, მეოხებითა მისითა შეიწირე, უფალო, მსხუერპლი ესე შენსა ზეცისა საკურთხეველსა.

დასდგა დედუფალი მარჯვენით შენსა, შემოსილი სამოსლითა ოქრო ქსოვილითა შემკულ და შემოსილ.

პატიოსნისა დიდებულისა წინასწარ-მეტყველისა, წინა-მორბედისა და ნათლის-მცემელისა იოანესითა.

წმიდათა დიდებულთა წინასწარ-მეტყუელთა: მოსე და აარონ, ილია და ელისე, ისაია, დავით და იესე, და წმიდათა სამთა ყრმათა, და წინასწარ-მეტყუელისა დანიილისა, და ყოველთა წმიდათა წინასწარ-მეტყუელთათა.

წმიდათა დიდებულთა და ყოვლად ქებულთა მოციქულთა, პეტრე და პავლე, ათორმეტთა და ყოველთა წმიდათა მოციქულთათა, და წმიდისა დედისა ჩუენისა მოციქულთა სწორისა ქალწულისა ნინოსითა და მოციქულთა სწორთა მეფისა მირიანისა და დედოფლისა ნანასითა.

წმიდათა შორის მამათა ჩუენთა მღდელთ-მთავართა: ბასილი დიდისა, გრიგოლი ღმრთის-მეტყველისა და იოანე ოქროპირისათა, ათანასი და კჳრილე, ნიკოლოზ მირონ-ლუკიისა მთავარ-ეპისკოპოსისა, და ყოველთა წმიდათა მღდელთ-მთავართათა.

წმიდისა მოციქულისა, პირველ მოწამისა და არქიდიაკონისა სტეფანესითა. წმიდათა დიდთა მოწამეთა: გიორგი, დემეტრე, თევდორე ტირონისა, თევდორე სტრატილატისა, ევსტათი და წმიდათა დიდთა მოწამეთა ჩუენთა არგვეთის მთავართა დავით და კონსტანტინესითა, წმიდათა ღუაწლისმძლეთა მეფე-დედოფალთა დემეტრე თავდადებულისა, არჩილ, ლუარსაბ, შუშანიკ და ქეთევანისათა და ყოველთა წმიდათა მოწამეთათა, და ქალწულ მოწამეთა, თეკლე, ბარბარე, კირიაკია, ევფემია, პარასკევა, ეკატერინე და ყოველთა წმიდათა ქალწულ მოწამეთათა.

ღირსთა და ღმერთ შემოსილთა მამათა ჩუენთა: ანტონი, ექვთიმე, საბა, ონოფრე, ათანასე ათონელისა, იოანე ზედაზნელისა და მისთა ათორმეტთა მოწაფეთა, და ღირსისა მამისა ჩვენისა დავით გარეჯელისა, დოდო გარეჯელისა, გრიგოლ ხანძთელისა და ალექსი ბერისათა და წმიდისა მამისა ჩვენისა ილია მართლისათა და ყოველთა ღირსთა მამათა, და ღირსთა დედათა: პელაგია, თეოდოსია, ანასტასია, ევპრაქსია, ათანასია, თებრონია, თეოდულა, ევფროსინა, მარიამ მეგჳპტელისა, და ყოველთა წმიდათა ღირსთა დედათათა.

წმიდათა და საკჳრველთ მოქმედთა უვეცხლოთა, კოსმა და დამიანე, კჳროს და იოანე, პანტელეიმონ, ერმოლაოს, და ყოველთა წმიდათა უვეცხლოთათა.

წმიდათა და მართალთა მშობელთა ღმრთისათა, იოაკიმ და ანასითა (და წმიდისა სახელი, რომლისაცა იყოს ტაძარი, და ვისიც იყოს დღე) და ყოველთა წმიდათა, მათითა მეოხეობითა შეგჳწყალენ ჩუენ, ღმერთო.

წმიდათა შორის მამისა ჩუენისა იოანე ოქროპირისა, კონსტანტინეპოლელ მთავარ-ეპისკოპოსისათა.

მოიჴსენე მეუფეო კაცთ-მოყუარეო უწმიდესი და უნეტარესი, სრულიად საქართველოს კათოლიკოს-პატრიარქი და მცხეთა-თბილისის მთავარ-ეპისკოპოსი დიდი მეუფე მამაჲ ჩუენი ილია, ყოვლად სამღდელონი მიტროპოლიტნი, მთავარ-ეპისკოპოსნი და ეპისკოპოსნი (ეპარქიის მღდელ-მთავარი) , პატიოსანნი მღდელნი, ქრისტეს მიერ დიაკონნი და ყოველი სამღდელო და სამონაზვნო წესი, და წინამძღუარი ჩუენი (სახელი) ძმანი და თანამწირველნი ჩუენი, მღდელნი და დიაკონნი, და ყოველნი ძმანი ჩუენნი, რომელთა მოუწოდე ზიარებად მრავალ მოწყალებისა და სახიერებისა შენისა მიმართ, ყოვლად-სახიერო მეუფეო.

მოიჴსენე, უფალო, ღმრთივ-დაცული ერი ჩუენი, მთავრობა და მხედრობა მისი.

მოიჴსენე, უფალო, (სახელი). და ესრეთ აღმოიღებს ნაწილსა, და დასდებს ქვემოთ წმიდისა პურისა, და ეგრეთვე მიიღებს მეხუთესა სეფისკუერსა, და იტყჳს:

მოსაჴსენებელად და მისატევებელად ცოდვათა, უწმიდესთა მართლ-მადიდებელთა პატრიარქთა, მეფეთა და დედოფალთა, და სანატრელთა აღმაშენებელთა წმიდისა ამის ტაძრისათა (უკუეთუ იყოს მონასტერი: წმიდისა ამის მონასტრისა ) . ესრეთ მოიჴსენებს რომელიცა ენებოს მიცვალებულთა სახელებსა, და თჳთოეულსა სახელებსა ზედა აღმოიღებს ნაწილსა, და შესძინებს: მოიჴსენე, უფალო, (სახელი).

ყოველნი სასოებითა აღდგომისა, და ცხოვრებისა საუკუნოჲსათა, შენდა ზიარებულთა მიცვალებულთა მართლ-მადიდებელთა მამათა, და ძმათა ჩუენთა, კაცთ-მოყუარეო უფალო.

მოიჴსენე უფალო, ჩემიცა უღირსებაჲ, და შემინდვენ მე ყოველნი შეცოდებანი ჩემნი ნებსითნი, და უნებლიეთნი.

აკურთხე, მეუფეო, სასაკმეველე ესე.

უფლისა მიმართ ვილოცოთ. და მღდელმან ლოცვა სასაკმევლისა:

საკმეველსა შევსწირავთ შენდა, ქრისტე ღმერთო ჩუენო, საყნოსელად სუნნელებისა სულიერისა, შეიწირე შენსა ზეცისა საკურთხეველსა, და ნაცვლად გარდამოგჳვლინე ჩუენ მადლი სულისა შენისა წმიდისა.

უფლისა მიმართ ვილოცოთ.

მოვიდა ვარსკვლავი, და დაადგრა ზედა, სადაცა იყო ყრმა.

უფლისა მიმართ ვილოცოთ.

უფალი სუფევს, შუენიერება შეიმოსა: შეიმოსა უფალმან ძალი და გარე შეირტყა, და რამეთუ დაამყარა სოფელი, რათა არა შეიძრას. განმზადებულ არს საყდარი შენი მიერითგან, და საუკუნითგან შენ ხარ. აღიღეს მდინარეთა, უფალო, აღიმაღლნეს მდინარეთა ჴმანი მათნი, აღსდგეს მდინარენი სლვასა თჳსსა, ჴმითა წყალთა მრავალთათა. საკჳრველ არიან განცხრომანი ზღჳსანი, საკჳრველ არს მაღალთა შინა უფალი, წამებანი შენნი, უფალო, სარწმუნო იქმნნეს ფრიად. სახელსა შენსა შუენის სიწმიდე, უფალო, სიგრძესა შინა დღეთასა.

უფლისა მიმართ ვილოცოთ. დაფარე, მეუფეო.

დაფარნა ცანი შუენიერებამან შენმან, ქრისტე, და ქებითა შენითა აღივსო ქუეყანა.

უფლისა მიმართ ვილოცოთ. დაფარე, მეუფეო.

დაგჳფარენ ჩუენ საფარველითა ფრთეთა შენთათა, წარსდევნე ჩემგან, ჩუენგან, ჩვენი ერისაგან ყოველნი მტერნი და მბრძოლნი და დაამშჳდე ცხოვრება ჩუენი, უფალო, შეგჳწყალენ ჩუენ, და სოფელი შენი, და აცხოვნენ სულნი ჩუენნი, ვითარცა სეხიერ ხარ და კაცთ-მოყუარე, ამინ.

კურთხეულ ხარ ღმერთო ჩუენო, რომელმან ესრეთ სათნო იყავ, დიდება შენდა.

ყოვლადვე, აწ და მარადის და უკუნითი უკუნისამდე. ამინ.

წინა დაგებულთა პატიოსანთა ძღუენთათჳს, უფლისა მიმართ ვილოცოთ.

ღმერთო, ღმერთო ჩუენო, რომელმან ზეცისა პური, საზრდელი ყოვლისა სოფლისა, უფალი ჩუენი და ღმერთი იესო ქრისტე, მოავლინე მაცხორად, და მჴსნელად და ქველისმოქმედად, და მაკურთხეველად, და წმიდა მყოფელად ჩუენდა. შენ აკურთხე წინა დაგებული ესე, და შეიწირე ესე წმიდასა და ზესთა ცათასა და საცნაურსა საკურთხეველსა შენსა. მოიჴსენენ, ვითარცა სახიერმან და კაცთ-მოყუარემან, შემომწირველნი, და რომელთათჳს შემოსწირნეს, და ჩუენ დაუსჯელად დამიცვენ მღდელმოქმედებასა შინა საღმრთოთა შენთა საიდუმლოთასა: რამეთუ წმიდა არს, და დიდებულ ყოვლად პატიოსანი, და დიდად შუენიერი სახელი შენი, მამისა და ძისა და წმიდისა სულისა, აწ და მარადის და უკუნითი უკუნისამდე. ამინ.

დიდება შენდა, ქრისტე ღმერთო, სასოებაო ჩუენო, დიდება შენდა.

დიდება, აწდა. უფალო, შეგჳწყალენ გ-გზის. გუაკურთხენ.

მკვდრეთით აღდგომილმან.

ქრისტემან ჭეშმარიტმან ღმერთმან ჩუენმან, მეოხებითა ყოვლად უხრწნელისა დედისა თჳსისათა, წმიდათა შორის მამისა ჩუენისა იოანე ოქროპირისა კონსტანტინეპოლელ მთავარ-ეპისკოპოსისათა

ბასილი დიდისა კესარია-კაბადოკიის მთავარ-ეპისკოპოსისაჲთა, და ყოველთა წმიდათა, შეგჳწყალნეს და გუაცხოვნეს ჩუენ, ვითარცა სახიერ არს და კაცთ მოყუარე:

ამინ.

საფლავად ჴორცითა, და ჯოჯოხეთს სულითა, ვითარცა ღმერთი, სამოთხეს ავაზაკისა თანა, და საყდარსა განუშორებელ იყავ, ქე, მამისა თანა და სულისა, ყოველნი აღავსენ გარე შემოუწერელო:

მეუფეო ზეცათაო, ნუგეშინის-მცემელო, სულო ჭეშმარიტებისაო, რომელი ყოველგან ხარ, და ყოველსავე აღავსებ მადლითა შენითა, საუნჯეო კეთილთაო, მომნიჭებელო ცხოვრებისაო: მოვედ და დაემკჳდრე ჩუენ შორის, და წმიდა მყვენ ჩუენ ყოვლისაგან ბიწისა, და აცხოვნე, სახიერო, სულნი ჩუენნი.

დიდება მაღალთა შინა ღთსა, და ქუეყანასა ზედა მშჳდობა, და კაცთა შორის სათნოება. ბ-გზის.

უფალო, ბაგენი ჩემნი აღახვენ, და პირი ჩემი უთხრობდეს ქებულებასა შენსა.

ჟამი არს მსახურებად უფლისა, მეუფეო, გუაკურთხენ.

კურთხეულ არს ღმერთი ჩუენი ყოვლადვე, აწ და მარადის და უკუნითი უკუნისამდე:

ამინ, ლოცვა ჰყავ ჩემთჳს, მეუფეო.

წარგიმართოს უფალმან სლვანი შენნი.

მომიჴსენე მე, მეუფეო, წმიდაო.

მოგიჴსენოს შენ უფალმან ღმერთმან სასუფეველსა თჳსსა, ყოვლადვე, აწ და მარადის და უკუნითი უკუნისამდე.

ამინ.

უფალო, ბაგენი ჩემნი აღახვენ, და პირი ჩემი უთხრობდეს ქებულებასა შენსა.

გუაკურთხენ, მეუფეო.

კურთხეულ არს მეუფება, მამისა და ძისა და წმიდისა სულისა, აწ და მარადის და უკუნითი უკუნისამდე.

გუაკურთხენ მეუფეო, და განაღე მეუფეო , და ჟამი არს მსახურებად, გარნა კუერექსებისა და წინა დაგებულის წესის შესრულებისა.