წმიდა ბასილი დიდის ლიტურგია

გუაკურთხენ, მეუფეო.

კურთხეულ არს მეუფება მამისა და ძისა და წმიდისა სულისა, აწ და მარადის და უკუნითი უკუნისამდე.

ამინ.

მშჳდობით უფლისა მიმართ ვილოცოთ.

უფალო, შეგჳწყალენ.

ზეგარდამო მშჳდობისა, და ცხოვრებისათჳს სულთა ჩუენთასა, უფლისა მიმართ ვილოცოთ.

უფალო, შეგჳწყალენ.

მშჳდობისათჳს ყოვლისა სოფლისა, კეთილად დგომისათჳს წმიდათა ღმრთისა ეკლესიათა, და ყოველთა ერთობისათჳს, უფლისა მიმართ ვილოცოთ.

უფალო, შეგჳწყალენ.

წმიდისა ამის ტაძრისათჳს, (მონასტრისა) სარწმუნოებითა, სასოებითა, და შიშითა ღმრთისათა შემავალთა ამას შინა, უფლისა მიმართ ვილოცოთ.

უფალო, შეგჳწყალენ.

უწმიდესისა და უნეტარესისა, სრულიად საქართველოს კათოლიკოს-პატრიარქისა, და მცხეთა-თბილისის მთავარ-ეპისკოპოსისა, დიდისა მეუფისა, მამისა ჩუენისა ილიასათჳს, (აქა მოიხსენიე ეპარქიის მღდელ-მთავარი) პატიოსანთა მღდელთა, ქრისტეს მიერ დიაკონთა, და ყოვლისა სამღდელოჲსა დასისა და ერისა მისისათჳს, უფლისა მიმართ ვილოცოთ.

უფალო, შეგჳწყალენ.

ღმრთივ-დაცულისა ერისა ჩუენისა, მთავრობისა და მჴედრობისა მისისათჳს, უფლისა მიმართ ვილოცოთ.

უფალო, შეგჳწყალენ.

სამეუფოჲსა ქალაქისა ამის ჩუენისა, და წმიდისა ამის ტაძრისა (უკუეთუ იყოს მონასტერი, და წმიდისა ამის მონასტრისა) , და ყოვლისა ქალაქისა და სოფლებისათჳს, და სარწმუნოებით მკჳდრთა მათ შინა, უფლისა მიმართ ვილოცოთ.

უფალო, შეგჳწყალენ.

კეთილ შეზავებისათჳს ჰაერთასა, კეთილ გამოღებისათჳს ნაყოფთა ქუეყანისათა, და ჟამთა მშჳდობისათჳს, უფლისა მიმართ ვილოცოთ.

უფალო, შეგჳწყალენ.

მენავეთა, მოგზაურთა, სნეულთა, მშრომელთა, ტყვეთა ჴსნისა, და ცხორებისა მათისათჳს, უფლისა მიმართ ვილოცოთ.

უფალო, შეგჳწყალენ.

ჰჴსნად ჩუენდა ყოვლისაგან ჭირისა, რისხვისა და იწროებისა, უფლისა მიმართ ვილოცოთ.

უფალო, შეგჳწყალენ.

შეგუეწიენ, გუაცხოვნენ, შეგჳწყალენ, და დაგჳცვენ ჩუენ, ღმერთო, შენითა მადლითა.

უფალო, შეგჳწყალენ.

ყოვლად წმიდისა, უხრწნელისა, უფროსად კურთხეულისა, დიდებულისა დედუფლისა ჩუენისა ღმრთის-მშობელისა, და მარადის ქალწულისა მარიამისა, და ყოველთა წმიდათა მომჴსენებელთა, თავნი თჳსნი და ურთიერთას, და ყოველი ცხოვრებაჲ ჩუენი ქრისტესა ღმერთსა ჩუენსა შევვედროთ.

შენ, უფალო.

უფალო ღმერთო ჩუენო, რომლისა სიმტკიცე განუზომელ, და დიდება მიუწთომელ, რომლისა წყალობაჲ აურაცხელ, და კაცთ-მოყუარებაჲ მიუთხრობელ არს, შენ მეუფეო, მოწყალებისაებრ შენისა, მოიხილე ჩუენ ზედა, და წმიდასა ამას სახლსა ზედა, და ჰყუენ ჩუენ თანა, და თანა მლოცველთა ჩუენთა თანა, მდიდრად წყალობანი, და მოწყალებანი შენნი:

შუენის შენდა ყოველი დიდება პატივი და თაყუანის-ცემა მამისა და ძისა და წმიდისა სულისა, აწ და მარადის და უკუნითი უკუნისამდე;

ამინ.

აკურთხევს სული ჩემი უფალსა.

მერმე და მერმე მშჳდობით უფლისა მიმართ ვილოცოთ.

უფალო, შეგჳწყალენ.

შეგუეწიენ, გუაცხოვნენ, შეგჳწყალენ, და დაგჳცვენ ჩუენ, ღმერთო, შენითა მადლითა.

უფალო, შეგჳწყალენ.

ყოვლად წმიდისა, უხრწნელისა, უფროსად კურთხეულისა, დიდებულისა დედუფლისა ჩუენისა ღმრთის-მშობელისა, და მარადის ქალწულისა მარიამისა, და ყოველთა წმიდათა მომჴსენებელთა, თავნი თჳსნი და ურთიერთას, და ყოველი ცხოვრებაჲ ჩუენი ქრისტესა ღმერთსა ჩუენსა შევვედროთ.

შენ, უფალო.

სახიერი და კაცთმოყუარე ღმერთი ხარ, და შენდა დიდებასა აღვავლენთ, მამისა და ძისა და წმიდისა სულისა, აწ და მარადის და უკუნითი უკუნისამდე;

ამინ.

უფალო ღმერთო ჩუენო, აცხოვნე ერი შენი, და აკურთხე სამკჳდრებელი შენი, სავსება ეკლესიისა შენისა დაიცევ, წმიდა ჰყუენ მოყუარენი სახლისა შენისა შუენიერებისანი, შენ იგინი ნაცვლად ადიდენ ღმრთაებრივითა ძალითა შენითა, და ნუ დამიტევებ ჩუენ მოსავთა შენდამი:

შენი არს სიმტკიცე, და შენი არს სუფევა, და ძალი, და დიდება, მამისა და ძისა და წმიდისა სულისა, აწ და მარადის და უკუნითი უკუნისამდე:

ამინ.

მერმე და მერმე მშჳდობით უფლისა მიმართ ვილოცოთ.

უფალო, შეგჳწყალენ.

შეგუეწიენ, გუაცხოვნენ, შეგჳწყალენ, და დაგჳცვენ ჩუენ, ღმერთო, შენითა მადლითა.

უფალო, შეგჳწყალენ.

ყოვლად წმიდისა, უხრწნელისა, უფროსად კურთხეულისა, დიდებულისა დედუფლისა ჩუენისა ღმრთის-მშობელისა, და მარადის ქალწულისა მარიამისა, და ყოველთა წმიდათა მომხსენებელთა, თავნი თჳსნი და ურთიერთას, და ყოველი ცხოვრებაჲ ჩუენი ქრისტესა ღმერთსა ჩუენსა შევვედროთ.

შენ, უფალო.

ზიართა ამათ, და ერთ ხმობითა ლოცვათა ჩუენდა მომნიჭებელო, და ორთა და სამთა შეთქმულთა სახელითა შენითა, თხოვათა აღსრულებისა აღმთქმელო: შენ აწცა მონათა შენთა თხოვანი უმჯობესისა მიმართ სრულ ჰყუენ, აწინდელსაცა ამას საუკუნესა მეცნიერებასა ჭეშმარიტებისა შენისასა მომცემელმან, ხოლო მერმისა ცხოვრებისა ჩუენისა მომნიჭებელმან ჩუენდა:

სახიერი და კაცთ-მოყუარე ღმერთი ხარ, და შენდა დიდებასა აღვავლენთ, მამისა და ძისა და წმიდისა სულისა, აწ და მარადის და უკუნითი უკუნისამდე;

ამინ.

მეუფეო უფალო ღმერთო ჩუენო, რომელმან დააწესენ ცათა შინა განწყობილნი მჴედრობანი ანგელოსთანი და მთავარანგელოზთანი, მსახურებად დიდებისა შენისა: ჰყავ შესლვასა ჩუენსა თანა წმიდათაცა ანგელოზთა შესლვა, თანა მწირველად ჩუენდა, და თანა დიდების-მეტყველებად შენისა სახიერებისა:

რამეთუ შუენის შენდა ყოველი დიდება, პატივი, და თაყუანის-ცემა, მამისა და ძისა და წმიდისა სულისა, აწ და მარადის და უკუნითი უკუნისამდე, ამინ.

სიბრძნით აღემართენით.

ღმერთო წმიდაო, რომელი წმიდათა შინა განისვენებ, რომელი სამ წმიდითა ჴმითა სერაბიმთა მიერ იგალობები, და ქერუბიმთა მიერ იდიდებისმეტყველები, და ყოველთაგან ზეცისა ძალთა თაყუანის-იცემები, რომელმან არა არსისაგან არსად მოიყვანენ ყოველნი, რომელმან დაბადე კაცი ხატად და მსგავსად შენდა, ყოვლითავე მადლითა შენითა შეამკევ, და მისცემ მვედრებელთა სიბრძნესა და გულის ხმის ყოფასა, და არა შეურაცხ ჰყოფ ცოდვილთა, არამედ განუწესებ სინანულსა საცხოვრებელად, რომელმან ღირს მყვენ ჩუენ მდაბალნი, და უღირსნი მონანი შენნი, ჟამსაცა ამას დგომად წინაშე დიდებისა წმიდისა საკურთხეველისა შენისა, და თანა-მდებისა თაყუანის-ცემისა, და დიდების მეტყველებისა შეწირვად შენდა, შენ მეუფეო შეიწირე პირთაგანცა ჩუენ ცოდვილთასა სამწმიდაო გალობაჲ, და მომხედენ ჩუენ სიტკბოებითა შენითა, მოგჳტევენ ჩუენ ყოველნი შეცოდებანი ჩუენნი, ნებსითნი და უნებლიეთნი, წმიდა ჰყუენ ჩუენნი სულნი და ჴორცნი, და მომეც ჩუენ ღირსებით მსახურება შენი ყოველთა დღეთა ცხოვრებისა ჩუენისათა, მეოხებითა ყოვლად წმიდისა ღმრთის- მშობელისა, და ყოველთა წმიდათა საუკუნითგან სათნო ყოფილთა შენთათა:

უფალო, აცხოვნე კეთილ მსახურნი, და ისმინე ჩუენი.

უფლისა მიმართ ვილოცოთ.

უფალო, შეგჳწყალენ.

წმიდა ხარ ღმერთო ჩუენო, და შენდა დიდებასა აღვავლენთ, მამისა და ძისა და წმიდისა სულისა, აწ და მარადის,

უკუნითი უკუნისამდე.

ამინ.

გამოაბრწყინვე გულთა შინა ჩუენთა, კაცთ-მოყუარეო მეუფეო, ღმრთის-მეცნიერებისა ნათელი მიუწდომელი, და გონებისა ჩუენისა თუალნი განახვენ, განცდად სახარებისა შენისა ქადაგებათა, და დასდევ ჩუენ ზედა ნეტართა მათ მცნებათა შენთა შიში, რათა ყოველი ჴორციელი გულის-თქმაჲ დავსთრგუნოთ, და ყოველი სულიერი მოქალაქობაჲ მოვიგოთ, და ყოველსავე სათნოდ შენდა ვზრახვიდეთ, და ვიქმოდეთ. რამეთუ შენ ხარ განმანათლებელი სულთა და ჴორცთა ჩუენთა ქრისტე ღმერთო ჩუენო, და შენდა დიდებასა აღვავლენთ, თანა დაუსაბამოთ მამით შენით, და ყოვლად წმიდით და სახიერით, და ცხოველს მყოფელით სულით შენით, აწ და მარადის და უკუნითი უკუნისამდე, ამინ.

ვსთქვათ ყოველთა ყოვლითა სულითა, და ყოვლითა გონებითა ჩუენითა ვსთქვათ.

უფალო, შეგჳწყალენ.

უფალო ყოვლისა მპყრობელო ღმერთო მამათა ჩუენთაო გევედრებით, ისმინე და შეგჳწყალენ.

უფალო, შეგჳწყალენ.

შეგჳწყალენ ჩუენ ღმერთო დიდითა წყალობითა შენითა, გევედრებით, ისმინე, და შეგჳწყალენ.

უფალო, შეგჳწყალენ.

უფალო ღმერთო ჩუენო, აღპყრობილი ესე ვედრებაჲ შეიწირე მონათა შენთაგან, და შეგჳწყალენ ჩუენ, სიმრავლისაებრ წყალობათა შენთასა, და მოწყალებანი შენნი გარდამოავლინენ ჩუენ ზედა, და ყოველსა ერსა შენსა ზედა, მომლოდნელთა მდიდრად შენ მიერისა წყალობისასა:

მერმეცა გევედრებით ღმრთივ-დაცულისა ერისა ჩუენისა, მთავრობისა და მჴედრობისა მისისათჳს.

უფალო, შეგჳწყალენ. გგზის

მერმეცა გევედრებით უწმიდესისა და უნეტარესისა, სრულიად საქართველოს კათოლიკოს-პატრიარქისა, და მცხეთა-თბილისის მთავარ-ეპისკოპოსისა, დიდისა მეუფისა, მამისა ჩუენისა ილიასათჳს, (აქა მოიჴსენე ეპისკოპოსი ვისიც ეპარქია იყოს) და ყოველთა ქრისტეს მიერ ძმათა ჩუენთათჳს.

უფალო, შეგჳწყალენ. გგზის

მერმეცა გევედრებით ძმათა ჩუენთა, მღდელთა, მღდელ მონოზონთა, და ყოველთა ქრისტეს მიერ ძმათა ჩუენთათჳს.

უფალო, შეგჳწყალენ. გგზის

მერმეცა გევედრებით სანატრელთა და მარადის მოსაჴსენებელთა წმიდათა მართლმადიდებელთა პატრიარქთა, და კეთილ მსახურთა მეფეთა, და კეთილ-მორწმუნეთა დედოფალთა, და აღმაშენებელთა წმიდისა ამის ტაძრისათა (ანუ მონასტრისათა) და ყოველთა პირველ დაძინებულთა მამათა და ძმათა, აქა მდებარეთა, და ყოველთა მართლ-მადიდებელთა ერთათჳს.

უფალო, შეგჳწყალენ. გგზის

მერმეცა გევედრებით წყალობისა, სიცოცხლისა მშჳდობისა, სიმრთელისა, ცხოვრებისა, შეწევნისა, შენდობისა, და მიტევებისა ცოდვათასა, მონათა ღმრთისათა ძმათა წმიდისა ამის ტაძრისათა (უკუეთუ მონასტერია: წმიდისა ამის მონასტრისათა).

უფალო, შეგჳწყალენ. გგზის

მერმეცა გევედრებით ნაყოფის შემომწირველთათჳს, და კეთილის მყოფელთა წმიდისა და ყოვლად პატიოსნისა ამის ტაძრისა და ამას შინა მშრომელთა, მგალობელთა და აქა მდგომარეთა ერთათჳს, რომელნი მოელიან შენ მიერ დიდსა და მდიდარსა წყალობასა.

უფალო, შეგჳწყალენ. გგზის

რამეთუ მოწყალე და კაცთმოყუარე ღმერთი ხარ, და შენდა დიდებასა აღვავლენთ, მამისა და ძისა და წმიდისა სულისა, აწ და მარადის და უკუნითი უკუნისამდე.

ამინ.

შეგჳწყალენ ჩუენ, ღმერთო, დიდითა წყალობითა შენითა, გევედრებით, ისმინე, და შეგჳწყალენ.

უფალო, შეგჳწყალენ. გ-გზის

მერმეცა გევედრებით განსუენებისათჳს სულთა მიცვალებულთა მონათა ღმრთისათა, (სახელი) და რათა შეენდვნეს მათ ყოველნი შეცოდებანი მათნი ნებსითნი და უნებლიეთნი.

უფალო, შეგჳწყალენ. გ-გზის

რათა უფალმან ღმერთმან ჩუენმან დააწესოს სულნი მათნი, სადაცა მართალნი განისვენებენ.

უფალო, შეგჳწყალენ. გ-გზის

წყალობა ღმრთისა, და სასუფეველი ცათა, და მიტევება ცოდვათა მათთა, ქრისტეს მიერ უკუდავისა მეუფისა, და ღმრთისა ჩუენისაგან, მათთჳს ვითხოვოთ.

მოგუმადლე, უფალო.

უფლისა მიმართ ვილოცოთ.

უფალო, შეგჳწყალენ.

ღმერთო სულთაო, და ყოველთა ჴორციელთაო, რომელმან სიკუდილი განაქარვე, და ეშმაკი დასთრგუნე, და ცხოვრება სოფელსა მოანიჭე, შენ, უფალო, განუსვენე სულთა მონათა და მხევალთა შენთასა, (სახელი) ადგილსა ნათლისასა, ადგილსა მწვანვილოვანსა, ადგილსა განსასვენებელსა, სადა იგი არა არს სალმობა, მწუხარება, და სულთქმა, და ყოველნი ცოდვანი მათ მიერ ქმნილნი, საქმითნი, სიტყჳთნი, და მოგონებითნი, ვითარცა სახიერმან და კაცთ-მოყუარემან ღმერთმან შეუნდვენ, რამეთუ არა არს კაცი რომელი სცხოვნდეს, და არა სცოდოს, რამეთუ შენ მხოლო ხარ უცხო ყოვლისაგან ცოდვისა, და სიმართლე შენი სიმართლე არს საუკუნო, და სიტყუა შენი ჭეშმარიტ:

შენ ხარ აღდგომა, და ცხოვრება და განსუენება, მიცვალებულთა მონათა და მხევალთა შენთა, (სახელი) ქრისტე ღმერთო ჩუენო, და შენდა დიდებასა აღვავლენთ, თანა დაუსაბამოთ მამით შენით, და ყოვლად წმიდით სახიერით და ცხოველს მყოფელით სულით შენითურთ, აწ და მარადის და უკუნითი უკუნისამდე:

ამინ.

ილოცეთ, კათაკმეველნო, უფლისა მიმართ.

უფალო, შეგჳწყალენ.

მორწმუნენო კათაკმეველთათჳს ვილოცოთ, რათა უფალმან იგინიცა შეიწყალნეს.

უფალო, შეგჳწყალენ.

ასწავოს მათ სიტყუა ჭეშმარიტებისა.

უფალო, შეგჳწყალენ.

გამოუცხადოს მათ სახარება სიმართლისა.

უფალო, შეგჳწყალენ.

შეართნეს იგინი წმიდასა თჳსსა კათოლიკე და სამოციქულოსა ეკლესიასა.

უფალო, შეგჳწყალენ.

აცხოვნენ, შეეწიენ, შეიწყალენ, და დაიცვენ იგინი ღმერთო მადლითა შენითა.

უფალო, შეგჳწყალენ.

კათაკმეველნო თავნი თქუენნი უფალსა მოუდრიკენით.

შენ, უფალო.

უფალო ღმერთო ჩუენო, ცათა შინა დამკჳდრებულო, და ზედა მხედველო ყოველთა საქმეთა შენთაო: მოიხილე მონათა შენთა ზედა კათაკმეველთა, მომდრეკელთა ქედთა მათთასა წინაშე შენსა, მიეც მათ სუბუქი უღელი, ჰყავ იგინი ასო წმიდისა ეკლესიისა შენისა, და ღირს ჰყვენ იგინი საბანელსა კუალად-შობისასა მისატევებელად ცოდვათა, და სამოსლად უხრწნელებისა, შესამეცნებელად შენდა ჭეშმარიტისა ღმრთისა ჩუენისა:

რათა და ესენიცა ჩუენ თანავე ადიდებდენ, ყოვლად პატიოსანსა, და დიდად შუენიერსა სახელსა შენსა, მამისა და ძისა და წმიდისა სულისა, აწ და მარადის და უკუნითი უკუნისამდე.

ამინ.

რაოდენნი კათაკმეველნი ხართ განვედით, კათაკმეველნო განვედით, რაოდენნი კათაკმეველნი ხართ განვედით, ნუ ვინმე კათაკმეველაგანნი, არამედ რაოდენნი მორწმუნენი ვართ, მერმე და მერმე მშჳდობით უფლისა მიმართ ვილოცოთ.

უფალო, შეგჳწყალენ.

შენ, უფალო, მიჩვენე ჩუენ დიდი ესე ცხოვრებისა საიდუმლოჲ. შენ ღირს მყვენ ჩუენ მდაბალნი და უღირსნი მონანი შენნი, მსახურ ყოფად წმიდისა საკურთხეველისა შენისა. შენვე კმა საყოფელ მყვენ ჩუენ ძალითა სულისა შენისა წმიდისათა მსახურებისა ამის, რათა დაუსჯელად მდგომარეთა წინაშე წმიდისა დიდებისა შენისა, შევსწირეთ შენდა მსხუერპლი ქებისა: რამეთუ შენ ხარ მოქმედი ყოველთა ყოველსა შინა, მოგუეც, უფალო, ცოდვათა ჩუენთათჳს, და ერისა უმეცრებისათჳს, შეწირულ ყოფა მსხუერპლისა ჩუენისა, და კეთილად მითუალულებაჲ წინაშე შენსა:

შეგუეწიენ, გუაცხოვნენ, შეგჳწყალენ, და დაგჳცვენ ჩუენ, ღმერთო, შენითა მადლითა.

უფალო, შეგჳწყალენ.

სიბრძნით.

შუენის შენდა ყოველი დიდება, პატივი და თაყუანის-ცემა, მამისა და ძისა და წმიდისა სულისა, აწ და მარადის და უკუნითი უკუნისამდე;

ამინ.

მერმე და მერმე მშჳდობით უფლისა მიმართ ვილოცოთ.

უფალო, შეგჳწყალენ.

ზეგარდამო მშჳდობისა, და ცხოვრებისათჳს სულთა ჩუენთასა, უფლისა მიმართ ვილოცოთ.

უფალო, შეგჳწყალენ.

მშჳდობოსათ-ჳს ყოვლისა სოფლისა, კეთილად დგომისათჳს წმიდათა ღმრთისა ეკლესიათა, და ყოველთა ერთობისათჳს, უფლისა მიმართ ვილოცოთ.

უფალო, შეგჳწყალენ.

წმიდისა ამის ტაძრისათჳს, (მონასტრისა) სარწმუნოებითა, კრძალულებით, და შიშითა ღმრთისათა შემავალთა ამას შინა, უფლისა მიმართ ვილოცოთ.

უფალო, შეგჳწყალენ.

ჰჴსნად ჩუენდა ყოვლისაგან ჭირისა, რისხვისა და იწროებისა, უფლისა მიმართ ვილოცოთ.

უფალო, შეგჳწყალენ.

ღმერთო, რომელი განანათლებ წყალობითა და მოწყალებითა სიმდაბლესა ჩუენსა, და დამადგინებ ჩუენ მდაბალთა და ცოდვილთა, და უღირსთა მონათა შენთა წინაშე წმიდისა დიდებისა შენისა, მსახურებად წმიდისა საკურთხეველისა შენისა: შენ განმაძლიერენ ჩუენ ძალითა სულისა შენისა წმიდისათა, მსახურებასა ამას, და მომეც ჩუენ სიტყუა აღებასა პირისა ჩუენისასა, ხდად მადლსა სულისა შენისა წმიდისასა, წინა დაგებად ყოფადთა ზედა ძღუენთა.

შეგუეწიენ, გუაცხოვნენ, შეგჳწყალენ, და დაგჳცვენ ჩუენ, ღმერთო, შენითა მადლითა.

უფალო, შეგჳწყალენ.

სიბრძნით.

რათა ძლიერებითა შენითა ყოვლადვე დაცულნი, შენდა დიდებასა აღვავლენდეთ, მამისა და ძისა და წმიდისა სულისა, აწ და მარადის და უკუნითი უკუნისამდე;

ამინ.

არა ვინ არს ღირს თანა შეკრული ჴორციელთა გულის თქმათა და გემოთა წარდგომად, ანუ მიახლებად, გინა მსახურებად შენდა, მეუფეო დიდებისაო, რამეთუ მსახურება შენი, დიდ არს და საშინელ თჳთ მათ ზეცისა ძალთადცა, არამედ რამეთუ გამოუთქმელისათჳს და აურაცხელისა კაცთ-მოყუარებითა, უქცეველად და უცვალებელად კაც იქმენ, და მღდელ-მთავრად ჩუენდა გამოსჩნდი, და მსახურებრივისა ამის და უსისხლოჲსა მსხუერპლისა მღდელ-მოქმედებაჲ მოგუანიჭე ჩუენ, ვითარცა მეუფემან ყოველთამან, რამეთუ შენ მხოლო, უფალო ღმერთო ჩუენო, მეუფებ ცათა შინა და ქუეყანასა ზედა, საყდარსა ზედა ქერუბიმთასა მჯდომარე, სერაბიმთა უფალი, და მეუფე ისრაილისა, მხოლოო წმიდაო, და წმიდათა შინა განსუენებულო, შენ უკუე გევედრები მხოლოსა სახიერსა და კეთილ მსმენელსა, მოიხილე ჩემ ცოდვილსა ზედა და უჴმარსა მონასა შენსა, და განსწმიდე სული ჩემი და გული ცნობისაგან ბოროტისა, და ღირს მიჩინე მე ძალითა სულისა შენისა წმიდისათა, შემოსილი მღდელობისა მადლითა, წარდგომად წმიდისა ამის ტრაპეზისა შენისა, და მღდელ-მოქმედებად წმიდისა უხრწნელისა ჴორცისა შენისა და პატიოსნისა სისხლისა შენისა, რამეთუ შენდა მოვივლტი მომდრეკელი ქედისა ჩემისა, და გევედრები შენ, ნუ გარე მიიქცევ პირსა შენსა ჩემგან, ნუცა განმყოფ მე მონათა შენთაგან, არამედ ჯერ იჩინე შეწირვად შენდა, ჩემ ცოდვილისა და უღირსისა მონისა შენისა მიერ, მსხუერპლი ესე. რამეთუ შენ ხარ შემწირველი და შეწირული, და შემწყნარებელი და მიმცემელი, ქრისტე ღმერთო ჩუენო, და შენდა დიდებასა აღვავლენთ, თანა დაუსაბამოთ მამით შენით, და ყოვლად წმიდით სახიერით, და ცხოველს მყოფელით სულით შენითურთ, აწ და მარადის და უკუნითი უკუნისამდე. ამინ.

რომელნი ქერუბიმთა საიდუმლოდ ვემსგავსენით, და ცხოველს მყოფელისა სამებისა, სამ-წმიდა-არსობისა გალობასა შევსწირავთ, ყოველივე მსოფლიო დაუტევოთ ზრუნვა.

ვითარცა მეუფისა ყოველთასა შემწყნარებელსა, ანგელოზთაებრ უხილავად ძღუნისა შემწირველთა წესთასა, ალილუია, ალილუია, ალილუია.

სერობასა საიდუმლოსა შენისასა დღეს, ძეო ღმრთისაო, ზიარებად შემიწყნარე, რათა არა მტერთა შენთა უთხრა საიდუმლო შენი, და არცა ამბორს გიყო ვითარცა იუდა, არამედ ვითარცა ავაზაკი აღგიარებ შენ: მომიხსენე მე, უფალო, სასუფეველსა შენსა, ალილუია, ალილუია ალილუია.

ჰსდუმენინ ყოველი ჴორცი კაცობრივი, და სდეგინ შიშით და კრძალულებით, და ნუ რა რასა მსოფლიოსა შფოთსა იგონებენ, რამეთუ აჰა ესერა შემოვალს მეუფე მეუფეთა, და უფალი უფლებათა დაკლვად, და მიცემად საჭმლად მორწმუნეთა. და მას წინა უძღუიან გუნდნი ანგელოზთანი, ყოველნი მთავრობანი და ჴელმწიფებანი, მრავალ თუალნი ქერუბიმნი, ექუს-ექუს ფრთენი სერაბიმნი, პირთა თჳსთა დამფარველნი, და გალობით მღაღადებელნი, ალილუია, ალილუია, ალილუია.

აღუსრულოთ ვედრებაჲ ჩუენი უფალსა.

უფალო, შეგჳწყალენ.

წინა დაგებულთა პატიოსანთა ძღუენთათჳს, უფლისა მიმართ ვილოცოთ.

უფალო, შეგჳწყალენ.

წმიდისა ამის ტაძრისათჳს, (მონასტრისა) სარწმუნოებითა, სასოებითა, და შიშითა ღმრთისათა შემავალთა ამას შინა, უფლისა მიმართ ვილოცოთ.

უფალო, შეგჳწყალენ.

ჰჴსნად ჩუენდა ყოვლისაგან ჭირისა, რისხვისა და იწროებისა, უფლისა მიმართ ვილოცოთ.

უფალო, შეგჳწყალენ.

უფალო ღმერთო ჩუენო, დამბადებელო ჩუენო, და მომყვანებელო ცხოვრებასა ამას, მჩუენებელო ჩუენდა გზასა ცხოვრებისასა, მომნიჭებელო ჩუენდა ზეცათა საიდუმლოთა გამოცხადებისა: შენ ხარ დამაწესებელი ჩუენი მსახურებასა ამას ძალითა სულისა შენისა წმიდისათა: სათნო იყავ აწ, უფალო, ყოფაჲ ჩუენი მსახურ ახლისა აღთქმისა შენისა, მემსხუერპლეობად წმიდათა შენთა საიდუმლოთა, შემიწყნარენ ჩუენ მიახლებულნი წმიდისა შენისა საკურთხეველისანი, სიმრავლისაებრ წყალობათა შენთასა, რათა ვიქმნეთ ღირს შეწირვად შენდა, სიტყჳერისა ამის და უსისხლოჲსა მსხუერპლისა ჩუენთა ცოდვათათჳს და ერისა უმეცრებისათჳს, რომლისა შემწირველმან, წმიდასა ზედა და ზესთა ცათასა საცნაურსა საკურთხეველსა შენსა სუნად სუნნელებისად, ნაცულად გარდამოგჳვლინე ჩუენ მადლი სულისა შენისა წმიდისა. მოიხილე ჩუენ ზედა, ღმერთო, და მოხედე მსახურებასა ამას ჩუენსა ზედა, და შეიწირე ესე, ვითარცა შეიწირე აბელის ძღუენი, ნოეს მსხუერპლი, აბრაამის ყოვლად ნაყოფიერებანი, მოსეს და არონის მღდელობანი, სამოელის დასამშჳდებელნი, ვითარცა შეიწირენ წმიდათა შენთა მოციქულთაგან ჭეშმარიტი ესე მსახურება: ეგრეთვე ჴელთაგანცა ჩუენ ცოდვილთასა მიითუალენ მსხუერპლი ესე სიტკბოებითა შენითა, უფალო, რათა ღირს ქმნილთა წმიდისა საკურთხეველისა შენისა, უბრალოდ მსახურებითა ვპოვოთ სასყიდელი სარწმუნოთა და გონიერთა განმგეთა, დღესა შინა საშინელსა სიმართლით მიმგებლობისა შენისასა:

შეგუეწიენ, გუაცხოვნენ, შეგჳწყალენ, და დაგჳცვენ ჩუენ, ღმერთო, შენითა მადლითა.

უფალო, შეგჳწყალენ.

დღე ყოველი აღსრულებად, სიწმიდით, მშჳდობით, და უცოდველად, უფლისა მიმართ ვილხოვოთ.

მოგუმადლე, უფალო.

ანგელოზი მშვიდობისა, სარწმუნო წინამძღუარი, მცველი სულთა და ჴორცთა ჩუენთა, უფლისა მიმართ ვითხოვოთ.

მოგუმადლე, უფალო.

შენდობა და მოტევება ცოდვათა, და უსჯულოებათა ჩუენთა, უფლისა მიმართ ვითხოვოთ.

მოგუმადლე, უფალო.

კეთილნი და უმჯობესნი სულთა ჩუენთანი, და მშჳდობაჲ სოფლისა, უფლისა მიმართ ვითხოვოთ.

მოგუმადლე, უფალო.

შემდგომნი ჟამნი ცხოვრებისა ჩუენისანი მშჳდობით და სინანულით აღსრულებად, უფლისა მიმართ ვითხოვოთ.

მოგუმადლე, უფალო.

ქრისტეანობითნი აღსასრულნი ცხოვრებისა ჩუენისანი, უჭირველნი, ურცხვენელნი, მშჳდობითნი, და კეთილი სიტყჳს-გებაჲ წინაშე საშინელისა სამსჯავროსა ქრისტესსა, ვითხოვოთ.

მოგუმადლე, უფალო.

ყოვლად წმიდისა, უხრწნელისა, უფროსად კურთხეულისა, დიდებულისა დედუფლისა ჩუენისა ღმრთის-მშობელისა, და მარადის ქალწულისა მარიამისა, და ყოველთა წმიდათა მომხსენებელთა, თავნი თჳსნი და ურთიერთას, და ყოველი ცხოვრებაჲ ჩუენი ქრისტესა ღმერთსა ჩუენსა შევვედროთ.

შენ, უფალო.

მოწყალებათათჳს მხოლოდ შობილისა ძისა შენისათა, რომლისა თანა კურთხეულ ხარ, თანა ყოვლად წმიდით და სახიერით და ცხოველს მყოფელით სულით შენითურთ, აწ და მარადის და უკუნითი უკუნისამდე.

ამინ.

მშჳდობა ყოველთა

სულისაცა შენისა თანა.

ვიყვარებოდეთ ურთიერთ არს, რათა ერთობით აღვიარებდეთ.

მამასა, და ძესა, და წმიდასა სულსა, სამებასა ერთარსებასა, და განუყოფელსა

შეგიყვარო შენ, უფალო, ძალო ჩემო, უფალო დამამტკიცებელო ჩემო, და შესავედრებელო ჩემო. გ-გზის.

კარნი, კარნი, სიბრძნით მოხედენ.

მრწამსი... შემდგომად აღსრულებისა წმიდისა სარწმუნოების სიმბოლოჲსა, იტყჳს დიაკონი დიდითა ჴმითა.

ვსდგეთ კეთილად, ვსდგეთ შიშით, მოხედენ, წმიდასა ამას შესაწირავსა მშჳდობით შეწირვადსა.

წყალობა, მშჳდობა, შესაწირავი ქებისა.

მადლი უფლისა ჩუენისა იესო ქრისტესი, და სიყუარული ღმრთისა და მამისა, და ზიარება სულისა წმიდისა, იყავნ თქუენ ყოველთა თანა.

სულისაცა შენისა თანა.

გუაქუნდინ გულნი.

გუაქუს უფლისა მიმართ.

ვმადლობდეთ უფალსა.

ღირს არს და მართალ თაყუანის-ცემა მამისა და ძისა და წმიდისა სულისა, სამებისა ერთ არსებისა და განუყოფელისა.

რომელი ხარ, მეუფეო უფალო ღმერთო მამაო ყოვლისა მპყრობელო, თაყუანის-საცემელ, ვითარცა ჭეშმარიტად ღირს არს და მართალ, რამეთუ შუენის დიდად შუენიერებასა სიწმიდისა შენისასა, შენდა ქებად, შენდა გალობად, შენდა კურთხევად, შენდა თაყუანის-ცემად, შენდა მადლობად, შენდა დიდებად მხოლოჲსა ნამდჳლვე ჭეშმარიტისა ღმრთისა, და შენდა შეწირვად გულითა შემუსრვილითა, და სულითა სიმდაბლისათა, სიტყჳერისა ამის მსახურებისა ჩუენისა: რამეთუ შენ ხარ მომნიჭებელი ჩუენდა მეცნიერებასა შენისა ჭეშმარიტებისასა, და ვინმე კმა საყოფელად იტყოდეს ძლიერებათა შენთა, და სასმენეთ ჰყვნეს ქებულებანი შენნი, ანუ მიუთხრნეს საკვირველებანი შენნი ყოველსა ჟამსა, მეუფეო ყოველთაო, უფალო ცათა და ქუეყანისაო, და ყოვლისა დაბადებულისა, ხილულისა და უხილავისაო, მჯდომარეო საყდართა ზედა დიდებისათა, და ზედა მხედველო უფსკრულთაო, დაუსაბამოო, უხილაო, მიუწთომელო, გარეშემოუწერელო, უცვალებელო, მამაო უფლისა ჩუენისა იესო ქრისტესო, დიდისა ღმრთისა და მაცხორისა, სასოჲსა ჩუენისაო, რომელი არს ხატი შენისა სახიერებისა: ბეჭედი სწორ-სახე, თავსა შორის თჳსსა მჩვენებელი შენ მამისა, სიტყუა ცხოველი, ღმერთი ჭეშმარიტი, პირველ საუკუნეთა სიბრძნე, ცხოვრებაჲ, სიწმიდე, ძალი, ნათელი ჭეშმარიტი, რომლისა მიერ სული წმიდა გამოსჩნდა: სული ჭეშმარიტებისა, სული შვილებისა, მადლი, წინდი ყოფადისა მკჳდრობისა, დასაბამი საუკუნეთა კეთილთა, ცხოველს მყოფელი ძალი, სიწმიდისა წყარო, რომლისა მიერ ყოველი აგებული სიტყჳერი და საცნაური განძლიერებული გმსახურებს შენ, და შენდა სამარადისოსა აღავლენს დიდების-მეტყუელებისა, რამეთუ თანად ყოველნი გმონებენ შენ. შენ გაქებენ ანგელოზნი, მთავარ-ანგელოზნი, საყდარნი, უფლებანი, მთავრობანი, ჴელმწიფებანი, ძალნი, და მრავალთუალნი ქერუბიმნი: შენსა გარემოს სდგანან სერაბიმნი, ექუსითა ფრთითა ერთი, და ექუსითა ფრთითა ერთი: ორითა იფარვენ პირთა მათთა, ხოლო ორითა ფერჴთა, და ორითა მფრინვალენი, ღაღადებს მოყვასი მოყვსისა მიმართ, დაუცხრომელითა პირებითა, და დაუდუმებელითა დიდების-მეტყუელებითა:

ძლევისა გალობისა, მგალობელნი, მჴმობელნი, მღაღადებელნი, და მეტყველნი:

წმიდაო, წმიდაო, წმიდაო, უფალო საბაოთ, სავსე არიან ცანი და ქუეყანა დიდებითა შენითა: ოსანნა მაღალთა შინა, კურთხეულ არს მომავალი სახელითა უფლისათა, ოსანნა მაღალთა შინა.

შემდგომად ამათ სანატრელთა ძალთა, მეუფეო კაცთ-მოყუარეო, ჩუენცა ცოდვილნი ვღაღადებთ, და ვიტყჳთ: წმიდა ხარ ვითარცა ჭეშმარიტ არს და ყოვლად წმიდა და არა არს რიცხჳ დიდად შუენიერებისა სიწმიდისა შენისა: და წმიდა ყოველთა შინა საქმეთა შენთა, რამეთუ სიმართლითა და მსჯავრითა ჭეშმარიტებისათა მოაწიენ ყოველნი ჩუენ ზედა: რამეთუ დაბადე კაცი, თიხისა მიმღებელმან ქუეყანისაგან, და ხატებითა შენითა პატივცემული, ღმერთო, დაადგინე იგი სამოთხესა საშვებელისასა, უკუდავებასა ცხოვრებისასა, და ფუფუნებასა საუკუნეთა კეთილთასა, დაცვასა შინა მცნებათა შენთასა აღმთქმელმან მისდა: არამედ ურჩ ქმნილი შენ ჭეშმარიტისა ღმრთისა, და შემოქმედისა თჳსისა, საცთურითა გუელისათა შეპყრობილი, და მომკვდარი თჳსთა მიერ შეცოდებათა, ექსორია ჰყავ იგი მართლ-მსაჯულებითა შენითა, ღმერთო, სამოთხით სოფელსა ამას და მიაქციე ქუეყანად, რომლისაგან მოღებულ იყო, განმგებელმან მისდად კუალად შობისა მიერსა ცხოვრებასა, თჳთ მას ქრისტეს მიერ შენისა. რამეთუ არა სრულიად უკუნ აქციე დაბადებული შენი, რომელი შექმენ, სახიერ, არცა დაივიწყე საქმე ჴელთა შენთა, არამედ მიხედევდ მას მრავალ სახედ, ტკბილითა წყალობითა შენითა. წინასწარ-მეტყუელნი მოუვლინენ, და ჰყვენ ძალნი წმიდათა შენთა მიერ, თჳთოეულსა ნათესავსა, და ნათესავსა შინა, შენდა სათნო ყოფილთა მიერ. მეტყოდი ჩუენ პირითა მონათა შენთა წინასწარ-მეტყუელთათა, წინასწარ-მაუწყებელი მომავალთა ყოფადისა მის მაცხოვარებისა, შჯული მომეც შესაწევნელად, ანგელოზნი დამიდგინენ მცველად. ხოლო რაჟამს მოიწია სავსება ჟამთა, მეზრახე ჩუენ, თავადისა მიერ ძისა შენისა, რომლისა მიერ საუკუნენი შეიქმნენ, რომელ იყო ბრწყინვალება დიდებისა შენისა, და ხატი გუამოვნებისა შენისა, მტჳრთველი ყოველთა სიტყჳთა ძლიერებისა მისისათა, არა ნატაცებად შეირაცხა ყოფად სწორებად შენ ღმრთისა და მამისა, არამედ ღმრთად პირველ საუკუნეთად ცნობილი, ქუეყანასა ზედა გამოსჩნდა, და კაცთა შორის იქცეოდა, და ქალწულისაგან წმიდისა ჴორციელ იქმნა, დააცალიერა თავი თჳსი ხატსა მონისასა მიმღებელმან, თანა ხატ ქმნილმან ჴორცთა სიმდაბლისა ჩუენისათამან, რათა თანა ხატმყვნეს ჩუენ ხატსა დიდებისა თჳსისასა. რამეთუ ვინათგან კაცისა მიერ შემოჴდა სიკუდილი სოფლად ცოდვისათჳს, სიკუდილი სათნო იყო მხოლოდ შობილმან ძემან შენმან, მყოფმან წიაღთა შინა შენ ღმრთისა და მამისათა, შობითმან დედაკაცისაგან წმიდისა ღმრთისა მშობელისა, და მარადის ქალწულისა მარიამისა, ქმნილმან შჯულსა ქუეშე, დასაჯა ცოდვა ჴორცითა თჳსითა, რათა ადამის მიერ მომწყდარნი ცხოველთ იქმნენ თჳთ მის ქრისტეს მიერ შენისა, და მოქალაქე ქმნილმან სოფელსა ამას შინა, მომცნა ბრძანებანი ცხოვრებისანი, განმიყენნა ჩუენ საცთურისაგან კერპთასა, მომიყვანნა მეცნიერებად შენ ჭეშმარიტისა ღმრთისა და მამისა, მომგებელმან თავისა თჳსისა ერად საზეპუროდ, სამეუფოდ მღდელობად, ნათესავად წმიდად, და განბანნა ჩუენ წყლითა, და წმიდა მყუნა სულითა წმიდითა, მისცა თავი თჳსი ნაცულად სიკუდილისა, რომლისაგან შეპყრობილ ვიყვენით მისყიდულნი ცოდვისა მიერ, და შთავიდა ჯუარისა მიერ ჯოჯოხეთად, რათა თავისა მიერ თჳსისა აღავსოს ყოველი, დაჴსნნა სალმობანი სიკუდილისანი, და აღსდგა მესამესა დღესა, და გზა უყო ყოველსა ჴორციელსა მკვდრეთით აღდგომა, ვინათგან ვერ შესაძლებელ იყო შეპყრობად ხრწნილებისაგან, წინა მძღუარ ცხოვრებისა იქმნა, დასაბამ შესვენებულთა, პირმშო მკვდართა, რათა იყოს თავადი ყოველსა შინა მთავარ, და ამაღლდა რა ცათა შინა, დასჯდა მარჯვენით დიდებულებისა შენისა მაღალთა შინა, რომელიცა მოსულად არს მიგებად თჳთოეულისა საქმეთა მათთაებრ. ხოლო დამიტევნა ჩუენ მოსაჴსენებელნი საცხოვრებელთა ვნებათა მისთანი, რომელიცა წინა დაგჳგიან მცნებათაებრ მისთა. რამეთუ მგულვებელმან მოსულად ნებსითსა, დიდებულსა, და ცხოველს მყოფელსა სიკუდილსა მისსა, ღამესა რომელსა მისცემდა თავსა თჳსსა ცხოვრებისათჳს სოფლისა, მოიღო პური, წმიდათა ზედა და უხრწნელთა ჴელთა მისთა, და მჩვენებელმან შენ ღმრთისა, და მამისამან, და მმადლობელმან, აკურთხა, წმიდა ჰყო, განსტეხა:

მისცა წმიდათა თჳსთა მოწაფეთა და მოციქულთა, მეტყველმან: მიიღეთ და ჰსჭამეთ, ესე არს ჴორცი ჩემი, თქუენთჳს განტეხილი მისატევებელად ცოდვათა:

ამინ.

ეგრეთვე სასმელიცა ნაყოფისაგან ვენაჴისა მოიღო, განზავა, მადლობდა, აკურთხა, და წმიდა ჰყო.

მისცა წმიდათა თჳსთა მოწაფეთა და მოციქულთა, მეტყუელმან: ჰსუთ ამისაგან ყოველთა, ესე არს სისხლი ჩემი ახლისა აღთქმისა, თქუენთჳს და მრავალთათჳს დათხეული მისატევებელად ცოდვათა.

ამინ.

ამას ჰყოფდეთ მოსაჴსენებელად ჩემდა, რამეთუ რაოდენ გზისცა სჭამდეთ პურსა ამას, და სასმელსა ამას სმიდეთ, სიკუდილსა ჩემსა მიუთხრობდეთ, და აღდგომასა ჩემსა აღიარებდეთ. მომჴსენებელნი უკუე ჩუენცა, მეუფეო, საცხოვრებელთა შენთა ვნებათა, ცხოველს-მყოფელისა ჯუარისა, სამ დღე დაფლვისა, მკვდრეთით აღდგომისა, ზეცად აღსვლისა, მარჯვენით შენ ღმრთისა და მამისა დაჯდომისა დიდებით, და საშინელად მეორედ მოსლვისა შენისა:

შენნი შენთაგან, შენდა შემწირველნი, ყოველთა და ყოვლისათჳს.

შენ გიგალობთ, შენ გაკურთხევთ, შენ გმადლობთ, უფალო, და გევედრებით შენ, ღმერთო ჩუენო.

ამისთჳს, მეუფეო ყოვლად წმიდაო, ჩუენცა ცოდვილნი და უღირსნი მონანი შენნი, ღირს ქმნილნი მსახურებად წმიდისა საკურთხეველისა შენისა, არა სიმართლეთა ჩუენთათჳს, რამეთუ არა რა გჳქმნიეს კეთილი ქუეყანასა ზედა, არამედ წყალობითა შენითა და მოწყალებითა, რომელი მდიდრად მოფინენ ჩუენ ზედა, მინდობილნი მივეახლებით წმიდასა საკურთხეველსა შენსა, და წინა დამგებელნი ნაცვალად სახეთა წმიდისა ჴორცისა და სისხლისა ქრისტეს შენისათა, შენ შეგივრდებით და გევედრებით წმიდაო წმიდათაო, სათნო ყოფითა სახიერებისა შენისათა, მოვედინ სული შენი წმიდა ჩუენ ზედა, და წინა დაგებულთა ამათ მსხუერპლთა ზედა, და აკურრთხენ, და წმიდა ჰყვენ ესენი, და გამოაჩინენ:

ღმერთო განწმიდე მე ცოდვილი, და შემიწყალე მე.

უფალო, რომელმან ყოვლად-წმიდა სული შენი, ჟამსა მესამესა მოციქულთა შენთა გარდამოუვლინე და განანათლენ იგინი, მას, სახიერო, ნუ მიმიღებ ჩემგან, არამედ განმიახლენ მვედრებელსა შენსა.

გული წმიდა დაბადე ჩემ-თანა, ღმერთო, და სული წრფელი განმიახლე გუამსა ჩემსა.

უფალო, რომელმან ყოვლად-წმიდა სული შენი:

განმაგდებ მე პირსა შენისაგან, და სულსა წმიდასა შენსა ნუ მიმიღებ ჩემგან.

უფალო, რომელმან ყოვლად-წა:

აკურთხე, მეუფეო, წმიდა პური ესე.

ჰყავ უკუე პური ესე პატიოსან ჴორც უფლისა ღმრთისა და მაცხორისა ჩუენისა იესო ქრისტესსა.

ამინ.

აკურთხე, მეუფეო, წმიდა სასმისი.

სასმისსა ამას შინა, პატიოსან სისხლ უფლისა ღმრთისა და მაცხორისა ჩუენისა იესო ქრისტესსა.

ამინ.

რომელი გარდამოჴდა ცხოვრებისათჳს სოფლისა.

ამინ.

აკურთხე, მეუფეო, ორივე.

შესცვალე სულითა შენითა წმიდითა.

ამინ, ამინ, ამინ.

მომიჴსენე მე, წმიდაო მეუფეო, ცოდვილი.

ხოლო ჩუენ ყოველნი, ერთისა პურისა და სასმელისაგან მიმღებელნი, შეგუაერთენ ურთიერთ არს, ერთისა სულისა წმიდისა ზიარებად, და ნუცა ერთისა ჩუენგანისა სასჯელ ანუ დასასჯელ იქმნების ზიარება წმიდისა ჴორცისა და სისხლისა ქრისტეს შენისა, არამედ, რათა ვპოვოთ წყალობაჲ და მადლი ყოველთა თანა წმიდათა, საუკუნითგან სათნო ყოფილთა შენთა პირველთა მამათა, მამათ-მთავართა, წინასწარ-მეტყუელთა, მოციქულთა, ქადაგთა, მახარებელთა, მოწამეთა, აღმსარებელთა, მოძღუართა, და ყოვლისა სულისა მართლისა სარწმუნოებით აღსრულებულისა:

უმეტესად ყოვლად-წმიდისა, უხრწნელისა, უფროსად კურთხეულისა, დიდებულისა დედუფლისა ჩუენისა ღმრთის-მშობელისა, და მარადის ქალწულისა მარიამისა.

შენდამი იხარებს, მიმადლებულო, ყოველი დაბადებული, ანგელოზთა კრებული, და კაცთა ნათესავი, ტაძარო სიწმიდისაო, სამოთხეო სიტყჳერო, ქალწულებისა სიქადულო, რომლისაგან სიტყუა განხორციელდა, და ყრმა იშვა პირველ საუკუნეთა ღმერთი ჩუენი, რომელმან საშო შენი საყდრად გამოაჩინა, და მუცელი შენი ცათა უვრცევლეს ჰყო. შენდამი იხარებს, მიმადლებულო, ყოველი დაბადებული, დიდება შენდა.

წმიდისა იოანე წინასწარ-მეტყუელისა, წინა-მორბედისა და ნათლის-მცემელისა, წმიდათა და ყოვლად-ქებულთა მოციქულთა, წმიდისა (სახელი) რომლისა ჴსენებასა აღვასრულებთ, და ყოველთა წმიდათა შენთათა, რომელთა ვედრებითა მოიხილე ჩუენ ზედა, ღმერთო, და მოიჴსენენ ყოველნი პირველ გარდაცვალებულნი, სასოებითა აღდგომისა და ცხოვრებისა საუკუნოჲსათა.

ცხოვრებისათჳს, შეწევნისათჳს და მიტევებისათჳს ცოდვათასა, მონისა ღმრთისა (სახელი).

განსუენებისათჳს, და მიტევებისათჳს სულისა მონისა შენისა, (სახელი) ადგილსა ნათლისა, სადა არა არს მწუხარება, და სულ-თქმა, განუსვენე, ღმერთო ჩუენო, და განუსვენე მათ, სადაცა ჰფარავს ნათელი პირისა შენისა.

მერმეცა გევედრებით, მოიჴსენე, უფალო, შენი წმიდა კათოლიკე და სამოციქულო ეკლესია, კიდითგან ვიდრე კიდედმდე სოფლისათ, დაამშჳდე იგი, რომელი შეკრიბე პატიოსნითა სისხლითა ქრისტეს შენისათა, და წმიდა ესე სახლი დაამტკიცე ვიდრე აღსასრულადმდე საუკუნისა. მოიჴსენე, უფალო, ძღუენთა ამათ შემომწირველნი შენდა, და რომელთათჳს, და რომელთა მიერ შემოიწირნეს ესე. მოიჴსენე, უფალო, ნაყოფის შემომწირველნი, და კეთილის მყოფელნი წმიდათა შენთა ეკლესიათანი, და მომჴსენებელნი გლახაკთანი, თჳსთა და მეგობართანი: მიაგენ მათ მდიდარნი და ზეცისა მადლნი შენნი, მიანიჭენ მათ ქუეყანისათა წილ ზეცისათანი, და საწუთოჲსა წილ საუკუნონი, განხრწნადთა წილ უხრწნელნი. მოიჴსენე, უფალო, მეუდაბნოებასა, მთათა, და ქვაბთა, და ჴვრელთა ქუეყანისათა მყოფნი. მოიჴსენე, უფალო, ქალწულებისა, და კრძალულებისა, და მოღვაწებისა, და პატიოსნისა ცხოვრებისა აღმრჩეველნი. მოიჴსენე, უფალო, ყოვლისა მთავრისა და ჴელმწიფისა, პალატის შენათა ძმათა ჩუენთა, და ყოველთა მჴედართა: კეთილნი სიკეთესა შინა დაიცვენ და ბოროტნი კეთილ ჰყვენ სიტკბოებითა შენითა. მოიჴსენე, უფალო, გარემოს მდგომარისა ერისა, და სამართლისა მიზეზისათჳს დაკლებულთა, და შეიწყალენ იგინი და ჩუენ, სიმრავლისაებრ წყალობისა შენისა. საუნჯენი მათნი აღავსენ ყოვლითა კეთილითა, მეუღლეობა მათი მშჳდობასა შინა და ერთობასა დაიცევ, ჩჳლნი განზარდენ, სიჭაბუკე განსწვართე, სიბერე განაძლიერე, სულ მოკლეთა ნუგეშინის-ეც, განბნეულნი შეკრიბენ, შეცთომილნი მოაქციენ, და შეაერთენ წმიდასა შენსა კათოლიკე და სამოციქულოსა ეკლესიასა: შფოთიანნი სულთაგან არა წმიდათა განათავისუფლენ, მენავეთა თანა ნავით მავალობად, მოგზაურთა თანა მოგზაურობად, ქვრივთა შეეწიე, ობოლთა ჴელი აღუპყარ, ტყვენი გამოიჴსენ, სნეულნი განკურნენ, სამსჯავროსა, და საძნაურთა შრომათა, და ექსორიაობათა, და მწარეთა მონებათა, და ყოველსა ჭირსა, და ურვასა, და განსაცდელთა შინა მყოფნი გამოიჴსენ, ღმერთო, და მოიჴსენე ყოველნი მოქენენი დიდისა მოწყალებისა შენისანი, მოყუარენიცა ჩუენნი, და მოძულენი, და შემოვედრებულნი ჩუენ უღირსთა ლოცვისანი მათთჳს, და ყოვლისა ერისა შენისათჳს, მოიჴსენენ, უფალო ღმერთო ჩუენო, და ყოველთა მოჰფინე მდიდარი წყალობა შენი, ყოველთა მიმადლე საცხოვრებელნი თხოვანი მათნი, და რომელი ჩუენ ვერ მოვიჴსენენით, უცნაურებისათჳს, ანუ დავიწყებისა, გინა თუ სიმრავლისათჳს სახელთასა შენ მოიჴსენენ, ღმერთო, რომელმან უწყნი თჳთოეულისა ჰასაკი და სახელის დებაჲ, რომელმან უწყნი თჳთოეული მიერ მუცლითგან დედისა თჳსისათ, რამეთუ შენ ხარ, უფალო, შემწე შეუწევნელთა, სასოება უსასოთა, ღელვა გუემულთა მაცხოვარი, მენავეთა ნავთ საყუდელი, სნეულთა მკურნალი. შენ ყოველთა ექმენ ყოველ, რომელმან უწყნი თჳთოეულნი სახელნი, და საჴმარი მისი. იჴსენ, უფალო, ქალაქი ესე, და ყოველნი ქალაქნი, და სოფელნი, სიყმილისაგან, სრვისა, ძრვისა, დანთქმისა, ცეცხლისა, და მახჳლისა, ზედა მოსლვისაგან უცხო თესლთასა, და ტომისაგან ბრძოლისა:

პირველად მოიჴსენე, უფალო, უწმიდესი და უნეტარესი სრულიად საქართველოს კათოლიკოს-პატრიარქი, და მცხეთა-თბილისის მთავარ-ეპისკოპოსი, დიდი მეუფე, მამიჲ ჩუენი ილია, (სახელი მმართველი ეპისკოპოსისა) რომელი მომადლე წმიდასა შენსა ეკლესიასა, მშჳდობით, ცოცხლებით, პატიოსნად, სიმრთელით, დღეგრძელობით, მართლმკვეთელობით სიტყჳსა შენისა ჭეშმარიტებისათა.

ყოველთა და ყოვლისათჳს.

მოიჴსენე, უფალო, ყოველი ეპისკოპოსი მართლ-მადიდებელთა, რომელნი განამართლენ სიტყჳთა შენისა ჭეშმარიტებისათა, მოიჴსენე, უფალო, სიმრავლითა მოწყალებათა შენთათა ჩემიცა უღირსებაჲ, და შემინდვენ ყოველნი შეცოდებანი ჩემნი, ნებსითნი და უნებლიეთნი, და ნუ ჩემთა ცოდვათათჳს დააყენებ მადლსა სულისა წმიდისასა, წინა მდებარეთა ძღუენთაგან. მოიჴსენე, უფალო, ხუცესნი, ქრისტეს მიერ დიაკონნი, და ყოველნი სამღდელოჲსა მწყობრისა, და ნუცა ერთსა ჩუენგანსა არცხვენ, გარემოს მდგომარეთა წმიდისა შენისა საკურთხეველისათა. მომხედენ ჩუენ სიტკბოებითა შენითა, უფალო, გამოგჳჩნდი ჩუენ მდიდართა მიერ წყალობათა შენთა: კეთილად შეზავებულნი და მარგებელნი ჰაერნი მოგუმადლენ ჩუენ, წჳმანი მშჳდობისანი ქუეყანასა ნაყოფიერებად მოანიჭენ, აკურთხე გჳრგჳნი წელიწდისა სიტკბოებითა შენითა: დააცხრვე განხეთქილება ეკლესიათა, დაშრიტენ აღძრვანი წარმართთანი, წვალებათა ზედა აღმდგომანი მოსწრაფებით დაარღჳენ ძალითა სულისა შენისა წმიდისათა, ჩუენ ყოველნი შემიწყნარენ სასუფეველსა შენსა, ძედ ნათლისად, და ძედ დღისად გამოგჳჩინენ, შენი მშჳდობაჲ და შენი სიყუარული მომმადლენ ჩუენ, უფალო ღმერთო ჩუენო, რამეთუ ყოველივე მომაგე ჩუენ.

მომეც ჩუენ, უფალო, ერთითა პირითა, და ერთითა გულითა, დიდებად და გალობად ყოვლად-პატიოსანსა და დიდად-შუენიერსა, სახელსა შენსა, მამისა და ძისა და წმიდისა სულისა, აწ და მარადის და უკუნითი უკუნისამდე.

ამინ.

იყუნენ წყალობანი დიდისა ღმრთისა, და მაცხორისა ჩუენისა იესო ქრისტესნი თქვენ ყოველთა თანა.

სულისაცა შენისა თანა.

ყოველთა წმიდათა მომჴსენებელთა, მერმე და მერმე მშჳდობით უფლისა მიმართ ვილოცოთ.

უფალო, შეგჳწყალენ.

შეწირულთა ამათთჳს, და განწმედილთა პატიოსანთა ძღუენთა, უფლისა მიმართ ვილოცოთ

უფალო, შეგჳწყალენ.

რათა კაცთ-მოყუარემან ღმერთმან ჩუენმან, შემწირველმან ამათმან წმიდასა, და ზესთა ცათასა, და საცნაურსა საკურთხეველსა მისსა, საყნოსელად სუნად სუნნელად შეიწირნეს, და ნაცვლად გარდამოგჳვლინოს ჩუენ საღმრთო მადლი სულისა წმიდისა, ვილოცოთ.

უფალო, შეგჳწყალენ.

ჰჴსნად ჩუენდა ყოვლისაგან ჭირისა, რისხვისა და იწროებისა, უფლისა მიმართ ვილოცოთ.

უფალო, შეგჳწყალენ.

ღმერთო ჩუენო, ღმერთო განმაცხოველებელო, შენ მასწავენ ჩუენ მადლობად შენდა, ღირსად ქველის მოქმედებათა შენთა, რომელი ჰქმენ და იქმ ჩუენ თანა, შენ, უფალო ღმერთო ჩუენო, შემწირველო ამათ მსხუერპლთაო, წმიდა მყვენ ჩუენ ყოვლისაგან შეგინებისა სულისა და ჴორცთასა, და მასწავე აღსრულებად სიწმიდისა შიშითა შენითა, რათა წმიდითა მოწმობითა სჳნიდისისა ჩუენისათა, შემწყნარებელნი ნაწილსა სიწმიდეთა შენთასა, შევეერთნეთ წმიდასა ჴორცსა და სისხლსა ქრისტეს შენისასა, და ღირსებით შემწყნარებელთა ამათთა, გუაქუნდეს ქრისტე დამკჳდრებულად გულთა შინა ჩუენთა, და ვიქმნნეთ ტაძარ სულისა შენისა წმიდისა. ჰე ღმერთო ჩუენო, და ნუცა ერთსა ჩუენგანსა თანამდებ ჰყოფ, შესაძრწუნებელისა ამის და ზეცათა საიდუმლოჲსა შენისა, ნუცა უძლურ სულითა და ჴორცითა უღირსებით მიღებისა მისისათჳს: არამედ მომეც ჩუენ ვიდრე უკანასკნელად აღმომშჳნვად ჩუენდამდე, ღირსებით შეწყნარებად სასოებასა სიწმიდეთა შენთასა, საგზლად ცხოვრებისა საუკუნოჲსა, სიტყჳს გებად მითუალულად, წინაშე საშინელისა სამსჯავროჲსა ქრისტეს შენისა, რათა ჩუენცა ყოველთა თანა წმიდათა, საუკუნითგან სათნო ყოფილთა შენთა, ვიქმნნეთ ზიარად საუკუნეთა კეთილთა, რომელნი განუმზადე მოყუარეთა შენთა, უფალო.

შეგუეწიენ, გუაცხოვნენ, შეგჳწყალენ, და დაგჳცვენ ჩუენ, ღმერთო, შენითა მადლითა.

უფალო, შეგჳწყალენ.

დღე ყოველი აღსრულებად, სიწმიდით, მშჳდობით, და უცოდველად, უფლისა მიმართ ვილხოვოთ.

მოგვმადლე, უფალო.

ანგელოზი მშვიდობისა, სარწმუნო წინამძღუარი, მცველი სულთა და ჴორცთა ჩუენთა, უფლისა მიმართ ვითხოვოთ.

მოგვმადლე, უფალო.

შენდობა და მოტევება ცოდვათა, და უსჯულოებათა ჩუენთა, უფლისა მიმართ ვითხოვოთ.

მოგვმადლე, უფალო.

კეთილნი და უმჯობესნი სულთა ჩუენთანი, და მშჳდობაჲ სოფლისა, უფლისა მიმართ ვითხოვოთ.

მოგვმადლე, უფალო.

შემდგომნი ჟამნი ცხოვრებისა ჩუენისანი მშჳდობით და სინანულით აღსრულებად, უფლისა მიმართ ვითხოვოთ.

მოგვმადლე, უფალო.

ქრისტეანობითნი აღსასრულნი ცხოვრებისა ჩუენისანი, უჭირველნი, ურცხვენელნი, მშჳდობითნი, და კეთილი სიტყჳს-გებაჲ წინაშე საშინელისა სამსჯავროსა ქრისტესსა, ვითხოვოთ.

მოგვმადლე, უფალო.

ერთობასა სარწმუნოებისასა, და ზიარებასა სულისა წმიდისა მთხოველთა, თავნი თჳსნი და ურთიერთ არს, და ყოველი ცხოვრება ჩუენი ქრისტესა ღმერთსა ჩუენსა შევვედროთ.

შენ, უფალო.

ღირს მყვენ ჩუენ მეუფეო, კადნიერებით, დაუსჯელად კადრებად, და ხდად შენდა ზეცათა ღმრთისა მამისა და თქმად:

მამაო ჩუენო:

რამეთუ შენი არს სუფევა, და ძალი, და დიდება, მამისა და ძისა და წმიდისა სულისა, აწ და მარადის და უკუნითი უკუნისამდე.

ამინ.

მშჳდობა ყოველთა.

სულისაცა შენისა თანა.

თავნი ჩუენნი უფალსა მოუდრიკნეთ.

შენ, უფალო.

მეუფეო უფალო მამაო მოწყალებისაო, და ღმერთო ყოვლისა ნუგეშინის-ცემისაო, მომდრეკელნი შენდა თავთა მათთანი, აკურთხენ, წმიდა ჰყუენ, დაიცვენ, განამტკიცენ, განაძლიერენ, და ყოვლისაგან საქმისა ბოროტისა განაშორენ, და ყოველსა საქმესა კეთილსა შეაყვენ: და ღირს ჰყუენ დაუსჯელად მიღებად უხრწნელთა ამათ, და ცხოველს-მყოფელთა შენთა საიდუმლოთა, მისატევებელად ცოდვათა, ზიარებად სულისა წმიდისა:

მადლითა, და წყალობითა, და კაცთმოყუარებითა, მხოლოდშობილისა ძისა შენისათა, რომლისა თანა კურთხეულ ხარ, თანა ყოვლად წმიდით სახიერით, და ცხოველს მყოფელით სულით შენითურთ, აწ და მარადის და უკუნითი უკუნისამდე.

ამინ.

მოიხილე, უფალო იესო ქრისტე ღმერთო ჩუენო, წმიდით სამკჳდრებელით შენით, და საყდრით დიდებისა სუფევისა შენისაჲთ, და მოვედ წმიდა-ყოფად ჩუენდა, რომელი ზე მამისა თანა მჯდომარე ხარ, და აქა ჩუენ თანა უხილავად თანა-მყოფობ: და ღირს მყვენ ჩუენ, მტკიცითა ჴელითა შენითა მოცემად ჩუენდა უხრწნელი ჴორცი შენი, და პატიოსანი სისხლი შენი, და ჩუენ მიერ ყოველსა ერსა შენსა:

ღმერთო განწმიდე მე ცოდვილი, და შემიწყალე მე. გ-გზის.

მოხედენ.

წმიდა წმიდათა.

ერთ არს წმიდა, ერთ არს უფალი, იესო ქრისტე, სადიდებელად ღმრთისა მამისა, ამინ.

გმადლობ შენ, უფალო ღმერთო ჩუენო, ზიარებასა წმიდათა უხრწნელთა, უკუდავთა, და ზეცისა შენთა საიდუმლოთა, რომელნი მომცენ ჩუენ ქველის მოქმედებად და სიწმიდედ, და საკურნებელად სულისა და ჴორცთა ჩუენთა. შენ, მეუფეო ყოველთაო, მომეც, რათა მექმნას ზიარება წმიდისა ჴორცისა, და სისხლისა ქრისტეს შენისა, სარწმუნოებად ურცხვენელად და სიყუარულად შეუორგულებელად, აღვსებად სიბრძნითა, საკურნებელად სულისა და ჴორცთა, გარე მისაქცეველად ყოველთა წინა აღმდგომთა, სრულ ყოფად მცნებათა შენთა, სიტყჳს გებად კეთილ-მითუალულად წინაშე საშინელსა სამსჯავროსა ქრისტეს შენისასა:

აღემართენით მიმღებელნი საღმრთოთა, წმიდათა, უხრწნელთა, უკუდავთა, ზეცისა ცხოველთა, საშინელთა ქრისტეს საიდუმლოთა, ღირსებით ვმადლობდეთ უფალსა.

უფალო, შეგჳწყალენ.

შეგუეწიენ, გუაცხოვნენ, შეგჳწყალენ, და დაგჳცვენ ჩუენ, ღმერთო, შენითა მადლითა.

უფალო, შეგჳწყალენ.

დღე ყოველი არსრულებად, სიწმიდით, მშჳდობით, და უცოდველად მთხოველთა, თავნი თჳსნი და ურთიერთ არს, და ყოველი ცხოვრებაჲ ჩუენი, ქრისტესა ღმერთსა ჩუენსა შევვედროთ.

შენ, უფალო.

რამეთუ შენ ხარ განმწმედელი ჩუენი, და შენდა დიდებასა აღვავლენთ, მამისა და ძისა და წმიდისა სულისა, აწ და მარადის და უკუნითი უკუნისამდე.

ამინ.

მშჳდობით წარვიდეთ.

სახელითა უფლისათა.

უფლისა მიმართ ვილოცოთ.

უფალო, შეგჳწყალენ.

რომელი აკურთხევ მაკურთხეველთა შენთა უფალო, და წმიდა ჰყოფ შენდა მომართ მსასოებელთა შენთა, აცხოვნე ერი შენი, და აკურთხე სამკჳდრებელი შენი, სავსება ეკლესიისა შენისა დაიცევ, წმიდა ჰყუენ მოყუარენი სახლისა შენისა შუენიერებისანი, შენ იგინი ნაცულად ადიდენ საღმრთოჲთა ძალითა შენითა, ნუ დამაგდებ ჩუენ მოსავთა შენთა, მშჳდობაჲ სოფელსა მოანიჭე, ეკლესიათა შენთა, მღდელთა, უწმიდესსა და უნეტარესსა, სრულიად საქართველოს კათოლიკოს-პატრიარქსა, და მცხეთა-თბილისის მთავარ-ეპისკოპოსსა, დიდსა მეუფესა მამასა ჩუენსა ილიას, და ყოველსა ერსა შენსა, რამეთუ ყოველი მოცემა კეთილი, და ყოველი ნიჭი სრული, ზეგარდამო არს შთამომავალი შენ მიერ მამისაგან ნათლისა, და შენდა დიდებასა, და მადლობასა, და თაყუანის-ცემასა აღვავლენთ, მამისა და ძისა და წმიდისა სულისა, აწ და მარადის და უკუნითი უკუნისამდე:

ამინ.

აღესრულა და სრულ იქმნა ძალისაებრ ჩუენისა, ქრისტე ღმერთო ჩუენო, განგებულებისა შენისა საიდუმლო, რამეთუ ვჰპოვეთ სიკუდილისა შენისა მოსაჴსენებელი, ვიხილეთ აღდგომისა შენისა სახე, აღვივსენით დაუსრულებელისაგან ცხოვრებისა შენისა, განვიშუთ დაულევნელისაგან საშვებელისა, რომლისა ყოფადსაცა საუკუნესა, ჩუენ თანა ღირს-ყოფა სათნო იჩინე, მადლითა დაუსაბამოჲსა მამისა შენისა, და წმიდისა, სახიერებისა, და ცხოველს-მყოფელისა სულისა შენისათა, აწ და მარადის და უკუნითი უკუნისამდე:

განუტევე მონა შენი: წმიდაო ღმერთო: და შემდგომად მამაო ჩუენოსა, ოხითა, და კონდაკი დიდისა ბასილისა.