წმიდა იოანე ოქროპირის ლიტურგია

გუაკურთხენ, მეუფეო.

კურთხეულ არს მეუფება, მამისა და ძისა და წმიდისა სულისა, აწ და მარადის და უკუნითი უკუნისამდე.

ამინ.

მშჳდობით უფლისა მიმართ ვილოცოთ.

უფალო, შეგჳწყალენ.

ზეგარდამო მშჳდობისა, და ცხოვრებისათჳს სულთა ჩუენთასა, უფლისა მიმართ ვილოცოთ.

უფალო, შეგჳწყალენ.

მშჳდობისათჳს ყოვლისა სოფლისა, კეთილად დგომისათჳს წმიდათა ღმრთისა ეკლესიათა, და ყოველთა ერთობისათჳს, უფლისა მიმართ ვილოცოთ.

უფალო, შეგჳწყალენ.

წმიდისა ამის ტაძრისათჳს, (მონასტრისა) სარწმუნოებითა, სასოებითა, და შიშითა ღმრთისათა შემავალთა ამას შინა, უფლისა მიმართ ვილოცოთ.

უფალო, შეგჳწყალენ.

უწმიდესისა და უნეტარესისა, სრულიად საქართველოს კათოლიკოს-პატრიარქისა, და მცხეთა-თბილისის მთავარ-ეპისკოპოსისა, დიდისა მეუფისა, მამისა ჩუენისა ილიასათჳს, (აქა მოიხსენიე ეპარქიის მღდელ-მთავარი) პატიოსანთა მღდელთა, ქრისტეს მიერ დიაკონთა, და ყოვლისა სამღდელოჲსა დასისა და ერისა მისისათჳს, უფლისა მიმართ ვილოცოთ.

უფალო, შეგჳწყალენ.

ღმრთივ-დაცულისა ერისა ჩუენისა, მთავრობისა და მხედრობისა მისისათჳს, უფლისა მიმართ ვილოცოთ.

უფალო, შეგჳწყალენ.

სამეუფოჲსა ქალაქისა ამას ჩუენისა და წმიდისა ამის ტაძრისა (უკუეთუ იყოს მონასტერი, წმიდისა ამის მონასტრისა) , და ყოვლისა ქალაქისა და სოფლებისათჳს, და სარწმუნოებით მკჳდრთა მათ შინა, უფლისა მიმართ ვილოცოთ.

უფალო, შეგჳწყალენ.

კეთილ შეზავებისათჳს ჰაერთასა, კეთილ გამოღებისათჳს ნაყოფთა ქუეყანისათა, და ჟამთა მშჳდობისათჳს, უფლისა მიმართ ვილოცოთ.

უფალო, შეგჳწყალენ.

მენავეთა, მოგზაურთა, სნეულთა, მშრომელთა, ტყვეთა ჴსნისა, და ცხოვრებისა მათისათჳს, უფლისა მიმართ ვილოცოთ.

უფალო, შეგჳწყალენ.

ჰჴსნად ჩუენდა ყოვლისაგან ჭირისა, რისხვისა და იწროებისა, უფლისა მიმართ ვილოცოთ.

უფალო, შეგჳწყალენ.

შეგუეწიენ, გუაცხოვნენ, შეგჳწყალენ, და დაგჳცვენ ჩუენ, ღმერთო, შენითა მადლითა.

უფალო, შეგჳწყალენ.

ყოვლად წმიდისა, უხრწნელისა, უფროსად კურთხეულისა, დიდებულისა დედუფლისა ჩუენისა ღმრთის-მშობელისა, და მარადის ქალწულისა მარიამისა, და ყოველთა წმიდათა მომხსენებელთა, თავნი თჳსნი და ურთიერთას, და ყოველი ცხოვრებაჲ ჩუენი ქრისტესა ღმერთსა ჩუენსა შევვედროთ.

შენ, უფალო.

უფალო ღმერთო ჩუენო, რომლისა სიმტკიცე განუზომელ, და დიდება მიუწთომელ, რომლისა წყალობაჲ აურაცხელ, და კაცთ-მოყუარებაჲ მიუთხრობელ არს, შენ მეუფეო, მოწყალებისაებრ შენისა, მოიხილე ჩუენ ზედა, და წმიდასა ამას სახლსა ზედა, და ჰყუენ ჩუენ თანა, და თანა მლოცველთა ჩუენთა თანა, მდიდრად წყალობანი, და მოწყალებანი შენნი:

შუენის შენდა ყოველი დიდება, პატივი და თაყუანის-ცემა, მამისა და ძისა და წმიდისა სულისა, აწ და მარადის და უკუნითი უკუნისამდე;

ამინ.

მერმე და მერმე მშჳდობით უფლისა მიმართ ვილოცოთ.

უფალო, შეგჳწყალენ.

შეგუეწიენ, გუაცხოვნენ, შეგჳწყალენ, და დაგჳცვენ ჩუენ, ღმერთო, შენითა მადლითა.

უფალო, შეგჳწყალენ.

ყოვლად წმიდისა, უხრწნელისა, უფროსად კურთხეულისა, დიდებულისა დედუფლისა ჩუენისა ღმრთის-მშობელისა, და მარადის ქალწულისა მარიამისა, და ყოველთა წმიდათა მომხსენებელთა, თავნი თჳსნი და ურთიერთას, და ყოველი ცხოვრებაჲ ჩუენი ქრისტესა ღმერთსა ჩუენსა შევვედროთ.

შენ, უფალო.

უფალო ღმერთო ჩუენო, აცხოვნე ერი შენი, და აკურთხე სამკჳდრებელი შენი, სავსება ეკლესიისა შენისა დაიცევ, წმიდა ჰყუენ მოყუარენი სახლისა შენისა შუენიერებისანი, შენ იგინი ნაცვლად ადიდენ ღმრთაებრივითა ძალითა შენითა, და ნუ დამიტევებ ჩუენ მოსავთა შენდამი:

შენი არს სიმტკიცე, და შენი არს სუფევა, და ძალი, და დიდება, მამისა და ძისა და წმიდისა სულისა, აწ და მარადის და უკუნითი უკუნისამდე:

ამინ.

მერმე და მერმე მშჳდობით უფლისა მიმართ ვილოცოთ.

უფალო, შეგჳწყალენ.

შეგუეწიენ, გუაცხოვნენ, შეგჳწყალენ, და დაგჳცვენ ჩუენ, ღმერთო, შენითა მადლითა.

უფალო, შეგჳწყალენ.

ყოვლად წმიდისა, უხრწნელისა, უფროსად კურთხეულისა, დიდებულისა დედუფლისა ჩუენისა ღმრთის-მშობელისა, და მარადის ქალწულისა მარიამისა, და ყოველთა წმიდათა მომხსენებელთა, თავნი თჳსნი და ურთიერთას, და ყოველი ცხოვრებაჲ ჩუენი ქრისტესა ღმერთსა ჩუენსა შევვედროთ.

შენ, უფალო.

ზიართა ამათ, და ერთ ხმობითა ლოცვათა ჩუენდა მომნიჭებელო, და ორთა და სამთა შეთქმულთა სახელითა შენითა, თხოვათა აღსრულებისა აღმთქმელო: შენ აწცა მონათა შენთა თხოვანი უმჯობესისა მიმართ სრულ ჰყუენ, აწინდელსაცა ამას საუკუნესა მეცნიერებასა ჭეშმარიტებისა შენისასა მომცემელმან, ხოლო მერმისა ცხოვრებისა ჩუენისა მომნიჭებელმან ჩუენდა:

სახიერი და კაცთ-მოყუარე ღმერთი ხარ, და შენდა დიდებასა აღვავლენთ, მამისა და ძისა და წმიდისა სულისა, აწ და მარადის და უკუნითი უკუნისამდე;

ამინ.

უფლისა მიმართ ვილოცოთ. მღდელი იტყჳს ლოცვასა გამოსლვისა საიდუმლოდ.

მეუფეო უფალო ღმერთო ჩუენო, რომელმან დააწესენ ცათა შინა განწყობილნი მჴედრობანი ანგელოსთანი და მთავარ-ანგელოზთანი, მსახურებად დიდებისა შენისა: ჰყავ შესლვასა ჩუენსა თანა წმიდათაცა ანგელოზთა შესლვა, თანა მწირველად ჩუენდა, და თანა დიდების-მეტყველებად შენისა სახიერებისა:

რამეთუ შუენის შენდა ყოველი დიდება, პატივი, და თაყუანის-ცემა, მამისა და ძისა და წმიდისა სულისა, აწ და მარადის და უკუნითი უკუნისამდე, ამინ.

აკურთხე, მეუფეო, წმიდა შესავალი.

კურთხეულ არს შესავალი წმიდათა შენთა, ყოვლადვე, აწ და მარადის და უკუნითი უკუნისამდე, ამინ.

სიბრძნით აღემართენით.

მოვედით თაყუანის-ვსცეთ, და შეუვრდეთ ქრისტესა, გუაცხოვნენ ჩუენ, ძეო ღმრთისაო, წმიდათა შორის საკჳრველო, მგალობელნი შენნი: ალილუია, ერთ გზის.

აღდგომილო მკუდრეთით, მგალობელნი შენნი: ალილუია, ერთ გზის.

ღმერთო წმიდაო, რომელი წმიდათა შინა განისვენებ, რომელი სამ წმიდითა ჴმითა სერაბიმთა მიერ იგალობები, და ქერუბიმთა მიერ იდიდებისმეტყველები, და ყოველთაგან ზეცისა ძალთა თაყუანის იცემები, რომელმან არა არსისაგან არსად მოიყვანენ ყოველნი, რომელმან დაბადე კაცი ხატად და მსგავსად შენდა, ყოვლითავე მადლითა შენითა შეამკევ, და მისცემ მვედრებელთა სიბრძნესა და გულის ხმის ყოფასა, და არა შეურაცხ ჰყოფ ცოდვილთა, არამედ განუწესებ სინანულსა საცხოვრებელად, რომელმან ღირს მყვენ ჩუენ მდაბალნი, და უღირსნი მონანი შენნი, ჟამსაცა ამას დგომად წინაშე დიდებისა წმიდისა საკურთხეველისა შენისა, და თანა-მდებისა თაყუანის-ცემისა, და დიდების მეტყველებისა შეწირვად შენდა, შენ მეუფეო შეიწირე პირთაგანცა ჩუენ ცოდვილთასა სამწმიდაო გალობაჲ, და მომხედენ ჩუენ სიტკბოებითა შენითა, მოგჳტევენ ჩუენ ყოველნი შეცოდებანი ჩუენნი, ნებსითნი და უნებლიეთნი, წმიდა ჰყუენ ჩუენნი სულნი და ჴორცნი, და მომეც ჩუენ ღირსებით მსახურებაჲ შენი ყოველთა დღეთა ცხოვრებისა ჩუენისათა, მეოხებითა ყოვლად წმიდისა ღმრთის- მშობელისათა, და ყოველთა წმიდათა საუკუნითგან სათნო ყოფილთა შენთათა:

აკურთხე, მეუფეო, ჟამი სამწმიდაოსი.

უფალო, აცხოვნე კეთილ მსახურნი, და ისმინე ჩუენი.

უფლისა მიმართ ვილოცოთ.

უფალო, შეგჳწყალენ.

წმიდა ხარ ღმერთო ჩუენო, და შენდა დიდებასა აღვავლენთ, მამისა და ძისა და წმიდისა სულისა, აწ და მარადის,

უკუნითი უკუნისამდე.

ამინ.

ბრძანე მეუფეო.

კურთხეულ არს მომავალი სახელითა უფლისათა.

აკურთხე, მეუფეო, მაღალი დასაჯდომელი.

კურთხეულ ხარ საყდართა ზედა დიდებისა და მეუფებისა შენისათა, მჯდომარე ქერუბიმთა ზედა, ყოვლადვე, აწ და მარადის და უკუნითი უკუნისამდე, ამინ.

მოხედენ.

მშჳდობა ყოველთა.

სულისაცა შენისა თანა.

სიბრძნით.

წარდგომა, ფსალმუნი დავითისი.

სიბრძნით.

საქმე წმიდათა მოციქულა საკითხავი: ან რომაელთა, გინა, კორინთელთა, გინა, გალატელთა მიმართ ეპისტოლე წმიდისა პავლე მოციქულისა საკითხავი.

მოხედენ.

მშჳდობა შენდა.

სულისაცა შენისა თანა. ალილუია გ-გზის.

გამოაბრწყინვე გულთა შინა ჩუენთა, კაცთ-მოყუარეო მეუფეო, ღმრთის-მეცნიერებისა ნათელი მიუწდომელი, და გონებისა ჩუენისა თუალნი განახვენ, განცდად სახარებისა შენისა ქადაგებათა, და დასდევ ჩუენ ზედა ნეტართა მათ მცნებათა შენთა შიში, რათა ყოველი ჴორციელი გულის-თქმაჲ დავსთრგუნოთ, და ყოველი სულიერი მოქალაქობაჲ მოვიგოთ, და ყოველსავე სათნოდ შენდა ვზრახვიდეთ, და ვიქმოდეთ. რამეთუ შენ ხარ განმანათლებელი სულთა და ჴორცთა ჩუენთა ქრისტე ღმერთო ჩუენო, და შენდა დიდებასა აღვავლენთ, თანა დაუსაბამოთ მამით შენით, და ყოვლად წმიდით და სახიერით, და ცხოველს მყოფელით სულით შენით, აწ და მარადის და უკუნითი უკუნისამდე. ამინ.

აკურთხე, მეუფეო, სიტყუანი კეთილ-მაუწყებელისა წმიდისა, დიდებულისა და ყოვლად ქებულისა მოციქულისა და მახარებელისა, (სახელი).

ღმერთმან ვედრებითა წმიდისა დიდებულისა, და ყოვლად ქებულისა მოციქულისა, და მახარებელისა (სახელი) , გცეს შენ (ჯუარსა დასახავს) სიტყუაჲ კეთილ მითხრობისა ძალითა მრავლითა, აღსრულებად სახარებისა, საყვარელისა ძისა თჩსისა, უფლისა ჩუენისა იესო ქრისტესა:

ამინ.

სიბრძნით აღემართენით, და ისმინეთ წმიდა სახარება.

მშჳდობა ყოველთა.

სულისაცა შენისა თანა.

იოანესაგან, გინა, მათესაგან, გინა, მარკოზისაგან, ანუ ლუკასაგან წმიდისა სახარებისა საკითხავი.

დიდება შენდა, უფალო, დიდება შენდა.

მოხედენ.

მშჳდობა შენდა, კეთილ მომთხრობელო.

დიდება შენდა, უფალო, დიდება შენდა.

ვსთქვათ ყოველთა ყოვლითა სულითა, და ყოვლითა გონებითა ჩუენითა ვსთქვათ.

უფალო, შეგჳწყალენ.

უფალო ყოვლისა მპყრობელო ღმერთო მამათა ჩუენთაო გევედრებით, ისმინე და შეგჳწყალენ.

უფალო, შეგჳწყალენ.

შეგჳწყალენ ჩუენ ღმერთო დიდითა წყალობითა შენითა, გევედრებით, ისმინე, და შეგჳწყალენ.

უფალო, შეგჳწყალენ. გგზის

უფალო ღმერთო ჩუენო, აღპყრობილი ესე ვედრებაჲ შეიწირე მონათა შენთაგან, და შეგჳწყალენ ჩუენ, სიმრავლისაებრ წყალობათა შენთასა, და მოწყალებანი შენნი გარდამოავლინენ ჩუენ ზედა, და ყოველსა ერსა შენსა ზედა, მომლოდნელთა მდიდრად შენ მიერისა წყალობისასა:

მერმეცა გევედრებით ღმრთივ-დაცულისა ერისა ჩუენისა, მთავრობისა და მჴედრობისა მისისათჳს

უფალო, შეგჳწყალენ. გგზის

მერმეცა გევედრებით უწმიდესისა და უნეტარესისა, სრულიად საქართველოს კათოლიკოს-პატრიარქისა, და მცხეთა-თბილისის მთავარ-ეპისკოპოსისა, დიდისა მეუფისა, მამისა ჩუენისა ილიასათჳს, (აქა მოიხსენე მღდელთმთავარი მის სამწყსოჲსა) და ყოველთა ქრისტეს მიერ ძმათა ჩუენთათჳს.

უფალო, შეგჳწყალენ. გგზის

მერმეცა გევედრებით ძმათა ჩუენთა, მღდელთა, მღდელ მონოზონთა, და ყოველთა ქრისტეს მიერ ძმათა ჩუენთათჳს.

უფალო, შეგჳწყალენ. გგზის

მერმეცა გევედრებით სანატრელთა და მარადის მოსაჴსენებელთა წმიდათა მართლ-მადიდებელთა პატრიარქთა, და კეთილ მსახურთა მეფეთა, და კეთილ-მორწმუნეთა დედოფალთა, და აღმაშენებელთა წმიდისა ამის ტაძრისათა (ანუ მონასტრისათა) და ყოველთა პირველ დაძინებულთა მამათა და ძმათა, აქა მდებარეთა, და ყოველთა მართლ-მადიდებელთა ერთათჳს.

უფალო, შეგჳწყალენ. გგზის

მერმეცა გევედრებით წყალობისა, სიცოცხლისა მშჳდობისა, სიმრთელისა, ცხოვრებისა, შეწევნისა, შენდობისა, და მიტევებისა ცოდვათასა, მონათა ღმრთისათა ძმათა წმიდისა ამის ტაძრისათა (უკუეთუ მონასტერია: წმიდისა ამის მონასტრისათა).

უფალო, შეგჳწყალენ. გგზის

მერმეცა გევედრებით ნაყოფის შემომწირველთათჳს, და კეთილის მყოფელთა წმიდისა და ყოვლად პატიოსნისა ამის ტაძრისა და ამას შინა მშრომელთა, მგალობელთა და აქა მდგომარეთა ერთათჳს, რომელნი მოელიან შენ მიერ დიდსა და მდიდარსა წყალობასა.

უფალო, შეგჳწყალენ. გგზის

რამეთუ მოწყალე და კაცთმოყუარე ღმერთი ხარ, და შენდა დიდებასა აღვავლენთ, მამისა და ძისა და წმიდისა სულისა, აწ და მარადის და უკუნითი უკუნისამდე.

ამინ.

შეგჳწყალენ ჩუენ, ღმერთო, დიდითა წყალობითა შენითა, გევედრებით, ისმინე, და შეგჳწყალენ.

უფალო, შეგჳწყალენ. გ-გზის

მერმეცა გევედრებით განსუენებისათჳს სულთა მიცვალებულთა მონათა და მხევალთა ღმრთისათა (სახელი), და ყოველთა აქა მოხსენიებულთა, და რათა შეენდვნეს მათ ყოველნი შეცოდებანი მათნი ნებსითნი და უნებლიეთნი.

უფალო, შეგჳწყალენ. გ-გზის

რათა უფალმან ღმერთმან ჩუენმან დააწესოს სულნი მათნი, სადაცა მართალნი განისვენებენ.

უფალო, შეგჳწყალენ. გ-გზის

წყალობა ღმრთისა, და სასუფეველი ცათა, და მიტევება ცოდვათა მათთა, ქრისტეს მიერ უკუდავისა მეუფისა, და ღმრთისა ჩუენისაგან მათთვის ვითხოვოთ.

მოგუმადლე, უფალო.

უფლისა მიმართ ვილოცოთ.

უფალო, შეგჳწყალენ.

ღმერთო სულთაო, და ყოველთა ჴორციელთაო, რომელმან სიკუდილი განაქარვე, და ეშმაკი დასთრგუნე, და ცხოვრება სოფელსა მოანიჭე, შენ, უფალო, განუსუენე სულთა მონათა შენთასა, (სახელი) ადგილსა ნათლისასა, ადგილსა მწვანჳლოვანსა, ადგილსა განსასვენებელსა, სადა-იგი არა არს სალმობა, მწუხარება, და სულთქუმა, და ყოველნი ცოდვანი მათ მიერ ქმნილნი, საქმითნი, სიტყჳთნი, და მოგონებითნი, ვითარცა სახიერმან და კაცთ-მოყუარემან ღმერთმან შეუნდვენ, რამეთუ არა არს კაცი რომელი სცხოვნდეს, და არა სცოდოს, რამეთუ შენ მხოლო ხარ უცხო ყოვლისაგან ცოდვისა, და სიმართლე შენი სიმართლე არს საუკუნო, და სიტყუა შენი ჭეშმარიტ:

შენ ხარ აღდგომა, და ცხოვრება და განსუენება, მიცვალებულთა მონათა და მხევალთა შენთა, (სახელი) , და ყოველთა აქა მოხსენებულთა ქრისტე ღმერთო ჩუენო, და შენდა დიდებასა აღვავლენთ, თანა დაუსაბამოთ მამით შენით, და ყოვლად წმიდით სახიერით და ცხოველს მყოფელით სულით შენითურთ, აწ და მარადის და უკუნითი უკუნისამდე:

ამინ.

ილოცეთ, კათაკმეველნო, უფლისა მიმართ.

უფალო, შეგჳწყალენ.

მორწმუნენო კათაკმეველთათჳს ვილოცოთ, რათა უფალმან იგინიცა შეიწყალნეს.

უფალო, შეგჳწყალენ.

ასწავოს მათ სიტყუა ჭეშმარიტებისა.

უფალო, შეგჳწყალენ.

გამოუცხადოს მათ სახარება სიმართლისა.

უფალო, შეგჳწყალენ.

შეართნეს იგინი წმიდასა თჳსსა კათოლიკე და სამოციქულოსა ეკლესიასა.

უფალო, შეგჳწყალენ.

აცხოვნენ, შეეწიენ, შეიწყალენ, და დაიცვენ იგინი ღმერთო მადლითა შენითა.

უფალო, შეგჳწყალენ.

კათაკმეველნო თავნი თქუენნი უფალსა მოუდრიკენით.

შენ, უფალო.

უფალო ღმერთო ჩუენო, რომელი მაღალთა შინა დამკჳდრებულ ხარ, და მდაბალთა ხედავ, რომელმან ცხოვრებისათჳს კაცთასა მოავლინე მხოლოდ შობილი ძე შენი და ღმერთი, და უფალი ჩუენი იესო ქრისტე, მოიხილე მონათა შენთა კათაკმეველთა, მომდრეკელთა შენდა ქედთა მათთასა, და ღირს ჰყუენ იგინი ჟამსა შინა კეთილსა, საბანელსა მეორედ შობისასა, მიტევებასა ცოდვათასა, და სამოსელსა უხრწნელებისასა, შეაერთენ იგინი წმიდასა შენსა კათოლიკე და სამოციქულოსა ეკლესიასა, და თანა აღრაცხენ იგინი რჩეულსა შენსა სამწყსოსა:

რათა და ესენიცა ჩუენ თანავე ადიდებდენ, ყოვლად პატიოსანსა, და დიდად შუენიერსა სახელსა შენსა, მამისა და ძისა და წმიდისა სულისა, აწ და მარადის და უკუნითი უკუნისამდე.

ამინ.

რაოდენნი კათაკმეველნი ხართ განვედით, კათაკმეველნო განვედით, რაოდენნი კათაკმეველნი ხართ განვედით, ნუ ვინმე კათაკმეველაგანნი, არამედ რაოდენნი მორწმუნენი ვართ, მერმე და მერმე მშჳდობით უფლისა მიმართ ვილოცოთ.

უფალო, შეგჳწყალენ.

გმადლობთ შენ, უფალო ღმერთო ძალთაო, ღირს მყოფელსა ჩუენსა წარდგომად აწცა წმიდასა შენსა საკურთხეველსა, და შევრდომად შენთა მოწყალებათა ჩუენთა ცოდვათათჳს, და ერისა უმეცრებისათჳს, მიითუალე ღმერთო ვედრებაჲ ჩუენი, მყვენ ჩუენ ღირს ყოფად შეწირვად შენდა ვედრებათა და ოხათა, და მსხუერპლთა უსისხლოთა ყოვლისათჳს ერისა შენისა, და კმა მყვენ, ჩუენ რომელნი დასხმენ მსახურებასა ამას შენსა, ძალითა სულისა შენისა წმიდისათა, უბრალოდ და დაუბრკოლებელად, წმიდითა მოწამებითა სჳნიდისისა ჩუენისათა, ხდად შენდა ყოველსა ჟამსა და ადგილსა, რათა მსმენელი ჩუენი მწყალობელ ჩუენდა იყო, სიმართლითა შენისა სახიერებისათა:

შეგუეწიენ, გუაცხოვნენ, შეგჳწყალენ, და დაგჳცვენ ჩუენ, ღმერთო, შენითა მადლითა.

უფალო, შეგჳწყალენ.

სიბრძნით.

შუენის შენდა ყოველი დიდება, პატივი და თაყუანის-ცემა, მამისა და ძისა და წმიდისა სულისა, აწ და მარადის და უკუნითი უკუნისამდე;

ამინ.

მერმე და მერმე მშჳდობით უფლისა მიმართ ვილოცოთ.

უფალო, შეგჳწყალენ.

ზეგარდამო მშჳდობისა, და ცხოვრებისათჳს სულთა ჩუენთასა, უფლისა მიმართ ვილოცოთ.

უფალო, შეგჳწყალენ.

მშჳდობისათჳს ყოვლისა სოფლისა, კეთილად დგომისათჳს წმიდათა ღმრთისა ეკლესიათა, და ყოველთა ერთობისათჳს, უფლისა მიმართ ვილოცოთ.

უფალო, შეგჳწყალენ.

წმიდისა ამის ტაძრისათჳს, (მონასტრისა) სარწმუნოებითა, კრძალულებითა, და შიშითა ღმრთისათა შემავალთა ამას შინა, უფლისა მიმართ ვილოცოთ.

უფალო, შეგჳწყალენ.

ჰჴსნად ჩუენდა ყოვლისაგან ჭირისა, რისხვისა და იწროებისა, უფლისა მიმართ ვილოცოთ.

უფალო, შეგჳწყალენ.

კვალადცა, და მრავალ-გზის შენ შეგივრდებით, და შენ გევედრებით სახიერო, და კაცთ-მოყუარეო, რათა მოხედვითა ვედრებასა ჩუენსა, განსწმიდნე სულნი ჩუენნი და ჴორცნი ყოვლისაგან შეგინებისა ჴორცთა და სულისა, და მომეც ჩუენ უბრალოდ და დაუსჯელად წარდგომად წმიდასა შენსა საკურთხეველსა: მომმადლენ, ღმერთო, ჩუენთანა მლოცველთაცა, წარმართებაჲ ცხოვრებისა, და სარწმუნოებისა, და გულისჴმის-ყოფისა სულიერისა, მოეც მათ ყოვლადვე შიშით და სიყუარულით მსახურთა შენთა, უბრალოდ და დაუსჯელად მოღებად წმიდათა შენთა საიდუმლოთა, და ზეცისა სასუფეველსა ღირს-ყოფად.

შეგუეწიენ, გუაცხოვნენ, შეგჳწყალენ, და დაგჳცვენ ჩუენ, ღმერთო, შენითა მადლითა.

უფალო, შეგჳწყალენ.

სიბრძნით.

რათა ძლიერებითა შენითა ყოვლადვე დაცულნი, შენდა დიდებასა აღვავლენდეთ, მამისა და ძისა და წმიდისა სულისა, აწ და მარადის და უკუნითი უკუნისამდე;

ამინ.

არა ვინ არს ღირს თანა შეკრული ჴორციელთა გულის თქმათა და გემოთა წარდგომად, ანუ მიახლებად, გინა მსახურებად შენდა, მეუფეო დიდებისაო, რამეთუ მსახურება შენი, დიდ არს და საშინელ თჳთ მათ ზეცისა ძალთადცა, არამედ რამეთუ გამოუთქმელისათჳს და აურაცხელისა კაცთ-მოყუარებითა, უქცეველად და უცვალებელად კაც იქმენ, და მღდელ-მთავრად ჩუენდა გამოსჩნდი, და მსახურებრივისა ამის და უსისხლოჲსა მსხუერპლისა მღდელ-მოქმედებაჲ მოგუანიჭე ჩუენ, ვითარცა მეუფემან ყოველთამან, რამეთუ შენ მხოლო, უფალო ღმერთო ჩუენო, მეუფებ ცათა შინა და ქუეყანასა ზედა, საყდარსა ზედა ქერუბიმთასა მჯდომარე, სერაბიმთა უფალი, და მეუფე ისრაილისა, მხოლოო წმიდაო, და წმიდათა შინა განსუენებულო, შენ უკუე გევედრები მხოლოსა სახიერსა და კეთილ მსმენელსა, მოიხილე ჩემ ცოდვილსა ზედა და უჴმარსა მონასა შენსა, და განსწმიდე სული ჩემი და გული ცნობისაგან ბოროტისა, და ღირს მიჩინე მე ძალითა სულისა შენისა წმიდისათა, შემოსილი მღდელობისა მადლითა, წარდგომად წმიდისა ამის ტრაპეზისა შენისა, და მღდელ-მოქმედებად წმიდისა უხრწნელისა ჴორცისა შენისა და პატიოსნისა სისხლისა შენისა, რამეთუ შენდა მოვივლტი მომდრეკელი ქედისა ჩემისა, და გევედრები შენ, ნუ გარე მიიქცევ პირსა შენსა ჩემგან, ნუცა განმყოფ მე მონათა შენთაგან, არამედ ჯერ იჩინე შეწირვად შენდა, ჩემ ცოდვილისა და უღირსისა მონისა შენისა მიერ, მსხუერპლი ესე. რამეთუ შენ ხარ შემწირველი და შეწირული, და შემწყნარებელი და მიმცემელი, ქრისტე ღმერთო ჩუენო, და შენდა დიდებასა აღვავლენთ, თანა დაუსაბამოთ მამით შენით, და ყოვლად წმიდით სახიერით, და ცხოველს მყოფელით სულით შენითურთ, აწ და მარადის და უკუნითი უკუნისამდე. ამინ.

რომელნი ქერუბიმთა საიდუმლოდ ვემსგავსენით, და ცხოველს მყოფელისა სამებისა, სამ-წმიდა-არსობისა გალობასა შევსწირავთ, ყოველივე მსოფლიო დაუტევოთ ზრუნვა.

ვითარცა მეუფისა ყოველთასა, შემწყნარებელსა ანგელოზთა-ებრ უხილავად ძღუნის შემწირველთა წესთასა, ალილუია, ალილუია, ალილუია.

ღმერთო განწმიდე მე ცოდვილი, და შემიწყალე მე. გ-გზის

აღიღე მეუფეო.

აღიღეთ ჴელნი თქუენნი წმიდად მიმართ, და აკურთხევდით უფლისა.

ღმრთივდაცული ერი ჩუენი და მთავრობა, და მჴედრობა მისი, მოიჴსენოს უფალმან ღმერთმან ჩუენმან სასუფეველსა თჳსსა, ყოვლადვე, აწ და მარადის და უკუნითი უკუნისამდე:

უწმიდესი და უნეტარესი, სრულიად საქართველოს კათოლიკოს-პატრიარქი, და მცხეთა-თბილისის მთავარ-ეპისკოპოსი, დიდი მეუფე მამაჲ ჩუენი ილია, მოიჴსენოს უფალმან ღმერთმან ჩუენმან სასუფეველსა თჳსსა, ყოვლადვე, აწ და მარადის და უკუნითი უკუნისამდე. ამინ. (აქა მოიხსენიოს მღდელ-მთავარი, ვისიცა ეპარქია იყოს.). კეთილ მორწმუნენი, ნაყოფის შემომწირველნი და კეთილის მყოფელნი წმიდისა და ყოვლად პატიოსნისა ამის ტაძრისა, და ამას შინა მშრომელნი, მგალობელნი, თქუენ აქა მდგომარენი, მვედრებელნი და ყოველნი მართლმადიდებელნი ქრისტიანენი, მოიჴსენოს უფალმან ღმერთმან ჩუენმან სასუფეველსა თჳსსა, ყოვლადვე, აწ და მარადის და უკუნითი უკუნისამდე:

შუენიერმან იოსებ ძელისაგან გარდამოჴსნა უხრწნელი ჴორცი შენი, და არმენაკითა წმიდათა წარგრაგნა, სუნნელებითა შემურვილი, ახალსა საფლავსა დაგდვა.

საფლავსა შინა ჴორცითა, ჯოჯოხეთს შინა სულითა ვითარცა ღმერთი, ხოლო სამოთხეს ავაზაკისა თანა, და საყდართა მამისა და სულისა თანა იყავ ქრისტე, ყოვლისა აღმავსებელ გარე შემოუწერელო.

ვითარცა ცხოვრება-შემოსილ, ვითარცა ნანდჳლ სამოთხისა უშუენიერეს, და ყოვლისა სამეუფოჲსა სასძლოჲსა უბრწყინვალეს გამოსჩნდა, ქრისტე, საფლავი შენი, წყარო იგი ჩუენისა აღდგომისა.

შუენიერმან იოსებ ძელისაგან გარდამოჴსნა უხრწნელი ჴორცი შენი, და არმენაკითა წმიდათა წარგრაგნა, სუნნელებითა შემურვილი, ახალსა საფლავსა დაგდვა.

კეთილი უყავ, უფალო, ნებითა შენითა სიონსა, და აღაშენენ ზღუდენი იერუსალიმისანი, მაშინ გთნდეს მსხუერპლი სიმართლისა, შესაწირავი და ყოვლად დასაწველი, მაშინ შეიწირნენ საკურთხეველსა შენსა ზედა ზვარაკნი.

მომიჴსენე მე, ძმაო და თანა მწირველო.

მოიჴსენოს უფალმან ღმერთმან მღდლობა შენი სასუფეველსა თჳსსა.

ლოცვა ჰყავ ჩემთჳს, მეუფეო წმიდაო.

სული წმიდაჲ მოვიდეს შენ ზედა, და ძალი მაღლისა გფარვიდეს შენ.

იგივე სული თანა-მოქმედ გუექმნას ჩუენ, ყოველთა დღეთა ცხოვრებისა ჩუენისათა.

მომიჴსენე მე, მეუფეო წმიდაო.

მოგიჴსენოს შენ უფალმან ღმერთმან სასუფეველსა თჳსსა, ყოვლადვე, აწ და მარადის და უკუნითი უკუნისამდე.

ამინ,

აღუსრულოთ ვედრებაჲ ჩუენი უფალსა.

უფალო, შეგჳწყალენ.

წინა დაგებულთა პატიოსანთა ძღუენთათჳს, უფლისა მიმართ ვილოცოთ.

უფალო, შეგჳწყალენ.

წმიდისა ამის ტაძრისათჳს, (მონასტრისა) სარწმუნოებითა, სასოებითა, და შიშითა ღმრთისათა შემავალთა ამას შინა, უფლისა მიმართ ვილოცოთ.

უფალო, შეგჳწყალენ.

ჰჴსნად ჩუენდა ყოვლისაგან ჭირისა, რისხვისა და იწროებისა, უფლისა მიმართ ვილოცოთ.

უფალო, შეგჳწყალენ.

უფალო, ყოვლისა მპყრობელო, ღმერთო მამათა ჩუენთაო, რომელი შეიწირავ მსხუერპლსა ქებისასა მათგან, რომელნი გხადიან შენ ყოვლითა გულითა, მიითუალე ჩუენიცა ცოდვილთა ვედრებაჲ, და შეიწირე წმიდასა შენსა საკურთხეველსა, და კმა მყვენ ჩუენ შეწირვად შენდა ძღუენთა და მსხუერპლთა სულიერთა ჩუენთა ცოდვათათჳს, და ერისა უმეცრებისათჳს, და ღირს მყვენ ჩუენ პოვნად მადლსა წინაშე შენსა, კეთილ მითუალულ ყოფად შენდა მსხუერპლი ჩუენი, და დამკჳდრებად სულსა მადლისა შენისასა სახიერსა ჩუენზედა, და წინა მდებარეთა ამათ ძღუენთა ზედა, და ყოველსა ერსა შენსა:

შეგუეწიენ, გუაცხოვნენ, შეგჳწყალენ, და დაგჳცვენ ჩუენ, ღმერთო, შენითა მადლითა.

უფალო, შეგჳწყალენ.

დღე ყოველი აღსრულებად, სიწმიდით, მშჳდობით, და უცოდველად, უფლისა მიმართ ვილხოვოთ.

მოგუმადლე, უფალო.

ანგელოზი მშვიდობისა, სარწმუნო წინა-მძღუარი, მცველი სულთა და ჴორცთა ჩუენთა, უფლისა მიმართ ვითხოვოთ.

მოგუმადლე, უფალო.

შენდობაჲ და მოტევებაჲ ცოდვათა, და უსჯულოებათა ჩუენთა, უფლისა მიმართ ვითხოვოთ.

მოგუმადლე, უფალო.

კეთილნი და უმჯობესნი სულთა ჩუენთანი, და მშჳდობაჲ სოფლისა, უფლისა მიმართ ვითხოვოთ.

მოგუმადლე, უფალო.

შემდგომნი ჟამნი ცხოვრებისა ჩუენისანი მშჳდობით და სინანულით აღსრულებად, უფლისა მიმართ ვითხოვოთ.

მოგუმადლე, უფალო.

ქრისტეანობითნი აღსასრულნი ცხოვრებისა ჩუენისანი, უჭირველნი, ურცხვენელნი, მშჳდობითნი, და კეთილი სიტყჳს-გებაჲ წინაშე საშინელისა სამსჯავროსა ქრისტესსა, ვითხოვოთ.

მოგუმადლე, უფალო.

ყოვლად წმიდისა, უხრწნელისა, უფროსად კურთხეულისა, დიდებულისა დედუფლისა ჩუენისა ღმრთის-მშობელისა, და მარადის ქალწულისა მარიამისა, და ყოველთა წმიდათა მომხსენებელთა, თავნი თჳსნი და ურთიერთარს, და ყოველი ცხოვრებაჲ ჩუენი ქრისტესა ღმერთსა ჩუენსა შევვედროთ.

შენ, უფალო.

მოწყალებათათჳს მხოლოდ შობილისა ძისა შენისათა, რომლისა თანა კურთხეულ ხარ, თანა ყოვლად წმიდით და სახიერით და ცხოველს მყოფელით სულით შენითურთ, აწ და მარადის და უკუნითი უკუნისამდე.

ამინ.

მშჳდობა ყოველთა

სულისაცა შენისა თანა.

ვიყვარებოდეთ ურთიერთ არს, რათა ერთობით აღვიარებდეთ.

მამასა, და ძესა, და წმიდასა სულსა, სამებასა ერთარსებასა, და განუყოფელსა

შეგიყვარო შენ, უფალო, ძალო ჩემო, უფალო, დამამტკიცებელო ჩემო, და შესავედრებელო ჩემო. გ-გზის.

ქრისტე არს ჩუენ შორის.

არს და იყოს.

კარნი, კარნი, სიბრძნით მოხედენ.

მრწამს ერთი ღმერთი მამა ყოვლისა-მპყრობელი, შემოქმედი ცათა და ქუეყანისა, ხილულთა ყოველთა და არა ხილულთა. და ერთი უფალი იესო ქრისტე ძე ღმრთისა, მხოლოდ შობილი, მამისაგან შობილი უწინარეს ყოველთა საუკუნეთა. ნათელი ნათლისაგან, ღმერთი ჭეშმარიტი ღმრთისაგან ჭეშმარიტისა, შობილი და არა ქმნილი, ერთ არსი მამისა რომლისაგან ყოველი შეიქმნა. რომელი ჩუენთჳს კაცთათჳს, და ჩუენისა ცხოვრებისათჳს გარდამოჴდა ზეცით, და ჴორცნი შეისხნა სულისაგან წმიდისა და მარიამისაგან ქალწულისა, და განკაცნა. და ჯუარს ეცვა ჩუენთჳს პონტოელისა პილატეს ზე, და ივნო, და დაეფლა. და აღსდგა მესამესა დღესა მსგავსად წერილისა. და ამაღლდა ზეცად, და მჯდომარე არს მარჯვენით მამისა. და კუალად მომავალ არს დიდებით განსჯად ცხოველთა და მკვდართა, რომლისა სუფევისა არა არს დასასრულ. და სული წმიდა, უფალი და ცხოველს-მყოფელი, რომელი მამისაგან გამოვალს, მამისა თანა და ძისა თანა თაყუანის-იცემების, და იდიდების, რომელი იტყოდა წინასწარ-მეტყველთა მიერ. ერთი წმიდა, კათოლიკე და სამოციქულო ეკლესია. აღვიარებ ერთსა ნათლისღებასა მოსატევებელად ცოდვათა. მოველი აღდგომასა მკუდრეთით, და ცხოვრებასა მერმისა მის საუკუნისასა. ამინ.

ვსდგეთ კეთილად, ვსდგეთ შიშით, მოხედენ, წმიდასა ამას შესაწირავსა მშჳდობით შეწირვადსა.

წყალობა, მშჳდობა, შესაწირავი ქებისა.

მადლი უფლისა: ხოლო დიაკონი თაყუანის-სცემს, და შევალს წმიდასა შინა საკურთხეველსა.

მადლი უფლისა ჩუენისა იესო ქრისტესი, და სიყუარული ღმრთისა და მამისა და ზიარება სულისა წმიდისა, იყავნ თქუენ ყოველთა თანა.

სულისაცა შენისა თანა.

გუაქუნდინ გულნი.

გუაქუს უფლისა მიმართ.

ვმადლობდეთ უფალსა.

ღირს არს და მართალ თაყუანის-ცემა მამისა და ძისა და წმიდისა სულისა, სამებისა ერთ არსებისა და განუყოფელისა.

ღირს არს და მართალ შენდა ქებად, შენდა კურთხევად, შენდა გალობად, შენდა მადლობად, შენდა თაყუანის-ცემად, ყოველსა ადგილსა მეუფებისა შენისასა, რამეთუ შენ ხარ ღმერთი გამოუთარგმანებელი, მოუგონებელი, უხილავი, მიუწთომელი, მარადის ხარ, ვითარცა იგი ხარ შენ, და მხოლოდშობილი ძე შენი, და სული შენი წმიდა, რამეთუ შენ არა არსისაგან ყოფად მომიყვანენ ჩუენ, და დაცემულნი კუალად აღმადგინენ, და არა განეყენე ყოვლისა ქმნად, ვიდრემდის ზეცად აღმიყვანენ ჩუენ, და მოგუმადლე ჩუენ სასუფეველი მერმისა: ამათ ყოველთათჳს გმადლობთ შენ, და მხოლოდ შობილსა ძესა შენსა, და სულსა შენსა წმიდასა, ყოველთათჳს, რომელ უწყით, და რომელ არა უწყით, საჩინოთა და უჩინოთა ქველის-მოქმედებათა ჩუენდა მომართ ქმნილთა, გმადლობთ შენ შეწირვისაცა ამისთჳს, რომლისა ჴელთაგან ჩუენთა შეწირვა ღირს იჩინე, დაღათუ შენსა გარემოს სდგანან, ათასეულნი მთავარ-ანგელოზთანი, და ბევრეულნი ანგელოზთანი, ქერუბიმნი და სერაფიმნი, ექუს-ექუს ფრთენი, მრავალთუალნი, აღპყრობილნი ფრთეებითა:

ძლევისა გალობისა, მგალობელნი, მჴმობელნი, მღაღადებელნი, და მეტყველნი:

წმიდაო, წმიდაო, წმიდაო, უფალო საბაოთ, სავსე არიან ცანი და ქუეყანა დიდებითა შენითა: ოსანნა მაღალთა შინა, კურთხეულ არს მომავალი სახელითა უფლისათა, ოსანნა მაღალთა შინა.

შემდგომად ამათ სანატრელთა ძალთა ჩუენცა, მეუფეო კაცთ-მოყუარეო, ვჴმობთ, და ვიტყჳთ, წმიდა ხარ და ყოვლად-წმიდა, შენ, და მხოლოდ შობილი ძე შენი, და სული შენი წმიდა, და დიდად შუენიერ დიდება შენი, რომელმან სოფელი შენი ესრეთ შეიყვარე, ვიდრე მიცემადმდეცა მხოლოდ შობილისა ძისა შენისა, რათა ყოველსა, რომელსა რწმენეს მისსა მიმართ, არა წარსწყმდეს, არამედ აქუნდეს ცხოვრებაჲ საუკუნოჲ, რომელი იგი მოვიდა რა, და ყოველი ჩუენთჳს განგებულება სრულ ჰყო, ღამესა, რომელსა მიეცემოდა, უფროსღა მისცემდა თავსა თჳსსა ცხოვრებისათჳს სოფლისა, მოიღო პური წმიდათა ზედა უხრწნელთა და უბიწოთა ჴელთა, გმადლობდა, და აკურთხა, და წმიდა ჰყო, და განსტეხა, და მისცა წმიდათა მისთა მოწაფეთა და მოციქულთა, მეტყველმან:

მიიღეთ და ჰსჭამეთ, ესე არს ჴორცი ჩემი, თქუენთჳს განტეხილი მისატევებელად ცოდვათა:

ამინ.

ჰსუთ ამისაგან ყოველთა: უჩვენებს თჳთ წმიდასა ბარძიმსა.

მსგავსადვე და სასმელისა ყოვლად სერობისა, სთქუა:

ჰსუთ ამისაგან ყოველთა, ესე არს სისხლი ჩემი ახლისა აღთქმისა, თქუენთჳს და მრავალთათჳს დათხეული მისატევებელად ცოდვათა.

ამინ.

მომჴსენებელნი უკუე საცხოვრებელისა ამის მცნებისა, და ყოველთა ჩუენთჳს ქმნილთა, ჯუარისა, დაფლვისა სამ დღე, და აღდგომისა, ზეცად აღსლვისა, მარჯვენით დაჯდომასა, მეორისა და დიდებულისა კუალად მოსლვისა:

შენნი შენთაგან, შენდა შემწირველნი, ყოველთა და ყოვლისათჳს.

შენ გიგალობთ, შენ გაკურთხევთ, შენ გმადლობთ, უფალო, და გევედრებით შენ, ღმერთო ჩუენო.

მერმეცა შევსწირავთ შენდა სიტყჳერსა ამას, და უსისხლოსა მსხუერპლსა, და გხადით შენ, და შეგივრდებით, და გევედრებით, გარდამოავლინე სული შენი წმიდა ჩუენ ზედა, და წინა მდებარეთა ამათ ძღუენთა ზედა

უფალო, რომელმან ყოვლად-წმიდა სული შენი, ჟამსა მესამესა მოციქულთა შენთა გარდამოუვლინე და განანათლენ იგინი, მას, სახიერო, ნუ მიმიღებ ჩემგან, არამედ განმიახლენ მვედრებელსა შენსა.

გული წმიდა დაბადე ჩემ-თანა, ღმერთო, და სული წრფელი განმიახლე გუამსა ჩემსა.

უფალო, რომელმან ყოვლად-წმიდა სული შენი:

განმაგდებ მე პირსა შენისაგან, და სულსა წმიდასა შენსა ნუ მიმიღებ ჩემგან.

უფალო, რომელმან ყოვლად-წმიდა სული შენი:

აკურთხე, მეუფეო, წმიდა პური ესე.

ჰყავ უკუე პური ესე პატიოსან ჴორც ქრისტეს შენისა.

ამინ.

აკურთხე, მეუფეო, წმიდა ბარძიმი ესე.

ბარძიმსა ამას შინა, პატიოსან სისხლ ქრისტეს შენისა.

ამინ.

აკურთხე, მეუფეო, ორივე.

შესცვალე სულითა შენითა წმიდითა.

ამინ, ამინ, ამინ.

მომიჴსენე მე, წმიდაო მეუფეო ცოდვილი.

მოგიჴსენოს შენ უფალმან ღმერთმან სასუფეველსა თჳსსა ყოვლადვე, აწ და მარადის და უკუნითი უკუნისამდე:

ამინ.

რათა ექმნეს მიმღებელთა, განსაფრთხობელად სულისა, მისატევებელად ცოდვათა, ზიარებად წმიდისა სულისა შენისა, სასუფეველსა ცათასა დამკჳდრებად, კადნიერებად წინაშე შენსა, ნუ სასჯელად, გინა დასასჯელად:

მერმეცა შევსწირავთ შენდა სიტყჳერსა ამას მსხუერპლსა, სარწმუნოებით შესვენებულთათჳს პირველთა მამათა, მამათ-მთავართა, წინასწარ-მეტყველთა, მოციქულთა ქადაგთა, მახარებელთა, მოწამეთა, აღმსარებელთა, მმარხველთა, და ყოვლისა სულისა სარწმუნოებით აღსრულებულისა:

უმეტესად ყოვლად-წმიდისა, უხრწნელისა, უფროსად კურთხეულისა, დიდებულისა დედუფლისა ჩუენისა ღმრთის-მშობელისა, და მარადის ქალწულისა მარიამისა.

ღირს არს ჭეშმარიტად, რათა გადიდებდეთ შენ ღმრთის-მშობელო, რომელი მარადის სანატრელ იქმენ, ყოვლად უბიწოდ და დედად ღმრთისა ჩუენისა. უპატიოსნესსა ქერუბიმთასა, და აღმატებით უზესთაესა სერაბიმთასა, განუჴრწნელად მშობელსა სიტყჳსა ღმრთისასა, მხოლოსა ღმრთის-მშობელსა გალობით გადიდებდეთ.

წმიდისა წინასწარ-მეტყუელისა იოანე წინა-მორბედისა და ნათლის-მცემელისა, წმიდათა დიდებულთა და ყოვლად-ქებულთა მოციქულთა, და წმიდისა (სახელი) რომლისაცა ჴსენებასა აღვასრულებთ, და ყოველთა წმიდათა შენთათა, რომელთა ვედრებითა მომხედენ ჩუენ, ღმერთო, და მოიჴსენენ ყოველნი დაძინებულნი სასოებითა აღდგომისა და ცხოვრებისა საუკუნოჲსათა: (სახელები) და განუსვენე მათ, სადა იგი მიხედავს ნათელი პირისა შენისა.

მერმეცა გევედრებით შენ, მოიჴსენე, უფალო, ყოველი მართლ-მადიდებელი პატრიარქნი და მამათმთავარნი და მღდელთმთავარნი, მართლ-მკვეთელნი სიტყჳსა შენისა ჭეშმარიტებისა, ყოველი მღვდლობა, და ქრისტეს მიერ დიაკონობა, და ყოველი სამღდელო დასი.

მერმეცა შევსწირავთ შენდა სიტყჳერსა ამას მსხუერპლსა, სოფლისათჳს, და წმიდისა, კათოლიკე და სამოციქულოჲსა ეკლესიათათჳს, უბრალოდ და ღირსებით მოქალაქობისა მქონებელთათჳს.

ღმრთივ-დაცულისა ერისა ჩუენისა, მთავრობისა და მხედრობისა მისისათჳს. მიეც მათ, უფალო, მშჳდობით მოქალაქეობაჲ, რათა ჩუენცა მყუდროებასა შინა მათსა დაწყნარებული და მყუდრო ცხოვრება გუაქუნდეს, ყოვლითა კეთილ მსახურებითა და პატიოსნებითა:

პირველად მოიჴსენე, უფალო, უწმიდესი და უნეტარესი სრულიად საქართველოს კათოლიკოს-პატრიარქი, და მცხეთა-თბილისის მთავარ-ეპისკოპოსი, დიდი მეუფე, მამიჲ ჩუენი ილია, (სახელი მმართველი ეპისკოპოსისა) რომელი მომადლე წმიდასა შენსა ეკლესიასა, მშჳდობით, ცოცხლებით, პატიოსნად, სიმრთელით, დღეგრძელებით, მართლმკვეთელობით სიტყჳსა შენისა ჭეშმარიტებისათა (ხოლო უკეთუ მღდელთმთავარი წირვიდეს ძღველსა მოიხსენებს რა პატრიარქსა სიტვებით: პირველად მოიხსენე... შემდგომ უპირატესი მღდელი წარმოსთქვამს მღვდელთმთავრისათვის არა „პირველად მოიხსენე“..., არამედ „და კვალად მოიხსენე“... და შემდგომი მისი).

ყოველთა და ყოვლისათჳს.

მოიჴსენე, უფალო, ქალაქი რომელსა შინა ვმსხემობთ, და ყოველნი ქალაქნი და სოფელნი, და სარწმუნოებით მკჳდრნი მას შინა, მოიჴსენე, უფალო, მენავენი, მოგზაურნი, სნეულნი, მშრომელნი, ტყვეთა მჴსნელნი, და ცხოვრება მათი. მოიხსენე, უფალო, ნაყოფის მომრთმელნი, და კეთილის-მყოფელნი წმიდათა შენთა ეკლესიათანი, და მომჴსენებელნი გლახაკთანი, და ჩუენ ყოველთა ზედა მოწყალებანი შენნი გარდამოგჳვლინე:

მომეც ჩუენ, უფალო, ერთითა პირითა, და ერთითა გულითა, დიდებად და გალობად ყოვლად-პატიოსანსა და დიდად-შუენიერსა, სახელსა შენსა, მამისა და ძისა და წმიდისა სულისა, აწ და მარადის და უკუნითი უკუნისამდე.

ამინ.

იყუნენ წყალობანი დიდისა ღმრთისა, და მაცხორისა ჩუენისა იესო ქრისტესნი თქუენ ყოველთა თანა.

სულისაცა შენისა თანა.

ყოველთა წმიდათა მომჴსენებელთა, მერმე და მერმე მშჳდობით უფლისა მიმართ ვილოცოთ.

უფალო, შეგჳწყალენ.

შეწირულთა ამათთჳს, და განწმედილთა პატიოსანთა ძღუენთა, უფლისა მიმართ ვილოცოთ

უფალო, შეგჳწყალენ.

რათა კაცთ-მოყუარემან ღმერთმან ჩუენმან, შემწირველმან ამათმან წმიდასა, და ზესთა ცათასა, და საცნაურსა საკურთხეველსა მისსა, საყნოსელად სუნად სუნნელად შეიწირნეს, და ნაცვლად გარდამოგჳვლინოს ჩუენ საღმრთო მადლი სულისა წმიდისა, ვილოცოთ.

უფალო, შეგჳწყალენ.

ჰჴსნად ჩუენდა ყოვლისაგან ჭირისა, რისხვისა და იწროებისა, უფლისა მიმართ ვილოცოთ.

უფალო, შეგჳწყალენ.

შენ შეგვედრებთ ყოველსა ცხოვრებასა ჩუენსა და სასოებასა, მეუფეო კაცთ-მოყუარეო, და გხადით შენ, და გევედრებით, და შეგივრდებით, ღირს მყვენ ჩუენ მოღებად ზეცისა შენთა შესაძრწუნებელთა საიდუმლოთა, ამის სამღდელოსა და სულიერისა ტრაპეზისათა, წმიდითა სჳნიდისითა, მოსატევებელად ცოდვათა, შესანდობელად ბრალთა, სულისა წმიდისა ზიარებად, სასუფეველსა ცათასა დამკჳდრებად, ნუ სასჯელად, გინა დასასჯელად:

შეგუეწიენ, გუაცხოვნენ, შეგჳწყალენ, და დაგჳცვენ ჩუენ, ღმერთო, შენითა მადლითა.

უფალო, შეგჳწყალენ.

დღე ყოველი აღსრულებად, სიწმიდით, მშჳდობით, და უცოდველად, უფლისა მიმართ ვილხოვოთ.

მოგუმადლე, უფალო.

ანგელოზი მშვიდობისა, სარწმუნო წინა-მძღუარი, მცველი სულთა და ჴორცთა ჩუენთა, უფლისა მიმართ ვითხოვოთ.

მოგუმადლე, უფალო.

შენდობა და მოტევება ცოდვათა, და უსჯულოებათა ჩუენთა, უფლისა მიმართ ვითხოვოთ.

მოგუმადლე, უფალო.

კეთილნი და უმჯობესნი სულთა ჩუენთანი, და მშჳდობაჲ სოფლისა, უფლისა მიმართ ვითხოვოთ.

მოგუმადლე, უფალო.

შემდგომნი ჟამნი ცხოვრებისა ჩუენისანი მშჳდობით და სინანულით აღსრულებად, უფლისა მიმართ ვითხოვოთ.

მოგუმადლე, უფალო.

ქრისტეანობითნი აღსასრულნი ცხოვრებისა ჩუენისანი, უჭირველნი, ურცხვენელნი, მშჳდობითნი, და კეთილი სიტყჳსგებაჲ წინაშე საშინელისა სამსჯავროსა ქრისტესსა, ვითხოვოთ.

მოგუმადლე, უფალო.

ერთობასა სარწმუნოებისასა, და ზიარებასა სულისა წმიდისა მთხოველთა, თავნი თჳსნი და ურთიერთ არს, და ყოველი ცხოვრება ჩუენი ქრისტესა ღმერთსა ჩუენსა შევვედროთ.

შენ, უფალო.

ღირს მყვენ ჩუენ მეუფეო, კადნიერებით, დაუსჯელად კადრებად, და ხდად შენდა ზეცათა ღმერთსა მამისა და თქმად:

მამაო ჩუენო, რომელი ხარ ცათა შინა, წმიდა იყავ სახელი შენი, მოვედინ სუფევა შენი, იყავნ ნება შენი, ვითარცა ცათა შინა, ეგრეცა ქუეყანასა ზედა, პური ჩუენი არსობისა მომეც ჩუენ დღეს, და მომიტევენ ჩუენ თანა-ნადებნი ჩუენნი, ვითარცა ჩუენ მიუტევებთ, თანა-მდებთა მათ ჩუენთა, და ნუ შემიყვანებ ჩუენ განსაცდელსა, არამედ მიხსნენ ჩუენ ბოროტისაგან.

რამეთუ შენი არს სუფევა, და ძალი, და დიდება, მამისა და ძისა და წმიდისა სულისა, აწ და მარადის და უკუნითი უკუნისამდე.

ამინ.

მშჳდობა ყოველთა.

სულისაცა შენისა თანა.

თავნი ჩუენნი უფალსა მოუდრიკნეთ.

შენ, უფალო.

გმადლობ შენ, მეუფეო უხილავო, რომელმან უზომოჲთა ძალითა შენითა ყოველნი დაბადენ, და სიმრავლითა წყალობისა შენისათა არა არსისაგან ყოფად მომიყვანენ ჩუენ ყოველნი: შენ მეუფეო, ზეცით მოიხილე მათ ზედა, რომელთა მოუდრეკიან შენდა თავნი მათნი, რამეთუ არა ჴორცთა და სისხლთა მოუდრიკნეს, არამედ შენ საშინელსა ღმერთსა, შენ უკუე, მეუფეო, ჩუენ ყოველთა წინამდებარენი კეთილად განაწრფელენ, თჳთოეულისა საჴმარისაებრ: მენავეთა თანა მენავობად, მოგზაურთა თანა მოგზაურობად, სნეულნი განკურნენ, მკურნალო სულთა და ჴორცთაო:

მადლითა, და წყალობითა, და კაცთ-მოყუარებითა, მხოლოდ შობილისა ძისა შენისათა, რომლისა თანა კურთხეულ ხარ, თანა ყოვლად წმიდით სახიერით, და ცხოველს მყოფელით სულით შენითურთ, აწ და მარადის და უკუნითი უკუნისამდე.

ამინ.

მოიხილე, უფალო იესუ ქრისტე ღმერთო ჩუენო, წმიდით სამკჳდრებელით შენით და საყდრით დიდებისა სუფევისა შენისაჲთ, და მოვედ წმიდა-ყოფად ჩუენდა, რომელი ზე მამისა თანა მჯდომარე ხარ, და აქა ჩუენ თანა უხილავად თანა-მყოფობ: და ღირს მყვენ ჩუენ, მტკიცითა ჴელითა შენითა მოცემად ჩუენდა უხრწნელი ჴორცი შენი, და პატიოსანი სისხლი შენი, და ჩუენ მიერ ყოველსა ერსა შენსა:

ღმერთო განწმიდე მე ცოდვილი, და შემიწყალე მე. გ-გზის.

მოხედენ.

წმიდა წმიდათა.

ერთ არს წმიდა, ერთ არს უფალი, იესო ქრისტე, სადიდებელად ღმრთისა მამისა ამინ.

განსტეხე, მეუფეო, წმიდა პური.

განიტეხების და განიყოფის ტარიგი ღმრთისა, განიტეხების და არა განიყოფის, მარადის იჭამების და არა დაილევის, არამედ მზიარებელთა განსწმედს.

იჳ უკუე დასდევ ზემოთ კერძო წმიდისა ფეშხუმისა, რომელი არს აღმოსავალით: ხოლო ქე დაბლითკენ, რომელ არს დასავლეთით: და ძლ ჩრდილოეთით კერძო: ვა სამჴრეთით კერძო, ვითარცა აქა დასახულ არს.

იჳ უკუე ნაწილი აღიღე, და აღავსე წმიდა ბარძიმი: ქე ნაწილი, განუყავ მღდელთა, და დიაკონთა. ხოლო ესე ორნი ნაწილნი წმიდანი რომელ არს, ძლ და რომელ არს, ვა მაზიარებელთა განუყავ მცირედ ნაწილად, რაოდენიცა კმა ეყოფოდენ განზრახვისაებრ შენისა. ხოლო ნაწილისაგან ყოვლად წმიდისა ღმრთის-მშობელისა, გინა ცხრათა წესთა წმიდათასა, ანუ სხუათა რაოდენიცა წმიდასა ფეშხუმსა ზედა არს, ნუვის აზიარებ თჳნიერ ორისა მის ნაწილისა დაშთომილისა წმიდისა ტარიგისა, ოდესცა აზიარებდე.

წმიდა წმიდათა, აზიარენ ყოველნი:

აღავსე, მეუფეო, წმიდა ბარძიმი.

იჳ, და მით ჯუარსა გამოსახავს ზედათ წმიდასა ბარძიმსა და იტყჳს:

აღვსება სულისა წმიდისა.

ამინ.

აკურთხე, მეუფეო, მდუღარებაჲ.

კურთხეულ არს მდუღარება წმიდათა შენთა, ყოვლადვე, აწ და მარადის და უკუნითი უკუნისამდე. ამინ.

მდუღარება სარწმუნოებისა, აღვსება სულისა წმიდისა, ამინ.

დიაკონო, მოვედ.

მომეც მე, მეუფეო, პატიოსანი და წმიდა ჴორცი უფლისა და ღმრთისა და მაცხორისა ჩუენისა იესო ქრისტესი.

სამღდელოსა დიაკონსა, მოგეცემის პატიოსანი, და წმიდა და უხრწნელი ჴორცი უფლისა და ღმრთისა და მაცხორისა ჩუენისა იესო ქრისტესი, მოსატევებელად ცოდვათა შენთა, და ცხოვრებად საუკუნოდ.

პატიოსანი და ყოვლად წმიდა ჴორცი უფლისა და ღმერთსა, და მაცხორისა ჩუენისა იესო ქრისტესი, მომეცემის მე, (სახელი) , მღდელსა, მოსატევებელად ცოდვათა ჩემთა, და ცხოვრებად საუკუნოდ.

მრწამს, უფალო, და აღვიარებ, რამეთუ შენ ხარ ჭეშმარიტად ქრისტე ძე ღმრთისა ცხოველისა, მოსრული სოფლად ცოდვილთა ცხოვრებად, რომელთაგან პირველი მე ვარ. კუალად მრწამს, რამეთუ ესე არს თჳთ უჴრწნელი ჴორცი შენი, და ესე არს თჳთ პატიოსანი სისხლი შენი. შენ უკუე გევედრები, შემიწყალე მე, და შემინდევ მე შეცოდებანი ჩემნი, ნებსითნი და უნებლიეთნი, სიტყჳთ და საქმით, მეცნიერებით და უმეცრებით, და ღირს მყავ მე დაუსჯელად ზიარებად უხრწნელთა საიდუმლოთა შენთა, მოსატევებელად ცოდვათა, და ცხოვრებად საუკუნოდ. ამინ.

სერობასა საიდუმლოსა შენისასა დღეს, ძეო ღმრთისაო, ზიარებად შემიწყნარე, რათა არა მტერთა შენთა უთხრა საიდუმლო შენი, და არცა ამბორს გიყო ვითარცა იუდა, არამედ ვითარცა ავაზაკი აღგიარებ შენ: მომიჴსენე მე, უფალო, სასუფეველსა შენსა.

რათა არა სასჯელად, გინა დასასჯელად მექნას მე ზიარება წმიდათა შენთა საიდუმლოთა, უფალო, არამედ საკურნებელად სულისა და ჴორცისა. ამინ.

პატიოსანსა და წმიდასა სისხლსა, უფლისა ღმრთისა და მაცხორისა ჩუენისა იესო ქრისტესსა, ვეზიარები მე მონა ღმრთისა მღდელი, (სახელი) , მოსატევებელად ცოდვათა ჩემთა, და ცხოვრებად საუკუნოდ. ამინ.

ესერა შეეხო ბაგეთა ჩემთა, და მომიტევებს უშჯულოებასა ჩემსა, და ცოდვასა ჩემსა განწმედს.

დიაკონო მოვედ.

აჰა, ესერა მოვალ წინაშე უკუდავისა მეუფისა და ღმრთისა ჩემისა.

მომეც მე, მეუფეო, პატიოსანი და წმიდა სისხლი უფლისა, და ღმრთისა, და მაცხორისა ჩუენისა იესო ქრისტესი.

ეზიარები მონა ღმრთისა სამღდელო დიაკონი, (სახელი) , პატიოსანსა და წმიდასა სისხლსა უფლისა და ღმრთისა და მაცხორისა ჩუენისა იესო ქრისტესსა, მოსატევებელად ცოდვათა შენთა, და ცხოვრებად საუკუნოდ.

ესერა შეეხო ბაგეთა შენთა, და მოგიტევებს უშჯულოებათა შენთა, და ცოდვათა შენთა განსწმენდს.

ძლ და რომელ არს ვა მცირედ ნაწილად, ვითარცა კმა ეყოფოდენ ყოველთა მაზიარებელთა, და ეგრეთ შთაასვენებს მათ წმიდასა შინა ბარძიმსა, და აზიარებს წესისაებრ ჴორცისაგან და სისხლისა უფლისა ყოვლითა სიფრთხილითა. ხოლო აზიარებს მათ, შემდგომ გაღებისა წმიდა კართა და თქმისა დიაკონის-მიერ სიტყუათა:

შიშითა ღმრთისათა და სარწმუნოებით მოვედით.

ეზიარება მონა ღმრთისა, (სახელი) , პატიოსანსა, და წმიდასა ჴორცსა, და სისხლსა უფლისა, და ღმრთისა, და მაცხორისა ჩუენისა იესო ქრისტესსა, მისატევებელად ცოდვათა მისთა, და ცხოვრებად საუკუნოდ, ამინ.

აღდგომა ქრისტესი ვიხილეთ, თაყუანის-ვსცეთ წმიდასა ამას უფალსა დიდებისასა იესოს, მხოლოსა ღმერთსა ჩუენსა, და ესრეთ ჴმა ვჰყოთ ჯუარსა შენსა თაყუანის-ვსცემთ, ქრისტე, მეუფეო, და წმიდასა აღდგომასა შენსა უგალობთ და ვადიდებთ, რამეთუ შენ ხარ ღმერთი ჩუენი, და ჩუენ შენსა გარეშე სხუა ღმერთი არა ვიცით. მოვედით, ყოველნი მორწმუნენი, თაყუანის-ვსცეთ ქრისტეს ღმრთისა ჩუენისა აღდგომასა, რამეთუ აჰა ესერა მოიწია ჯუარისა მიერ და აღდგომისა სიხარული ყოვლისა სოფლისა, მარადის ვაკურთხევდეთ ქრისტესა, და უგალობდეთ აღდგომასა მისსა, რამეთუ ჯუარცმა თავს იდვა, და სიკუდილითა სიკუდილი განაქარვა.

განათლდი, განათლდი, ახალო იერუსალიმ, დღეს დიდება უფალსა შენ ზედა გამობრწყინდა, განსცხრებოდე და იხარებდ სიონ, და აწ შენდა იშვებდინ, ღმრთის-მშობელო, აღდგომასა ძისა შენისასა.

პასექო დიდო და სამღდელო, ქრისტე: ჵ სიბრძნეო და სიტყუაო ღმრთისაო და ძალო, მომეც ჩუენ უსრულესი შენთა მზიარებელთა სერობა, დღესა სუფევისა შენისასა.

მიუტევენ, უფალო, ცოდვანი აქა მოჴსენებულთანი, პატიოსნითა სისხლითა შენითა, მეოხებითა წმიდათა შენთათა.

გმადლობ შენ, მეუფეო, კაცთ მოყუარეო ქველისმოქმედო სულთა ჩუენთაო, რამეთუ მოწევნულსაცა ამას დღესა ღირს მყვენ ჩუენ, ზეცისათა შენთა უკუდავთა საიდუმლოთა, მართლ-მკვეთელ ჰყუენ გზანი ჩუენნი, დამამტკიცენ ჩუენ შიშსა შინა შენსა ყოველნივე, შეიცევ ცხოვრებაჲ ჩუენი, უცთომელ ჰყუენ სულანი ჩუენნი, ლოცვითა და ვედრებითა წმიდისა და დიდებულისა ღმრთის-მშობელისა, და მარადის ქალწულისა მარიამისათა, და ყოველთა წმიდათა შენთათა.

შიშითა ღმრთისათა, სარცმუნოებით და სიყვარულით მოვედით.

კურთხეულ არს მომავალი სახელითა უფლისათა, ღმერთი უფალი, და გამოგჳჩნდა ჩუენ.

აცხოვნე, ღმერთო, ერი შენი, და აკურთხე სამკჳდრებელი შენი.

ამაღლდი ცათა შინა, ღმერთო, და ყოველსა ქუეყანასა ზედა არს დიდება შენი.

ნათელი ჭეშმარიტი ვიხილეთ, ზეცათა სული მოვიღეთ, ვპოვეთ სარწმუნოება ჭეშმარიტი, და განუყოფელსა სამებასა თაყუანის-ვსცემთ, რამეთუ მან გუაცხოვნა ჩუენ.

კურთხეულ არს ღმერთი ჩუენი.

ყოვლადვე, აწ და მარადის და უკუნითი უკუნისამდე.

ამინ.

აღავსე პირი ჩემი ქებითა შენითა, უფალო, რათა უგალობდე დიდებასა შენსა, რამეთუ ღირს მყვენ ჩუენ ზიარებად წმიდათა შენთა საღმრთოთა, უკუდავთა, და ცხოველს მყოფელთა საიდუმლოთა, დაგუმარხენ ჩუენ სიწმიდეთა შინა შენთა, ყოველსა დღესა გუასწავენ სიმართლენი შენნი: ალილუია, ალილუია, ალილუია.

აღემართენით მიმღებელნი საღმრთოთა, წმიდათა, უხრწნელთა, უკუდავთა, ზეცისა ცხოველთა, საშინელთა ქრისტეს საიდუმლოთა, ღირსებით ვმადლობდეთ უფალსა.

უფალო, შეგჳწყალენ.

შეგუეწიენ, გუაცხოვნენ, შეგჳწყალენ, და დაგჳცვენ ჩუენ, ღმერთო, შენითა მადლითა.

უფალო, შეგჳწყალენ.

დღე ყოველი არსრულებად, სიწმიდით, მშჳდობით, და უცოდველად მთხოველთა, თავნი თჳსნი და ურთიერთ არს, და ყოველი ცხოვრებაჲ ჩუენი, ქრისტესა ღმერთსა ჩუენსა შევვედროთ.

შენ, უფალო.

რამეთუ შენ ხარ განმწმედელი ჩუენი, და შენდა დიდებასა აღვავლენთ, მამისა და ძისა და წმიდისა სულისა, აწ და მარადის და უკუნითი უკუნისამდე.

ამინ.

მშჳდობით წარვიდეთ.

სახელითა უფლისათა.

უფლისა მიმართ ვილოცოთ.

უფალო, შეგჳწყალენ.

რომელი აკურთხევ მაკურთხეველთა შენთა, უფალო, და წმიდა ჰყოფ შენდა მომართ მსასოებელთა შენთა, აცხოვნე ერი შენი, და აკურთხე სამკჳდრებელი შენი, სავსება ეკლესიისა შენისა დაიცევ, წმიდა ჰყუენ მოყუარენი სახლისა შენისა შუენიერებისანი, შენ იგინი ნაცულად ადიდენ საღმრთოჲთა ძალითა შენითა, ნუ დამაგდებ ჩუენ მოსავთა შენთა, მშჳდობაჲ სოფელსა მოანიჭე, ეკლესიათა შენთა, მღდელთა, უწმიდესსა და უნეტარესსა, სრულიად საქართველოს კათოლიკოს პატრიარქსა და მცხეთა-თბილისის მთავარ-ეპისკოპოსსა, დიდსა მეუფესა მამასა ჩუენსა ილიას, და ყოველსა ერსა შენსა, რამეთუ ყოველი მოცემა კეთილი, და ყოველი ნიჭი სრული, ზეგარდამო არს შთამომავალი შენ მიერ მამისაგან ნათლისა, და შენდა დიდებასა, და მადლობასა, და თაყუანის-ცემასა აღვავლენთ, მამისა და ძისა და წმიდისა სულისა, აწ და მარადის და უკუნითი უკუნისამდე:

ამინ.

იყავნ სახელი უფლისა კურთხეულ ამიერითგან და უკუნისამდე გ-გზის.

ვაკურთხო უფალი ყოველსა ჟამსა:

აღვსება შჯულისა და წინასწარ-მეტყველისა, შენ ხარ ქრისტე, ღმერთო ჩუენო, რომელმან აღავსე ყოველი მამობრივი განგებულებაჲ, აღავსე სიხარულითა და მხიარულებითა გულნი ჩუენნი, ყოვლადვე, აწ და მარადის და უკუნითი უკუნისამდე, ამინ.

კურთხევა უფლისა თქუენ ზედა, მისითა მადლითა, და კაცთ-მოყუარებითა, ყოვლადვე, აწ და მარადის და უკუნითი უკუნისამდე.

ამინ.

დიდება შენდა, ქრისტე ღმერთო, სასოებაო ჩუენო, დიდება შენდა.

დიდება, აწდა.

უფალო, შეგჳწყალენ. გ-გზის.

ქრისტემან ჭეშმარიტმან ღმერთმან ჩუენმან, მეოხებითა ყოვლად უხრწნელისა დედისა თჳსისათა, (და შემდგომი) , წმიდათა შორის მამისა ჩუენისა იოანე ოქროპირისა, კონსტანტინეპოლელ მთავარ-ეპისკოპოსისა. (და სახელი წმიდისა, ვისსაცა სახელსა ზედა იყოს ეკლესიაჲ, და წმიდისა მის, რომლისაცა იყოს დღე.) და ყოველთა წმიდათათა, შეგჳწყალნეს და გუაცხოვნნეს ჩუენ, ვითარცა სახიერ არს და კაცთმოყუარე.